LAWAS UG DUGO NI KRISTO

 LAWAS UG DUGO NI KRISTO

[Dominggo human sa Santissima Trinidad]

A. Unang Basahon

Exodo 24:3-8

Ang pagbasa gikuha gikan sa basahon sa Exodo.

Busa giadto ni Moises ang katawhan ug gisuginlan sa tanan nga gisugo sa Ginoo. Ang tibuok Israel nagdungan pagtubag, "Buhaton namo ang tanan nga gisulti sa Ginoo." Gisulat ni Moises ang tanang nga gisugo sa Ginoo. Unya sayo kaayo sa buntag sa pagkasunod adlaw, nagtukod siya'g halaran sa tiilan sa bukid, ug nagbutang siya'g dose ka bato nga handumanan alang sa napulo'g- duha ka banay sa Israel. Unya nagsugo siya'g mga batan-ong lalaki aron paghimo'g mga halad nga sunogon, ug pag-ihaw og torong baka aron ihalad ngadto sa Ginoo, alang sa usa ka halad sa panaghiusa. Unya gikuha ni Moises ang katunga sa dugo ug gisulod sa mga dulang; ang katunga gisablig niya sa halaran. Unya gikuha niya ang basahon sa kasabutan ug gikusog niya kini pagbasa ngadto sa katawhan, ug sila miingon, "Tumanon namo ang tanang gisugo sa Ginoo ug sundon namo siya."

Unya gikuha ni Moises ang dugo nga diha sa mga dulang ug gisablig sa katawhan. Siya miingon, "Mao kini ang dugo nga naglig-on sa kasabutan nga gihimo sa Ginoo uban kaninyo sa paghatag niya niining tanang mga sugo."

Mga igsoon, ang Pulong sa Ginoo.

B. Salmo Responsoryo

Salmo 116:12-13,15-16,17-18

Tubag (R) - Imnon ko ang kopa sa kaluwasan ug sangpiton ko ang ngalan sa Ginoo.

Unsaon ko pagbalus sa Ginoo sa tanang mga kaayohan nga iyang nahimo kanako? Imnon ko ang kopa sa kaluwasan ug sangpiton ko ang ngalan sa Ginoo. (R)

Bililhon sa mga mata sa Ginoo ang kamatayon sa iyang matinumanon nga mga sulugoon. Ako imong sulugoon, ang anak sa imong ulipong babaye; imong gilugti ang akong mga talikala. (R)

Kanimo akong ihalad ang sakripisyo sa pasalamat, ug sangpiton ko ang ngalan sa Ginoo. Tumanaon ko ang akong panaad ngadto sa Ginoo diha sa atubangan sa tibuok niyang lungsod. (R)

C. Ikaduhang Basahon

Hebreo 9:11-15

Ang pagbasa gikuha gikan sa sulat ngadto sa mga Hebreo.

Apan miabot na si Kristo ingon nga Pangulong Pari sa mga maayong butang nga ania na dinhi. Mas halangdon ug mas hingpit ang tolda nga iyang gialagaran kay dili kini binuhat sa mga tawo, sa ato pa, dili tipik niining kalibutana. Sa pag-adto ni Kristo sa tolda ug pagsulod sa makausa ug alang sa tanan ngadto sa Labing Balaan nga Dapit, wala siya magdala sa dugo sa mga kanding ug sa mga nating baka aron ihalad, kondili gidala niya ang iyang kaugalingong dugo ug nakakab-ot alang kanato sa kaluwasan nga walay katapusan. Ang dugo sa mga kanding ug toro nga baka ug ang abo sa sinunog nga nating baka isablig ngadto sa mga tawo nga dili hinlo sumala sa seremonyas, ug naghinlo kini kanila pinaagi sa paghugas sa kahugawan nila sumala sa seremonyas. Sanglit tinuod kini, unsa pa kadako ang nahimo sa dugo ni Kristo! Pinaagi sa walay katapusang Espiritu gihalad niya ang iyang kaugalingon ingon nga hingpit nga halad ngadto sa Dios. Ang iyang dugo maoy maghinlo sa atong mga konsensiya sa walay kapuslanang mga buhat, aron mag-alagad kita sa buhing Dios.

