IKA-KAWHAA'G-LIMA NGA DOMINGGO

IKA-KAWHAA'G-LIMA NGA DOMINGGO

A. Unang Basahon

Kinaadman 2:12,17-20

Ang pagbasa gikuha gikan sa basahon sa Kinaadman.

Ang mga dautan miingon, "Ang matarong nga mga tawo walay kapuslanan, kon dili mga samokan lamang, busa mangita kita'g higayon sa paglaglag kanila. Supak sila sa atong gibuhat; nagpasangil sila kanato nga kita nagasupak sa Balaod ni Moises ug naglapas sa mga pagtulon-an sa atong mga katigulangan.

Apan tan-awon ta unsay mahitabo kon mamatay na sila! Kon ang mga matarong tinuod gayud nga mga anak sa Dios, ang Dios magluwas kanila sa ilang mga kaaway. Busa sulayon ta sila. Ato silang daogdaogon ug sakiton; unya sutaon ta unsa kamalinawon ug kamakatarunganon sila!

Sutaon ta asa kutob ang ilang pag-agwanta! Silotan ta sila sa usa ka makauulaw nga kamatayon, sanglit nag-ingon man sila nga ang Dios mao ray manalipod kanila."

Mga igsoon, ang Pulong sa Ginoo.

B. Salmo Responsoryo

Salmo 54:3-4,5,6-8

Tubag (R) - Ang Ginoo maoy nagabuhi kanako.

O Dios, sa imong ngalan luwasa ako, ug sa imong gahum labani ang akong hinungdan. O Dios, pamati-a ang akong pag-ampo; patalinghugi ang mga pulong sa akong baba. (R)

Kay ang garbosong mga tawo misukol batok kanako, ug ang mapintas nga mga tawo nangita sa akong kinabuhi; wala nila ibutang ang Dios atubangan sa ilang mga mata. (R)

Ania, ang Dios mao ang akong magtatabang; ang Ginoo maoy nagabuhi kanako. Maghalad ako kanimo nga mahinangpon og sakripisyo; dayegon ko ang imong ngalan, O Ginoo, tungod sa imong kaayo. (R)

C. Ikaduhang Basahon

Santiago 3:16-4:3

Ang pagbasa gikuha gikan sa sulat ni Santiago.

Diin anaa ang kasina ug ang pagpaninguha alang sa kaugalingong kaayohan lamang, anaa usab ang kasamok ug tanang matang sa daotang buhat. Apan ang kaalam nga gikan sa langit, una sa tanan, putli ug unya makigdaiton, mahigalaon, maloloy-on ug maayo'g binuhatan; dili usab kini mopihig ug dili tigpakaaron-ingnon. Ang pagkamatarung mao ang bunga sa binhi nga gipugas sa mga makigdaiton diha sa kalinaw.

Unsa bay hinungdan sa inyong panag-away ug panagbingkil? Dili ba ang inyong mga lawasnong kaibog nga nagkasumpaki sa sulod ninyo? Buot kamong manag-iya'g mga butang, apan kay wala man kamo makaangkon niini, buot kamong mopatay. May gikaibgan kamo, apan wala ninyo kini makab-ot. Busa nagkabingkil kamo ug nag-away. Wala ninyo maangkon ang inyong gitinguha kay wala man kamo mangayo niini sa Dios. Ug sa dihang nangayo kamo, wala kamo hatagi kay daotan man ang inyong tuyo. Nangayo kamo aron lamang pagtagbaw sa inyong mga lawasnong kaibog.

Mga igsoon, ang Pulong sa Ginoo.

D. Ebanghelyo

Marcos 9:30-37

Ang pagsangyaw sa Maayong Balita sumala ni San Marcos.

Unya mibiya sila niadtong dapita ug mipadayon paglakaw latas sa Galilea. Dili buot si Jesus nga may mahibalo kon hain siya, kay gipahimangnoan man niya ang iyang mga tinun-an nga ang Anak sa Tawo itugyan ngadto sa mga tawo ug patyon nila siya, ug mabanhaw tapos tulo ka adlaw.

Wala sila makasabot kon unsay kahulugan sa iyang giingon kanila, apan nahadlok silang mangutana kaniya.

Nahiabot sila sa Capernaum ug sa nakasulod na sila sa balay, gipangutana ni Jesus ang iyang mga tinun-an, "Unsa may inyong gilalisan didto sa dalan?"

