MIYERKOLES SA BADLIS

MIYERKOLES SA BADLIS

A. Unang Basahon

Joel 2:12-18

Ang pagbasa gikuha gikan sa basahon ni Propeta Joel.

Ang Ginoo miingon, "Apan bisan karon, paghinulsol kamo sa kinasingkasing ug balik kanako nga magpuasa, maghilak ug magbangotan. Gisi-a ang inyong kasingkasing ug dili ang inyong mga sinina".

Balik sa Ginoo nga inyong Dios, kay maloloy-on siya kaayo, mapailubon ug matinumanon sa saad; andam siya sa pagpasaylo ug dili sa pagsilot. Basi'g malooy siya kanato ug panalanginan niya ang atong mga uma aron may trigo ug bino kita nga ikahalad kaniya. Patingoga ang trumpeta sa bukid sa Sion; sugo-a ang katawhan sa pagpuasa; tigoma sila aron pagsimba. Tigoma ug andama sila alang sa usa ka balaang panagtigom; iapil ang mga tigulang, ang mga kabataan, lakip ang mga masuso. Bisan ang bag-o pang gikasal kinahanglan moapil sa maong tigom. Ang mga pari nga nag-alagad sa Ginoo sa tunga-tunga sa pultahan ug sa halaran sa templo kinahanglan maghilak ug mag-ampo, "Ginoo, kaloy-i intawon ang katawhan mo. Ayaw itugot nga kami tamayon ug biaybiayon sa ubang mga nasud ug ingnon, 'Hain na man ang inyong Dios?"

Unya gipakita sa Ginoo nga nahingawa siya sa iyang yuta ug nalooy sa iyang katawhan.

Mga igsoon, ang Pulong sa Ginoo.

B. Salmo Responsoryo

Salmo 51:3-4,5-6,12-13,14,17

Tubag (R) - Malooy ka Ginoo, kay nakasala kami.

Kaloy-i ako, O Dios, diha sa imong kaayo: sa kadako sa imong kalooy papasa ang akong mga kalapasan. Hugasi ako'g maayo sa akong mga kasaypanan, ug linisi ako sa akong mga kasal-anan. (R)

Kay giila ko ang akong kalapasan, ug ang akong sala kanunay ania sa akong atubangan: "Kanimo lamang nakasala ako, ug nakabuhat og dautan sa imong atubangan." (R)

Himoa dinhi kanako ang usa ka malinis nga kasingkasing, Ginoo, ug usa ka makanunayong espiritu bag-oh a sulod kanako. Ayaw ako isalikway sa imong atubangan, ug ayaw kuhaa gikan kanako ang imong balaang espiritu. Kaloy-i ako, O Dios, diha sa imong kaayo: sa kadako sa imong kalooy papasa ang akong mga kalapasan. Hugasi ako'g maayo sa akong mga kasaypanan, ug linisi ako sa akong mga kasal-anan. (R)

Ibalik kanako ang kasadya sa imong kaluwasan, ug padayona dinhi kanako ang mauyonong espiritu. O Ginoo, ablihi ang akong ngabil, ug ang akong baba magsangyaw sa imong pagdayeg. (R)

C. Ikaduhang Basahon

2 Corinto 5:20-6:2

Ang pagbasa gikuha gikan sa ikaduhang sulat ni San Pablo ngadto sa taga- Corinto.

Kami gipadala ni Kristo, ug sama ra nga ang Dios gayud ang nangaliyupo kaninyo pinaagi kanamo. Sa ngalan ni Kristo hangyoon namo kamo nga makig-uli kamo sa Dios. Walay sala si Kristo, apan gipaambit siya sa Dios sa atong sala aron kita, sa atong pagkahiusa kaniya, makaambit sa pagkamatarung sa Dios. Busa, ingon nga mga katabang sa Dios, nagahangyo kami kaninyo nga dili ninyo usikan ang grasya sa Dios nga inyong nadawat. Kay nag-ingon ang Dios, "Gidungog ko kamo sa takna nga akong gikahimut- an. Gitabangan ko kamo sa adlaw sa kaluwasan."

Mao na kini ang takna sa pagdawat sa kalooy sa Dios; karon mao ang adlaw sa kaluwasan.

Mga igsoon, ang Pulong sa Ginoo.

