Ikanapulog-tulo nga Domingo Sulod sa Tuig

Ikanapulog-tulo nga Domingo Sulod sa Tuig C

BASAHON I

1 Kgs. 19:16, 19-21

KINUTLO GIKAN SA UNANG BASAHON SA MGA HARI

Ang Ginoo miingon kang Elias, "Dihogi si Eliseo, anak ni Safat, nga taga Abelmiula aron mahimong propeta ilis kanimo."

Busa mibiya si Elias gikan didto ug nakaplagan niya si Eliseo, ang anak ni Safat, nga nagdaro ginamit ang napulog duha ka baka, ug diha siya sa ikanapulog duha. Miagi si Elias kaniya ug gisul-ob ni Elias ngadto kang Eliseo ang iyang kupo. Gibiyaan niya ang mga baka, ug migukod siya kang Elias ug miingon, "Pahaloka una ako sa akong amahan ug sa akong inahan, ug unya mosunod ako kanimo."

Ug si Elias miingon kang Eliseo, "Lakaw kay wala ko ikaw did-i."

Ug mibalik siya ug gikuha niya ang mga baka ug giihaw ug giluto niya kini ug maoy iyang gisugnod ang mga yugo ug iya kining gipakaon sa katawhan. Unya misunod siya kang Elias, ingon nga iyang katabang.

ANG PULONG SA GINOO.

SALMO RESPONSORYO

Ps. 16: 1-2, 5, 7-8, 9-10, 11

R. Ikaw ang akong kabilin, O Ginoo. 

Bantayi ako, Dios, kay nagadangop ako kanimo; nagaingon ako sa Ginoo, "Ikaw ang akong Ginoo."

O Ginoo, ikaw ang akong bahin ug akong kopa, ikaw mao ang akong suwerte.

R. Ikaw ang akong kabilin, O Ginoo. 

Daygon ko ang Ginoo nga nagatambag kanako; bisan sa kagabhion nagapahimangno kanako ang akong kasingkasing. Gibutang ko kanunay ang Ginoo sa akong atubangan; kon anaa siya sa akong tuo wala akoy kahadlokan.

R. Ikaw ang akong kabilin, O Ginoo. 

Busa ang akong kasingkasing nalipay ug ang akong kalag nagsadya, ang ako usab nga lawas nagapabilin diha sa pagsalig. Kay dili nimo biyaan ang akong kalag didto sa kahiladman, ni itugot mo nga ang imong buotang alagad madunot.

R. Ikaw ang akong kabilin, O Ginoo.

Tudloan mo ako sa dalan ngadto sa kinabuhi, sa kapuno sa mga kasadya diha sa imong tuong kamut hangtod sa kahangturan.

R. Ikaw ang akong kabilin, O Ginoo.

BASAHON II

Gal. 5:1, 13-18

KINUTLO GIKAN SA SULAT NI SAN PABLO NGADTO SA TAGA-GALACIA

May kagawasan kita tungod kay gihatagan man kitag kagawasan ni Cristo. Busa pabilin kamo nga dili ulipon ug ayaw kamo paulipon pag-usab.

Apan kamo, mga igsuon, gitawag aron makabaton ug kagawasan. Apan ayaw himoa ang inyong kagawasan nga pasangil aron maghari kaninyo ang lawasnong pangandoy. Hinonoa, pag alagaray kamo uban ang gugma. Kay ang tibuok Balaod natingob sa usa lamang ka sugo: "Higugmaa ang imong isig katawo sama sa imong kaugalingon." Apan kon kamo magpinahitay ug mag tinukbanay sama sa mga mananap, pagbantay nga dili kamo mahurot pagkalaglag!

Kini ang akong isulti kaninyo: paharia ang Espiritu sa inyong kinabuhi, ug ayaw patumani ang mga pangandoy sa taw hanong kinaiya. Kay ang mga tinguha sa tawhanong kinaiya supak sa mga tinguha sa Espiritu, ug ang mga tinguha sa Espiritu supak sa tawhanong kinaiya. Nagkasumpaki kining duha busa dili kamo makabuhat sa buot unta ninyong buhaton. Kon ang Espiritu maoy nag mando kaninyo, dili na kamo ilalom sa Balaod.

ANG PULONG SA GINOO.

EBANGHELYO

Kinutlo gikan sa Ebanghelyo sumala ni Lucas

9:51-62

Ug nahitabo nga hápit na matuman ang mga adlaw sa iyang pagkayab,

nakapunting na ang iyang panagway sa pag-adto sa Jerusalem. 

Ug nagpadala siya og mga sinugo nga mag-una kaniya. Ug miadto sila ug misulod ngadto sa lungsod sa mga Samaritanhon aron pangandaman siya.

