Solemnidad sa Pagsaka sa Ginoo

SOLEMNIDAD SA PAGSAKA SA LANGIT SA GINOO

UNANG BASAHON

Buhat 1:1-11

Ang pagbasa gikuha gikan sa Buhat sa mga Apostoles.

Minahal kong Teofilo: Sa una kong sulat gihisgutan ko ang tanang butang nga gibuhat ug gitudlo ni Jesus sukad sa pagsugod niya sa iyang buluhaton hangtud sa adlaw nga siya gibayaw ngadto sa langit. Sa wala pa siya bayawa, gipahimangnoan niya pinaagi sa Espiritu Santo ang mga tawo nga iyang gipili nga mga apostoles.

Sulod sa kwarenta ka adlaw human siya namatay, mipakita siya kanila sa makadaghan, sa mga paagi nga nagmatuod nga buhi gayud siya. Nakita siya nila ug nakigsulti siya kanila mahitungod sa paghari sa Dios. Ug samtang si Jesus uban pa kanila, gitugon niya sila, "Ayaw una kamo pagbiya sa Jerusalem; hulata ninyo ang gasa nga gisaad sa akong Amahan, sumala sa gisulti ko kaninyo. Kay si Juan namunyag pinaagi sa tubig, apan pipila na lamang ka adlaw gikan karon bunyagan kamo pinaagi sa Espiritu Santo."

Sa pagkatigom na nila, gipangutana nila si Jesus, "Ginoo, tukuron mo ba pag-usab niining panahona ang Boy gingharian sa Israel?" Si Jesus mitubag kanila, "Ang mga Amj panahon ug mga adlaw gitagana nang daan sa akong Amahan; dili kamo angay magpakisayod kun kanus-a kini imahitabo. Apan kun mokunsad na kaninyo ang Espiritu Santo, makadawat kamo'g gahum ug mahimo kamong akong mga saksi sa Jerusalem, sa tibuok Judea ug Samaria, ug sa tibuok kalibutan." Human niya isulti kini, gibayaw siya ngadto sa langit samtang nagtan-aw sila kaniya, ug siya wala na nila makita kay gisalipdan man siya'g panganod.

Samtang nagtutok sila sa langit sa pagkayab ni Jesus, may duha ka tawo nga nagbisti'g puti nga mitungha pagkalit ug mibarog tupad kanila. Miingon sila, "Mga taga-Galilea, nganong nagtindog man kamo dinha ug nagsigi'g hangad sa langit? Si Jesus nga gibayaw ngadto sa langit mobalik sa samang paagi sa iyang pagkayab ngadto sa langit."

Mga igsoon, ang Pulong sa Ginoo.

SALMO RESPONSORYO

Salmo 47:2-3,6-7,8-9

Tubag (R) - Misaka ang Dios sa iyang trono uban sa mga singgit sa kalipay, usa ka tingog sa mga trumpeta ipalanog alang sa Ginoo.

Kamong tanang mga tawo, pamakpak kamo, singgit kamo ngadto sa Dios og mga singgit sa kalipay; Kay ang Ginoo, ang labing halangdon, ang katingalahan, dakung hari sa tibook kalibutan. (R)

Pag-awit og mga pagdayeg ngadto sa Dios; awiti'g mga pagdayeg ang atong hari. Kay ang Dios hari sa tibook kalibutan; dayga siya pinaagi sa mga awit! (R)

Kay hari sa tibook yuta ang Dios; awiti siya'g mga imno sa pagdayeg. Maghari ang Dios diha sa kanasuran, magalingkod ang Dios diha sa iyang balaang trono. (R)

IKADUHANG BASAHON

Efeso 1:17-23

Ang pagbasa gikuha gikan sa sulat ni San Pablo ngadto sa mga taga-Efeso.

Naghangyo ako sa Dios sa atong Ginoong Jesukristo, ang gamhanang Amahan, nga hatagan unta kamo sa Espiritu nga maghimo kaninyong maalamon ug magpadayag sa Dios kaninyo aron makaila kamo kaniya. Naghangyo usab ako nga malamdagan unta ang inyong salabutan aron masayud kamo unsa ang paglaum nga alang niini gitawag kamo. Ug hinaut usab unta nga masayud kamo sa kahupong sa mga panalangin nga gisaad niya sa iyang katawhan. Dugang pa niini, gipanghinaut ko nga masayran ninyo ang kadako sa iyang gahum nga ania kanato nga nagtuo kaniya. Kining gahoma nga ania kanato mao ang gigamit niya pagbanhaw kang Kristo, ug pagpalingkod kaniya sa iyang tuo didto sa langit. Didto naghari si Kristo labaw sa tanang mga hari, ug sa mga anaa sa gahum ug sa mga punoan, ingon man sa mga kaginoohan; labaw siya sa tanan bisan unsa pa ang ilang katungdanan niining kalibutana ug sa sunod.

Gibutang sa Dios ang tanan ubos sa pagmando ni Kristo, ug alang sa iglesia gihimo siyang pangulo labaw sa tanan. Ang iglesia mao ang lawas ni Kristo, ang kahingpitan niya nga mao ang naghingpit sa tanang butang.

