IKA-NAPULO'G-SIYAM NGA DOMINGGO

 IKA-NAPULO'G-SIYAM NGA DOMINGGO

A. Unang Basahon

1 Hari 19:4-8

Ang pagbasa gikuha gikan sa unang basahon sa Mga Hari.

Si Elias mipadayon og bali'g usa ka adlaw nga panaw ngadto sa kamingawan, ug miabot siya ug milingkod sa ilalom sa kahoy; ug nangaliya siya sa Ginoo nga mamatay na unta siya. Miingon siya, "Maayo pa'g mamatay ako, Ginoo."

Unya mihigda siya ug nakatulog ilalom sa maong kahoy; unya may anghel nga mihikap kaniya ug miingon, "Bangon ug kaon." Mitan-aw siya ug nakita niya dapit sa iyang ulohan ang usa ka pan ug usa ka tadyaw nga tubig. Mikaon ug miinom siya ug unya mihigda pag-usab. Ug mibalik pag-usab ang anghel sa Ginoo ug mihikap kaniya ug miingon, "Bangon ug kaon kay tingali unya'g dili ka makaagwanta sa panaw." Busa mitindog siya, mikaon ug miinom ug nabaskog siya ug nakalahutay sa iyang panaw sulod sa kwarenta (40) ka adlaw ngadto sa Sinai, ang bukid sa Dios.

Mga igsoon, ang Pulong sa Ginoo.

B. Salmo Responsoryo

Salmo 34:2-3,4-5,6-7,8-9

Tubag (R) - Tagamtama ug sinati-a ang kaayo sa Ginoo,

Dayegon ko ang Ginoo sa tanang panahon, ang iyang pagdayeg maania kanunay sa akong baba. Pahimaya-a ang akong kalag diha sa Ginoo; ang mapaubsanon makadungog kanako ug malipay. (R)

Himaya-a ang Ginoo uban kanako mag-ambahan kita aron pagbayaw sa iyang ngalan. Gipangita ko ang Ginoo, ug gitubag ako niya ug giluwas ako niya sa tanan kong gikahadlokan. (R)

Paglaum kamo kaniya aron mosanag kamo sa kasadya, ug ang inyong mga nawong dili manglipaghong sa kaulaw. Sa pagsangpit sa nasakit nga tawo, namati ang Ginoo, ug giluwas siya sa tanan niyang kagul-anan. (R)

Ang anghel sa Ginoo nagalibot kanila nga mahadlokon kaniya, ug nagapalingkawas kanila. Tagamizna ug tan-aw unsa ka kamaayo ang Ginoo; bulahan ang tawo nga nagadangop kaniya. (R)

C. Ikaduhang Basahon

Efeso 4:30-5:2

Ang pagbasa gikuha gikan sa sulat ni San Pablo ngadto sa taga-Efeso.

Ayaw ninyo pasub-a ang Espiritu Santo sa Dios, kay ang Espiritu mao ang patik sa Dios diha kaninyo ilhanan nga kamo iya na, ug garantiya nga moabot ang Adlaw nga luwason kamo sa Dios.

Kinahanglan magkinabuhi kamo diha sa gugma, ingon nga gihigugma kita ni Kristo ug gitugyan ang iyang kinabuhi alang kanato, sama sa mahumot nga halad-sinunog nga makapahimuot sa Dios.

Mga igsoon, ang Pulong sa Ginoo.

D. Ebanghelyo

Juan 6:41-51

Ang pagsangyaw sa Maayong Balita sumala ni San Juan.

Ang mga Judio nagbagulbol batok kaniya, kay miingon man siya, "Ako ang pan nga gikan sa langit." Busa miingon sila, "Dili ba siya si Jesus, ang anak ni Jose? Nakaila kita sa iyang amahan ug inahan, busa nganong miingon man siya gikan siya sa langit?"

