IKAUPAT NGA DOMINGGO SA PAGKABANHAW

 IKAUPAT NGA DOMINGGO SA PAGKABANHAW

A. Unang Basahon

Buhat 4:8-12

Ang pagbasa gikuha gikan sa mga Buhat sa mga Apostoles

Si Pedro nga napuno sa Espiritu Santo misulti, "Mga pangulo sa katawhan ug mga kadagkoan sa Templo: kon kami gisukit-sukit karon mahitungod sa maayong buhat nga among nahimo alang sa bakol, ug sa unsang paagiha siya naayo, nan, angay masayod kamong tanan ug ang tanang katawhan sa Israel, nga kining tawhana nga nagtindog dinhi sa inyong atubangan naayo sa hingpit pinaagi sa gahom sa ngalan ni Jeuskristo nga Nazaretnon-kadtong inyong gilansang sa krus ug unya gibanhaw sumala sa Kasulatan nga nag-ingon, Ang bato nga gisalikway ninyong mga magtutukod og balay nahimo hinoon nga labing importanteng bato!'

Ang kaluwasan makaplagan lamang diha kaniya, kay wala nay laing ngalan sa tibuok kalibutan nga gihatag sa Dios ngadto sa katawhan nga makaluwas kanato."

Mga igsoon, ang Pulong sa Ginoo.

B. Salmo Responsoryo

Salmo 118:1,8-9,21-23,26,27,29

Tubag (R) - Ang bato nga gisalikway sa mga magtutukod nahimong usa ka importanting bato.

Pasalamatan ko ikaw kay gipamati mo ako ug nahimo kang akong manluluwas. Ang bato nga gisalikway sa mga magtutukod nahimong batong patukuranan. Sa Ginoo nahimo kini; katingalahan kini atubangan sa atong mga mata. (R)

Daygon siya nga nagaanhi sa ngalan sa Ginoo; daygon ikaw namo gikan sa balay sa Ginoo. Pasalamatan ko ikaw, kay gipatalinghogan mo ako ug nahimo kang akong manluluwas. Pasalamati ninyo ang Ginoo, kay siya maayo; kay ang iyang kalooy nagalungtad hangtud sa kahangturan. (R)

Ug ngadto kaniya mabuhi ang akong kalag; ang akong mga anak mag-alagad kaniya. Ang umaabot nga kaliwat suginlan unta bahin sa Ginoo aron magsangyaw sila ngadto sa katawhan nga wala pa matawo sa katarong nga iyang gipakita. (R)

C. Ikaduhang Basahon

1 Juan 3:1-2

Ang pagbasa gikuha gikan sa unang sulat ni San Juan.

Palandonga ninyo unsa kadako ang paghigugma sa Amahan kanato! Gihigugma kita niya pag-ayo nga tungod niini giisip kitang mga anak sa Dios ug kini matuod gayud. Wala makaila kanato ang kalibutan, kay wala man kini makaila sa Dios.

Minahal kong mga igsoon, kita karon mga anak na sa Dios, apan wala pa nato matino kon maunsa gayud kita. Ang nasayran nato mao nga inigpadayag na ni Kristo mahisama kita kaniya, kay nakita man nato siya sa iyang pagkamao gayod.

Mga igsoon, ang Pulong sa Ginoo.

D. Ebanghelyo

Juan 10:11-18

Ang pagsangyaw sa Maayong Balita sumala ni San Juan.

Si Jesus miingon, "Ako ang maayong magbalantay sa mga karnero. Ang maayong magbalantay andam sa pagpakamatay alang sa mga karnero. Ang sinuholan lamang modagan inigkakita niya sa lobo nga nagpaingon na kanila, kay dili man siya maayong magbalantay ug tag-iya sa mga karnero; busa tukbon sila sa lobo ug patibulaagon. Ang sinuholan modagan sanglit sinuholan man lamang ug walay pagtagad sa mga karnero. Ako ang maayong magbalantay sa mga karnero. Ingon nga ang Amahan nakaila kanako ug ako nakaila sa Amahan, nakaila usab ako sa akong mga karnero ug sila nakaila kanako. Ug ako andam sa pagpakamatay alang kanila. Ako adunay ubang mga karnero nga wala mahisakop niining torila. Kinahanglan dad-on ko usab sila nganhi ug mamati sila sa akong tingog ug mahimo silang usa na lamang ka panon ubos sa usa ka magbalantay.

