IKATULONG ADLAW SA MISA DE GALLO

IKATULONG ADLAW SA MISA DE GALLO 

Disyembre 18

PASIUNA

DISYMEBRE 18, 2023

Maayong buntag mga igsuon diha ni Cristo.

Karon mao ang Ikatulong Adlaw sa atong malaumong pagtukaw alang sa pag-abot sa atong Manunubos.

Diha sa unang pagbasa nga gikan sa Basahon ni Propeta Jeremias atong madungog nga kini nagsaysay mahitungod sa usa ka hari nga kaliwat ni David ug panganlan siya'g, "Ang Ginoo Atong Kaluwasan."

Ug diha sa Balaan nga Ebanghelyo sumala ni San Mateo, atong madungog ang kaagi sa pagkatawo ni Jesucristo.

Palihug manindog alang sa pagsugod sa Santos nga Eyukaristiya.

Salmo Responsoryo:

Ang katarong molambo sa iyang panahon, ug ang kahingpitan sa kalinaw hangtod sa kahangturan.

Katilingbanong Pag-ampo:

Amahan sa tanan, panalangini kami.

BASAHON I

Jer. 23:5-8

KINUTLO GIKAN SA BASAHON NI PROPETA JEREMIAS

Nag-ingon ang GINOO, "Taliabot ang panahon nga magpili akog matuod nga kaliwat ni David aron mahimong hari. Ang maong hari magmando sa tumang kamaalamon, ug ipatunhay niya ang hustisya ug katarong sa tibuok nasod. Kon maghari na siya, mahilikay na sa kadaut ang katawhan sa Juda, ug magpuyo nang malinawon ang katawhan sa Israel. Paganganlan siyag, 'Ang GINOO Atong Kaluwasan."

Nag-ingon ang GINOO, "Taliabot ang panahon nga ang katawhan dili na manumpa sa akong ngalan ingon nga Buhing Dios nga nagkuha sa katawhan sa Israel gikan sa Ehipto. Hinonoa, manumpa sila sa akong ngalan ingon nga Buhing Dios nga nagkuha sa katawhan sa Israel gikan sa nasod sa amihanan, ug gikan sa ubang nasod diin ko sila patlaagi. Ug anhi na sila puyo sa ilang kaugalingong nasod."

ANG PULONG SA GINOO.

SALMO RESPONSORYO

Ps. 72:1, 12-13, 18-19

R. Ang katarong molambo sa iyang panahon, ug ang kahingpitan sa kalinaw hangtod sa kahangturan.

O Dios, togahi sa imong panghukom ang hari, ug sa imong katarong, ang anak sa hari; Magmando siya sa imong katawhan uban sa katarong ug sa imong mga nag-antus nga anak uban sa panghukom.

R. Ang katarong molambo sa iyang panahon, ug ang kahingpitan sa kalinaw hangtod sa kahangturan.

Luwason niya ang kabus nga tawo kon mosangpit siya ug ang nag-antus kon wala gayoy motabang kaniya.

Maluoy siya sa maubsanon ug sa kabus; ang kinabuhi sa kabus iyang luwason.

R. Ang katarong molambo sa iyang panahon, ug ang kahingpitan sa kalinaw hangtod sa kahangturan.

Daygon ang Ginoo, ang Dios sa Israel, siya lamang ang naghimo sa katingalahang mga buhat.

Ug daygon sa kahangturan ang iyang mahimayaong ngalan; mapuno unta sa iyang himaya ang tibuok yuta. Amen. Amen.

R. Ang katarong molambo sa iyang panahon, ug ang kahingpitan sa kalinaw hangtod sa kahangturan.

EBANGHELYO 

Mt. 1: 18-25

Kinutlo gikan sa Balaan nga Ebanghelyo sumala ni Mateo

Ug mao kini ang kaagi sa pagkatawo ni Jesu-cristo. Sa diha nga ang iyang inahan nga si Maria sinayoran na kang Jose, sa wala pa sila magtipon, nakaplagan nga nagsabak siya sa lalang sa Espiritu Santo. Apan si Jose nga iyang bana, sanglit mata- rong nga tawo ug dili buot nga pakaulawan siya, nagtinguha nga biyaan siya sa hilom. Apan, samtang naghunahuna siya niini, adunay usa ka anghel sa Ginoo mipakita kaniya pinaagi sa damgo ug miingon, "Jose, kaliwat ni David, ayaw kahadlok pag- dawat kang Maria nga imong asawa, kay ang iyang gisabak lalang sa Espiritu Santo. Ug manganak siya og usa ka bata nga lalaki, ug hinganlan mo siya og Jesus, kay luwason niya ang iyang katawhan sa ilang mga sala." Ug nahitabo kining tanan aron matuman ang giingon sa Ginoo pinaagi sa propeta nga nag-ingon: "Ania, ang usa ka babayeng ulay magsabak ug manganak og bata nga lalaki, ug ilang pagatawgon ang iyang ngalan Emmanuel", nga sa ato pa, "Ang Dios uban kanato."

Ug sa pagmata ni Jose, gituman niya ang gisugo sa anghel sa Ginoo ug gidawat niya ang iyang asawa. Ug wala siya makaila kaniya hangtod nga nanganak siya og usa ka batang lalaki; ug ginganlan niya siya og Jesus.

Ang Ebanghelyo sa Ginoo.

KATILINGBANONG PAG-AMPO

DISYEMBRE 18, 2023

Part: Nahiusa kang San Jose, ang tawo nga nagbaton sa dakong pagtuo, atong hiusahon ang atong mga pag-ampo isip pamilya sa Dios ngadto sa matuod nga Amahan sa tanan, diha sa pag-ingon:

AMAHAN SA TANAN, PANALANGINI KAMI.

1. Nga ang Santo Papa, mga Obispo, mga pari ug mga konsagradong katawhan, sama kang San Jose, molarawan sa gugma sa Ginoo diha sa ilang amahanong pag-amoma. Mag-ampo kita sa Ginoo.

2. Nga ang mga opisyales sa panggamhanan, sama kang San Jose, magpatalinghog sa tingog sa Dios ug mamalandong sa lyang plano nga magpadayag diha sa mga panghitabo sa kinabuhi matag adlaw. Mag-ampo kita sa Ginoo.

3. Nga ang mga amahan, sama kang San Jose, mopakita og talagsaong gugma ug pagtagad sa ilang mga banay pinaagi sa ilang makugihon ug makapalig-on nga kinabuhi. Mag-ampo kita sa Ginoo.

4. Nga ang mga nag-atubang sa mga suliran sa ilang kinabuhi ug sa pamilya, makabaton unta sa paglaum ug pagtuo nga sama kang San Jose. Mag- ampo kita sa Ginoo.

5. Nga pinaagi sa pagpangama ni San Jose, ang mga himalatyon ug mga tigulang, makakaplag og kahupayan sa katapusang gutlo sa ilang kinabuhi. Mag-ampo kita sa Ginoo.

6. Nga ang mga mihalad sa ilang pagdayeg ngadto sa Dios ilabina nila makakaplag unta diha kang Cristo og kasingkasing nga manggihatagon ngadto sa mga nanginahanglan. Mag-ampo kita sa Ginoo.

7. Nga ang mga magtutuong nangamatay ilabina sila makaangkon na sa kinabuhing walay katapusan. Mag-ampo kita sa Ginoo. 

Pari: O Dios, tabangi kami nga magkahiusa isip usa ka banay ubos sa imong pagka-amahan. Kini among gipangayo pinaagi ni Cristo among Ginoo. Amen.