SOLEMNIDAD NI SAN JOSE ESPOSO NI MARIA

Marso 19

SAN JOSE, Bana ni SANTA MARIA SOLEMNITY

PASIUNA

Marso 19, 2024

Maayong buntag ug malipayong pista mga igsoon ko diha ni Cristo.

Niadtong Marso 19,1870 gideklara ni Pope Pius IX isip Patron sa sa tibuok simbahang Katoliko si San Jose Esposo ni Maria.

Karong adlawa usab atong gisaulog ang ika-baynte sinko (25) ka tuig nga kapistahan sa atong patron sa katilingban si San Jose-Esposo ni Maria dinhi sa Elenita Heights Subdivision, Catalunan Grande, Davao City.

Ang atong unang pagbasa gikan sa ikaduhang basahon ni Samuel. Atong madungog nga gisultihan sa Ginoo si Natan nga himuon niyang hari ang usa sa iyang mga anak ug lig-unon niya ang iyang gingharian hangtud sa kahangturan.

Ang atong ikaduhang pagbasa gikuha gikan sa sulat ni San Pablo ngadto sa taga-Roma. Kita gidasig sa pagkamasaligon sa pagtoo sa Ginoo, sama kang Abraham nga nakabaton hinuon ug daghang mga kaliwat.

Ang atong Ebanghelyo gikan sa Ebanghelyo sumala ni San Mateo atong madungog nga si San Jose naglaraw sa pagpakigbulag kang Birhen Maria. Apan pinaagi sa damgo iyang gituman ang gisulti sa angel kaniya aron matuman ang kinatibuk-ang laraw sa Dios Amahan nga mao ang pagluwas sa tanang katawhan pinaagi sa Iyang Bugtong Anak.

Ang mangulo sa atong Santos nga Misa mao ang atong halangdong Arsobispo sa Davao, Romulo G. Valles, DD

Palihug manindog alang sa pagsugod sa Santos nga Yukaristiya.

SALMO RESPONSORYO:

"ANG ANAK NI DAVID MABUHI HANGTUD SA KAHANGTURAN."

KATILINGBANONG PAG-AMPO:

LANGITNONG AMAHAN, DUNGGA KAMI.

BASAHON I

2 Sm. 7:4-5, 12-14, 16

KINUTLO GIKAN SA IKADUHANG BASAHON NI SAMUEL

Niadtong gabhiona gisultihan si Natan sa GINOO, "Ingna ang akong alagad nga si David, 'Kini ang gisulti sa GINOO: Buhatan ba ako nimog balay nga akong kapuy-an? Ug inigkamatay mo, ilubong ka tupad sa imong mga katigulangan ug himoon kong hari ang usa sa imong mga anak ug lig-onon ko ang iyang ging- harian. Siya ang magtukod ug usa ka templo alang sa akong ngalan ug palung- taron ko ang trono sa iyang gingharian hangtod sa kahangturan. Ako maiyang amahan, ug siya maakong anak. Kon makasala siya, kastigohon ko siya ingon sa buhaton sa usa ka amahan ngadto sa iyang anak. Ug palungtaron ko ang imong banay ug ginghariang hangtod sa hangtod."

ANG PULONG SA GINOO.

SALMO RESPONSORYO

Ps. 89:2-3, 4-5, 27, 29

R. Ang anak ni David mabuhi hangtod sa kahangturan.

Ang mga kaayohan sa Ginoo akong awitan hangtod sa kahangturan; latas sa tanang kaliwatan magsangyaw ang akong ba-ba sa imong kamatinud-anon

Kay miingon ikaw, "Ang akong kaluoy nagabarog sa kahangturan: diha sa langit imong gilig-on ang imong kamatinud-anon."

R. Ang anak ni David mabuhi hangtod sa kahangturan.

"Naghimo akog kasabutan uban sa akong pinili; Namumpa ako kang David akong sulugoon: Hangtod sa kahangturan, lig-onon ko ang imong kaliwat ug pabarugon ko ang imong trono sa tanang kaliwatan.”

R. Ang anak ni David mabuhi hangtod sa kahangturan.

"Moingon siya kanako ‘ikaw akong Amahan; Akong Dios, akong Bato, akong Manluluwas!

Hangtod sa kahangturan patunhayon ko Aang akong kaluoy alang kanimo ug ang akong kasabutan uban kanimo nagabarog nga malig-on.”

R. Ang anak ni David mabuhi hangtod sa kahangturan.

BASAHON II

Rom. 4:13, 16-18, 22

KINUTLO GIKAN SA SULAT NI SAN PABLO NGADTO SA TAGA-ROMA

Mga igsuon: Gisaad sa Dios kang Abraham ug sa iyang mga kaliwat nga maiya ang kalibutan. Gihimo kining saara dili tungod kay gituman ni Abraham ang Balaod, kondili tungod kay mituo siya ug gimatarong sa Dios.

