IKA-NAPULO'G-PITO NGA DOMINGGO

 IKA-NAPULO'G-PITO NGA DOMINGGO

A. Unang Basahon

2 Hari 4:42-44

Ang pagbasa gikuha gikan sa ikaduhang basahon sa Mga Hari.

Sa laing higayon may tawo nga gikan sa Baal sa lisa nga nagdalag bayente ka pan nga hinimo sa sebada nga unang abot. Nagdala usab siya'g bag-ong inani nga sebada aron ipakaon niya sa mga propeta. Si Eliseo miingon kang Gihasi, "Ihatag kini sa mga tawo aron kan-on nila."

Apan ang iyang sulugoon miingon, "Dili kini paigo sa usa ka gatos ka tawo."

Busa miingon si Eliseo pag-usab, "Ihatag kini sa mga tawo aron kan- on nila kay nag-ingon ang Ginoo nga dili kini mahurot nila." Busa gidulot kini sa sulugoon ngadto sa mga tawo. Nangaon sila ug may nasalin sumala sa giingon sa Ginoo.

Mga igsoon, ang Pulong sa Ginoo.

B. Salmo Responsoryo

Salmo 145:10-11,15-16,17-18

Tubag (R) - Ang kamot sa Ginoo maoy nagapakaon kanato; iyang gitagbaw ang tanan natong panginahanglan.

Papasalamata kanimo ang tanan mong mga binuhat, O Ginoo ug padayega kanimo ang tanan nga nagatoo kanimo. Pasultiha sila bahin sa himaya sa imong gingharian ug pasuginla sila sa imong gahum. (R)

Ang mata sa tanan nagatan-aw nga malaumon kanimo, ug gihatagan mo sila sa ilang kalan-on sa husto nga panahon; gibukhad mo ang imong kamot ug gitagbaw mo ang tinguha sa tanang buhi. (R)

Ang Ginoo matarong diha sa tanan niyang mga paagi ug balaan diha sa tanang mga buhat. Ang Ginoo haduol sa tanan nga nagasangpit kaniya, sa tanan nga nagasangpit kaniya diha sa kamatuoran. (R)

C. Ikaduhang Basahon

Efeso 4:1-6

Ang pagbasa gikuha gikan sa sulat ni San Pablo ngadto sa taga-Efeso.

Busa ako nga binilanggo tungod kay nag-alagad ako sa Ginoo, mag- awhag kaninyo sa pagkinabuhi nga angay gayud sa buluhaton sa mga tinawag sa Dios. Pagmapaubsanon kamo, pagmaaghop, ug pagmapailubon kanunay. Ipakita ang inyong gugma pinaagi sa pagtinabangay. Paningkamoti aron motunhay ang inyong panaghiusa nga hinatag sa Espiritu, pinaagi sa panagdait nga nagbugkos kaninyo. May usa lamang ka lawas ug usa ka Espiritu, ingon nga may usa lamang ka paglaom, ug alang niini gitawag kamo sa Dios. May usa lamang ka Ginoo, usa ka pagtoo, ug usa ka bunyag; may usa lamang ka Dios ug Amahan sa tanang mga tawo, nga mao ang labaw sa tanang mga tawo, nga mao ang labaw sa tanan ug anaa sa tanan.

Mga igsoon, ang Pulong sa Ginoo.

D. Ebanghelyo

Juan 6:1-15

Ang pagsangyaw sa Maayong Balita sumala si San Juan.

Human niini mibalik si Jesus pagtabok sa Lanaw sa Galilea sa may

Tiberias. Misunod kaniya ang daghan kaayong tawo, kay nakita man nila ang

mga milagro sa iyang pag-ayo sa mga masakiton. Mitungas si Jesus sa usa ka bungtod ug milingkod didto uban sa iyang mga tinun-an. Niadtong higayona duol na ang Pangilin sa Pagsaylo. Unya mitan-aw si Jesus sa libot niya ug sa pagkakita niya sa daghang mga tawo nga nagpaingon kaniya, miingon siya kang Felipe, "Asa man kita makapalit og tinapay aron ipakaon niining katawhan?" Apan ang tinuod mao nga nahibalo na siya kon unsay iyang buhaton.

Si Felipe mitubag, "Bisa'g mopalit kitag pan nga nagkantidad og duha ka gatus (200) ka denario, dili paigo nga ipakaon niining mga tawhana.

Usa sa iyang mga tinun-an nga si Andres, igsoon ni Simon Pedro, miingon kang Jesus, "Aniay batang lalaki dinhi nga may lima ka pan nga sebada ug duha ka isda. Apan mag-unsa man kini alang niining tawo?"

