IKADUHANG DOMINGGO SA KWARESMA

IKADUHANG DOMINGGO SA KWARESMA

A. Unang Basahon

Genesis 22:1-2,9,10-13,15-18

Ang pagbasa gikuha gikan sa basahon sa Genesis.

Gisulayan sa Dios si Abraham ug gitawag siya, "Abraham!" Ug si Abraham mitubag, "Ania ako." Miingon ang Dios, "Dad-a si Isaac, ang imong bugtong anak nga imong gihigugma, ug lakaw ngadto sa yuta sa Moria. Ihalad siya pinaagi sa pagsunog didto sa bukid nga itudlo ko kanimo."

Sa ilang pag-abot sa dapit nga gitudlo kanila sa Dios, gikuha ni Abraham ang kutsilyo aron patyon niya si Isaac. Apan, gikan sa langit, mitawag kaniya ang anghel sa Ginoo, "Abraham, Abraham!" Mitubag siya, "Ania ako." "Ayaw unsa-a ang bata," miingon ang anghel. "Nasayod na ako nga andam ka gayud pagsugot sa Ginoo, kay wala mo man ihikaw kanako ang imong bugtong anak."

Miyahat si Abraham ug nakita niya ang usa ka laking karnero kansang sungay nasangit didto sa usa ka tanum nga sampinit. Gikuha niya kini ug gihalad pinaagi sa pagsunog ilis sa iyang anak. Gikan sa langit ang anghel sa Ginoo mitawag pag-usab kang Abraham. Miingon siya, "Ang Ginoo ang nag-ingon, 'Ipanumpa ko kanimo sa akong ngalan nga panalanginan ko ikaw pag-ayo, kay gihimo mo man kini ug wala mo ihikaw kanako ang imong bugtong anak. Isaad ko usab kanimo nga hatagan ko ikaw'g mga kaliwat nga sama kadaghan sa bitoon sa langit ug sa balas sa baybayon. Buntogon sa imong kaliwat ang ilang mga kaaway, ug mohangyo kanako ang tanang mga nasud nga panalanginan sila ingon nga akong gipanalanginan ang imong mga kaliwat-kay imo mang gituman ang gisugo ko kanimo."

Mga igsoon, ang Pulong sa Ginoo.

B. Salmo Responsoryo

Salmo 116:10,15,16-17,18-19

Tubag (R) - Molakaw ako sa atubangan sa Ginoo, diha sa yuta sa mga buhi.

Mitoo ako, bisan sa akong pag-ingon, "Gisakit ako." Bililhon atubangan sa mga mata sa Ginoo ang kamatayon sa iyang buotan nga mga sulugoon. (R)

O Ginoo, imo akong alagad; imo akong alagad, ang anak sa imong sulugoon nga babaye; imong gilugti ang akong mga talikala, kanimo akong ihalad ang sakripsiyo sa pasalamat ug sangpiton ko ang ngalan sa Ginoo. (R)

Tumanon ko ang akong mga saad ngadto sa Ginoo sa atubangan sa tibuok niyang lungsod, diha sa mga hawanan sa balay sa Ginoo, sa imong taliwala, O Jerusalem. (R)

C. Ikaduhang Basahon

Roma 8:31-34

Ang pagbasa gikuha gikan sa basahon ni San Pablo ngadto sa taga-Roma.

Karon nga ato nang nasayran kini, unsa may atong ikaingon? Kon dapig kanato ang Dios, kinsay makigbatok kanato? Kon wala magdumili ang Dios pagtugyan sa iyang Anak ngadto sa kamatayon tungod kanatong tanan, dili ba hatagan kita niya sa tanang butang nga atong pangayoon kaniya? Kinsay mangahas pagsumbong sa mga piniling katawhan sa Dios? Ang Dios mismo nag-ila kanila nga walay sala. May makahukom ba kanila nga sila sad- an? Si Kristo Jesus mao ang nagpakamatay ug gibanhaw; atua siya sa tuo sa Dios ug nangaliyupo alang kanato!

Mga igsoon, ang Pulong sa Ginoo

D. Ebanghelyo

Marcos 9:2-10

Ang pagsangyaw sa Maayong Balita sumala ni San Marcos.

Tapos sa unom ka adlaw, gidala ni Jesus si Pedro, si Santiago, ug si Juan ngadto sa usa ka taas nga bukid diin didto walay laing tawo gawas kanila. Ug samtang nagtan-aw sila kang Jesus, nausab ang iyang panagway, ug ang iyang bisti misidlak sa hilabihang kaputi; walay bisan kinsa sa tibuok kalibutan nga makapaputi sama niini. Unya nakita sa tulo ka tinun-an si Elias ug si Moises nga nakigsulti kang Jesus. Ug miingon si Pedro kang Jesus, "Magtutudlo, maayo nga ania kita dinhi. Maghimo kita og tulo ka payag, usa alang kanimo, usa alang Moises, ug usa alang kang Elias." Nakaingon siya niini kay wala siya mahibalo kun unsay iyang isulti sanglit nangalisang man sila.