Tungod niini si Kristo mao ang naghimo sa usa ka bag-ong kasabutan, aron kadtong gitawag sa Dios makadawat sa walay katapusang mga panalangin nga gisaad sa Dios. Mahimo kini tungod kay may kamatayon man nga nagluwas sa mga tawo gikan sa mga sala nga nahimo nila samtang ubos pa sila sa unang kasabutan.

Mga igsoon, ang Pulong sa Ginoo.

D. Ebanghelyo

Marcos 14:12-16,22-26

Ang pagsangyaw sa Maayong Balita sumala ni San Marcos.

Sa unang adlaw sa Pangilin sa Pan nga Walay Patubo, ang adlaw nga maoy iihaw sa mga karnero nga kan-on inigsaulog sa Pangilin sa Pagsaylo, ang mga tinun-an nangutana kang Jesus, "Asa mo man kami paadtoa aron andamon namo ang panihapon?"

Ug gisugo ni Jesus ang duha kanila ug giingnan, "Pangadto kamo sa siyudad, ug usa ka tawo nga naglukdo'g usa ka tadyaw nga tubig motagbo kaninyo. Kuyog kamo kaniya ngadto sa balay nga iyang adtoan, ug ingna ang tag-iya sa balay, Ang Magtutudlo nag-ingon, Hain ang kuwarto alang kanako diin ako makigsalo sa akong mga tinun-an sa panihapon sa Pasko?' Unya tultolan kamo niya sa usa ka dakong kuwarto sa itaas nga sangkap sa galamiton ug iandam ninyo didto ang atong pagkaon."

Ug miadto ang mga tinun-an sa siyudad ug ilang nakaplagan ang tanan sumala sa giingon ni Jesus. Didto giandam nila ang panihapon.

Samtang nangaon sila, mikuha si Jesus sa pan, nagpasalamat, ug gipikaspikas niya kini ug gihatag ngadto sa iyang mga tinun-an, "Kan-a ninyo kini," miingon siya, "kini mao ang akong lawas.”

Unya gikuha niya ang kupa, gipasalamatan ang Dios, ug gitunol kanila; ug silang tanan nanginom niini. Miingon si Jesus, "Kini mao ang akong dugo nga giula alang sa daghan; ang dugo nga naglig-on sa kasabutan sa Dios. Ug sultihan ko kamo nga dili gayud ako mousab pag-inom niining bino hangtud sa adlaw nga moinom ako sa bag-ong bino didto sa Gingharian sa Dios."

Unya nag-awit sila og usa ka awit sa pagdayeg sa Dios ug nangadto sa Bungtod sa mga Olibo.

Mga igsoon, ang Maayong Balita sa atong Ginoo.

E. Komentaryo

Tema: Sakripisyo, Hagit sa matag usa.

Karong adlawa atong gisaulog ang Solemnidad sa Lawas ug Dugo ni Kristo. Kining maong kapistahan, nagpahinumdom kanato sa grasya sa kaluwasan ug sa atong tawag isip mga sumusunod ni Kristo.

Ang atong mga pagbasa ilabina sa Ebanghelyo karon nagsaysay mahitungod sa paghalad sa atong Ginoong Jesukristo sa iyang Lawas ug Dugo nga maoy hinungdan nga kita nakabaton sa atong kaluwasan ug kinabuhing walay katapusan. Dinhi makakutlo kita og mga importanteng punto nga mao ang: atong kaluwasan, atong gipaabot nga kinabuhi nga dili matapos ug ang pagsakripisyo alang sa uban.

Sa unang punto, mao ang pagkamatinumanon ni Kristo sa kabubut-on sa iyang Amahan. Mao kini ang pinakamahinungdanong elemento nganong makaangkon kita sa kaluwasan ug sa kinabuhing dili matapos. Kung dili tungod niini dili gayod kita maluwas sa atong pagkamakasasala. Ang ikaduhang punto mao ang iyang walay sukod nga gugma alang kanatong iyang mga katawhan. Ug kining tanan tataw kaayo nga gihulagway sa mga pagbasa karong adlawa. Sa Ebanghelyo ni San Markos, nagpadayag kini sa pagkamasinugtanon ni Kristo sa Amahan pinaagi sa matinud-anon niyang paghalad sa iyang kaugalingon nga maoy gisakripisyo tungod ug alang kanatong tanan. Sa basahon sa taga Hebreo gisaysay nga ang Lawas ug Dugo mismo ni Kristo ang gihalad nga mao ang katumanan ug kahingpitan sa plano sa Amahan. Gihalad ni Kristo mismo nga mahigugmaon ang lyang Lawas ug Dugo tungod ug alang kanato aron kita maluwas sa atong mga kasal-anan. Sa ato pa ang pagkamatinumanon ug ang pagkamahigugmaon gayod ni Kristo sa kabubut-on sa iyang Amahan maoy hinungdan nga kita nakaangkon sa atong kaluwasan.

