UNANG DOMINGGO SA ADBIYENTO

V. KASAULOGAN SA PAGPANALANGIN SA ADVENT WREATH

(Unang Dominggo sa Adbiyento)

1. Kining maong rito himoon lamang sulod sa unang semana human sa unang Dominggo sa Adbiyento.

2. Alang sa ikaduha, ikatulo ug ikaupat nga semana, pagagamiton ang porma I, II o III sa Hiniusang Pag- ampo.

3. Sa nabatasan, ang Advent wreath himuon nga lingin linibutan og dahon o sanga nga berdi inugbukan og upat ka kandila - 3 ka kandila nga biyolita ang usa rosas. Hinoon, mahimong upat ka biyolita o upat ka puti nga kandila.

4. Ang upat ka kandila nagsimbolo sa upat ka Dominggo sa Adbiyento ug ang kandila pagasindihan subay sa semana nga kini ginasaulog. Kung gamiton ang rosas nga kandila, kini pagasindihan sa Ikatulong Dominggo o semana.

5. Kini sindihan sa matag kasaulogan. Sa adlaw sa pagpanalangin, mahimo kining ibutang sa tunga sa kapilya. Apan sa laing higayon, kini ipahimutang nga dili makaestorbo sa kasaulogan.

6. Alang sa ikaduha, ikatulo ug ikaupat nga Dominggo, ang kandila pagasindihan sa dili pa mosugod ang kasaulogan. Walay dugang nga rito o pag-ampo nga pagahimoon.

I. RITO SA PAGSUGOD

1. Pasiuna

Pangulo: Mga igsoon ko diha kang Kristo, maayong gabii kanatong tanan.

Ania na usab kita karon aron sa pagsaulog niining balaang takna nga atong gigahin alang sa atong Ginoo ug alang sa usa'g-usa.

Angayan lamang nga atong andamon ang atong kaugalingon alang sa mas makahuluganon ug madasigon nga pagsaulog niining hiniusang pag- ampo sa katilingban.

Sa ngalan sa atong halangdong Arsobispo sa Davao, Romulo G. Valles, inubanan sa pagtudlo sa atong Kura Paroko, si Reberendo Padre ______________, DCD ako, inyong Pangulo sa Liturhiya (PSL) gipadala ug gitahasan sa pagdumala niining senemanang pag-ampo.

(Magpaila ang PSL sa iyang pangalan kon ugaling magsaulog sa laing katilingban apan kon anaa mismo sa katilingban, dili na kinahanglan nga magpaila pa. Timbayaon ang mga bisita kon aduna. Kon wala, ang pangulo mopadayon)

Pangulo: Manindog kita ug atong pasidunggan ang Ginoo diha sa atong pag-awit sa pagsugod.

2. Pasiunang Awit

3. Pag-abiabi

Pangulo : Sa ngalan sa Amahan, ug sa Anak, ug sa Espiritu Santo

Tanan : Amen.

Pangulo: Hinaut nga ang Dios, nga midan-ag sa matag kasingkasing, maanaa kanato.

Tanan : Maanaa kanimo.

4. Pagpangandam sa Kasaulogan

Pangulo: Mga kaigsoonan, karong adlawa atong pagasugdan ang unang Dominggo sa panahon sa Adbiyento. Ablihan nato ang atong mga kasingkasing diha sa gugma sa Ginoo uban sa atong pagpangandam sa pag-abiabi kang Kristo diha sa atong kinabuhi ug sulod sa atong panimalay.

Ang mga kandila niining "wreath" nagpahinumdum kanato nga si Jesukristo mianhi aron sa pagbuntog sa kangitngit sa sala ug sa paggiya kanato ngadto sa kahayag sa Iyang mahimayaong gingharian.

II. KASAULOGAN SA PULONG SA DIOS

(Ang PSL o pangulo moadto sa atubangan sa altar ug moyukbo [bow] niini. Hagkan niya ang leksyonaryo, dayon kuhaon ug ibayaw atubangan sa katawhan ug kuhaon kini sa unang magbabasa diha sa atubangan. Pagka-human, mobalik ang PSL sa iyang lingkora-ranan samtang ang unang magbabasa moadto sa Ambo. Sa dili pa ang pagbasa, dapiton sa pangulo ang katawhan sa pag-ingon:)

Pangulo: Mga kaigsoonan, paminawon nato karon ang Pulong sa Dios nga nagpadayag sa gugma sa Amahan nganhi kanato. Sa atong pagpaminaw, atong sination kining maong gugma nga maoy nagpalawom sa atong paglaum ug pagtoo sa Ginoo.

Palihug manglingkod.

1. Unang Pagbasa

Is. 63: 16-17, 19; 64:2-7

Ang pagbasa gikuha gikan sa basahon ni Propeta Isaias.

Kay ikaw mao ang among Amahan, bisan tuod wala makaila kanamo ang among katigulangan, si Abraham ug si Jacob, ikaw kanunay maoy nagluwas kanamo. Ginoo, nganong, gitugotan mo man nga mahisalaag kami gikan sa imong dalan, ug mahimong mogahi ang among ulo nga maoy nakapawala sa among kahadlok kanimo? Tungod sa imong mga alagad, kaloy-i ang imong katawhan. Nahisama kami sa mga tawo nga wala mo harii, ug dili mo katawhan. 