Unya dihay panganod nga mitungha ug gilandongan sila niini. Ug may nadungog silang tingog gikan sa panganod nga nag-ingon, "Kini siya mao ang pinangga kong Anak - pamati kamo kaniya!" Midali sila paglingi-lingi, apan wala silay nakitang tawo gawas lamang kang Jesus. Sa nanglugsong na sila sa bukid, gipasidan-an sila ni Jesus sa dili pagsugilon kang bisan kinsa sa ilang nakita hangtud nga ang Anak sa Tawo mabanhaw na.

Gituman nila ang iyang gitugon, apan ilang gipangsultihan kon unsa ang kahulugan sa giingon niyang "pagkabanhaw."

Mga igsoon, ang Maayong Balita sa atong Ginoo.

E. Komentaryo

Tema: Pagkamanggihatagon!

Kitang tanan adunay kasinatian sa pagsulay. Pagsulay sa daghang pamaagi. Sa mga estudyante adunay pagsulay sa pagtuon aron mahibal-an sa maestro ug maestra ang kaalam sa maong estudyante. Ang pagsulay gimugna aron sukdon ang katakos ug kalig-on ug kahanas sa usa ka tawo.

Sa atong mga pagbasa karon diha sa libro sa Genesis, si Abraham gisulayan sa Ginoo sa paghalad sa iyang bugtong anak. Makita nato kung unsa kaimportante kang Abraham ang iyang anak tungod sa pasalig sa Ginoo nga ang iyang banay modaghan. Apan, unsay nahibatabo, ihalad hinoon kini. Usa ba kini ka pagsulay sa kinabuhi ni Abraham? Atong nahibaloan nga ang Ginoo buot isakripisyo ni Abraham ang iyang anak, kung kini iyang pagabuhaton. Siya makalabang sa pagsulay sa Ginoo, apan kung dili niya tumanon, siya dili magmalampuson sa pagsulay sa Ginoo. Mao ba kini ang Ginoo nga atong gituohan nga interesado sa tawhanong sakripisyo? Mao ba kini ang Ginoo nga atong gituohan ug gisimba?

Kining tanan kinahanglan nato nga masabtan pag-ayo nga ang Ginoo wala magkinahanglan kang Isaac. Ang Ginoo wala magkinahanglan og tawhanong pag-antus. Ang Ginoo nagkinahanglan kang Abraham og tiunay nga pagkamanggihatagon sa kaugalingon. Ang estorya sa kinabuhi ni Abraham nagpadayag nga ang Ginoo naghagit kanato sa paghatag sa atong kaugalingon. Ang Ginoo naghangyo kanato sa pag-abli sa atong kaugalingong pagsakrispiyo bisan kini sakit alang sa atong kinabuhi. Sakit nga pagatumanon sama sa kasinatian ni Abraham.

Ang Ginoo nag-awhag kanato sa pagkamanggihatagon sa atong kaugalingon ug dili kini pagsulay sa atong pagtuo. Gihagit kita sa pagbiya sa mga butang nga nagpahilayo kanato sa Ginoo. Mga butang nga nakapahimo kanatong hakog sama sa pagkamateryalismo, hakog sa salapi ug gahum nga nagdala kanato ngadto sa pagdaug-daug sa uban ug pagpanikas sa uban. Mga butang nga naghatag kanato og kalibutanong kahayahay apan nagdala kini og kaalautan sa atong espirituhanong bahin sa kinabuhi. Kung kita nahimong binilanggo niining kalibutanong gawi, kita gi-awhag sa pagbiya ug pagsalikway niini ug hingpiton nato ang atong pagsalig sa Ginoo, ang matuod nga makahatag og kalingkawasan sa matag usa kanato. Atong likayan ang mga butang nga sukwahi sa kabubut-on sa Dios.

Kining ikaduhang Dominggo sa Kwaresma kita gihagit sa pag bag-o sa atong kaugalingon. Hagit sa paghatag sa kaugalingon alang sa uban. Hagit sa pagsakripisyo sama sa gibuhat sa atong Ginoo nga si Jesukristo. Kung kita makatuman niining hagit sa paghatag sa kaugalingon mahisama kita kang Abraham nga wala magdumili sa pagtahan sa iyang kaugalingon. Iyang nasinati ang kausaban sa kaugalingon gikan sa pagkamaduhaduhaon ngadto sa hingpit nga pagsalig. Sa atong kaugalingon gihagit kita sa pagbiya sa atong mga dautang binuhatan aron makahatag kita sa atong kaugalingon ngadto sa uban. Ang kausaban nga atong nabasa karon nagpadayag sa dakong gugma sa atong Ginoo dinhi kanato.