"Ang Amahan nahigugma kanako kay ako andam man pagtugyan sa akong kinabuhi aron madawat ko kini pagbalik. Walay makahimo pagpatay kanako; magpakamatay ako sa kaugalingon kong pagbuot. May gahom ako sa paghalad sa akong kinabuhi, ug may gahom usab ako pagbawi niini. Kini ang gisugo kanako sa akong Amahan."

Mga igsoon, ang Maayong Balita sa atong Ginoo.

E. Komentaryo

Tema: Ang Maayong Magbalantay!

Si Jesus ang Maayong Magbalantay ug kita mao ang mga karnero sa Iyang panon. Kitang katawhan giila nga mga karnero ni Kristo. Sa pagkatinuod ang karnero nga hayop mao ang pinaka ubos sa klase sa mga hayop. Kay kining klase nga hayop, magdepende kanunay sa iyang magbalantay ug kung mahisalaag kini, dili na siya kahibalo mobalik, mao nga mamatay nalang siya kung atakehon sa mga mabangis nga hayop. Mao na, kung dili maayo ang magbalantay daghan sa iyang mga karnero ang mawala ug mahisalaag.

Diha sa ikaduhang pagbasa sa unang sulat ni San Juan, ang Dios Amahan nga maoy nagbuhat kanato kahibalo sa atong kinaiya mao nga pinaagi sa Iyang dakong gugma gihatagan kita Niya sa pinakamaayo ug kasaligan nga magbalantay. Kahibalo ang Dios nga kini nga magbalantay nakaila sa Iyang panon mao nga dili gayod Niya pasagdan. Kahibalo Siya sa kahuyang niining Iyang mga karnero mao nga makahibalo Siya nga naay nahisalaag ug Iya gayod kining pangitaon ug ibalik sa Iyang panon. Bisan gani ang unang pagbasa sa Buhat sa mga Apostoles, si Pedro pinaagi sa pag- ayo sa maong masakiton iyang gipaila ang matuod nga magbalantay nga maoy nagsugo kanila sa pagpangita sa mga nahisalaag nga mga karnero. Ang Iyang pag ayo sa maong masakiton nagpadayag lamang nga dili gayod niya pasagdan nga mawala ang usa pinaagi sa iyang mga kasakitan sa kinabuhi. Ang kaayohan sa iyang sakit mao ang simbolo sa pagpangita sa iyang kaayohan mao nga nahibalik na siya sa panon. Ang maong Magbalantay mao si Jesukristo ang atong Ginoo ug iya kining gisulti pinaagi sa Ebanghelyo ni San Juan, "Ako ang Maayong Magbalantay, nakaila ako kaninyo ug kamo usab kanako sama nga ang Amahan nakaila kanako". Ug iya kining hingpit nga gipadayag diha sa iyang paghalad sa iyang kaugalingon alang sa kaluwasan natong tanan.

Kung atong balikan pagtan-aw ang atong mga kasinatian kagahapon ug karon, kapila na kaha kita nahisalaag sa panon nga atong giubanan kay tungod magtuman lamang kita sa atong gusto? Dili kita makahibalong maminaw, tungod sa atong garbo nga dili kita gustong manduan. Daghan kanato nga anaa sa kahimtang nga nagsakit nga wala nay kaayuhan, o nahurot ang tanan nga katigayonan tungod sa maong panghitabo. Usahay mawala ang atong pagtuo sa Dios, buot ipasabot nga nahisalaag na kita niini apan ang Ginoo anaa gihapon nangita kanato. Wala kita Niya pasagdi, kuhaon kita Niya pagbalik ug kugoson ug ibalik kita sa panon nga atong gigikanan. Gibuhat Niya kini pinaagi sa Iyang kamatayon ug pagkabanhaw aron atong masabtan ug mailhan nga Siya dili gayod mobiya kanato bisan pa man sa kagahi sa atong ulo ug kasingkasing. Ang Iyang pagtugyan sa Iyang kinabuhi nagpamatuod sa Iyang gisulti nga Siya gayod ang Maayong Magbalantay.