Mga igsoon, ang Pulong sa Ginoo.

EBANGHELYO

Lucas 24:46-53

Ang pagsangyaw sa Maayong Balita sumala ni San Lucas.

SI Jesus miingon kanila, "Kini mao ang nahisulat: nga yang Mesiyas kinahanglan mag-antus ug unya mabanhaw sa ikatulong adlaw, ug nga sa iyang ngalan ang mensahe mahitungod sa paghinulsol ug sa pagpasaylo sa mga sala kinahanglan isangyaw ngadto sa tanang mga nasud, sugod sa Jerusalem. Kamo nga saksi niining mga butanga. Ug ako mismo mao ang magpadala nganhi kaninyo sa gisaad sa akong Amahan. Apan kinahanglan maghulat kamo sa siyudad hangtud nga mokunsad kaninyo ang gahum gikan Ay sa kahitas-an.

Unya gidala niya sila ngadto sa gawas sa siyudad hangtud sa Betania, diin giisa niya ang iyang mga kamot ug gipanalanginan sila. Ug samtang siya nanalangin kanila, mibiya siya ug gibayaw ngadto sa langit. Gisimba nila siya ug unya mibalik sila sa Jerusalem nga malipayon kaayo. Nagkanunayan sila didto sa Templo ug nagpasalamat sa Dios.

Mga igsoon, ang Maayong Balita sa atong Ginoo.

KOMENTARYO

Tema: Ang Gisaad nga Maghatag og Paglaum

Kasagaran kanato naglaum gayud nga matuman ang mga saad nga atong nadawat ug nadunggan. Ang tanang saad nga kanunay natong madawat og gilauman mao ang kaayohan. Nagalaum kita sa mga saad nga makahatag sa kanato og higayon nga makatagamtam og kahayahay, kabantugan, maayong panginabuhi, maayong panglawas ug makapahilayo kanato sa kadautan. Sama sa saad nga kita tabangan sa pagbayad sa atong nagasto sa pag-eskuwela gikan sa gobyerno o saad nga mahatagan kita og maayong trabaho ug ang saad nga hatagan kita og regalo panahon sa atong birthday ug Christmas.

Tanang gidawat nato nga mga saad maayo ug naglaum kita nga kung matuman lamang kini mahimong mabag-o ang estado sa atong kinabuhi. Apan, bisan tuod dili kita sigurado sa katumanan niining mga saad nagpabilin gihapon kita nga malaumon nga ato untang madawat ug maangkon kini. Ang uban sa kanato nakasinati na og kapakyasan sa mga saad, apan dili nato ikalimod nga nagpabilin gihapon kitang malaumon. Kalipay ug pasalamat ang kanunay natong mabati sa matag saad nga natuman sa atong kinabuhi. Kung naglaum kita sa mga saad sa kalibutan ug malipayon kita nga nidawat niini, unsa pa kaha sa mga saad sa Ginoo. Si Jesukristo mao ang gisaad nga moanhi sa kalibutan aron pagluwas kanatong tanan ug karon Siya naghatag kanato sa paglaum sa katumanan sa atong pangandoy; ang hingpit nga kalipay ug kinabuhing walay katapusan.

Ang Ginoo dili gayud motugot nga dili matuman ang Iyang mga saad. Si Jesus nga atong paglaum nagpahinumdom kanato karon nga angayan lamang kita molaum Kaniya. Busa karong adlawa ang tibuok Simbahan nagsaulog sa Solemnidad sa Pagsaka sa atong Ginoong Jesukristo sa langit. Ang pagsaka ni Jesus sa langit naghatag og paglaum nga matuman gayud ang mga saad sa Amahan. Ang pagsaka sa langit ni Jesus kabahin sa misteryo sa Iyang kinabuhi sa kalibutan. Kini usab usa sa makaluwasnong hitabo alang kanato. Ang pagbalik ni Jesus sa Iyang Amahan gikinahanglan aron mapadala ang Espiritu Santo. Apan ang pagsaka ni Jesus sa langit wala makapahimulag Kaniya sa kalibutan, misamot hinuon ang Iyang pagkaana-a uban sa Iyang mga tinun-an. Si Jesus mipadayon sa paghatag og kadasig sa pagsangyaw sa Maayong Balita ug ang mga Apostoles nagmalaumon kanunay pinaagi sa Iyang mga saad.

Ang pagkayab sa langit sa atong Ginoo wala lamang naghiuli sa Gingharian sa Israel sama sa gilauman sa tibuok banay sa Israel ug sa mga Apostoles nga gihisgotan sa Unang Pagbasa (Buhat 1:6). Apan nagtukod hinuon Siya og bag ong gingharian nga alang sa tanang katawhan sa tibuok kalibutan. Ang langitnong gingharian nga nagpatuman sa kamatuoran, kabalaan, hustisya, gugma, kalinaw, kahiusahan, ug grasya sa kinabuhi. Ug kini mao ang atong gilauman nga atong matagamtaman pinaagi sa pagtuo.

