IKA-KAWHAA'G-PITO NGA DOMINGGO

IKA-KAWHAA'G-PITO NGA DOMINGGO

Unang Basahon

Genesis 2:18-24

Ang pagbasa gikuha gikan sa basahon sa Genesis.

Unya miingon ang Ginoong Dios, "Dili maayo nga mag-inusara ang tawo; himoan ko siya'g kauban ug katabang nga angay kaniya." Busa giumol niya gikan sa yuta ang tanang mananap ug langgam, ug gidala niya sila ngadto sa tawo aron iyang hinganlan sila; bisa'g unsa ang ingalan sa tawo sa matag usa kanila mao na ang ngalan niini. Busa gihinganlan sa tawo ang tanang kahayopan ug ang mga langgam, ingon man ang ihalas nga mga mananap; apan walay hipalgan nga kauban ug katabang nga angay kaniya.

Unya gipakatulog sa Ginoong Dios ang tawo ug samtang nahinanok siya, gikuhaan siya sa Ginoong Dios og gusok ug gihulipan niya kining unod. Ang maong gusok gihimo niya nga usa ka babaye, ug gidala niya ang babaye ngadto sa lalaki. Ug miingon ang lalaki, "Ania ra gayud ang sama kanako - bukog gikan sa akong bukog, ug unod gikan sa akong unod. 'Babaye' ang ngalan niya kay gikuha man siya gikan sa lalaki."

Tungod niini ang lalaki mobiya sa iyang amahan ug inahan ug motipon sa iyang asawa ug mausa sila.

Mga igsoon, ang Pulong sa Ginoo.

B. Salmo Responsoryo

Salmo 128:1-2,4-5,5-6

Tubag (R)- Bendisyonan unta kita sa Ginoo sa tanang mga adlaw sa atong kinabuhi.

Bulahan ikaw nga mahadlokon sa Ginoo, nga nagalakaw sa iyang kadalanan. Kay magakaon ka sa bunga sa imong binuhatan; mabulahan gayud ikaw ug mapanalanginan. (R)

Ang imong asawa mahisama sa usa ka mabungahon nga bagon nga anaa sa tugkaran sa imong balay; Ang imong mga anak sama sa mga tanum nga olibo libot sa imong talad. (R)

Ania, ingon niini pagpanalangin ang tawo nga mahadlokon sa Ginoo. Ang Ginoo manalangin kanimo gikan sa Sion makakita unta ikaw sa kausbawan sa Jerusalem sa tanang mga adlaw sa imong kinabuhi. (R)

Makakita unta ikaw sa mga anak sa imong mga anak, ang kalinaw maanaa unta sa Israel. (R)

C. Ikaduhang Basahon

Hebreo 2:9-11

Ang pagbasa gikuha gikan sulat ngadto sa taga-Hebreo.

Ang nakita nato mao si Jesus nga sa makadiyot nahimong ubos sa mga anghel, aron pinaagi sa grasya sa Dios magpakamatay siya alang sa tanan. Nakita nato siya nga gihimaya ug gipasidunggan karon tungod sa kamatayon nga iyang giantos. Husto gayud ang Dios nga maoy nagbuhat ug nagpalungtad sa tanang butang, sa paghingpit kang Jesus pinaagi sa iyang pag-antos, aron makaambit sa iyang himaya ang daghang mga anak. Kay si Jesus mao ang nagdala kanila ngadto sa kaluwasan. Kay sila gibalaan ug ang nagbalaan kanila may usa lamang ka Amahan. Busa dili maulaw si Jesus sa pagtawag kanila nga iyang mga igsoon.

Mga igsoon, ang Pulong sa Ginoo.

D. Ebanghelyo

Marcos 10:2-16 or 10:2-12

Ang pagsangyaw sa Maayong Balita sumala ni San Marcos.

Ug dihay pipila ka mga Pariseo nga miduol ug misulay pagbitik kang Jesus. Nangutana sila, "Nagtugot ba ang atong Balaod kang bisan kinsa sa pagpakigbulag sa iyang asawa?"

Si Jesus misumbalik sa pagpangutana kanila, "Unsa may gisugo ni Moises kaninyo?"