Si Jesus mitubag, "Ayaw kamo pagbagulbol. Walay makaari kanako gawas kon ang Amahan nga nagpadala kanako magdani kaniya, ug banhawon ko siya sa katapusang adlaw. Ang mga propeta nagsulat nga Ang tanang tawo tudloan sa Dios. Ang mamati sa Amahan ug makakat-on gikan kaniya, moari kanako. Apan wala kini magpasabot nga may nakakita sa Amahan; siya nga gikan sa Dios mao lamay nakakita sa Amahan. Sultihan ko kamo: ang motuo may kinabuhing walay kataposan. Ako ang pan nga nagahatag sa kinabuhi. Ang inyong mga katigulangan mikaon sa mana didto sa kamingawan, apan nangamatay gihapon sila. Ang mokaon sa pan nga gikan sa langit dili mamatay. Ako ang pan nga gikan sa langit nga nagahatag sa kinabuhi. Ang mokaon niining pan dili gayud mamatay. Ug ang pan nga akong gihatag mao ang akong unod aron mabuhi ang kalibutan."

Nakahaling kini og mainit nga paglalisay sa mga Judio. "Unsaon man niining tawhana paghatag kanato sa iyang lawas aron kan-on?" nangutana sila.

Mga igsoon, ang Maayong Balita sa atong Ginoo.

E. Komentaryo 

Tema: Si Jesukristo ang Pan sa Kinabuhi.

Si Propeta Elias, diha sa unang pagbasa, nagsagubangog dagkong mga pagsulay. Siya nakasinati og kaluya, gani nangaliya siya sa Ginoo nga mamatay na lang unta siya. Kini nga mga pagbati mitumaw tungod kay gibiyaan siya sa katawhan, apan ang Ginoo wala gayud mibiya kaniya, gidala siya sa anghel ngadto sa bukid sa Sinai. Didto sa bukid, nasinati ni Elias ang presensya Ginoo ug kini gipabati kaniya aron malig- on siya una siya ibalik sa lugar nga gitahas kaniya nga iyang dumalaon ug alagaran. Dinhi atong mabati ug makita kung giunsa ni Propeta Elias paglahutay sa iyang panaw. Kung giunsa siya pagtabang sa Ginoo pinaagi sa anghel nga mihatag og pan ug tubig kaniya. Kini usab nagpahinumdum sa matag usa kanato sa atong panaw isip katawhan sa Dios nga kita misalig sa kamahinungdanon sa Yukaristiya, ang pagkaon ug ilimnon sa atong kinabuhi.

Sa ikaduhang pagbasa, madunggan nato ang kamahinungdanon sa pagbuhat og maayo, diha sa pag- ila sa Espiritu Santo nga maoy patik sa Ginoo ug nga Siya maanaa sa matag usa kanato. Gipahimangnoan kita ni San Pablo diha sa iyang sulat ngadto sa taga Efeso kung unsa ang mga angay nga buhaton aron malipay ang Dios. Diha sa pagbuhat og maayo alang sa uban, pinaagi sa mapaubsanong kasingkasing, pagpinasayloay ug pagkinabuhi diha sa kahayag.

Ang Ebanghelyo nagpadayag nga si Jesukristo mao ang Pan sa kinabuhi. Gipasidan-an niya ang iyang katawhan nga kadtong mga tawo lamang nga moduol ug motuo Kaniya mao ang makasinati og tunhay'ng katagbawan sa ilang gilauman. Gani sa katapusan gipaklaro ni Jesukristo nga Siya labaw sa mana nga gipakaon didto sa kamingawan ug nga Siya naghatag og ideya nga Siya ang Halad-Sakripisyo alang sa katawhan.

Unsa may kalambigitan niining mga pagbasa diha sa atong kinabuhi? Unsa may mga mensahe niini alang kanato? Sa atong mga pagbasa nakita nato kung giunsa sa Ginoo paghatag og pagtagad sa iyang pinalanggang katawhan. Gipangga Niya si Elias aron dili kini mahimong pagano, o mawad-an sa pagsalig Kaniya. Gipangga pag-ayo sa Ginoo ang mga tawong nagmasulub-on ug mga dinaugdaug. Ang pan ug tubig nga gihatag kang Elias sa kamingawan nagpahinumdom sa uban pang mga milagro nga gihimo ug gipakita sa Ginoo alang sa iyang katawhan.

