Ikatloan nga Domingo sa Ordinaryong Panahon

ΙΚΑ-KATLOAN NGA DOMINGGO

A. Unang Basahon

Jeremias 31:7-9

Ang pagbasa gikuha gikan sa basahon ni Propeta Jeremias.

Nag-ingon ang Ginoo, "Pag-awit kamo tungod sa kalipay alang sa Israel, ang labing gamhanang nasud. Awita ang inyong alawiton sa pagdayeg. Giluwas na sa Ginoo ang iyang katawhan, giluwas niya ang tanang nahibilin. Dad-on ko sila gikan sa amihanan, ug gikan sa tanang suok sa kalibutan. Ang mga buta ug mga bakol uban kanila, ang mga mabdos ug kadtong mga talianak. Mamalik sila nga usa ka dakong nasud. Mamauli ang akong katawhan nga maghilak, nga mag-ampo samtang dad-on ko sila balik sa Israel.

Dad-on ko sila ngadto sa kasapaan, agi sa hapsay nga dalan aron dili sila madagma. Sama ako sa usa ka amahan alang sa Israel, ug ang kamagulangan kong anak mao si Efraim.

Mga igsoon, ang Pulong sa Ginoo.

B. Salmo Responsoryo

Salmo 126:1-2,2-3,4-5,6

Tubag (R) - Ang Ginoo naghimo'g mga katingalahang butang dinhi kanato; napuno kita sa kalipay.

Sa pagpabalik Ginoo sa mga bihag sa Sion, nahisama kita sa mga tawo nga nagdamgo. Unya ang atong baba napuno sa hudyaka ug ang atong dila sa kasadya. (R)

Unya miingon sila diha sa kanasuran, "Ang Ginoo naghimo'g dagkong mga butang kanila." Ang Ginoo naghimo'g dagkong mga butang kanato; ug nalipay gayud kita. (R)

I-uli ang among kapalaran, O Ginoo, ingon sa masulog nga mga sapa diha sa kamingawan sa kasadpan. Sila nga nagpugas nga naghilak mangani nga managsadya. (R)

Bisan nanggula sila nga nagdangoyngoy managdala sa binhi aron ipugas. Mamalik sila nga managsadya magdala sa ilang ginalab. (R)

C. Ikaduhang Basahon

Hebreo 5:1-6

Ang pagbasa gikuha gikan sa sulat ngadto sa mga Hebreo.

Ang tanang pangulong pari gipili ug gitudlo gikan sa katawhan aron mag-alagad sa Dios sa ngalan sa mga tawo. Maghalad siya'g mga gasa ug mga halad nga mananap nga sunugon tungod sa mga sala. Sanglit huyang man siya sama kanato, maluoy siya sa mga walay kahibalo ug sa mga masalaypon. Ug kay huyang man siya kinahanglan nga maghalad siya'g mga halad nga sunogon dili lamang alang sa mga sala sa katawhan, kondili sa iyang kaugalingong mga sala usab. Walay magpili sa iyang kaugalingon aron mahimong pangulong pari kondili ang Dios maoy magpili kaniya sama sa iyang gibuhat kang Aaron. Sa samang pagkaagi, si Kristo wala magpili sa iyang kaugalingon aron mahimong pangulong pari, kondili gitudlo siya sa Dios ug giingnan, "Ikaw ang akong Anak, Naimo akong Amahan karong adlawa." Miingon usab siya sa laing bahin sa Kasulatan, "Ikaw mahimong pari hangtud sa kahangturan, sa laray sa pagkapari ni Melquisedec."

Mga igsoon, ang Pulong sa Ginoo.

D. Ebanghelyo

Marcos 10:46-52

Ang pagsangyaw sa Maayong Balita sumala ni San Marcos.

Miabot sila sa Jerico. Ug sa diha nga mobiya na si Jesus uban sa iyang mga tinun-an ug sa dakong panon sa katawhan, may buta nga gihinganla'g Bartimeo, anak ni Timeo, nga naglingkod ug nagpakilimos daplin sa dalan. Sa pagkabati niya nga kadto mao diay si Jesus nga taga-Nazaret, misinggit siya, "Jesus! Kaliwat ni David, kaloy-i intawon ako!"

Daghan ang mikasaba ug mipahilom kaniya, apan misamot hinoon siya pagsinggit, "Kaliwat ni David, kaloy-i intawon ako!"