Diha sa Ebanghelyo ni San Markos gipadayag ang dakong gugma sa Dios alang kanato. Gihalad sa Dios and Iyang pinaggang Anak nga si Jesukristo alang sa atong kaluwasan. Namatay si Kristo tungod ug alang kanato, apan siya nabanhaw usab nga maoy sumbanan sa kabag-ohan sa atong kinabuhi. Ang pasyon sa atong Ginoo nagtudlo kanato kung unsa ang

mahitabo sa iyang mga sumusunod. Kini nagpasabot nga ang sumusunod ni Kristo mobati og kalisud. Ang kamatuoran sa atong mga pag-antos, sakripisyo ug kamatayon nga atong nasinati karon, makaambit ra unya kita sa kahayag sa langit uban ni Kristo sa iyang gingharian. Ang kahayag nga nakita sa mga apostoles

nagpadayag lamang nga adunay kinabuhi nga tiunay uban sa Ginoo. Pagkaanindot sa ilang nakita nga sila

mismo nakaingon nga maghimo sila og tulo ka tolda.

Mga reaksyon ug mga kasinatian nga dili nila buot biyaan. Apan dili pa kadto mao ang panahon. Si Kristo

kinahanglan motugyan sa iyang kaugalingon ngadto sa Krus. Ang paghatag sa Amahan sa Iyang bugtong Anak sama ra usab sa paghatag ni Abraham kang Isaac nga iyang pinalangga usab nga anak.

Kining tanan dakong hagit kanato kung makahatag ba kita sa atong kaugalingon. Ang pagkamanggihatagon mao ang dakong hagit kanato. Makahatag bakita sa atongoras samgananginahanglan kanato? Makatabang ba kita sa nanginahanglan natong mga silingan nga nagkalisud? Unta dili lang kini magpabilin sa atong hunahuna ang pagtabang ug paghatag sa kaugalingon. Hinaut unta atong mapuy- an ang hagit sa atong mga pagbasa karon diha sa atong pamilya, mga silingan ug sa tanan natong mga kaigsoonan.

Giya alang sa Pamalandong:

1. Giunsa man nato pagpuyo ang atong kinabuhi karon?

2. Nagmanggihatagon ba kita sa atong kaugalingon sa panginahanglan sa uban pinasubay sa kabubut- on sa Dios?

F. Katilingbanong Pag-ampo

Pangulo: Sayud kita sa dakung gugma sa atong Langitnong Amahan kanato nga bisan sa atong pagkamakasasala nagpadayon Siya paghigugma ug pag-atiman kanato. Busa sa dakung pagsalig ato karong ipadayag ang atong mga pag-ampo ug panginahanglan ug sa matag pangamuyo kita motubag: PAMINAWA ANG IMONG KATAWHAN O DIOS.

1. Alang sa kinatibuk-ang Simbahan, hingpit unta kining motuo sa grasya ug kalooy sa Dios nga maoy tag-iya ug tinubdan sa tanan. Mag-ampo kita.

2. Alang sa mga nangulo sa atong nasud, magmatinud-anon unta sila sa katawhan nga ilang gialagaran nga nangandoy nga makasinati og kalinaw ug kaayohan. Mag- ampo kita.

3. Alang sa matag katilingban, nga ang kahiusahan ug pagtinabangay maoy mopatigbabaw alang sa katukuran sa malampuson ug maampoon nga katawhan. Mag-ampo kita.

4. Alang kanatong tanan nga dili unta magpasulabi sa atong galamhan sa pagtinguha sa mga materyal nga butang kon dili atong paningkamutan ang paghupot sa hiyas nga maampoon ug hingpit nga pagpakighiusa sa Dios. Mag- ampo kita.

5. Alang sa atong mga kaigsoonan nga nag- una na kanato sa laing kalibutan nga makadayon na unta sila sa Gingharian sa Dios diin lunlon nga kalipay maoy ilang matagamtaman. Mag-ampo kita.

6. Alang sa atong kaugalingon nga katuyuan, ato kining ihalad diha sa kahilum.

Pangulo: Makagagahum nga Amahan, sayud kami sa Imong mahigugmaong pag- amoma kanamo. Malaumon kami nga Imong paminawon ang among mga pag-ampo nga among gihalad Kanimo karon pinaagi ni Jesukristo Imong Bugtong Anak uban sa Espiritu Santo Dios nga usa hangtud sa kahangturan. Amen.