Ug wala nila siya dawata tungod kay nakapunting na gayod ang iyang panagway ngadto sa Jerusalem.

Ug sa pagkakita niini sa mga tinun-an nga si Santiago ug si Juan, miingon sila, "Ginoo, buòt ba nimo nga motawag kami og kalayo aron mokanaog gikan sa langit ug mogun-ob kanila?"

Apan milingi siya ug gibadlong niya sila. Ug miadto sila ngadto sa laing balangay.

Ug samtang nagalakaw sila sa dalan,

dihay miingon ngadto kaniya,

"Mosunod ako kanimo bisan asa ka paingon." Ug miingon kaniya si Jesus, "Ang mga milo adunay mga lungib ug ang mga langgam sa langit adunay mga salag, apan ang Anak sa Tawo walay kapahilunaan sa iyang ulo."

Ug miingon siya ngadto sa lain pang tawo, "Sunòd kanako." Apan mitubag siya, "Ginoo, tugoti únâ ako sa pagbiya aron paglubong sa akong amahan." Ug miingon siya kaniya,

"Pasagdi ang mga patay paglubong sa ilang kaugalingong mga patay. Apan ikaw, lakaw ug isangyaw ang gingharian sa Dios."

Ug miingon pa gayod ang laing tawo,

"Mosunod ako kanimo, Ginoo, apan pabalika únâ akò aron pagpanamilit kanila nga anaa sa akong balay."

Apan miingon si Jesus ngadto kaniya, "Walay tawo nga naggunit na og daro ug magpunay og lingi nga angayan sa gingharian sa Dios."

Ang Ebanghelyo sa Ginoo.

PASIUNA 

HUNYO 26,2022

Maayong buntag / hapon mga igsoon diha ni Kristo.

Ania na kita sa Ikanapulo ug tulo nga domingo sulod sa tuig

Kining domingoha gitawag usab kini nga Pontifical Work of St. Peter the Apostle (Sancti Petri ) o St. Peter the Apostles Sunday, alang sa pormasyon, kahanas ug suporta sa mga seminarista, kaparian ug relihiyoso sa tibook kalibutan.

Ang unang pagbasa gikan sa Unang Basahon sa mga Hari. Kini nagsaysay sa pagdihog ni Elias kang Eleseo aron sa pagpili kaniya isip propeta.

Ang ikaduhang pagbasa gikan sa Sulat ni San Pablo ngadto sa taga Galacia. Siya nagkanayon " Paharia ang Espiritu sa inyong kinabuhi, ug ayaw patumani ang mga pangandoy sa tawhanong Kinaiya."

Ug ang Ebanghelyo gikan sa Ebanghelyo sumala ni San Lucas. Kini mahitungod sa mga tawo nga buot mosunod kang Jesus.

Palihug manindog alang sa pagsugod sa Santos nga Eyukaristiya.

PANGALIYA

Hunyo 26, 2022

PARI: Mag-ampo kita ngadto sa atong Amahan sa Langit nga magpadayon kita pagtubo sa Kristohanong kinabuhi. Kita moingon:

GINOO, DUNGGA KAMI NGA NANGAMUYO KANIMO.

1. Nga ang atong Simbahan panalipdan ug giyahan unta sa kaalam sa Dios aron makanunayong magmantala sa ebanghelyo ni Kristo. Mag-ampo kita.

2. Nga ang atong mga nagdumala sa nasud lamdagan sa Balaang Espiritu, aron ilang mapatunhay ang kalinaw ug kaangayan. Mag ampo kita.

3. Nga ang tanang sumusunod ni Kristo hilabina kanato nga nagsaulog niining Santos nga Eyukaristiya,hatgan unta sa Dios ug dugang kalig-on sa pagtoo aron kanunay kitang mosubay sa dalan ni Kristo matag adlaw sa atong kinabuhi. Mag-ampo kita.

4. Nga kadtong midayeg ug mipasalamat sa manggihatagong Dios, hilabina sila_________hatagan unta sa mga grasya nga ilang gikinahanglan sa kinabuhi. Mag-ampo kita.

5. Nga ang mga kalag sa atong mga igsoong nangamatay,hilabina nila __________makaangkon na unta ug luna sa gingharian sa langit. Mag-ampo kita.

PARI: Langitnong Amahan, ang imong katawhan kanunay gayud nga modangop kanimo kay ikaw maayo ug maloloy-on, pamatia ang among mga pag-ampo ug hatagi kinig katumanan. kon nahiuyon sa imong kabubut-on. Pinaagi ni Kristo among Ginoo, Amen.