UNANG ADLAW SA MISA DE GALLO

UNANG ADLAW SA MISA DE GALLO

Disyembre 16 

PASIUNA

Malipayong buntag mga igsoon diha ni Cristo.

Karon ang unang adlaw sa Misa de Gallo, ang atong pagtukaw agi'g pagpangandam sa atong pagsaulog sa Pasko sa Pagkatawo sa atong Ginoong Jesucristo ug pagpangandam usab alang sa lyang pagbalik.

Karong adlawa usab atong gisaulog ang National Youth Day. Matag sugod nato niining Misa de Gallo, ang Simbahan sa Pilipinas, nagsaulog sa presensya sa atong mga kabatan-onan.

Ang unang pagbasa gikan sa basahon ni Propeta Isaias. Dinhi atong madungog kini: Nag-ingon ang Ginoo sa iyang katawhan, "Sunda ang hustisya ug buhata ang matarong kay dili madugay luwason ko na kamo..."

Ang Ebanghelyo gikan sa Ebanghelyo ni San Juan. Kini naghisgot mahitungod sa mga saksi ni Jesus nga siya tinuod pinadala sa Amahan.

Palihug manindug alang sa pagsugod sa Santos nga Eyukaristiya.

Salmo Responsoryo:

O Diyos, magdayeg unta kanimo ang tanang mga nasod.

Katilingabanong Pag-ampo:

Ginoo, ipadan-ag ang imong kahayag nganhi kanamo.

BASAHON I

Is. 56:1-3, 6-8

KINUTLO GIKAN SA BASAHON NI PROPETA ISAIAS

Nag-ingon ang GINOO sa iyang katawhan, "Sunda ang hustisya ug buhata ang matarong, kay sa dili madugay luwason ko na kamo, ug ipaila ko ang akong katarong. Bulahan ang tawo nga magbuhat niini sa kanunay, ug magtamod sa Adlawng Igpapahulay ug dili gayod magpasipala niini, ug dili usab magbuhat og dautan."

Ayaw tugoti ang langyaw nga nagsimba sa GINOO sa pag-ingon, "Hinginlan ako sa GINOO gikan sa iyang katawhan"; ug ayaw usab itugot nga moingon ang yunoko, "Sama ako sa patayng kahoy."

"Ang mga langyaw nga miduol sa GINOO aron pag-alagad kaniya ug nagtamod sa Adlawng Igpapahulay ug nagtuman sa iyang mga sugo panad-on ko sa balaan kong bukid, ug lipayon ko sila didto sa akong Templo.

Ang ilang mga halad-sinunog ug mga halad-inihaw dawaton ko didto sa akong halaran; kay ang akong Templo nganlan mag balay-alampoanan alang sa tanang katawhan."

Ang GINOONG DIOS, nga nagtigom sa mga nagkatibulaag nga Israelita miingon, "Aduna pay uban nga akong tigumon, walay labot niadtong natigom na."

ANG PULONG SA GINOO

SALMO RESPONSORYO

Ps. 67:2-3, 5, 7-8

R. O Dios, magdayeg unta kanimo ang tanang mga nasod.

Kaloy-an unta kita sa Dios ug bendisyonan kita; ipadan-ag unta kanato ang iyang nawong

Mahibaw-an unta ang iyang dalan dinhi sa yuta; ug diha sa tanang mga nasod, ang imong kaluwasan.

R. O Dios, magdayeg unta kanimo ang tanang mga nasod.

Maglipay unta ang mga nasod ug magsadya, kay nagamando ka sa kanasuran diha sa katarong; Imong agakon ang mga nasod dinhi sa yuta.

R. O Dios, magdayeg unta kanimo ang tanang mga nasod.

Daygon unta ikaw sa katawhan, O Dios, ang tanang kalungsoran magdayeg unta kanimo.

Bendisyonan unta kita sa Dios ug ang tanang kautlanan sa yuta mahadlok unta kaniya.

R. O Dios, magdayeg unta kanimo ang tanang mga nasod.

EBANGHELYO

Jn. 5: 33-36

Kinutlo gikan sa Ebang- helyo sumala ni Juan

Miingon Jesus sa mga Judio, "Gipa- adtoan ninyo si Juan, ug gisaksihan niya ang kamatuoran. Apan wala ako magkinahanglan og pagsaksi gikan sa tawo, giingon ko lamang kini aron maluwas kamo. Siya ang suga nga nagsiga ug nagdan-ag, ug sa mubo nga panahon nalipay kamo sa iyang kahayag.

"Apan aduna akoy saksi nga labaw pa kang Juan kay ang mga buhat nga gihatag kanako sa Amahan aron akong buhaton, kining mga buhat nga akong gihimo mao ang nagsaksi mahitungod kanako nga gipadala ako sa Amahan."

Ang Ebanghelyo sa Ginoo.

Katilingbanong Pag-ampo

Disyembre 16, 2023

Pari: Si Juan nga Magbubunyag miabot isip "saksi sa pagsangyaw sa kahayag." Sa atong pgpangandam sa pag-abot sa maong kahayag. mohangyo kita sa Amahan nga pamation niya ang atong mga pag- ampo, kita moingon:

GINOO, IPADAN-AG ANG IMONG KAHAYAG NGANHI KANAMO,

1. Alang sa atong Santo Papa Francisco, mga obispo ug mga kaparian, nga unta ang Dios maglig-on kanila sa kanunay aron magmatinud- anon sila sa paggiya ug pag-andam sa katawhan alang sa pag-abot sa Ginoo. Mag-ampo kita.

2. Alang sa atong mga pangulo sa panggamhanan nga giyahan unta sila sa Espiritu Santo aron mapaubsanon silang mag-alagad sa katawhan. Mag-ampo kita.

3. Alang sa atong mga kabatan-onan, lamdagan, giyahan ug dasigon unta sila sa Dios aron mamahimong malaumon ug malipayon silang moalagad Kaniya diha sa Simbahan. Mag-ampo kita.

4. Alang kanatong tanan nga ania karon dinhi, nga pinaagi niining kasaulogan sa Santos nga Eyukaristiya, makapadasig kanato sa pagpahimuot sa Dios pinaagi sa pagpaubos ug pagpasalamat sa matarong. Mag-ampo kita.

5. Alang sa mga nagdayeg ug nagpasalamat sa Ginoo, ilabina sila ang Dios sa grasya magapanalangin kanila sa kanunay ug magdasig kanila sa pagkamanggihatagon ngadto sa uban. Mag-ampo kita.

6. Alang sa mga kalag sa mga nangamatay, ilabina nila makasulod na unta sa gingharian sa langit. Mag-ampo kita.

Pari: Langitnong Amahan, paminawa kining mga pag-ampo sa imong katawhan, itugot kini sa ngalan ni Jesucristo among Ginoo ug Manluluwas. Amen.