Mitubag sila, "Mitugot si Moises nga ang bana makahimo pagbulag sa iyang asawa human niya sulati'g sulat sa pakigbulag ang iyang asawa."

Miingon si Jesus kanila, "Gihimo kining sugo-a ni Moises kay kamo gahi ma'g ulo. Apan sa sinugdan, sa pagbuhat sa kalibutan gibuhat sa Dios ang lalaki ug babaye. Tungod niini, mobiya ang lalaki sa iyang amahan ug sa iyang inahan ug makighiusa sa iyang asawa, ug silang duha mahimo nang usa.' Busa ang bana ug ang asawa dili na duha, kon dili usa na lamang. Tungod niini kinahanglan nga dili bulagon sa tawo ang gihiusa sa Dios."

Sa didto na sila sa balay, nangutana ang mga tinun-an kang Jesus mahitungod ning butanga. Miingon siya kanila, "Ang bana nga mobulag sa iyang asawa ug makigminyo'g laing babaye, nakapanapaw batok sa una niyang asawa; ug ang babaye nga mobulag sa iyang bana ug makigminyo sa laing lalaki, nanapaw usab."

May pipila ka tawo nga nagdala og mga bata ngadto kang Jesus aron sila hikapon niya, apan gikasab-an sila sa mga tinun-an. Sa pagkaalingat ni Jesus niini, nasuko siya ug miingon sa iyang mga tinun-an, "Paari-a kanako ang mga bata. Ayaw sila'g did-i, kay ang Gingharian sa Dios ila sa sama niining mga bata. Timan-i ninyo kini: ang dili modawat sa paghari sa Dios sama sa usa ka bata, dili mahisakop niini." Unya iyang gipangkugos ang mga bata, gitapion ang iyang mga kamot kanila, ug gipanalanginan sila.

Mga igsoon, ang Maayong Balita sa atong Ginoo.

E. Komentaryo

Tema: "Ang sa Dios gihiusa, sa tawo dili pagbulagon sila".

"Ang sa Dios gihiusa, sa tawo dili pagbulagon sila." Usa ka linya sa awit nga sagad natong gikanta panahon sa kasal. Ug kining maong mga pulong tataw nga gipadayag ni Jesus sa mga Pariseo nga nangutana kaniya mahitungod sa pakigbulag. Klaro kaayo ang gipamulong ni Jesus nga dili siya uyon sa pakigbulag. Apan ngano man nga misupak man si Jesus niini ug si Moises miuyon man?

Diha sa mga pagbasa gipadayag ang mga bug-at nga hinungdan nganong hugot nga misupak si Jesus sa pakigbulag. Una, ang pagpakigbulag makaguba sa relasyon diha sa pamilya. Kini usa ka kamatuoran nga dayag natong nasaksihan karong mga panahona. Sayod kita nga daghan na kaayong pamilya ang naguba o nabungkag bisan pa nga wala pa mahimong balaod ang pagpakigbulag. Unsa pa kaha kon mahimo na kining usa ka balaod? Nakasiguro kita nga mas daghan pang mga pamilya ang maapektuhan ug wala kita masayod nga bisan ang atong kaugalingong pamilya makasinati niini.

Ikaduhang hinungdan mao nga ang pagpakigbulag moguba usab sa mga saad nga gihimo sa duha ka binuhat nga gihiusa atubangan sa Dios diha sa Simbahan. Ang usa ka saad magpabilin nga saad ug kinahanglan kining tumanon sa duha ka magtiayon nga nanumpa sa usag-usa. Apan ang pagpakigbulag buot nga moguba niining maong panumpa mao nga kung buot makigbulag ang asawa o bana sa ilang kapikas sa kinabuhi nahimo silang bakakon atubangan sa Dios nga maoy saksi sa ilang pagpanumpa.

Ikatulong hinungdan mao nga ang pagpakigbulag nagpamatuod lamang sa kahuyang sa tawo. Ang hinungdan nganong mitugot si Moises sa pagpakigbulag nga atong mabasa diha sa Daang Kasabutan tungod sa katig-a sa kasingkasing o kagahi sa ilang mga ulo. Tataw kaayo kini nga nagpamatuod sa kahuyang sa tawo nga dili niya matuman ang panaad nga gihimo atubangan sa Dios dili tungod kay dili niya kini matuman kon dili nagpadala siya sa iyang kahuyang.

