IKA-UNOM NGA DOMINGO SA PAGKABANHAW

IKAUNOM NGA DOMINGO SA PAGKABANHAW

UNANG BASAHON 

Buhat 15:1-2,22-29

Ang pagbasa gikuha gikan sa Buhat sa mga Apostoles.

May pipila ka tawo nga nangabot sa Antioquia gikan sa Judea, ug nanudlo sila sa mga kaigsoonan. Sila nag ingon, "Dili kamo maluwas gawas kun modawat kamo sa seremonyas sa pagtuli sumala sa gisugo sa Balaod ni Moises." Kining pagtulon-ana gisupak pag-ayo ni Pablo ug ni Bernabe; busa gikauyohan nga si Pablo ug Bernabe ug pipila ka mga tinun-an sa Antioquia mangadto sa Jerusalem ug makigkita sa mga apostoles ug sa mga kadagkoan bahin niining butanga.

Unya dinasonan sa tibuok iglesia, kaming mga apostoles ug ang mga pangulo sa maong iglesia nagkauyon sa pagpili'g mga tawo sa ilang pundok aron ipadala ngadto sa Antioquia uban ni Pablo ug ni Bernabe. Gipili nila si Judas, nga gihinganla'g Barsabas, ug si Silas, mga tawo nga gitamod pag-ayo sa mga kaigsoonan. Ug ilang gipadala kanila kining mosunod nga sulat:

"Ang mga apostoles ug ang mga pangulo sa iglesia nga inyong mga igsoon nangumusta sa tanang mga kaigsoonang dili Judio nga nagpuyo sa Antioquia, sa Siria ug sa Cilicia. Nakabalita kami nga may mga sakop sa atong pundok nga nagsamok ug nagpalibog kaninyo tungod sa ilang gipanulti; apan kini sila wala namo sugo-a sa pagbuhat niini. Busa nagtigom kami ug nagkauyon ang tanan sa pagpili'g mga tinugyanan aron ipadala nganha kaninyo. Mokuyog sila sa atong minahal nga higala nga si Bernabe ug si Pablo, nga naghalad sa ilang kinabuhi aron pag-alagad sa atong Ginoong Jesukristo. Busa among gipadala kaninyo si Judas ug si Silas nga maoy mosaysay sa mga butang nga among gisulat kaninyo. Ang Espiritu Santo ug kami nagkauyon sa pagsangon kaninyo og laing mga palas-onon gawas sa dili gikinahanglang mga tulomanon nga mao kini: Ayaw pagkaon og kalan-on nga gihalad ngadto sa mga dios dios, ni dugo, ni mananap nga gituok; ug likayi ninyo ang pakighilawas. Kun likayan ninyo kining mga butanga matarong ang inyong gibuhat. Adyos."

Mga igsoon, ang Pulong sa Ginoo.

SALMO RESPONSORYO

Salmo 67:2-3,5,6,8

Tubag (R)- O Dios magdayeg unta kanimo ang tanang mga nasud.

Kaloy-an unta kita sa Dios ug bendisyonan kita; ipadan-ag unta kanato ang iyang nawong. Mahibaw-an unta ang iyang dalan dinhi sa yuta; ug diha sa tanang mga nasud, ang imong kaluwasan. (R)

Maglipay unta ang mga nasud ug magsadya kay nagamando ka sa kanasuran diha sa kaangayan; ang mga nasud dinhi sa yuta imong gitultolan. (R)

Dayegon unta ikaw sa katawhan, O Dios; ang tanang kalungsoran magdayeg unta kanimo. Bendisyonan unta kita sa Dios. Ug ang tanang kautlanan sa yuta mahadlok unta kaniya. (R)

IKADUHANG BASAHON

Gipadayag 21:10-14,22-23

Ang pagbasa gikuha gikan sa basahon sa Gipadayag.

Unya gigamhan ako sa Espiritu ug gidala sa anghel ngadto sa tumoy sa habog kaayong bukid ug gipakita kanako ang Jerusalem, ang Balaang Siyudad nga mikunsad gikan sa langit ug gikan sa Dios, naggilakgilak kini sa himaya sa Dios.