D. Ebanghelyo

Mateo 6:1-6,16-18

Ang pagsangyaw sa Maayong Balita sumala ni San Mateo.

Si Jesus miingon sa iyang mga tinun-an, "Ayaw gayud ninyo buhata ang inyong mga tulumanon sa relihiyon aron lamang makita sa mga tawo. Kun ingnon ninyo niini pagbuhat, dili kamo makada- wat og ganti gikan sa inyong Amahan nga atua sa langit. Busa kun mohatag kamo sa tawong kabus, ayaw kini ipasigarbo ingon sa gibuhat sa mga hambugiro sulod sa mga sinagoga ug sa mga kadalanan. Nagbuhat sila niini aron daygon sa mga tawo. Apan sultihan ko kamo nga ang naghimo niini gigantihan na. Kun ugaling motabang ka sa usa ka tawong kabus, himoa kini sa paagi nga bisan gani ang imong labing suod nga higala dili masayud niini. Himoa kini sa tago, ug ang imong Amahan nga nagtan-aw sa imong gibuhat sa tago, moganti kanimo.

Ug kun mag-ampo ka, ayaw pag-iningon sa mga tigpakaaron-ingnon. Gusto silang magtindog nga mag-ampo sulod sa mga sinagoga ug diha sa mga kanto sa kadalanan aron makita sila sa mga tawo. Sultihan ko kamo nga gigantihan na sila. Apan kun mag-ampo ka, sulod ngadto sa imong lawak, unya sirad-i ang pultahan, ug pag-ampo sa imong Amahan nga dili makita. Ug gantihan ka sa imong Amahan n ga nagtan-aw sa imong gihimo sa tago.

Ug sa inyong pagpuasa, ayaw ipakita nga nagsubo kamo, sama sa gibuhat sa mga tigpakaaron-ingnon. Nagsuroysuroy sila nga gutom og panagway aron makita gayud nga nagpuasa sila. Sultihan ko kamo nga gigantihan na sila. Kun magpuasa ka, panghilam-os ug panudlay aron walay mahibalo nga nagpuasa ka, gawas sa imong Amahan nga dili makita. Ug gantihan ka sa imong Amahan nga nagtan-awsa imong gibuhat sa tago."

Mga igsoon, ang Maayong Balita sa atong Ginoo.

E. Komentaryo

Tema: Pag-ampo, Pagpuasa ug Paghatag og Limos!

Ang Miyerkoles sa Badlis mao ang sinugdanan sa panahon sa Kwaresma diin ang Kristohanong magtotoo sa tibuok kalibutan mohatag og panahon aron pagpabadlis og abo diha sa agtang. Mao kini ang simbolo diin kita gipahimangnoan diha sa atong kamatayon ug ang saad sa bag-ong kinabuhi pinaagi sa atong paghinulsol.

Ang laing ngalan sa Kwaresma mao ang pulong nga "Lent" gipasabot kini sa binisayang pinulongan nga "hinay". Adunay tulo ka matang sa paghinayhinay diin kini maglangkob sa kabililhon sa atong pagka Kristiyanos. Kini ang pag-ampo, pagpuasa, ug paghatag og limos. Matag usa niini naglarawan sa pagsalig sa Dios diin mao ang tinubdan sa tanan.

Kining tulo dali ra kaayo sultihon apan lisod buhaton kon walay pagsalig diha sa Dios. Ang tawo nga walay pagsalig sa Dios kawang lamang kining tulo ka tulumanon kay nag-usik-usik lang kita sa panahon.

Kon buot hunahunaon, pag-usik-usik sa panahon ang pag ampo kay dili kini makahatag og ganansiya.

Ang pagpuasa usab makapahinay sa lihok sa lawas ug ang paghatag og limos hasol sa tawo nga kanunayng

nagdali. Kining tulo timailhan nga kita mihinay-hinay aron mohatag og luna ngadto sa Dios ug sa atong isigkatawo.

Pagsalig sa Ginoo ug dili sa atong kaugalingon maoy magpaluyo niining tulo ka mga buhat sa Kwaresma. Maghinlo kini sa atong mga kahiladman ug mahatagan nato og angay nga pag-abi abi ang Dios.

