Ikakawhaag-usa nga Domingo Sulod sa Tuig

Ikakawhaag-usa nga Domingo Sulod sa Tuig

PASIUNA

AGOSTO 25, 2024

Maayong buntag/hapon mga igsuon diha ni Cristo.

Ania na kita sa Ikakawhaan ug usa nga Domingo sa Ordinaryong Panahon.

Ang unang pagbasa gikuha gikan sa Basahon ni Josue. Niining bahina sa Basahon ni Josue iyang gisaysay ang iyang pagtigom sa tanang banay sa Israel.

Ang ikaduhang pagbasa gikuha gikan sa Sulat ni San Pablo ngadto sa taga-Efeso. Dinhl gipresentar ni San Pablo ang relasyon tali sa bana ug asawa nga may kalabutan sa pagsakripisyo ni Cristo tungod sa lyang dakong gugma.

Ang Ebanghelyo gikuha gikan sa Balaan nga Ebanghelyo sumala ni San Juan. Dinhi atong madungog si Simon Pedro nga nangutana, "Ginoo, kang kinsa kami moadto? Anaa kanimo ang mga pulongsa kinabuhing dayon."

Palihug manindog alang sa pagsugod sa Santos nga Eyukaristiya.

Salmo Responsoryo:

Tagamtama ug tan-awa ang kaayo sa Ginoo.

Katilingbanong Pag-ampo:

Ginoo, dungga kami.

BASAHON I

Jos. 24:1-2, 15-17, 18

KINUTLO GIKAN SA BASAHON NI JOSUE

Gitigom ni Josue ang tanang banay sa Israel didto sa Siquem. Gitawag niya ang mga pangulo, ang mga kadagkoan, ang mga maghuhukom, ug ang mga opisyal sa Israel, ug nanuol sila sa atubangan sa Dios. Giingnan ni Josue ang tanang katawhan, "Mao kini ang giingon sa Dios sa Israel, 'Kaniadto ang mga katigulangan ninyo nagpuyo sa tabok sa Suba sa Eufrates, ug nagsimba sa laing mga dios. Usa kanila mao si Tera, amahan ni Abraham ug ni Nahor."

"Kon dili kamo andam pag-alagad sa GINOO, pagpili karong adlawa kon kinsay alagaran ninyo, ang mga dios ba nga gialagaran sa inyong mga ka- tigulangan didto sa Mesopotamia, o ang mga dios ba sa mga Amorihanon dinhi sa yuta nga gipuy-an ninyo karon. Apan alang kanako ug sa akong pamilya, mag- alagad kami sa GINOO."

Ang mga tawo mitubag, "Dili gayod kami mobiya sa GINOO ni moalagad sa laing mga dios! Ang GINOO nga atong Dios nagluwas sa atong mga katigulangan ug kanako sa kaulipnan sa Ehipto, ug nakita nato ang dagkong mga butang nga gibuhat niya. Gilikay kita niya sa kadautan bisan diin kita paingon taliwala sa tanang kanasuran nga atong giagian. Sa atong pagdasdas, giabog sa GINOO ang katawhan, ang mga Amorihanon nga nagpuyo sa kayutaan. Busa mag-alagad usab kami sa GINOO, kay siya amo mang Dios."

ANG PULONG SA GINOO.

SALMO RESPONSORYO

Ps. 34:2-3, 16-17, 18-19, 20-21, 22-23

R. Tagamtama ug tan-awa ang kaayo sa Ginoo.

Daygon ko ang Ginoo sa tanang panahon; ang iyang pagdayeg maania kanunay sa akong ba-ba. Pahimayaa ang akong kalag diha sa Ginoo; ang mapaubsanon makadungog kanako ug malipay.

R. Tagamtama ug tan-awa ang kaayo sa Ginoo.

Ang Ginoo nagatan-aw sa matarong, ug nagapatalinghug sa ilang mga singgit.

Ang Ginoo nagasudya sa mga nagabuhat og dautan, aron dili na sila hinumdoman sa yuta.

R. Tagamtama ug tan-awa ang kaayo sa Ginoo.

Sa pagsangpit sa matarong, namati kanila ang Ginoo, ug sa tanan nilang mga kasakit giluwas niya sila.

Ang Ginoo haduol sa gisulay nga tawo; ug sila nga naguol sa espiritu iyang giluwas.

R. Tagamtama ug tan-awa ang kaayo sa Ginoo.

Daghan ang mga kaguol sa tawo nga matarong, apan niining tanan ang Ginoo nagapalingkawas kaniya; Nagabantay siya sa tanan niyang kabukogan; ug walay usa kanila nga mabali.

R. Tagamtama ug tan-awa ang kaayo sa Ginoo.

Ang dautang mga buhat nagapatay sa dautang tawo, ug ang mga kaaway sa matarong nagabayad sa ilang kalapasan. Apan ang Ginoo nagaluwas sa kinabuhi sa iyang mga sulugoon; ug walay mahulog sa kalapasan kanila nga nagadangop kaniya.

R. Tagamtama ug tan-awa ang kaayo sa Ginoo.

BASAHON II

Eph. 5:21-32

KINUTLO GIKAN SA SULAT NI SAN PABLO NGADTO SA TAGA-EFESO

Tungod kang Cristo pagtinahoray kamo. Mga asawa, tahora ug sunda ninyo ang inyong bana sama nga nagtahod ug nagsunod kamo sa Ginoo. Kay ang bana mao ang ulo sa iyang asawa ingon nga si Cristo maoy ulo sa simbahan; ug si Cristo mismo mao ang Manluluwas sa simbahan nga mao ang iyang lawas. Busa kina- hanglan motahod ug mosunod ang mga asawa sa ilang bana ingon nga ang simbahan nagtahod ug nagsunod kang Cristo.