Mihunong si Jesus ug miingon, "Tawga siya." Busa gitawag nila siya. Giingnan nila ang buta, "Paglipay! Tindog, kay gitawag ka niya." Ug giwakli niya ang iyang kupo, milukso siya ug miduol kang Jesus. Nangutana si Jesus kaniya, "Unsay ipabuhat mo kanako?" Mitubag ang buta, "Magtutudlo, gusto unta ako nga makakita pag-usab." Ug giingnan siya ni Jesus, "Lakaw na, ang imong pagtoo nakaayo kanimo." Dihadiha nakakita ang buta, ug mikuyog kang Jesus.

Mga igsoon, ang Maayong Balita sa atong Ginoo.

E. Komentaryo

Tema: Walay puas nga kalooy sa Dios.

Ang sentro ug tema sa mga binasa karon mao ang walay puas nga kalooy ug pagkamaayo sa atong mahigugmaon ug mapasayloong Dios diha sa iyang katawhan. Ang unang pagbasa naghisgot kung giunsa pag-ayo sa atong maloloy-ong Dios ang espirituhanong pagkabuta sa iyang piniling katawhan human sila giluwas niya sa Babilonia balik sa Israel. Ang panaw ni Jesus sa Jerusalem uban sa mga bakol ug mga buta adunay kalambigitan sa unang pagbasa sa atong Ebanghelyo karon. Ang pagkaayo sa buta nga si Bartimeo sa atong Ebanghelyo nagpakita lamang nga kini maoy katumanan sa malipayong panagna ni Propeta Jeremias mahitungod sa pagbalik sa mga binilanggo nga Judeyo gikan sa Babilonia padulong sa Israel. Ang atong ikaduhang pagbasa karón nga gikan sa sulat ngadto sa mga Hebreo nagpunting kang Jesus isip usa ka dakong sakripisyo alang sa atong mg sala ug usa ka labawng Pari diha sa Bag-ong Tugon. Kining maong pagbasa naghulagway kang Jesus isip usa ka maloloy-ong Dios nga andam sa pagtabang kanato bisan pa sa atong mga kakulian.

Ang atong Ebanghelyo karon nagsaysay kung giunsa pagpakita ni Jesus sa maong kalooy ug paghigugma sa Dios Amahan pinaagi sa pag-ayo sa buta nga si Bartimeo. Sama sa dakong pagtagad sa Dios Amahan sa mga buta ug mga bakol sa unang pagbasa. Si Jesus nagpakita usab og dakong pagtagad sa buta nga nagpakilimos nga si Bartimeo. Sa pagkadungog ni Bartimeo nga molabay si Jesus nga taga Nazaret kaniya, siya misinggit sa makusog sa iyang masaligong pagtoo sa makaluwas ug makaayong gahum ni Jesus sa pag-ingon, "Jesus, anak ni David, kaloy-i intawon ako."

Dinhi atong makita nga si Jesus dili lamang gusto nga mamaayo ang atong pisikal nga pagkabuta, apan gusto niya nga ayohon ang atong pagkabuta sa mga espirituhanong mga butang. Kung atong lantawon pag-ayo ug atong itandi ang pagtoo ni Bartimeo ug ang pagtoo nato, mas maayo pa siya kay sa atoa kay bisan sa iyang pisikal nga kahimtang lig-on gayud ang iyang pagtoo. Mas nakita pa niya ang pagkamaayo sa Ginoo, Daghang mga tawo nga misunod kang Jesus, apan sila pa gayod ang nagbadlong kang Bartimeo ug nagdumili sa pagduol kang Jesus. Apan ang atong Dios usa ka maloloy-ong Dios. Siya gusto makighimamat sa iyang katawhan. Kini iyang gipakita diha sa pagsaway niadtong mga tawo nga buot mobabag kang Bartimeo.