Nahilambigit niini ang tulo. Ang magpuasa apan dili mag-ampo, nagdiyeta lamang. Ang mag-ampo nga

wala ubani sa pagpuasa, walay kadasig. Ang paghatag og limos nga walay pag-ampo ug pagpuasa, pakisama lang, kinahanglan maglambigit gayod kining tulo.

Mao kini ang dakong hagit sa atong Ebanghelyo karong adlawa diin dili kita magpakaaron-ingnon kung kita magpuasa. Dili nato ipakita nga kita nagsubo susama sa gibuhat sa mga tigpakaaron-ingnon. Dili nato ipasundayag nga gutom ang atong panagway aron dili kita mailhan nga nagpuasa kita. Niining paagiha kita makadawat sa ganti nga gitagana ni Jesus kanato. Kita gihagit nga magpuasa, manghilam-os ug manudlay aron walay mahibalo nga kita nagpuasa gawas sa atong Amahan nga dili makita kinsa nagtan- aw sa atong gibuhat sa tago ug niining paagiha gantihan kita.

Mga igsoon, human nato madawat ang abo karong adlawa, inig-uli nato sa atong tagsa-tagsa ka panimalay, moadto kita sa salamin ug atong tan-awon ang atong panagway diin atong makita ang patik o tatak sa maong abo diin kita gipahinumduman diha sa atong kamatayon ug ang saad sa bag-ong kinabuhi pinaagi sa atong paghinulsol. Busa, atong pamalandongan ug pangutan-on ang atong kaugalingon unsa ang kahulogan niining maong patik nga anaa sa tagsatagsa nato ka agtang karon.

Giya alang sa Pamalandong:

1. Sulod niining kapanahunan sa Kwaresma, unsa man ang angay natong bag-ohon sa atong kinabuhi?

2. Andam naba kita sa pagdawat sa Ginoo dinhi sa atong tagsa tagsa ka kinabuhi?

F. Katilingbanong Pag-ampo

Pangulo: Niining pagsugod nato sa Panahon sa Kwaresma, magtinguha kita sa pagpakig-uli sa Dios ug diha sa atong mga igsoon. Busa mangahas usab kita sa paghalad sa atong mga pag-ampo ug panginahanglan sa atong Makagagahum nga Amahan. Sa matag pag-ampo kita motubag: O DIOS, DUNGGA ANG IMONG KATAWHAN.

1. Alang sa tibuok Simbahan ilabina sa Santo Papa, mga Obispo ug kaparian, nga makalingkawas unta kini sa paghatag og bili sa mga materyal nga kakulangan aron matinud-anon nilang ikapadayag ngadto sa tanan ang kahayag ug gahum sa Ebanghelyo nga maoy maghatag sa tanan og katagbawan. Mag-ampo kita.

2. Alang sa mga lideres sa nasud, giyahan unta sila sa gahum sa Espiritu Santo aron matinud-anon silang mopaambit ug moalagad sa tanan ilabina sa mga nanginahanglan. Mag-ampo kita.

3. Alang sa Kristohanong katilingban dili unta sila mawad-an sa kadasig sa pagtahan sa ilang kaugalingon diha sa pagpangalagad bisan pa og makasinati sila og mga pagsulay sa ilang kinabuhi. Mag-ampo kita.

4. Alang sa atong mga kaigsoonan nga nag- antus sa mga kasakitan sa kinabuhi, makabaton unta gihapon sila ug kaisog sa pagsunod sa dalan nga gisubay ni Jesukristo aron makaabot sila sa kinatumyan nga tumong nga mao ang kinabuhing dayon. Mag-ampo kita.

5. Alang kanatong tanan, nga niining panahon sa Kwaresma, makabaton unta kita og kalinaw diha sa matinud-anon natong pagpakig-uli sa atong mga kaigsoonan nga nabuhatan nato og mga Kasaypanan. Mag-ampo kita.

6. Alang sa atong kaugalingon nga katuyuan, ato kining ihalad diha sa kahilum.

Pangulo: Ginoo among Dios, dungga ang among mga pag-ampo nga among gihalad karon ug hikapa usab ang among kasingkasing aron sama Kanimo kami usab motubag sa mga panginahanglan sa among mga kaigsoonan. Kini among gipangayo pinaagi ni Kristo among Ginoo. Amen.