IKA-KATLOA'G-TULO NGA DOMINGGO

IKA-KATLOA'G-TULO NGA DOMINGGO

A. Unang Basahon

Daniel 12:1-3

Ang pagbasa kinutlo gikan sa basahon ni Daniel.

Ang anghel nga nagsul-ob og lino miingon, "Unya niadtong panahona, motungha si Miguel, ang gamhanang prinsipe nga maoy tigpanalipod sa imong katawhan. Unya moabot ang usa ka panahon nga hilabihan kalisod nga sukad masukad wala pa gayud mahitabo; apan ang tanan sa imong katawhan kansang ngalan gilista sa basahon sa Dios maluwas gikan niini. Ug daghan sa mga nangamatay ug atua na sa lubnganan mabanhaw ngadto sa kinabuhing dayon, ug ang uban ngadto sa kaulawan nga walay katapusan.

Ang mga maalamon mosidlak sama sa kahayag sa kalangitan; ug kadtong nakakabig og daghan ngadto sa pagkamatarong modan-ag hangtud sa hangtud sama sa mga bitoon."

Mga igsoon, ang Pulong sa Ginoo.

B. Salmo Responsoryo

Salmo 16:5,8,9-10,11

Tubag (R) - Bantayi ako, O Ginoo kay ikaw ang akong gilauman.

O Ginoo, ikaw ang akong bahin ug akong kopa, ikaw ang naglig-on sa akong suwerte, gibutang ko ang Ginoo kanunay sa akong atubangan; kon anaa siya sa akong tuo dili gayud ako mahingawa. (R)

Busa nalipay ang akong kasingkasing ug ang akong kalag nagmaya, ang akong lawas usab buhi nga masaligon; didto sa kahiladman dili ka motugot nga ang imong alagad madunot (R)

Tultolan mo ako sa agi-anan sa kinabuhi, sa kabuhong sa kalipay uban kanimo, ang mga kabulahanan diha sa imong tuo hangtud sa kahangturan. (R)

C. Ikaduhang Basahon

Hebreo 10:11-14,18

Ang pagbasa gikuha gikan sa sulat ngadto sa mga Hebreo.

Ang matag pari nga Judio nagtuman sa iyang pag-alagad adlaw-adlaw ug nagsubli-subli paghalad sa samang mga sakripisyo. Apan kining mga sakripisyoha dili gayud makawagtang sa mga sala. Apan si Kristo naghalad og usa ka sakripisyo alang sa mga sala, usa ka maayong halad hangtud sa kahangturan, ug unya milingkod siya sa tuo sa Dios. Didto naghulat siya karon hangtud nga ang iyang mga kaaway himoon sa Dios nga tumbanan sa iyang mga tiil. Busa pinaagi sa usa ka sakripisyo gihingpit niya hangtud sa kahangturan kadtong nahinloan sa sala. Human kini mapasaylo, wala na kinahanglana ang halad aron pagwagtang sa mga sala.

Mga igsoon, ang pulong sa Ginoo.

D. Ebanghelyo

Marcos 13:24-32

Ang pagsangyaw sa Maayong Balita sumala ni San Marcos.

Si Jesus miingon sa iyang mga tinun-an, "Sa mga adlaw human sa panahon sa kasakitan, mongitngit ang adlaw ug dili na modan-ag ang bulan. Mangahulog gikan sa langit ang mga bitoon ug motipas sa ilang naandang agianan ang mga planeta sa kawanagan. Unya diha sa mga panganod makita ang Anak sa Tawo nga moabot nga may gahum ug himaya. Ug sugoon niya ang iyang mga anghel ngadto sa tanang suok sa kalibutan aron tigumon ang piniling katawhan sa Dios gikan sa tanang dapit."

"Kuha-i ninyo og pagtulun-an ang kahoy nga igera. Inigpanghumok na sa mga sanga niini ug mangudlot na kini, inyong masayran nga duol na ang ting-init. Sa samang pagkaagi, inigkakita ninyo nga kining mga butanga nagsugod na pagkahitabo, masayran ninyo nga duol na gayud ang pagbalik sa Anak sa Tawo. Timan-i kini: kining tanan mahitabo sa dili pa mangamatay ang tanang tawo nga karon buhi pa. Ang langit ug ang yuta matapos, apan ang akong gisulti dili gayud mapakyas. Apan walay nasayud kanus-a moabot kadtong adlawa o taknaa, bisan ang mga anghel sa langit, bisan gani ang Anak; ang Amahan lamang maoy nasayod niini."

Mga igsoon, ang Maayong Balita sa atong Ginoo.

E. Komentaryo

Tema: Pangandam ug Pagmabinantayon

Unsa kahay atong posibleng bation, o kaha himoon, kung ugaling masayran nato nga ugmang adlawa, mao na gayud ang katapusan sa kalibutan, ug mahanaw na ang tanan? Tingali mapuno gayud kita sa kalisang, ug dili na masayud kung unsa pay angay nga buhaton, ilabina kung wala kita makapangandam.

Mao kini ang gihisgutan sa atong mga pagbasa karong Dominggoha. Ang pag-abot sa adlaw sa paghukom! Sa atong unang pagbasa gibutyag ni Propeta Daniel nga sa pag-abot sa maong adlaw, masinati sa katawhan ang tumang kapait ug ang hilabihang kalisud nga sukad nga masukad wala pa gayud matagamtami sa kalibutan. Ug ang maluwas, sila lamang kansang mga ngalan, nahisulat sa "libro sa kinabuhi," Sa pikas bahin usab, ang atong Ebanghelyo nagbutyag mahitungod sa pagbalik sa Anak sa Tawo nga mao si Ginoong Jesukristo. Niadtong adlawa, tapos ang hilabihang pag-antus, mongitngit ang adlaw, ug mangataktak ang mga bitoon gikan sa kalangitan.