Kining tanan gibuhat ni Kristo, ang iyang pagsakripisyo, naghatag kanato og usa ka dakong hagit sa matag usa kanato. Andam ba kita sa paghatag sa atong ginagmay nga mga sakripisyo alang sa uban? Sa atong panahon karon nagkadaiyang mga panghitabo nga naghatag kanato og dakung hagit sa pagtahan sa atong kaugalingon alang sa uban. Ug niining pagsaulog nato sa kapistahan sa Lawas ug Dugo ni Kristo, mao unta ang makapahigmata kanato nga kita maaghat sa paghalad sa atong kaugalingon sa pag- alagad. Bisan sa ginagmay nga paagi daku na kaayo kini og bili alang niadtong nanginahanglan. Busa dili kita mag-usik sa atong panahon. Ug uban sa grasya sa Dios dinuyugan sa atong kinasingkasing nga pag- ampo magmaalagaron unta kita sa atong isigkatawo.

Giya alang sa Pamalandong:

1. Bisan pa man sa mga kalisod nga atong nasinati, andam pa ba kita sa pag-alagad sa uban?

2. Matinud-anon ba natong gitahan ang atong kaugalingon alang sa kaayohan sa isigkatawo?

F. Katilingbanong Pag-ampo 

Pangulo: Mga igsoon, niining pagsaulog nato sa Solemnidad sa Lawas ug Dugo ni Kristo kita gidasig sa pagpakighiusa Kaniya diha sa atong matag adlaw nga pagkinabuhi kay Siya man ang tinubdan ug tubag sa tanan natong mga panginahanglan. Sa matag pag-ampo kita motubag:

DIOS SA GUGMA, DUNGGA KAMI.

1. Amahan sa gugma Imong gitugyan ang Imong anak alang sa kabulahanan sa Imong Simbahan. Hatagi og igong kusog ug kadasig ang mga nag-alagad niini ang Santo Papa, mga Obispo ug mga kaparian. Mag-ampo kita.

2. Amahan nga maloloy-on, itugot nga ang among mga pangulo sa nasud makabaton og mga maayong desisyon nga haum sa Imong kabubut-on alang sa kalamboan sa tanan. Mag-ampo kita.

3. Amahan nga tinubdan sa kinabuhi, lig-ona ug hatagig kadasig ang among mga igsoon nga nag-antus sa kapit-os sa kinabuhi nga dili sila kawad-an og paglaum sa pagpadayon sa pagpakabuhi kay ang Dios sa kanunay nag-atiman kanila pinaagi sa mga instrumento nga Iyang gipadala. Mag-ampo kita.

4. Amahan nga tinubdan sa grasya, himoa kaming angayan sa matag dawat namo sa Lawas ug Dugo ni Kristo nga bisan pa sa among pagkamasalaypon sa gihapon gihatagan Mo kami og hiagayon nga mahiduol Kanimo kanunay. Mag-ampo kita.

5. Amahan nga malumo og kasingkasing, makaamgo unta ang tanang katawhan sa kabililhon sa Lawas ug Dugo ni Kristo diha sa kinasingkasing nga pagdawat niini pinaagi sa makanunayong pag-apil sa Santos nga Yukaristiya. Mag-ampo kita.

6. Amahan diha sa kahilum among ihalad ang among kaugalingong katuyuan.

Pangulo: Amahan nga walay kinutuban, dungga ang pangamuyo sa Imong katawhan nga nangandoy nga mahiusa kanunay sa Imong bililhong Anak nga namatay alang sa among kaluwasan. Kini among gipangayo pinaagi ni Kristo among Ginoo ug Manunubos. Amen.