IKA-KAWHAA'G-TULO NGA DOMINGG

 IKA-KAWHAA'G-TULO NGA DOMINGGO

A. Unang Basahon

Isaias 35:4-7

Ang pagbasa gikuha gikan sa basahon ni Propeta Isaias.

Ingna ang nakabsan na'g paglaum, "pagmaisog ug ayaw kahadlok! Moanha ang imong Dios aron sa pagpanimalos sa imong mga kaaway ug iya kamong luwason."

Makakita na unya ang buta ug makadungog na ang bungol; magluksolukso na ang bakol daw lagsaw, ug mag-awit ang amang sa kalipay. Kay didto sa kamingawan modagayday ang tubig, ug may sapa na ang disyerto. Ang kaniadto balas nga init kaayo, mahimo nang usa ka linaw; ug ang nanliki nga yuta, mahimo nang tinubdan sa tubig; ug sa mga dapit diin bugang ug kupong-kupong ray nanubo ug gipuy-an sa mga lobo manubo na ang mga sagbot.

Mga igsoon, ang Pulong sa Ginoo.

B. Salmo Responsoryo

Salmo 146:7,8-9,9-10

Tubag (R) - Dayega ang Ginoo, kalag ko.

Ang Dios ni Jacob matinumanon hangtud sa kahangturan, nagapadangat sa katarong alang sa gidaugdaug, naghatag og pagkaon sa gigutom. Ang Ginoo nagaluwas sa mga bihag. (R)

Ang Ginoo nagahatag og pagtan-aw sa buta, Ang Ginoo nagabangon kanila nga nangadagma; ang Ginoo nahigugma sa matarong. Ang Ginoo nanalipod sa mga langyaw. (R)

Gibuhi sa Ginoo ang mga ilo ug ang balo, apan iyang gibawog ang paagi sa dautan. Ang Ginoo maghari hangtud sa kahangturan; ang imong Dios, O Sion, latas sa tanang kaliwatan. Aleluya. (R)

C. Ikaduhang Basahon

Jas.2:1-5

Ang pagbasa gikuha gikan sa sulat ni Santiago.

Mga igsoon, kamo nga nagatoo sa atong halangdong Ginoong Jesukristo, angaya ninyo pagtagad ang mga tawo. Pananglit may usa ka datu nga nagsingsing og bulawan ug luho ang pamisti motambong sa inyong pagsimba, ug motambong usab ang usa ka kabos nga nagkagidlay - kon tagdon ninyo pag-ayo ang tawo nga luho'g ug moingon kamo karıiya, "Diri ka lingkod sa labing maayong lingkoranan," apan moingon kanio sa kabos, "Tindog diha o lingkod diri sa akong tilian,' nakasala kamo sa inyong pagpihigpihig sa mga tawo ug sa paghukom sa dili matarong nga paagi.

Pamati kamo, minahal kong mga igsoon. Ang Dios nagpili sa mga kabos niining kalibutana aron mahimong dato sa pagtuo ug aron makapanag- iya sa Gingharian nga iyang gisaad sa tanan nga nahigugma kaniya.

Mga igsoon, ang Pulong sa Ginoo.

D. Ebanghelyo

Marcos 7:31-37

Ang pagsangyaw sa Maayong Balita sumala ni San Marcos.

Unya mibiya si Jesus sa yuta duol sa Tiro ug milakaw latas sa Sidon ngadto sa Lanaw sa Galilea, agi sa yuta sa Decapolis. Ug may usa ka tawo nga bungol ug amang nga gidala sa pipila ka mga tawo ngadto kang Jesus, ug mihangyo sila kaniya nga ang iyang kamot itapion niya sa tawo. Busa gipahilayo siya ni Jesus sa mga tawo, ug gikulkog niya ang iyang mga tudlo sa dalunggan sa tawo. Unya gituthoan niya ang iyang mga tudlo ug iyang gihikap ang dila sa tawo. Unya mihangad si Jesus sa langit, nanghupaw siya, ug miingon sa tawo, "Etafa!" nga sa ato pa, "Maabli ka!"

Dihadiha nakadungog na ang tawo ug maayo na siyang mosulti. Ug gipinahan silang tanan ni Jesus sa dili pagpanugilon niini kang bisan kinsa; apan hilabihan hinoon nilang panugilon niini. Ug natingala pag-ayo ang tanan ug miingon sila, "Maayo gayud niyang pagkabuhat ang tanan! Bisan gani ang mga bungol iyang gihimo nga makadungog, ug ang mga amang makasulti."

Mga igsoon, ang Maayong Balita sa atong Ginoo.

E. Komentaryo

Tema: Ang matuod nga pagtoo diha kang Kristo.

Duna ba kamoy nailhan nga usa sa atong mga kaigsoonan nawad-an og panan-aw, pangdungog o tiil? Sa pagkatinuod, dili lalim sa usa ka tawo nga buta, bungol, o bakol ba hinoon. Dili sayon dawaton sa usa ka tawo nga adunay siyay kakulangan sa iyang lawas. Usa kini ka kamatuoran nga dili gayod nato malikayan nga adunay kitay mga kaigsoonan nga adunay kakulangan sa ilang panglawas. Sayod kita nga dili sayon alang kanila ang pagkinabuhi tungod kay walay mangahas pagdawat kanila sa trabaho o dili ba kaha wala kaayo motagad kanila tungod sa ilang kakulangan. Apan sayod kita nga kini sila maoy nanginahanglan sa atong kalooy ug tabang.