Ikaupat nga hingudan mao nga ang pagpakigbulag makaguba usab sa Sakramento sa kaminyoon. Tungod niini ang sakramento sa duha ka binuhat mahimong usa ka paagi sa lig-on nga panaad sa gugma nga maoy nagbugkos kanila hangtod sa ilang kamatayon. Apan ang pagpakigbulag buot motangtang niining maong bugkos aron mabulag ang duha.

Ang katapusan nga hinungdan mao nga ang pagpakigbulag usa ka dakung sala batok sa Ginoo tungod kay supak man kini sa Iyang kabubut-on nga kinahanglan maghinigugmaay, magsinabtanay ug mag-uban ang magtiayon hangtod sa kahangturan.

Sa kasamtangang kahimtang karon, sayod kita nga nagpadayon ang pagpakigbisog sa Simbahan batok niining mga balaodnon nga maoy makaguba sa panaghiusa sa magtiayon. Mao nga ang Simbahan naningkamot sa pagbabag niini aron dili kini mamahimong usa ka balaod tungod kay ato nang nalantaw daan nga daku kaayo ang kadaut niini ngadto sa daghang pamilya. Maningkamot kita sa paghimo og mga lakang aron babagan kining maong tinguha. Makigbatok kita niini nga magmadaugon ang plano sa Ginoo aron motunhay ang kalinaw ug kahiusahan sa atong tagsa tagsa ka pamilya. Hinaut pa unta.

Giya alang sa Pamalandong:

1. Isip pamilya unsa man ang lig-on nga lakang aron mapatunhay nato ang plano sa Dios?

2. Nakigbatok ba kita niining mga pagsulay nga naghulga sa kagun-oban sa nagmalinawon natong pamilya?

F. Katilingbanong Pag-ampo

Pangulo: Sa tumang pagsalig ato karong ihalad sa Makagagahum nga Amahan ang atong mga pag-ampo ug pangi- nahanglan kinsa kanunay nga naga- atiman kanato. Sa matag pangamuyo kita motubag:

GINOO, DUNGGA ANG AMONG PAG-AMPO.

1. Alang sa nangulo sa atong Simbahan, makita ug mabati unta sa katawhan ang ilang matinud-anon nga pagtahan sa ilang kinabuhi isip mga alagad sa Dios. Mag- ampo kita.

2. Alang sa gitahasan sa pagdumala sa atong nasud, kinasingkasing unta nilang hatagan og dakung pagpakabana ang mga panginahanglan sa bagang pundok sa katawhan kinsa nangandoy nga makalingkawas sa gibating kalisod sa kinabuhi. Mag-ampo kita.

3. Alang sa atong mga kaigsoonan nga mihalad sa ilang kaugalingon sa pag-alagad sa Dios isip pari ug relihiyoso, dasigon unta sila sa Espiritu Santo aron molahutay sila sa ilang gipili nga bokasyon. Mag-ampo kita.

4. Alang sa matag Kristohanong pamilya, nga ang diwa sa pagpaubos, pagsinabtanay ug paghigugma maoy maghari sa usa'g usa aron mahimo silang sumbanan sa usa ka sulondon nga pamilya diha sa katilingban. Mag-ampo kita.

5. Alang sa atong mga kaigsoonan nga mihalin na ngadto sa laing kalibutan, ila na untang maangkon ang kapasayloan sa ilang mga sala nga nabuhat sa buhi pa sila ug ila nang madawat ang ganti sa pagpakighiusa sa Dios ngadto sa paraiso diin lunlon kalipay ang ilang matagamtaman hangtud sa kahangturan. Mag-ampo kita.

6. Alang sa atong personal nga katuyuan, ato kining ihalad diha sa kahilum.

Pangulo: Amahan, patalinghugi ang mga pag- ampo nga among gihalad karon ug tuguti nga amo na kining maangkon kon wala man kini mahisupak sa Imong kabubut-on ug paagi. Kini among gipangayo nga puno sa pagtoo diha Kanimo pinaagi ni Jesukristo among Ginoo ug Manluluwas. Amen.