Sa atong Ebanghelyo karon si Jesus nagsaad nga mopadala sa gisaad sa Amahan nga gasa alang kanato (Lk. 24: 49). Kini naghatag kanato og paglaum nga madawat gayud nato ang gisaad nga Espiritu Santo sa Amahan. Natuman gayud kini diha sa Pentekostes. Naghatag usab kini og paglaum nga kita sa umaabot nga panahon makasunod kita kang Jesus didto sa gingharian sa Amahan.

Pagkanindot pamation nga ang atong Ginoo kanunay naghatag og paglaum pinaagi sa pagtuman sa Iyang mga saad. Apan ang paglaum nga gihatag Niya kanato naghagit kanato una, sa pagsangyaw sa Maayong Balita ngadto sa tibuok kalibutan (Lk. 24:47) ug kini mahitungod sa langitnong gingharian nga puno sa kalipay, gugma ug panaghiusa. Ikaduha, sa pagpaambit sa paglaum nga atong natagamtaman. Nga kita unta mamahimong paglaum sa uban ug mamahimong instrumento sa katumanan sa saad sa Dios ngadto sa uban. Mohatag unta kita og kadasig sa uban pinaagi sa paglikay sa pagpangdaut, pagpanglupig ug pagdumot. Ikatulo, gihagit kita sa pagpasaka sa dignidad sa uban nga pinaagi sa pagrespeto sa atong isigkatawo ilabina sa mga dinaugdaug ug mga kabus makakita unta sila og bag-ong paglaum. Gitawag kita sa pagtabang kanila sa pagpasaka sa ilang kaugalingon aron matagamtaman nila ang ilang dugay nang gilauman nga makasinati og tunhay nga gugma ug kalipay.

Mag-ampo kita nga ang Ginoo kanunay magpahinumdum kanato sa atong mga kaakuhan isip mga malaumon nga katawhan. Unta mamahimo kitang instrumento sa paglaum sa uban ug makapaambit sa grasya sa pagtuo aron matuman ang saad sa Ginoo alang kanatong tanan; ang makaangkon og kinabuhing dayon.

Giya alang sa Pamalandong:

1. Nakahatag ba ako og paglaum sa uban isip binunyagan? Kun wala pa kanus-a pa man ko mohatag?

2. Nagtuman ba ako sa akong mga saad sa Ginoo ug sa akong isigkatawo?

Solemnidad Sa Pagsaka Sa Ginoo Sa Langit (Buh. 1:1-11/Efeso 1:17-23 / Lk. 24:46-53)

Tema:

Hesus: Ang Gisaad nga Maghahatag ug Paglaum

Pangulo: Gitawag kita sa Dios nga mahiusa

kita Kaniya kanunay bisan sa dili nato pagka-angayan. Sa hiniusang tingog atong ipadangat Kaniya ang atong mga panginahanglan. Sa matag pangamuyo kita motubag: AMAHAN NGA MALOLOY-ON DUNGGA KAMI.

1. Alang sa mga nagdumala sa Simbahan nga sa kanunay maningkamot nga mamahimong epektibo sa ilang pagsaksi och sa pagtulon-ang Kristohanon diha sa pagsangyaw sa Pulong sa Dios sa tibuok kalibutan diha sa pulong ug sa buhat. Mag-ampo kita.

2. Alang sa tanang nagdumala sa atong panggamhanan nga sa kanunay ilang masinati nga gihimo silang instrumento sa Dios aron sa pagsaksi sa matuod nga kalinaw ug gugma pinaagi sa ilang in kinasingkasing nga pag-alagad sa tanang katawhan. Mag-ampo kita.

3. Alang sa atong mga kaigsoonan nga nabilanggo tungod sa pasangil sa salang wala nila mabuhat nga tabangan sila sa Dios pinaagi sa ilang pagtoo nga adunay Dios nga labaw'ng nakasaksi sa ilang binuhatan ug nga Siya lamang ang makahatag og hingpit nga kaangayan ug hustisya. Mag-ampo kita.

4. Alang sa mga nag-alagad sa atong katilingban nga molungtad ug molahutay sila sa ilang pagserbisyo uban sa mga maayong panig-ingnan agi og pagpadayag sa bunga sa ilang pagkamaayong piniyalan sa kabuhatan sa Dios. Mag-ampo kita.

5. Alang sa atong mga kaigsoonan nga nag una na kanato niining kalibutana nga mapasaylo na sila sa ilang mga kasaypanan ug makadayon na sila sa langitnong puloy anan nga gitagana sa Amahan kanila. Mag-ampo kita.

6. Alang sa atong kaugalingong katuyuan atong i-ampo sa hilum.

Pangulo: Amahan masaligon kami sa Imong Diosnon nga pag-amoma patalinghugi ang among mga pag-ampo uban sa dakung kahinangop nga amo nang matagamtaman ang bunga sa among pagpakighiusa Kanimo. Kini among gipangayo pinaagi ni Kristo among Ginoo. Amen.