Kung atong pamalandungan ang sitwasyon sa atong palibot karon, daghang mga butang nga buot mobabag diha sa atong pagtawag ug pagpaduol sa atong Ginoo. Naay mga tawo, mga butang, mga sitwasyon o mga higayon nga nagduhaduha kanato diha sa pagsangpit sa balaang ngalan sa atong Ginoo. Tuod, naay mga tawo nga gusto gayod kita ipalayo kaniya ilabina kung kita misupak kanunay sa pagsunod sa kabubut-on sa Dios. Duna usab mga sitwasyon o panghitabo sa atong kinabuhi nga nakapabugnaw diha sa atong pagtoo sa kaayo sa Dios, ilabina kung makasinati kita og mga dagkong pagsulay sa atong kinabuhi, kita usahay makapangutana, "Naa pa bay Dios?", "Asa man ang Ginoo?" Tinuod, kining mga butanga lisod gayod sabton ilabina kung ang atong paminawon lamang ang atong mga gibati. Kining mga butanga maoy nagpabuta kanato aron dili nato makita ang kaayo sa Dios.

Apan mga igsoon, kita unta makamatngon sa kinabuhi ni Bartimeo. Siya usa ka buta gikan pa sa iyang pagkabata, apan kini wala nakababag gayud kaniya sa pagsangpit sa ngalan ni Jesus, sa dihang iyang nahibaloan nga si Jesus molabay kaniya. Ato untang batonan ang iyang masaligong pagtoo sa Dios bisan pa unsa kadako ang problema nga atong giatubang dinhi sa pagpuyo nato sa kalibutan. Naay mga butang nga dili gayod nato masabtan sa pagkakaron. Sama sa propesiya ni Propeta Jeremias sa unang pagbasa nga ang Ginoo moluwas sa iyang piniling katawhan ug iyang ayohon ang mga buta. Kita unta mosalig usab nga moabot ang adlaw nga kita tabangan usab sa Dios diha sa atong kalisdanan. Kita unta sa kanunay andam sa pagtawag sa ngalan sa Dios ug mangayo sa iyang kalooy sama kang Bartimeo nga miingon, "Jesus, anak ni David, kaloy-i intawon ako." Ang Ginoo andam sa paghatag kanato sa atong panginahanglan kung kita mosangpit sa Iyang ngalan. Kita usab unta mag-ampo sa Ginoo nga Iyang ablihan ang atong mga mata aron atong makita kung unsa ka dako ang Iyang paghigugma ug kalooy kanatong Iyang mga anak.

Giya alang sa Pamalandong:

1. Giunsa man nato pagpadayag ngadto sa Dios ang atong hingpit nga pagtoo Kaniya?

2. Misalig ba kita sa kalooy sa Dios bisan pa sa atong nasinati nga mga kalisdanan sa kinabuhi?

F. Katilingbanong Pag-ampo 

Pangulo: Mga igsoon, modangop kita sa Dios nga labing gamhanan nga maoy tinubdan sa tanang kaayohan ug grasya. Sa matag pag-ampo kita motubag:

GINOO, DUNGGA KAMI.

1. Sa tanang nagdumala sa Simbahan, ang Santo Papa, mga Obispo ug kaparian, magmadasigon unta silang moalagad sa tanang katawhan uban sa makanunayong pagpasinati sa presensya sa Dios sa tanan. Mag-ampo kita.

2.Sa mga nagdumala sa atong nasud, hatagan unta nila og dakung bili ang mga panginahanglan sa katawhan ilabina kadtong atong mga kaigsoonan nga nag- antus sa kawad-on. Mag-ampo kita.

3. Sa tanan natong mga kaigsoonan nga nagmasakiton malig-on unta ang ilang pagtoo sa Dios nga maoy bugtong makahatag og kahupayan sa ilang balatian. Mag-ampo kita. 

4. Sa tanan nga nagdumala sa atong tagsa tagsa ka katilingban, makanunayon unta silang mogahin og panahon sa pagpakighiusa sa Dios diha sa makanunayon nilang pag apil sa Kasaulogan sa Pulong ug Santos nga Misa. Mag-ampo kita.

5. Sa tanan natong mga mahal sa kinabuhi nga nag-una na kanato sa laing kalibutan, makasulod na unta sila sa lawak nga gitagana sa Dios kanila nga ilang puloy- anan diin lunlon kalipay ang ilang matagamtaman hangtud sa kahangturan. Mag-ampo kita.

6. Sa tanan natong kaugalingon nga katuyuan, atong ihalad diha sa kahilum.

Pangulo: Makagagahum nga Dios, Imong nadungog ang tanan namong panginahanglan, daghan pa ang wala namo mabungat apan sayud kami nga Imo kining hatagan og katumanan pinaagi ni Kristo among Ginoo ug Manluluwas. Amen.