IKAUPAT NGA DOMINGGO

 IKAUPAT NGA DOMINGGO SA ORDINARYONG PANAHON

A. Unang Basahon

Deuteronomio 18:15-20

Ang pagbasa gikuha gikan sa basahon sa Deuteronomio.

Si Moises miingon sa katawhan, "Ang Ginoo nga inyong Dios magpadala og propeta sama kanako gikan sa inyong taliwala, ug kinahanglan motahud kamo kaniya. Gihatag siya sa Ginoo kaninyo ingon nga tubag sa inyong hangyo sa dihang nagtigom kamo didto sa Bukid sa Sinai ug miingon kamo, Ayaw na kami pabati-a sa tingog sa Ginoo nga among Dios, ni pakita- a sa makalilisang nga kalayo, aron dili kami mangamatay.' Niadtong higayona giingnan ako sa Ginoo nga husto ang inyong giingon, busa miingon siya, "Magpili ako'g propeta nga ila rang kadugo sama kanimo, Moises. Ihatag ko kaniya ang akong mensahe ug isulti niya bisan unsa nga akong isugo kaniya. Kinsa kadtong dili mamati sa mensahe nga akong ipasangyaw kaniya, silotan ko gayod. Apan kon ang maong propeta mosulti'g mensahe nga wala ko ipasulti kaniya ug siya magpatoo nga gisugo ko siya, o magsulti sa ngalan sa ubang dios, kinahanglan patyon siya."

Mga igsoon, ang Pulong sa Ginoo.

B. Salmo Responsoryo

Salmo 95:1-2,6-7,7-9

Tubag (R) - Kon karon makadungog kamo sa iyang tingog, ayaw gahi-a ang inyong kasingkasing.

Umari kamo, awitan ta nga malipayon ang Ginoo; isangyaw ta ang Bato sa atong kaluwasan. Yukboan ta siya uban sa pasalamat. Awitan ta siya nga malipayon og mga salmo. (R)

Umari kamo, manghapa kita sa pagsimba; mangluhod kita atubangan sa Ginoo nga nagbuhat kanato. Kay siya man ang atong Dios, ug kita ang katawhan nga iyang gidumala, ang panon nga iyang gitoltolan. (R)

Hinaut unta nga karon mamati kamo sa iyang tingog; "Ayaw tig-aha ang inyong mga kasingkasing sama didto sa Meriba. Sama sa adlaw ni Massah didto sa kamingawan diin gisulayan ako sa inyong mga katigulangan. Ila akong gisuta bisan nakakita sila sa akong mga buhat. (R)

C. Ikaduhang Basahon

1 Corinto 7:32-35

Ang pagbasa gikuha gikan sa unang sulat ni San Pablo ngadto sa taga- Corinto.

Buot ko nga mahilikay kamo bisan unsang matang sa kabalaka. Ang lalaki nga dili minyo magtagad sa buhat sa Ginoo kay maningkamot man siya sa pagpahimuot sa Ginoo; apan ang tawo nga minyo magkapuliki sa kalibutanong mga butang, kay buot siya magpahimuot sa iyang asawa. Busa mabahin ang iyang hunahuna. Ang babaye nga dili minyo o usa ka ulay magtagad sa buhat sa Ginoo kay buot siyang maghalad sa iyang lawas ug espiritu; apan ang babaye nga minyo nagkapuliki sa mga kalibutanong butang, kay nagtinguha man siya pagpahimuot sa iyang bana.

Gisulti ko kini alang sa inyong kaayohan. Dili ko tuyo ang pagpugong kaninyo. Hinonoa, buot ko nga magbuhat kamo sa matarong ug husto, ug magtugyan sa inyong kaugalingon sa hingpit gayud sa pag-alagad sa Ginoo.

Mga igsoon, ang Pulong sa Ginoo.

D. Ebanghelyo

Marcos 1:21-28

Ang pagsangyaw sa Maayong Balita sumala ni San Marcos.

Unya miabot sila sa lungsod sa Capernaum, ug sa pagkasunod nga Adlawng Igpapahulay misulod si Jesus sa sinagoga ug nagtudlo. Ang mga tawo nga nakabati kaniya natingala sa iyang tinudloan, kay may gahum man siya sa iyang pagtudlo, ug dili sama sa mga magtutudlo sa Balaod.

Unya may tawo nga giyawaan nga misulod sa sinagoga ug misinggit, "Unsay imong tuyo kanamo, Jesus nga Nazaretnon? Mianhi ka ba aron paglaglag kanamo? Nakaila ako nga ikaw mao ang Balaang Sinugo sa Dios!"

Apan gibadlong ni Jesus ang yawa, "Hilom, ug gula nianang tawhana!"

Gipakurog sa yawa ang tawo, unya misinggit sa makusog ang yawa ug migula. Hilabihang kahibulong sa mga tawo nagpangutan-anay sila, "Unsa ba kini? Bag-ong pagtulon-an? Kining tawhana adunay gahum sa pagsugo sa mga yawa, ug sila motuman ra ba gayud kaniya!"

Busa ang balita mahitungod kang Jesus daling mikaylap sa tanang dapit sa Galilea.

Mga igsoon, ang Maayong Balita sa atong Ginoo.

E. Komentaryo

Tema: Pagpuyo sa Kinabuhing Diosnon.

Usa sa mga butang nga kasagaran natong mabantayan, mao ang mga ngil-ad og kinaiya o sa mga tawo nga tigpakaaron-ingnon. Nasayod kita nga daghan kaayong matang sa mga tawo nga nagpalibot kanato, ug usa usab kita niini. Kasagaran kanato, kanunay nga magbantay sa mga lihok sa uban ug nga wala usab kita magmatngon sa atong mga lihok mao usab ang uban nakakita sa atong mga sayop nga binuhatan.