Si Jesus miingon kanila, "Palingkora ang mga tawo." May daghang balili niadtong dapita. Busa nanglingkod ang mga tawo nga may gidaghanon nga mga lima ka libo (5,000). Unya gikuha ni Jesus ang pan, gipasalamatan niya ang Dios, ug giapod-apod niya kini ngadto sa mga tawo. Mao usab kini ang iyang gibuhat sa isda, ug silang tanan nakakaon kutob sa ilang gusto. Sa nangabusog na silang tanan, miingon siya sa iyang mga tinun-an, "Hiposa ninyo ang mga salin aron walay mausik." Busa gihipos nila ang tanan, ug ang mga salin sa lima ka pan nga sebada nga gikaon sa mga tawo napulo'g- duha 12 ka bukag.

Sa pagkakita sa mga tawo sa milagro nga nabuhat ni Jesus, miingon sila, "Sa walay duhaduha siya gayud ang Propeta nga moanhi sa kalibutan." Apan, nakamatikod si Jesus nga moduol sila kaniya ug kuhaon siya aron pugson nga mahimong ilang hari; busa mibalik siya nga nag-inusara ngadto sa kabungtoran.

Mga igsoon, ang Maayong Balita sa atong Ginoo.

E. Komentaryo 

Tema: Si Jesus ang Katagbawan sa atong Kalag!

Naila kitang mga Pilipino dili lang sa atong pagka- "family oriented" nga mao ang pagkasuod nato sa atong pamilya, kondili sa ato usab nga kinaiya nga gitawag og pagka "meal oriented". Atong mamatikdan kini sa atong pamilya, ug sa uban pang mga panghitabo o okasyon sa atong kinabuhi. Ang pagkaon usa gayud sa mga timailhan nga nagpadayag sa atong pagkasuod sa pamilya. Tungod kay kasagaran sa pagkaon mahitabo ang atong pagbinayloay sa atong mga kasinatian sa atong matag adlaw nga pagkinabuhi.

Ganahan gyud kitang magsaulog matag pista ug mag-andam aron anaa kitay ikadalit sa atong mga katagilungsod o katagibaryo. Ug dinhi niining maong selebrasyon atong mapadayag ang atong pagkamaabiabihon ug pagkamaalagaron. "Dayon mo pare! Hapit sa diri mare! Maayong pista sa tanan! Naay kaon diha?" Mao kini ang mga pulong nga kasagarang mabungat nato kanunay.

Gani kini nga kasinatian sa pagka "meal oriented" natong mga Pinoy, bisan gamay ang atong giandam nga pagkaon, masinati gayod nato nga magkahiusa kita diha sa atong pag-estoryahay, pagpangumustahay, mga nagkadaiyang balita ug uban pa. Dili ikalimod nga anaa ang kalipay ug panagsuod sa matag usa. Usahay usab gamiton nato kining maong higayon nga makapadayag kita sa atong mga pagbati ug mga problema sa kinabuhi. Nga bisan og dyutay ang atong gipanag-ambitan nga pagkaon mibati kita sa tumang kalipay.

Ang atong mga pagbasa karong Dominggoha ilabina ang atong Ebanghelyo, nagpunting ug naghisgot sa milagro nga gibuhat ni Jesus nga mao ang pagpakaon sa lima ka libo ka tawo. Ang paghatag ni Kristo ug ang pag-ambit sa mga katawhan sa grasya nga gihatag sa Amahan, iyang gihatag o gipaambit aron ila pud kining ikapaambit sa uban. Atong makita ang tulo ka nagkalainlaing lihok nga gipakita dinhi. Una, ang pagkamaloloy-on nga gipakita sa atong Ginoo, tungod kay sa pagkakita niya sa katawhan, nibati siya og kalooy kanila, ug iyang gitagbaw ang ilang kagutom. Nagpamatuod kini nga ang atong Ginoo mahigugmaon ug mapinanggaon kaayo kanatong lyang mga katawhan. Andam siya kanunay sa paghatag kanato sa atong mga gikinahanglan, kung kini sibo sa iyang kabubut-on. Ikaduha, mao ang batasan nga gipakita kanato ni Felipe. Gipangutana siya ni Jesus, "Asa man kita makapalit og igong pagkaon alang niining mga tawhana? (Jn. 6:5) Ug mitubag si Felipe, Bisan mopalit kitag pan nga balig 200 ka denaryo dili paigo nga ipakaon niining mga tawhana...(Jn. 6:7) Apan sayod kita nga dili kini maoy buot ipasabot ni Jesus, kondili iya lamang gisulayan ang pagtoo ni Felipe ngadto kaniya. Ug sa gikaingon na, wala kini nasabtan ni Felipe. Hinuon ang iyang pagsabot mao ang tawhanon lamang nga panglantaw sa pangutana ni Jesus. Kining maong batasan ato usab nga nakita sa atong unang pagbasa. (2 Hari 4:42-44). Sa dihang nagpanuko usab sa pagbuhat ang suluguon sa gisugo kaniya ni Propeta Eliseo.

Duha ka batasan ang gipakita kanato karon, diin atong mapanaminan ug mahinuklugan sa mga higayon nga makabuhat usab kita sa samang batasan nga gibuhat ni Felipe ug sa suluguon: ang pagkadugay nga makasabot sa kabubut-on sa Dios kanato.