Kita gihagit niining ikaupat nga Dominggo sa Pagkabanhaw sa tinuoray nga pagtuo ug pagsalig Kaniya. Bisan pa man sa tanan natong mga kasal-anan, ug mga kahuyang, andam gihapon Siya sa pag atiman kanato. Kung mahimo pa lang nga mamatay Siya pag-usab aron lamang masabtan nato ug mailhan nga Siya ang Maayong Magbalantay Iya kining buhaton.  Ug gipahinumduman kita Niya kanunay diha sa Santos nga Misa.

Giya alang sa Pamalandong:

1. Kon misalig ug mitoo kita nga si Kristo ang Maayong Magbalantay, duna pa ba kitay angay nga kahadlokan ug kalisangan?

2. Giunsa man nato pagpuyo ang atong kinabuhi, aron sa kanunay mahisakop kita sa panon ni Jesukristo?

F. Katilingbanong Pag-ampo

Tema: Ang Maayong Magbalantay

Pangulo: Mga igsoon, sa hiniusang tingog, ato karong ipadangat sa Langitnong Amahan ang atong mga pag-ampo ug panginahanglan. Sa matag pangamuyo kita motubag:

GINOO NGA MAHIGUGMAON, DUNGGA ΚΑΜΙ.

1. Alang sa atong Santo Papa, mga Obispo ug mga kaparian, mamahimo unta silang mga Maayong Magbalantay sa tanang katawhan nga ilang gialagaran ug makita ug mabati unta sa tanan ang presensya sa nabanhaw'ng Jesus nga maoy magkabig kanila ngadto sa kabag-ohan. Mag-ampo kita.

2. Alang sa atong mga igsoon nga mitahan sa ilang kaugalingon alang sa pagpangalagad sa tanang katawhan nga gamiton unta nila ang ilang gahum sa pagpanalipod sa kinabuhi ug paghatag og kahupayan sa mga nanginahanglan. Mag-ampo kita.

3. Alang sa mga lideres sa matag Kristohanong katilingban nga mahingpit unta ang ilang pagtoo ug pagsalig sa gahum sa Dios nga maoy naghatag kanila og igong kusog sa malahutayong pagpangalagad. Mag-ampo kita.

4. Alang sa atong mga kaigsoonan nga nag-antus sa kawad-on sa kinabuhi nga ila untang makaplagan ug masinati ang presensya sa Dios nga maoy maglig-on sa ilang pagtoo ug paglaum sa pag-atubang sa mga pagsulay nga ilang nahiaguman. Mag-ampo kita.

5. Alang kanatong tanan nga hatagan unta nato og dakung bili si Kristo nga maoy sentro sa atong kinabuhi kay sa paghatag og gimbug-aton sa materyal nga butang nga maoy nahimong dakung babag diha sa atong pagpahiduol sa Dios. Mag-ampo kita.

6. Alang sa atong personal nga katuyuan, ato kining ihalad diha sa kahilum.

Pangulo: Amahan, Imong nadungog ang among mga pag-ampo. Daghan pa ang wala namo mabungat apan sayud kami nga anaa na kini sa Imong maloloy- on nga kasingkasing. Malaumon kami nga Imo kining hatagan_og katumanan kon haum kini sa Imong kabubut-on. Kini among gilauman nga madawat pinaagi ni Kristo among Ginoo. Amen.