Kung atong piyungon ang atong mga mata, ug atong gamiton ang atong panghunahuna aron sa paghanduraw sa mga posibleng mahitabo, pagkamalilisang gayud sa maong panan-awon. Tingali dili na nato buot nga masinati pa ang maong adlaw. Apan tataw kaayo nga gipatin-aw ni Jesus, nga mahitungod sa pag-abot sa maong adlaw, wala gayoy si bisan kinsa nga nasayod, ni ang Anak o ang mga anghel sa kalangitan, wala masayod gawas sa Amahan. Busa unsa may pulos sa atong mga kabalaka? Wala kitay angay nga kabalak-an. Busa walay kamatuoran kung atong hunahunaon nga adunay pipila nato ka mga igsoon, nga sagad nagapadagan og estorya nga ugma matapos na ang kalibutan. Kung nahinumdum kita, niadtong pag-abot sa tuig dos mil (2,000) adunay mga nag-ingon nga matapos na gayud ang kalibutan. Ug agig pagpangandam kinahanglan mopalit og mga kandila nga perdon ug posporo nga Rizal. Dayun kini pabenditahan sa pari, kay kung dili, dili kini mosiga pag-abot sa tumang kangitngit. Ug dili nato ikalimud nga adunay ubay-ubay usab nga mituo niini ug nangalisang. Pagkakulang gayod sa atong pagtoo ug pagsalig sa Dios.

Sumala sa Balaang Kasulatan, ug ato kining nadungog, moabot gayud kini ang adlaw sa paghukom. Apan inay nga ato kining kahadlokan, ato hinoon kining angay nga pangandaman. Ug kay wala man gayud kita masayud kung kanus-a kini moabot, gikinahanglan ang makanunayong pagpangandam. Kay kini moabot sa wala nato damha nga panahon. Unya, ugma, sunod semana, sunod bulan, o di ba kaha sunod tuig. Busa angay nga matag karon ug unya, atong andamon ang atong kaugalingon, kay basin unya'g ulahi na ang tanan. Ang pangutana, sa unsang paagiha man kita maandam? Kung atong sutaon ug pamalandungan pag-ayo, sa pag-abot unya sa maong adlaw sa paghukom, moatubang kita sa Dios nga hubo ug walay bisan unsang dala, gawas sa atong mga binuhatan, maayo ug dautan. Mao nga wala gayoy laing paagi aron kita maandam, gawas sa paghinlo sa atong kugalingon pinaagi sa paghinulsol sa tanan natong sala ug kalapasan. Ug sa inadlaw-adlaw natong pagpuyo kita maningkamot sa pagtuman sa kabubut-on sa atong Langitnong Amahan.

Sa mga butang nga nagapanghitabo sa atong palibot karon, luyo sa mga kagubot, sa nagkadaiyang mga kalamidad ug katalagman, adunay mga nag-ingon nga kuno kini mga senyales o timaan nga haduol na gayud ang katapusan sa kalibutan. Tinuod man kini o dili, ang pangutana nga angay natong hunahunaon pag-ayo: Andam na ba kita nga moatubang sa labawng Manghuhukom? Hinaut pa unta.

F. Katilingbanong Pag-ampo 

Tema: Pangandam ug Pagmabinantayon

Pangulo: Mag-ampo kita uban sa hingpit nga pagsalig sa Dios nga hatagan Niya og katumanan ang atong mga panginahanglan nga atong ihalad karon. Sa matag pag-ampo kita motubag:

GINOO, DUNGGA ANG AMONG PAG-AMPO:

1. Alang sa Simbahan ilabina sa Santo Papa, mga Obispo ug kaparian nga isangyaw niini uban sa pagsalig ug kalipay ang ilang hingpit nga pagtoo inubanan sa mga maayong binuhatan ug panig-ingnan. Mag-ampo kita.

2. Alang sa nga tinugyanan sa atong nasud nga pinaagi sa ilang kaakuhan, magdala unta kini og dakung kahiusahan sa tanan diha sa paghatag nila og dakung pagtagad sa mga panginahanglan sa katawhan. Mag-ampo kita.

3. Alang sa matag pamilya nga madasig unta sila sa pagkinabuhi subay sa mga pagtulon-an ni Kristo, ang kahiusahan, katarung ug paghigugma sa usa'g usa. Mag-ampo kita.

4. Alang sa tagsa tagsa ka katilingban nga mapadayag niini ang kahiusahan ug pagtinabangay aron malig-on kini ug mahimong kongkreto ug hingpit nga pundasyon sa katukuran sa gingharian sa langit dinhi sa atong taliwala. Mag-ampo kita.

5. Alang sa atong mga kaigsoonan nga nagmasakiton, nga makabaton sila og hingpit nga pagtoo ug pagsalig sa gahum sa Dios nga maoy maghatag kanila og hingpit nga kahupayan. Mag-ampo kita.

6. Alang sa atong kaugalingon nga katuyuan, ato kining ihalad diha sa kahilum.

Pangulo: Ginoo, among Dios sa kinabuhi, sayud kami nga hatagan Nimo og katumanan ang among mga pangamuyo. Malaumon kami nga amo kining madawat pinaagi ni Kristo among Ginoo ug Manunubos hangtud sa kahangturan. Amen.