Ikatulo, sa paghatag ni Jesus sa pan ngadto sa katawhan, sa hinayhinay nga pamaagi iyang gipasabot ang pagtulun-an nga sa dili madugay, iya nang ipadayag sa katawhan nga Siya mao ang pan nga naghatag sa kinabuhi. Sa iyang pagbuhat sa maong milagro, iyang giandam ang katawhan sa labing dako pang kamatuoran nga iyang ipadayag sa umaabot.

Sa pagkasaksi sa katawhan sa milagro ni Jesus, nakamatngon sila nga si Jesus mao ang propeta nga moanhi aron sa pagluwas ug paghaw-as kanila sa kaulipnan sa Romanhong pagdumala ug pagpahiuli sa kanhi mahimayaong gingharian ni Hari David. Dugang pa, atong mabasa nga ila unta siyang pugson aron mahimo nilang Hari.(Jn.6:15) Apan si Jesus midumili ug mipahilayo kanila, kay sa gikaingon na, ang iyang paghari dili niining kalibutana. Mianhi siya sa kalibutan aron pagsaksi sa kamatuoran ug pagsangyaw sa Gingharian sa Dios!

Pinaagi niining tulo ka mga punto, atong makutlo kining maong mga pagtulun-an: Una, ang atong Ginoong Dios nga maloloy-on, nagtan-aw gayod kanunay sa atong mga panginahanglan. Ang iyang malumo nga kasingkasing andam kanunay sa pagtabang kanato. Ang atong obligasyon mao ang pagpaambit usab sa mga grasya nga atong nadawat. Ikaduha, sa kadako sa paghigugma ug kahupong sa mga panalangin nga gihatag Niya kanato, wala na kitay rason nga mabugnaw pa sa atong pagtoo sa mga panahon nga makasinati kita og pagsulay ug kalisdanan sa kinabuhi. Ug ikatulo, human kita makasaksi sa kahibulungang mga butang nga gipakita sa Dios kanato, makahimo kita sa pag-ila kaniya, isip atong Dios ug Manluluwas ug mahiusa unta kita kaniya... sa usa ka lawas ug espiritu, sama nga gitawag usab kita nga mahiusa sa usa ka lawas, usa ka pagtoo, ug usa ka Ginoo! (Efeso: 4:3-6).

Pangayoon nato sa Ginoo ang grasya sa pagtoo ug kalig-on aron iya kitang lamdagan sa atong paglawig ngadto sa Iyang gisaad nga gingharian kanato. Hinaut pa unta.

Giya alang sa Pamalandong:

1. Ato bang nabati kanunay ang mga milagro nga ato nang nasinati sa atong kinabuhi?

2. Makanunayon ba kitang nakighiusa kang Jesus diha sa atong mga pag-ampo?

F. Katilingbanong Pag-ampo 

Pangulo: Sa hiniusang tingog ato karong ipadayag ang atong mga pag-ampo ug panginahanglan sa atong Langitnong Amahan kinsa kanunay nga nag-atiman kanato. Sa matag pag-ampo kita motubag: 

GINOO, DUNGGA ANG AMONG PAG-AMPO.

1. Nga ang Simbahan inubanan sa mga pangulo niini ang Santo Papa, mga Obispo ug kaparian, maoy matinud-anong saksi sa pagpatunhay sa kahiusahan, kalinaw ug gugma sa matag usa. Mag-ampo kita.

2. Nga ang nangulo sa atong nasud hatagan unta nila og dakung pagtagad ang nag- unang panginahanglan sa tanang katawhan ilabina ang atong mga kaigsoonan nga nahiagum sa mga katalagman. Mag-ampo kita.

3. Nga ang matag Kristohanong katilingban makasinati sa presensya ug gugma sa Dios aron molahutay kining mobarog bisan pa sa mga pagsulay nga ilang mahiaguman. Mag-ampo kita

4. Nga ang atong mga kaigsoonan nga nag-antus sa tumang kawad-on, makabaton na og kahupayan diha sa presensya sa Dios pinaagi sa mga instrumento nga gihatag sa Dios kanila nga maoy nitubag sa ilang mga panginahanglan. Mag-ampo kita.

5. Nga ang atong mga igsoon nga mipanaw na, mahatagan na unta og kapasayloan ang ilang mga kasaypanan nga nabuhat sa buhi pa sila ug makasulod na sa lawak nga gitagana sa Dios kanila. Mag-ampo kita.

6. Nga ang atong kaugalingon nga katuyuan ato kining ihalad diha sa kahilum.

Pangulo: Makagagahum nga Dios, kami misalig kanunay sa Imong walay puas nga panabang. Itugot nga ang mga pag-ampo nga among gihalad karon kahatagan na unta og katumanan subay sa Imong maayong kabubut- on. Kini among gipangayo pinaagi ni Kristo among Ginoo ug Manunubos. Amen.