Migilak ang siyudad sama sa bililhong bato nga daw haspe ug tin-aw sama sa bildo. May dako ug habog nga paril kini ug may napulo'g-duha ka ganghaan nga gibantayan sa napulo'g-duha ka anghel. Diha sa mga ganghaan, nahisulat ang mga ngalan sa napulo'g-duha ka banay sa Israel. Kada kilid sa siyudad may tulo ka ganghaan; tulo sa kasadpan. Gitukod ang paril sa siyudad ibabaw sa napulo'g-duha ka sukaranang bato nga gisulatan sa ngalan sa napulo'g duha ka apostoles sa Nating Karnero.

Wala akoy nakitang templo didto sa siyudad kay ang Ginoong Dios nga labing Gamhanan ug ang Nating Karnero mao may templo didto. Didto wala na kinahanglana ang kahayag sa adlaw ug sa bulan kay nagdan-ag man niini ang himaya sa Dios, ug ang Nating Karnero maoy suga didto.

Mga igsoon, ang Pulong sa Ginoo.

EBANGHELYO

Juan 14:23-29

Ang pagsangyaw sa Maayong Balita sumala ni San Juan.

Si Jesus miingon sa iyang mga tinun-an, "Ang nahigugma kanako magtuman sa akong gisugo. Mahigugma kaniya ang akong Amahan, ug ang akong Amahan ug ako moanha ug magpuyo diha kaniya. Ang wala mahigugma kanako dili motuman sa akong gisugo. Ang mensahe nga inyong nadungog dili akoa kondili iya sa Amahan nga nagpadala kanako."

"Gisultihan ko kamo niini samtang ako uban pa kaninyo. Ang Manlalaban, ang Espiritu Santo nga ipadala sa Amahan sa akong ngalan, magtudlo ug magpahinumdum kaninyo sa tanan nga akong gisulti kaninyo."

"Ang kalinaw Ibilin ko kaninyo; ang akong kalinaw ihatag ko kaninyo, kalinaw nga dili ingon sa ikahatag sa kalibutan. Ayaw kamo'g kabalaka ug ayaw kahadlok. Gisultihan ko na kamo nga mobiya ako, apan mobalik ako. Kun gihigugma ninyo ako, malipay kamo nga moadto ako sa Amahan, kay siya labaw man kanako. Gisultihan ko kamo niini karon sa wala pa kini mahitabo aron inigkahitabo niini, motuo kamo."

Mga igsoon, ang Maayong Balita sa atong Ginoo.

Pamalandong:

Tema: Gugma ang Tubag sa Atong Kaluwasan.

Ang atong mga pagbasa karon nagpahinumdom kanato nga ang paghigugma Iya nga lihok sa Ginoo. Gipakita sa atong Ginoo kung giunsa kita Niya kamahal. Wala kita Niya gipasagdan kun dili gihatagan kita Niya og paglaum nga ang Espiritu Santo maoy magtudlo kanato unsaon paghigugma Kaniya ug sa uban. Gisaaran kita sa Ginoo sa Iyang Balaang Espiritu nga maoy magtabang ug mogiya kanato diha sa pag-atubang sa mga hagit sa atong kinabuhi nga maoy mahimong babag sa pagpadayag sa atong gugma ngadto Kaniya. nga pagpadayag sa gugma sa Dios kanato. Ang pagkabanhaw sa atong Ginoo usa ka daku nga gugma ug paglaum nga gihatag sa Ginoo kanato. Nasayud kita nga ang pagpakita ug pagpadayag sa atong gugma ngadto sa Ginoo dili sayon. Adunay mga panahon nga makalimot kita, masayop kita, madagma kita, masipyat kita ug maluya kita. Usahay gipalabi pa nato ang kalibutanong butang kaysa Ginoo. Apan taliwala pa man sa atong mga kapakyasan ang Ginoo andam motabang kanato. Mao nga Iyang gipadala ang Iyang Balaang Espiritu, timaan sa Iyang gugma kanato, aron maglamdag kanato kung unsa ang tinuod nga gugma. Gihagit kita ni Kristo nga kung gihigugma nato Siya tumanon nato ang Iyang mga sugo, apan kahibalo si Kristo nga maglisod kita mao nga wala kita Niya gipasagdan. Ang paghigugma sa Ginoo, una lya gayud, lihok sa Ginoo. Kung maamgohan unta nato kung giunsa kita Niya paghigugma sayon ra usab kanato ang mahigugma. Busa importante sa tanan ang relasyon nato diha sa Dios.

