Ikalimang Domingo sa Pasko sa pagkabanhaw [Cycle C]

BASAHON I

Acts 14:21-27

KINUTLO GIKAN SA MGA BUHAT SA MGA APOSTOLES

Nagwali sa Maayong Balita si Pablo ug si Bernabe didto sa Derbe, ug naka kabig sila og daghang mga tinun-an. Unya namalik sila sa Listra, unya sa Iconio, ug dayon sa Antioquia sa Pisidia.

Ilang gilig-on ang mga magtutuo ug gidasig nga magpadayon sa pagtuo. Nanudlo sila sa pag-ingon, "Kinahanglan moagi kita sa daghang mga kalisdanan aron makasulod sa gingharian sa Dios." Sa matag simbahan nagtudlo sila og mga pangulo; ug uban sa mga pag-ampo ug pagpuasa ilang gitugyan sila ngadto sa Ginoo nga ilang gisaligan.

Unya milatas sila sa Pisidia ug miabot sa Pampilia. Giwali nila ang mensahe sa Ginoo didto sa Perga ug unya mipatighulog sila ngadto sa Atalia. Gikan didto milawig sila balik sa Antioquia, diin kaniadto gitugyan sila ngadto sa grasya sa Dios alang sa buhat nga karon ila nang nahuman.

Sa pag-abot nila sa Antioquia, ilang gitigom ang mga sakop sa simbahan ug gisuginlan sa tanan nga gibuhat sa Dios pinaagi kanila, ug sa iyang pagbukas sa dalan alang sa mga dili Judio aron motuo sila.

ANG PULONG SA GINOO.

SALMO RESPONSORYO Ps. 145:8-9, 10-11, 12-13

R. Daygon ko sa kahangturan ang imong ngalan, akong hari ug akong Dios.

Ang Ginoo mahigugmaon ug maluluy-on, dugay nga masuko ug dakog kaayo. Ang Ginoo maayo alang sa tanan ug maluluy-on alang sa tanan niyang mga buhat.

R. Daygon ko sa kahangturan ang imong ngalan, akong hari ug akong Dios. 

Papasalamata kanimo ang tanan mong mga buhat, O Ginoo, kanimo ang tanan nga nagatuo kanimo. Pasultiha sila bahin sa himaya sa imong gingharian ug pasuginla sila sa imong kagahuman.

R. Daygon ko sa kahangturan ang imong ngalan, akong hari ug akong Dios.

Pasangyawa sila ngadto sa mga tawo sa imong gahom ug sa mahimayaong kasanag sa imong gingharian. Ang imong gingharian usa ka gingharian alang sa tanang katuigan, ug ang imong paghari nagalungtad latas sa tanang kaliwatan.

R. Daygon ko sa kahangturan ang imong ngalan, akong hari ug akong Dios.

BASAHON II

Rv. 21:1-5

KINUTLO GIKAN SA BASAHON SA ANG GIPADAYAG

Unya nakita ko ang usa ka bag-ong langit ug bag-ong yuta, kay nahanaw na man ang unang langit ug ang unang yuta ingon man ang dagat. Nakita ko usab nga mikunsad gikan sa langit ang Balaang Siyudad, ang bag-ong Jerusalem nga gikan sa Dios, nga sama sa kaslonong babaye nga andam na sa pagsugat sa iyang pamanhonon. Ug nadungog ko ang usa ka kusog nga tingog nga nagsulti gikan sa trono, "Karon ang puloy-anan sa Dios ania na sa katawhan. Magpuyo na siya tipon kanila ug sila mahimong iyang katawhan. Ang Dios makig-uban kanila ug siya mahimo nga ilang Dios. Pahiran niya ang ilang luha ug wala nay kamatayon ni kasubo, paghilak o kasakit, kay nahanaw na man ang daang mga butang."

Unya ang naglingkod sa trono. miingon, "Gibag-o ko na ang tanang butang." Siya miingon usab kanako, "Isulat kini kay kining mga pulong kasaligan ug matuod gayod!"