Apan wala sila motubag kay naglalis man sila kon kinsay labing dako kanila. Unya milingkod si Jesus ug iyang gipaduol sila ug giingnan, "Bisan kinsa ang buot nga mahimo nga labing dako kinahanglan nga magpaubos siya ug mag-alagad sa tanan." Unya gikuha niya ang usa ka bata ug iyang gipatindog sa ilang atubangan. Ug iyang gikugos ang bata ug miingon siya kanila, "Ang modawat sa usa ka bata nga ingon niini sa akong ngalan, modawat usab kanako; ug ang modawat kanako, wala modawat kanako lamang, kondili kaniya usab nga nagsugo kanako."

Mga igsoon, ang Maayong Balita sa atong Ginoo.

E. Komentaryo

Tema: Pagpaubos ug Pagsalig sa Dios sama sa mga Bata.

Sa atong pagbasa sa Ebanghelyo, nadungog nato nga adunay duha ka bahin niini: una mao ang pagtagna ni Jesus sa iyang mga tinun-an sa iyang kamatayon ug pagkabanhaw ug ang ikaduha mao ang pagkalisang sa mga apostoles kung kinsa sa ilaha ang mas labing dako. Ug nadungog nato sa pagbasa nga gihatagan ni Jesus og duha ka tubag ang ilang tawhanong panglantaw. Una, si Jesus miingon sa iyang mga tinun-an "Bisan kinsa ang buot nga mahimo nga labing dako kinahanglan nga magpaubos siya ug mag-alagad sa tanan." Ikaduha, si Jesus nagkuha og usa ka bata ug iyang gipatindog sa ilang atubangan ug iyang gikugos ug miingon siya kanila "Ang modawat sa usa ka bata nga ingon niini sa akong ngalan, modawat usab kanako, ug ang modawat kanako, wala modawat kanako lamang, kon dili kaniya nga nagsugo kanako."

Kung atong tan-awon, ang mga tinun-an ni Jesus naglalis kay gusto sila makaangkon og posisyon. Nag-indigay sila, kay nagdahom sila nga makadawat og pagtahod sa uban ug tungod kay nagtuo sila nga si Kristo maghari sa nasud. Ang mga tinun-an nangandoy nga makahupot og gahum aron maoy magmando ngadto sa uban. Kung mabuhat nila kining mga butanga, nagtuo sila nga mahisama sila sa mga tawong adunay gahum sa ilang katilingban. Kini ang ilang panglantaw sa misyon ni Jesus kay wala man sila makasabot sa lintunganay sa gimbuhaton ni Kristo. Sa laing bahin, dili sila makadawat sa gisulti ni Jesus nga ang Anak sa Tawo itugyan sa mga tawo ug patyon nila siya ug mabanhaw tapus sa tulo ka adlaw. Nadungog nato sa atong ikaduhang pagbasa sa sulat ni Santiago nga magpabilin kita nga mapaubsanon ug manggihatagon ug likayan nato ang mga kahakog ug pagkamapahitas-on.

Ang atong Ebanghelyo naghatag kanato og mensahe, nga gihagit kita ni Jesus sa pagdawat kaniya. Sa unsang paagiha? Si Jesus nag-ingon nga kung kinsa kadtong modawat sa usa ka bata, nagdawat usab kaniya ug sa nagsugo kaniya. Si Jesus naghagit kanato sa pagpaubos ug pag-alagad sa uban. Gigamit ni Jesus ang bata kay ang bata ginatan-aw sa katilingban nga walay pulos ug walay gahum sa pakigbisog sa iyang kaugalingon. Sila nagatuman lamang sa kabubut-on sa ilang mga ginikanan. Sa pagkugos sa bata, si Jesus buot magtudlo sa mga tinun-an nga siya nagpuyo sa yano, kabus ug kanunay nga nagsalig sa Amahan nga nagpadala kaniya taliwala sa daghang mga misupak sa iyang misyon. Sama sa mga tinun-an, kinahanglan nato dawaton ug puy-an ang Ebanghelyo nga puno sa pagsalig ug pagtoo. Sa atong pakigbisog sa atong matag pamilya ug sa atong Kristohanong Katilingban, dali kaayo nato malimtan nga ang butang nga mas labing halangdon mao ang pagdawat nga anak kita sa usa ka Amahan sa Langit ug nga kita mosalig Kaniya. Ug ang panig-ingan nga gipakita ni Jesus bahin sa mga bata, sama kini sa mga tawo sa atong katilingban. Sila kadtong mga tigulang, mga bakul, mga masakiton, mga tawo nga wala nakaagi og eskwela, ug kadtong mga sinalikway. Sila makit-an nato sa atong mga palibot ug naghulat sa atong panabang. Si Jesus nagpaabot kanato sa pagdawat ug pagtabang sa mga tawong nanginahanglan sa atong panabang kay si