Sa atong tawhanong kinabuhi usab, adunay mga panahon nga moabot gayud ang kalaay ug kangitngit sa kinabuhi, ilabi na kung makasinati kita og mga dagkong pagsulay. Usahay basulon nato ang Ginoo, usahay maluya ang atong pagtuo sa Ginoo, usahay moingon nalang gayud kita nga itugyan nalang nako kanimo Ginoo. Apan, kung atong hinuklugan ang atong mga kasinatian makita nato ang kamot sa Ginoo nga naglihok taliwala sa mga kalisud ug mga kasakitan. Adunay mga panghitabo nga wala damha, sama sa mga kalamidad nga nasinati sa daghang katawhan nga maglisud pagdawat ang uban sa mga panghitabo, apan sa lintunganay adunay mga pamaagi ang Ginoo diin lyang gipadayag ang Iyang gugma sa matag usa kanato ilabina niadtong nagkinahanglan kaayo sa Iyang tabang. Ug ato usab nasinati nga sa panahon sa mga kalisdanan nagmasaligon kita sa Ginoo, ug kanunay naningkamot nga makasimba gayud sa adlaw nga Dominggo, mogahin og panahon sa Ginoo kay sa maong paagi atong mabati ang kahupayan. Kini nga kasinatian nagpadayag sa usa ka mahinungdanong kasinatian nga atong matandi sa kasinatian ni Propeta Elias, diin panahon sa iyang kalisdanan giluwas ug gipabati siya sa gugma ug presenya sa mahigugmaong Dios.

Sa atong pagpamalandong ato kanunay nga hinumduman nga si Kristo nga mipadayag nga Siya ang Pan nga gikan sa langit aron maghatag kanato og kinabuhi. Kung kita hingpit ang atong pagtoo diha sa gugma sa Ginoo ug masaligon nga motahan sa atong kaugalingon alang sa kabulahahan sa tanang katawhan, nan unsa pa may atong angay nga kabalak- an? Wala gayud, tungod kay nasayod kita nga ang Dios kanunay nga nag-atiman kanato sa tanang higayon sa atong kinabuhi. Ug sa katapusan, usa ka hagit natong tanan nga mamahimo unta kitang PAN o pagkaon ngadto sa uban.

Giya alang sa Pamalandong:

1. Sa panahon nga nakasinati kita og mga kalisdanan sa kinabuhi, nabati ba nato ang presensya sa Ginoo?

2. Nakabaton ba kita og kalig-on ug kabaskog sa pag- atubang sa mga pagsulay sa atong kinabuhi?

F. Katilingbanong Pag-ampo 

Pangulo: Sahiniusang tingog ato karong ihalad sa Makagagahum nga Amahan ang atong mga pag-ampo ug panginahanglan inubanan sa atong kinasingkasing nga pagsalig. Sa matag pag-ampo kita motubag:

GINOO, DUNGA KAMI.

1. Mag-ampo kita alang sa mga ministro sa Simbahan, nga diha sa ilang pagpikaspikas sa pan sa kinabuhi ilang gisangyaw ang buhing Pulong nga naghatag og kabag-ohan sa tanan. Tungod niini kita moingon...

2. Mag-ampo kita alang sa mga pangulo sa atong panggamhanan, maningkamot unta sila sa kaangayan sa tanan aron dunay kahiusahan sa tanang katawhan. Tungod  niini kita moingon...

3. Mag-ampo kita alang sa mga ginikanan, nga panalanginan unta sila sa Dios aron ang ilang paghigugma sa usa'g usa magasukad sa gugma ni Kristo. Tungod niini kita moingon...

4. Mag-ampo kita alang sa Kristohanong katilingban nga molambo unta ang tanang sakop niini ug ang panig-ingnan sa kinabuhi ni Kristo maoy huptan aron anaa ang madasigon ug mainiton nga pag-alagad sa usa'g usa. Tungod niini kita moingon...

5. Mag-ampo kita alang sa atong mga kaigsoonan nga mipanaw na ning kalibutana nga sila makaambit na sa Langitnong Bangkite ug ila nang madawat ang kalipay'ng dayon. Tungod niini kita moingon...

6. Mga-ampo kita alang sa atong kaugalingon nga katuyuan diha sa kahilum.

Pangulo: Manggihatagon nga Dios, uban sa dako namong pagtoo ug paglaum, dungga kining pag-ampo nga among gihalad karon. Masaligon kami kanunay sa walay puas Nimong kalooy ug grasya. Kini among gipangayo pinaagi ni Kristo Imong Bugtong Anak ug among Ginoo hangtud sa kahangturan. Amen.