ANG PULONG SA GINOO.

Kinutlo gikan sa Ebanghelyo sumala ni Juan

Sa paggawas na niya, miingon si Jesus, "Karon gihimaya na ang Anak sa Tawo ug ang Dios gihimaya diha kaniya. [Kon ang Dios gihimaya diha kaniya] himayaon usab siya sa Dios diha kaniya, ug dihadiha himayaon niya siya.

Mga anak, hamubo na lamang ang panahon nga akò ubàn kaninyo.

Mangita kamo kanako ug sama sa giingon ko sa mga Judio, 'Asa akò moadto dili kamo makaadto,

gisulti ko kini karon kaninyo. Maghatag akò kaninyog bag-ong sugo, paghigugmaay kamo. Sama nga akò nahigugma kaninyo, paghigugmaay usab kamo.

Tungod niini mahibalo ang tanan

nga kamo akong mga tinun-an, kon aduna kamoy gugma alang sa usag-usa."

Ang Ebanghelyo sa Ginoo.

PASIUNA MAYO 15, 2022

Maayong buntag / hapon mga igsoon diha ni Kristo.

Ania na kita sa ikalima nga domingo sa Pasko sa Pagkabanhaw.

Ang atong unang pagbasa gikan sa mga Buhat sa mga Apostoles.Dinhi atong madungog si Pablo ug si Bernabe nga madasigong nagwali sa maayong balita. Sila miingon" Kinahanglan moagi kita sa daghang mga kalisdanan aron makasulod sa gingharian sa Dios."

Ang ikaduhang pagbasa gikan sa Basahon sa Ang Gipadayag, diin aron madungog kining maayong balita nga nagkanayon: " Ang Dios makig-uban kanila ug siya mahimo nga ilang Dios. Pahiran niya ang ilang luha ug wala nay kamatayon ni kasubo,,paghilak o kasakit, kay nahanaw na man ang daang mga butang?

Ug ang ebanghelyo gikan sa ebanghelyo sumala ni San Juan. Niining bahina si Jesus naghatag og bag-ong sugo, siya nagkanayon."Maghatag ako kaninyog bag-ong sugo, paghigugmaay kamo."

Palihug manindog alang sa pagsugod sa Santos nga Eyukaristiya.

PANGALIYA MAYO 15, 2022

PARI: Ang Dios gamhanan ug manggihatagon ,busa masaligon kitang modangop ngadto kaniya diha sa atong mga panginahanglan. Mag-ampo kita sa pag-ingon:

GINOO, PATALINHUGI ANG AMONG PAG-AMPO.

1. Mag-ampo kita alang sa tanang pangulo sa Simbahan, nga sa kanunay ubanan kita sa Dios diha sa ilang matinud-anon nga pagpaningkamot sa pagsangyaw sa maayong balita ngadto sa tanang katawhan. Mag-ampo kita.

2. Mag-ampo kita alang sa mga bag-ong napili nga mga lideres sa atong nasud ug siyudad, giyahan unta sila kanunay sa Espiritu Santo aron makabuhat sila sa angay, alang sa kalambuan sa katawhan. Mag-ampo kita.

3. Mag-ampo kita ,alang sa atong mga igsoong nag-antus sa kalisod,mga masakiton ug mga tigulang, nga ang kalooy sa Dios ila untang matagamtaman. Mag-ampo kita.

4. Mag-ampo kita alang kanila nga mapasalamaton sa Ginoo, hilabina sila______________ hupngon unta sila sa Dios ug mga panalangin aron mahimo silang gasa ngadto sa uban. Mag-ampo Kita.

5. Mag-ampo kita alang sa mga magtutuong nangamatay, hilabina nila _______________dawaton na unta ang ilang mga kalag ngadto sa langit. Mag-ampo kita.

PARI: O Dios nga mahigugmaon, malaumon kami nga hatagan mo untag katumanan ang among mga pangamuyo. Kini among gipangayo pinaagi ni Kristo among Ginoo, Amen.