Busa ang saad gipasikad sa pagtuo aron kini maangkon ingon nga gasa sa Dios alang sa tanang kaliwat ni Abraham dili lamang kanila nga nagtuman sa Balaod kondili niadtong nagtuo usab sama kang Abraham. Kay si Abraham mao ang espirituhanong amahan natong tanan. Sumala sa Kasulatan, "Gihimo ko ikaw nga amahan sa daghang mga nasod." Busa ang saad maayo gayod atubangan sa Dios nga gituohan ni Abraham-ang Dios nga nagbanhaw sa mga patay ug maoy nagbuhat sa tanan pinaagi sa pulong. Mituo ug milaom si Abraham bisan sa panahon nga wala na siyay kalaoman nga manganak pa busa nahimo siyang amahan sa daghang mga nasod. Sumala sa Kasulatan, "Ingon niana kadaghan ang imong kaliwat."

Busa si Abraham "gimatarong sa Dios" gumikan sa iyang pagtuo.

ANG PULONG SA GINΟΟ.

EBANGHELYO

Mt. 1:16, 18-21, 24

Kinutlo gikan sa Ebanghelyo sumala ni Mateo

Si Jacob mao ang amahan ni Jose, ang bana ni Maria nga inahan ni Jesus, ang gitawag nga Cristo.

Ug mao kini ang kaagi sa pagkatawo ni Jesucristo. Sa diha nga ang iyang inahan nga si Maria sinayoran na kang Jose, sa walâ pa sila magtipon, nakaplagan nga nagsabak siya sa lalang sa Espiritu Santo. Apan si Jose nga iyang bana, sanglit matarong nga tawo ug dili buòt nga pakaulawan siya, nagtinguha nga biyaan siya sa hilom.

Apan, samtang naghunahuna siya niini, adunay usà ka anghel sa Ginoo mipakita kaniya pinaagi sa damgo ug miingon, "Jose, kaliwat ni David, ayaw kahadlok pagdawat kang Maria nga imong asawa, kay ang iyang gisabak lalang sa Espiritu Santo. Ug manganak siya og usà ka bata nga lalaki, ug hinganlan mo siya og Jesus, kay luwason niya ang iyang katawhan sa ilang mga salâ."

Ug sa pagmata ni Jose, gituman niya ang gisugo sa anghel sa Ginoo ug gidawat niya ang iyang asawa.

Ang Ebanghelyo sa Ginoo.

KATILINGBANONG PAG-AMPO:

March 19, 2024

Obispo: Ato karong ihalad ang atong mga pag-ampo ug panginahanglan sa maluluy-on nga Amahan atol niining pagsaulog nato sa kapistahan ni Sr. San Jose, Esposo ni Maria. Sa matag pangamuyo motubag kita: LANGITNONG AMAHAN, DUNGGA KΑΜΙ.

1. Alang sa mga pangulo sa Simbahan nga giniyahan sa gugma ni Cristo, magmakanunayon ug magmatinud-anon unta sila sa pagtuman sa misyon nga ilang naambitan kang Cristo nga mao ang pagsangyaw sa Maayong Balita. Mag-ampo kita.

2. Alang sa mga lideres sa atong panggamhanan, nilamdagan sa Espiritu Santo, magmadasigon unta sila sa ilang pagpangalagad sa tanang katawhan. Mag-ampo kita.

3. Alang sa tanang lumilihok dinhi sa atong GKK, dinasig sa mga panig-ingnan ni Sr. San Jose, magmalahutayon unta sila sa ilang pagpangalagad inubanan sa gugma ug grasya ni Kristo. Mag-ampo kita.

4. Alang sa mga amahan nga ang hiyas sa pagkamahadlokon sa Dios mao unta ang ilang mabatunan aron mahimo silang ehemplo sa ilang mga kabataan nga maoy maggiya kanila sa pagtamud sa mga Kristohanong pagtulun-an. Mag-ampo kita.

5. Alang sa atong mga igsoon nga nag-antus sa mga balatian mga tigulang ug masakiton, mga binilanggo ug mga nawad-an na ug paglaum sa kinabuhi makabaton unta sila ug kahupayan pinaagi sa mga instrumento nga gipadala sa Dios kanila. Mag-ampo kita.

6. Alang sa mga mapasalamaton sa Ginoo... ilabina nila...hatagan pa unta sila sa Dios og dugang pang grasya aron kanunay silang madasigon sa pagbuhat sa kabubut- on sa Ginoo. Mag-ampo kita.

7. Alang sa atong mga igsoon nga mihalin na niining kalibutan, ilabina nila nga atong gilakip sa atong pag- ampo niining Santos nga Misa, nga ila na untang matagamtaman ang kaluwasan nga gisaad sa langitnong Amahan. Mag-ampo kita.

Pari: Mahigugmaon nga Amahan, tuburan sa kalooy ug gugma, amo nang nahalad Kanimo ang among mga pag-ampo ug panginahanglan. tabangi kami nga makabaton og hingpit nga nga diin ang tanan nga among pagtoo ug pagsalig Kanimo mahuptan nagagikan sa Imong maayong kabubut-on. Kini among gipangayo pinaagi ni Kristo among Ginoo. Amen.