Mga bana, higugmaa ang inyong asawa ingon nga gihigugma ni Cristo ang simbahan ug gitugyan ang iyang kinabuhi alang niini. Gihimo niya kini aron paghalad sa simbahan ngadto sa Dios pinaagi sa iyang pulong, human niya kini hugasi sa tubig. Sa ingon niini, gitugyan niya ang simbahan alang kaniya mismo diha sa bug-os niyang kaanyag, putli ug walay ikasaway, walay buling o kunot, o bisan unsang apan. Kinahanglan nga ang mga bana mahigugma sa ilang asawa ingon nga nahigugma sila sa ilang kaugalingong lawas. Ang bana nga nahi- gugma sa iyang asawa nahigugma usab sa iyang kaugalingon. Walay nasilag sa kaugalingon niyang lawas; hinonoa, pakan-on niya kini ug atimanon sama sa gibuhat ni Cristo sa simbahan, kay mga bahin man kita sa iyang lawas. Sumala sa giingon sa Kasulatan, "Tungod niini ang lalaki mobiya sa iyang amahan ug inahan ug motipon sa iyang asawa, ug silang duha mahimong usa." May dakong kamatuoran kining bahina sa Kasulatan, ug sa akong hunahuna nagpasabot kini kang Cristo ug sa simbahan.

ANG PULONG SA GINOO.

EBANGHELYO

Jn. 6:60-69

Kinutlo gikan sa Balaan nga Ebanghelyo sumala ni Juan

Busa daghan sa iyang mga tinun-an ni Jesus nga nakadungog miingon, "Lisod kining pulonga; kinsay makapamati niini?"

Apan sa dihang nahibaloan ni Jesus sulod sa iyang kaugalingon nga nagbagulbol ang iyang mga tinun-an bahin niini, miingon siya kanila,

"Naiskandalo ba kamo niini? Unsa kaha kon makita ninyo ang Anak sa Tawo nga mokayab diin siya kaniadto? Ang Espiritu maoy nagahatag og kinabuhi, ang unod walay pulos. Ang mga pulong nga akong gipanulti kaninyo Espiritu ug kinabuhi. Apan ang ubàn kaninyo walâ nagatúo."

(Kay nasayod si Jesus sa sinugdan pa kon kinsa ang wala nagatúo ug kinsa ang magbudhi kaniya.)

Ug miingon siya,

"Busa giingnan ko kamo nga walay makaari kanako gawas kon gihatag kini kaniya sa Amahan."

Tungòd niini, daghan sa iyang mga tinun-an mingbiya ug wala na mosunòd kaniya. Busa miingon si Jesus sa Napulog-duha, "Buot ba usab kamo nga mobiya kanako?"

Mitubag kaniya si Simon Pedro, "Ginoo, kang kinsa kami moadto? Anaa kanimo ang mga pulong sa kinabuhing dayon. Ug kami mitúo ug nasayod nga ikaw mao ang Balaan sa Dios."

Ang Ebanghelyo sa Ginoo.

KATILINGBANONG PAG-AMPO:

AGOSTO 25, 2024

Pari: Mag-ampo kita karon ngadto sa atong Langitnong Amahan sa tanan natong gikihanglan tungod kay Siya man ang tuburan sa kaluoy ug panabang. Uban sa masaligong kasingkasing, kita moingon:

GINOO, DUNGGA KAMI.

1. Nga si Papa Francisco, Arsobispo Romulo, ang mga kaparian ug tanang mga relihiyoso, uban ni Jesus, maglakaw paingon sa pagkabalaan dala ang mga magtutuon kaigsuonan. Mag-ampo kita sa Ginoo.

2. Nga ang tanang lideres sa panggamhanan, mamahimong mangunay kanunay sa pag-alagad sa ilang katawhan, nagtrabaho alang sa integral nga kalamboan sa tawo, alang sa kaayohan sa kadaghanan, ilabina sa pag-atiman sa mga kabus ug niadtong nawad-an sa ilang mga panginabuhian. Mag-ampo kita sa Ginoo.

3. Nga ang mga bana ug mga asawa, pinaagi sa grasya sa matinud-anon nga gugma ug pagkamanggihatagon sa Dios, mahimong mga saksi sa gugma nga nagbugkos kang Kristo ug sa Simbahan. Mag-ampo kita sa Ginoo.

4. Nga kadtong dili motuo sa presensiya sa Sakramento ni Kristo diha sa Eukaristiya malamdagan sa Espiritu Santo ug makasinati sa presensya ni Jesus sa ilang adlaw-adlaw nga pagpaningkamot. Mag-ampo kita sa Ginoo.

5. Nga kadtong nag-antus; mental, pisikal, kawad-on, ug espirituhanon, makadawat ni Jesus, ang Tinapay sa Kinabuhi, diha sa Sakramento. Mag-ampo kita sa Ginoo.

6. Nga ang tanang magtutuo nga naghalad ug mga pagdayeg ug pagpasalamat sa Diyos ilabina nila, _______ makakita ug makasinati sa presensya ni Jesus matag adlaw. Mag-ampo kita sa Ginoo.

7. Nga ang tanang magtutuong nangamatay ilabina sila, ________ makaangkon na sa kinabuhing walay katapusan. Mag-ampo kita sa Ginoo.

Pari: Makagagahum nga Dios, gipadangat namo Kanimo ang tanan namong mga pangamuyo uban ang paglaum ug pagsalig kay kini among gipangayo pinaagi kang Kristo among Ginoo. Amen.