Sa atong mga pagbasa karon ilabi na sa Ebanghelyo, nagpahinumdum kanato sa kaayo sa atong Ginoo. Nadungog nato kung unsa kamaloloy- on ug manggihatagon ang atong Ginoo diha sa Iyang katawhan. Apan ang Iyang pagkamaloloy-on ug pagkamanggihatagon nag-agad kung unsa kalig-on ang atong pagtoo ngadto Kaniya.

Sa unang pagbasa gikan sa basahon ni Propeta Isaias nagpahinumdum kanato sa saad sa atong Ginoo diha sa Iyang katawhan. Ang pag-ayo sa mga buta, bungol, putol og tiil ug amang usa ka timaan sa Iyang pag-abot ug pagluwas sa Iyang katawhan. Diha sa ikaduhang pagbasa sa basahon ni Santiago, nagsaysay mahitungod sa pagtoo. Ug kining pagtoo mamahimo lamang tinuod kung kini inubanan sa atong buhat. Buhat nga nagsukad diha sa pagtulon-an sa atong Ginoo. Kay ang pagtoo kon walay buhat usa ka pagtoo nga walay kamatuoran.

Diha sa Ebanghelyo, nagpadayag kini kon unsa kamahinungdanon ang dakong pagtoo diha sa atong Ginoo. Ang pagtoo nga naghatag og kaayohan ug kaluwasan alang kanato. Apan ang atong pagtoo mamahimo lamang matuod kon kini ubanan og buhat. Sama sa gipadayag diha sa Ebanghelyo nga ilang gitabangan ang ilang higala ngadto kang Jesus. Ug gani nagpakilooy sila aron maayo ang ilang kauban nga bungol. Ug tungod niini natandog si Jesus ug iyang giayo ang bungol aron mahibalik ang iyang pangdungog.

Usa ka hagit alang kanatong mga Kristiyanos ang paghupot sa matuod nga pagtoo sa atong Ginoo. Bisan unsa pa ang atong kahimtang diha sa atong matag katilingban, dili igsapayan sa atong Ginoo kon kinsa ug unsa kita diha sa atong katilingban. Ang importante mao nga kita misalig sa makagagahum nga Dios. Nga kita hingpit nga mitoo nga adunay Dios nga makanunayong nahigugma ug nag-atiman kanato diha sa atong pagpadayon sa paglawig padulong sa iyang Gingharian. Ang matinud-anon nga pagtoo nagsukad sa atong galamhan aron makita kini diha sa atong inadlaw-adlaw nga pagkinabuhi sumala sa kabubut-on sa Dios.

Giya alang sa Pamalandong:

1. Ato bang natugkad ang tinuoray nga pagtoo sa atong Ginoo?

2. Sa unsang paagi nato gipadayag ang atong matuod nga pagtoo ngadto sa Ginoo?

F. Katilingbanong Pag-ampo

Pangulo: Sayud kita sa kamaloloy-on ug kamahigugmaon sa atong Langitnong Amahan. Busa maghiusa kitang modangop Kaniya ug atong ihalad ang atong mga gitinguha alang sa atong kabulahanan ug sa tanan. Sa matag pag-ampo kita motubag: GINOO KALOY-I KAMI.

1. Alang sa atong Santo Papa, mga Obispo ug kaparian nga ang ilang kinabuhi, pulong ug buhat kanunay nga magpadayag sa pagka-anaa sa Dios nga maoy mahimong sumbanan sa kalig-on sa pagtoo sa katawhan. Mag-ampo kita.

2. Alang sa nagdumala sa atong nasud nga ang ilang mga programa maghatag unta og kaayohan sa kadaghanan sa katawhan. Mag-ampo kita.

3. Alang sa matag pamilya, makaamgo unta sila sa kabililhon sa kahiusahan sa matag banay diha sa pag-ampo ug paghinigugmaay. Mag-ampo kita.

4. Alang sa mga lideres sa katilingban, molahutay unta sila sa pag-alagad bisan pa man sa mga pagsulay nga ilang mahiaguman. Mag-ampo kita.

5. Alang kanatong tanan nga ang mensahe nga atong nadungog motuhop unta sa atong galamhan nga maoy naghatag kanato og kadasig ug paglaum sa pagkinabuhi subay sa kabubut-on sa Dios. Mag-ampo kita.

6. Alang sa kaugalingon nato nga katuyuan, ato kining ihalad diha sa kahilum.

Pangulo: Dios nga labing gamhanan, Imong nadungog ang among mga pag- ampo. Tabangi kami nga ang mga panghitabo sa among inadlaw adlaw nga pagkinabuhi maoy pagpadayag sa Imong grasya alang kanamo. Kini among gipangayo pinaagi ni Kristo among Ginoo. Amen.