Jesus nagpaluyo kanila. Si Jesus nagmando kanato nga magpabilin kita sa pagkabata. Gihatagan ni Jesus og duso ang paghupot sa kasingkasing ug maayong pamatasan sama sa mga bata. Kining pamatasan mao ang pagpaubos ug pagdawat sa mga butang nga puno sa pagtuo ug pagsalig. Wala kini magkinahanglan sa paggamit og hunahuna sa pagpasabot sa tanan. Ang gikinahanglan lang mao ang atong matuod nga pagtoo. Matag adlaw nakasinati na kita og mga milagro sa atong kinabuhi. Pananglitan, pagmata sa buntag, paghupot sa maayong panlawas, pagkinabuhi sa maanindot nga palibot ug uban pa. Apan wala nato masinati ang milagro sa Ginoo kay gihatagan nato og kaugalingong pagsabot ang tanan diha sa atong tawhanong panghunahuna. Si Jesus nahimong bata dili lang sa Betlehem kon dili hangtod sa kamatayon sa Krus kung asa siya nagtuman sa kabubut-on sa Amahan sa pagluwas kanato sa atong mga kasal- anan. Ang Ginoo nga nahimong bata nanginahanglan sa atong kahuyang sa pagdala kanato ngadto sa kinatibuk-ang paghatag sa atong kaugalingon ngadto kaniya sa atong kahuyang nga anaa ang gahum sa Ginoo. Siya nanghinaot nga madala kita sa walay sa hingpit nga pagsalig sa iyang kalooy.

Si Jesus miingon nga kadtong tawong mapaubsanong nag-alagad sa uban maoy dako ug una sa Gingharian sa Dios. Niining paagiha, kita gihagit ni Kristo sa paghupot og maayong pamatasan ug mapaubsanon nga kasingkasing sama sa usa ka bata. Kini mao ang hiyas sa usa ka mapaubsanong pag-alagad sa atong Ginoo.

Giya alang sa Pamalandong:

1. Sa unsang higayon sa atong kinabuhi nga kita nagpaubos sa atong kaugalingon?

2. Nakatabang ba kini kanato sa pagsinati sa kaayo sa Dios?

F. Katilingbanong Pag-ampo

Tema: Pagpaubos ug Pagsalig sa Dios Sama sa mga Bata.

Pangulo: Sa mapaubsanong kasingkasing moduol kita sa atong Maloloy- on nga Amahan ug atong ihalad Kaniya ang atong mga pag-ampo ug panginahanglan. Sa matag pangamuyo kita motubag:

O DIOS DUNGGA ANG AMONG PAG-AMPO.

1. Alang sa nagdumala sa atong Simbahan, mapuy-an unta nila kanunay ang hiyas sa pagkamapaubsanon ug mahigugmaon ilabina sa mga kabus natong mga igsoon. Mag-ampo kita.

2. Alang sa lideres sa atong nasud, mapaubsanon unta nilang dawaton ang ilang mga katungdanan ug matinud- anon nilang puy-an ang kinaiya sa pagkamaalagaron ilabina sa atong mga kaigsoonan nga anaa sa kalisod. Mag- ampo kita.

Alang sa mga nag-antus sa hilabihang kalisdanan, masinati unta nila ang grasya ug presensya sa Dios diha sa mga tawo nga migahin sa ilang bahandi ug panahon sa pagtubag sa ilang panginahanglan. Mag-ampo kita.

4. Alang sa mga nag-alagad sa matag katilingban, makabaton unta sila og hingpit nga pagtoo sa Dios kinsa maoy tuburan sa matinud-anon ug malahutayon nga pagserbisyo bisan pa man og makasinati sila og mga pagsulay sa kinabuhi. Mag- ampo kita.

5. Alang sa atong mga mahal sa kinabuhi nga nangamatay na, makasulod na unta sila sa lawak nga gitagana sa Dios kanila nga ilang puloy-anan nga walay pagkatapos. Mag-ampo kita.

6. Alang sa atong kaugalingon nga katuyuan, ato kining ihalad diha sa kahilum.

Pangulo: Amahan sa gugma ug kalooy, Kanimo namo isalig ang tanan namong mga panginahanglan. Ug mapaubsanon kaming magpaabot sa grasya nga Imonggitagana sa matag usa kanamo. Kini among gipangayo pinaagi ni Kristo among Ginoo. Amen.