Mao usab kita ang kahimtang sa katilingban sa panahon ni Moises. Adunay daghang mga tawo nga magpaila nga sila makatagna sa umaabot nga mga panghitabo. Mao nga si Moises, sa atong unang pagbasa, nagpahimagno sa iyang mga kaigsoonan nga usa ka propeta ang pillion sa Ginoo gikan sa ilang kaliwat. Kining maong propeta kinahanglan nga sila mamati gayod kaniya.

Tuod man, gipili sa Dios si Jesukristo nga kaliwat ni David, aron mamahimong propeta nga ilang pamation. Si Jesus, kansang kinaiya mailhan sa Iyang mga buhat gitandi kang Moises. Ingon niini ang matuod nga pag-ila sa usa ka tawo. Mao nga atong nadungog usab sa ikaduhang pagbasa nga ang usa ka tawo nga dili minyo ug wala maminyo gitagana alang sa Gingharian sa Dios ug nga siya magbuhat sa mga butang nga iya sa Gingharian sa Dios. Apan ang tawong minyo magkapuliki sa kinabuhing minyo.

Kini gipamatud-an sa atong Ebanghelyo karon diin si Jesus nanudlo sulod sa sinagoga. Sa pagkadungog sa mga tawo sa paagi sa iyang pagpanudlo, nahibulong sila tungod kay nagtudlo siya nga adunay awtoridad nga bisan pa man ang mga dautang espiritu motuman sa Iyang mando. Ang Iyang awtoridad naggikan diha sa Iyang kaligdong tungod kay ang Iyang mga pulong dili sukwahi sa Iyang binuhatan. Apan dili lamang siya propeta nga sama ni Moises, kondili mas labaw pa kaniya. Siya ang gipili sa Dios nga pinadala nganhi sa kalibotan aron atong mailhan ang matuod nga Dios ug sa ingon atong mapuy-an ang kinabuhing Diosnon.

Sa atong inadlaw-adlaw nga kinabuhi, kita gihagit karon sa pagpamanlandong kon ang atong mga binuhatan nahisubay pa ba sa atong pagkabinunyagan isip mga Kristiyanos ug isip mga anak sa Dios. Dugang pa niini, gihagit usab kita sa pagsusi sa atong kaugalingon kon ang atong gipaminaw mao pa ba gihapon ang tingog sa Dios. Sa atong kahimtang karon, adunay nagkadaiyang tingog sa atong palibot nga makapalibog kanato. Ang atong galamhan maoy magtug-an kon kang kinsang tingog ang atong gipaminaw. Kon ang atong pagkinabuhi sukwahi na sa atong tinuoray nga kinaiya isip mga anak sa Dios, mas maayo nga atong paningkamotan sa pagpamalandong kung kinsang tingog ang atong gihatagan og bili. Ang matuod ba nga tingog, kinsa maoy tinubdan sa atong kinabuhi ug kalinaw ang atong gihatagan og gimbug-aton? Nasayod kita nga walay laing tingog nga angay natong sundon, gawas kang Jesus ang giingon sa Balaang Kasulatan, ang gisangyaw sa Simbahan kinsa nagpuyo diha sa atong kasingkasing. Hinaut pa unta.

Giya alang sa Pamalandong:

1. Giunsa man nato pagpuyo ang kinabuhi nga gihatag sa Dios kanato?

2. Kang kinsang tingog ang atong gipaminaw nga maoy gihatagan nato og gimbug-aton sa atong kinabuhi?

F. Katilingbanong Pag-ampo

Pangulo: Mga igsoon, uban sa masaligon nga kasingkasing ato karong ihalad sa atong Langitnong Amahan ang atong mga pag-ampo ug panginahanglan. Sa matag pangaliyupo kita motubag: 

GINOO, DUNGGA KAMI.

1. Alang sa nagdumala sa Simbahan, ang Santo Papa, mga Obispo ug kaparian, sa kanunay mamahimo silang buhing saksi ug panig-ingnan sa Kristohanong kinabuhi. Mag-ampo kita.

2. Alang sa mga lideres sa atong panggamhanan, malamdagan unta ang ilang hunahuna sa Espiritu Santo aron matinud-anon silang moalagad sa tanan subay sa mga panig-ingnan nga gipakita ni Kristo. Mag-ampo kita.

3. Alang sa atong mga kaigsoonan nga nag-ilaid sa kalisod tungod sa kawad- on sa panginabuhi, dili unta sila mawad-an sa paglaum ug molahutay sila sa pagpakighiusa sa Dios diha sa makanunayon nilang pag-ampo nga ang Dios mohatag gayud kanila og kahupayan. Mag-ampo kita.

4.

Alang sa mga lideres sa atong matag katilingban nga bisan pa sa mga pagsulay nga ilang mahiaguman sa gihapon sila madasig ug malig-on diha sa ilang pagtahan sa ilang kaugalingon sa pag- alagad sa uban. Mag-ampo kita.

5. Alang sa atong mga kaigsoonan nga nangamatay na, makatagamtam na unta sila sa kahimayaan sa Dios agi og ganti sa pagpuyo sa katarung sa buhi pa sila. Mag- ampo kita.

6. Alang sa atong personal nga katuyuan, ato kining ihalad diha sa kahilum.

Pangulo: Langitnon ug Makagagahum nga Amahan, patalinghugi ang among mga pag-ampo, ihatag kanamo ang grasya nga maoy makahupay sa among kalibutanon ug espirituhanon nga panginahanglan. Kini among gipangayo pinaagi ni Kristo Imong Bugtong Anak ug among Ginoo nga buhi hangtud sa kahangturan. Amen.