Kita mga ginikanan, kahibalo kita kung unsa kalisud ang mahimong ginikanan apan hatagan nato og higayon nga ang gugma sa atong Ginoo mopatigbabaw diha sa atong kinabuhi. Dili kita mahadlok kay ang Espiritu Santo mag-uban kanato ug magtudlo kanato unsaon nga mamahimong responsible nga mga ginikanan. Mobiya man gayud kita niining kalibutan, dili unta nato biyaan ang atong mga anak diha sa kangitngit. Tabangan nato sila nga makita ug masinati kung unsa kaanindot ang kinabuhi tungod sa dakung gugma sa Dios kanatong tanan. Mga kabatan-onan mangayo kita og gasa Espiritu Santo nga maoy molamdag kanato sa sa paghimo og desisyon sa atong kinabuhi. Ang Espiritu Santo nga maoy magtudlo kanato kung unsaon paghigugma ang Dios ug ang atong isig katawo. Ang Espiritu Santo ang magpasabot kanato nga ang kinabuhi nato niining kalibutana lumalabay lamang. Paningkamutan nato pagpuyo diha sa kahayag ni Kristo.

Pangayoon nato kanunay sa Ginoo ang gasa sa Espiritu Santo nga maoy magpahinumdom kanato sa atong daku ug bug-at nga kaakuhan nga mao ang paghigugma sa Ginoo. Paghigugma nga gikan sa Ginoo. Amen.

Giya alang sa Pamalandong:

1. Masaligon ba ako sa gugma sa Dios nga gipaambit kanako? 

2. Malipayon ba ako nga mopaambit niining maong gasa sa gugma ngadto sa akong isigkatawo?

PANGALIYA

Pangulo:

Ang Dios nagpadala kanato og Manlalaban ang Espiritu Santo nga maoy nag-uban kanato sa pagtuman sa Iyang mga kasuguan. Atong ipadangat Kaniya karon ang atong mga panginahanglan. Sa matag pangamuyo kita motubag: DIOS NGA MAHIGUGMAON, DUNGGA KAMI.

1. Alang sa tanang nagdumala sa Simbahan, nga uban sa lamdag sa Espiritu Santo du ilang mapuy-an ug masabwag sa tibuok kalibutan ang Kristohanong mithi bisan pa man sa mga pagsulay nga modangat sa ilang kinabuhi. Mag-ampo kita.

2. Alang sa tanang nagdumala sa kinatibuk ang panggamhanan nga mosalig sila sa gahum sa Espiritu Santo nga maoy mogiya kanila sa tanang mga gimbuhaton nga adunay kalambigitan sa kauswagan ug kabulahanan sa tanang katawhan. Mag ampo kita.

3. Alang sa atong mga igsoon nga nag-antus sa tumang kawad-on, mga nagmasakiton nga dinasig sa Balaang Espiritu mahupay ang ilang pag-antus ug kasakitan pinaagi sa mga tawo nga nagpakabana sa ilang mga panginahanglan. Mag-ampo kita.

4. Alang sa mga lideres sa atong katilingban nga uban sa gasa sa Espiritu Santo malig on sila sa ilang paggahin og panahon alhb sa pag-alagad alang sa katukuran sa gingharian sa Dios bisan pa man sa mga pagsulay nga ilang mahiaguman. Mag ampo kita.

5. Alang kanatong tanan nga nagkatigum karon nga mahatagan nato og kinabuhi ang gugma sa Dios nga Iyang gipakita kanato diha sa atong makanunayong pagmantala sa mensahe sa Dios diha sa atong kaugalingon ug sa uban. Mag-ampo kita.

6. Alang sa atong kaugalingong katuyuan atong i-ampo sa hilum.

Pangulo: 

Dios nga labing gamhanan, tungod sa pagpadala sa Imong Espiritu Santo, malaumon kami nga ang among mga pag-ampo Imo gayud nga hatagan og katumanan kon kini nahasubay man sa Imong kabubut on. Kini among gipangayo pinaagi ni Kristo among Ginoo. Amen.