Mangurog sila sama sa tubig; nga mobukal kon initon. Dali ngari ug ipadayag ang imong gahum ngadto sa imong mga kaaway aron mangurog ang kanasuran. Sa dihang naghimo ka'g makalilisang nga buhat nga wala namo paabota, nanaog ka ug nangurog ang kabukiran tungod sa kahadlok kanimo. Sukad masukad wala pa gayoy nakadungog ni may nakakita og Dios nga sama kanimo, Dios nga motabang niadtong mosalig kanimo. Kahimut-an mo ang nagkinabuhi'g matarong, ug nagtuman sa imong sugo. Nasuko ka sa dihang nakasala kami, ug nagpadayon kami sa pagpakasala. Sama kami sa tawong sad-an ug ang among matarong nga buhat ingon lamang daw hugaw nga pahiran. Nangalaya kami daw dahon, ang among pagkadautan daw hangin nga mipadpad kanamo. Wala gayo'y misangpit sa imong ngalan, ug mibangon aron pagkupot kanimo; kay gilingiw mo man ang imong nawong ug gipasagdan mo kami tungod sa among mga sala.

Mga igsoon, ang Pulong sa Ginoo.

2. Salmo Responsoryo

Salmo 80: 2-3, 15-16,18-19

Tubag (R) Ginoo, dad-a kami balik kanimo; pakitaa kami sa imong nawong ug maluwas kami.

O Magbalantay sa Israel, pamati-a intawon kami, Ikaw nga nagalingkod sa imong trono sinapwang sa mga kerubin. Ipakita kanamo ang imong gahum, dali ngari, umanhi ka, ug luwasa kami (R)

O Ginoo nga labing gamhanan, tan-awa kami gikan sa imong Gingharian. Atimana pag-ayo kining parasan, ug bantayi ang tanum nga naa sa imong kamot, ang anak sa tawo nga imong gihimong makusganon. (R)

Matabangan unta nimo ang tawo sa imong tuong kamot, pinaagi sa anak sa tawo nga imong gihimong makusganon. Dili na kami mopahilayo kanimo; hatagi kami'g bag-ong kinabuhi ug sangpiton namo ang imong ngalan. (R)

3. Ikaduhang Pagbasa

1 Corinto 1:3-9

Ang pagbasa gikuha gikan sa Unang sulat ni San Pablo ngadto sa taga- Corinto.

Ang Dios nga atong Amahan ug ang atong Ginoong Jesukristo maghatag unta kaninyo'g grasya ug kalinaw!

Sa kanunay nagapasalamat ako sa Dios alang kaninyo tungod sa grasya nga iyang gihatag kaninyo pinaagi kang Kristo Jesus. Kay diha sa pagkahiusa ninyo kang Kristo, nadato kamo sa tanang butang lakip sa tanang pagpanulti ug sa tanang kahibalo. Ang mensahe mahitungod kang Kristo nakagamot na kaninyo, ug tungod niini nakadawat kamo sa tanang panalangin samtang nagpaabot kamo sa pagpadayag sa atong Ginoong Jesukristo. Lig-onon usab kamo niya hangtod sa kataposan aron wala unyay ikasaway kaninyo sa adlaw sa pagbalik sa atong Ginoong Jesukristo. Kasaligan ang Dios nga nagtawag kaninyo aron mahiusa sa iyang Anak nga si Jesukristo nga atong Ginoo.

Mga igsoon, ang Pulong sa Ginoo.

4. Pagpasidungog sa Ebanghelyo

(Ang pangulo mobow sa may altar agig pagtahod ug moadto sa may ambo alang sa pagbasa sa Ebanghelyo ug dapiton ang katawhan sa pagtindog pinaagi sa pag-ingon:)

Pangulo: Manindog kita ug atong pasidunggan ang Ginoo diha sa atong pag-awit sa aleluya.

5. Ebanghelyo

Marcos 13:33-37

Ang pagsangyaw sa Maayong Balita sumala ni San Marcos.

Si Jesus mipahimatngon sa iyang mga tinun-an: "Busa pagbantay ug pagtukaw kamo, kay wala kamo masayod kanus-a kini moabot. Sama kini sa usa ka agalon nga mopanaw sa layong dapit. Sa dili pa siya mobiya, hatagan niya'g buluhaton ang tagsatagsa ka sulugoon, ug pahimangnoan ang guwardiya sa pultahan nga magbantay sa kanunay. Busa pagtukaw kamo, kay wala ninyo mahibalo-i kun kanus-a ang agalon mopauli - sa hapon ba, sa tungang gabii, o sa dili pa ang kaadlawaon, kun sa buntag ba. Kun mokalit siya pag-abot, kinahanglan nga dili kamo niya hiabtan nga nangatulog! Ang gisulti ko kaninyo, gisulti ko usab sa tanan. Busa pagbantay gayud kamo!"

Mga igsoon, ang Maayong Balita sa atong Ginoo.

6. Komentaryo

Pangulo: Manglingkod kita ug paminawon ang Komentaryo nga makatabang kanato sa pagsabot sa pulong sa Dios nga atong nadungog.

Tema: Pagmaigmat Kamo!

Sa moderno nga mga balay karon, atong mabantayan nga kon aduna gani gate ang balay sagad adunay "door bell or security guard." Kini sila maoy unang mopahibalo sa tagbalay kon kinsa ang nagkinahanglan o nangita sa tagbalay. Usa kini ka timaan nga walay makasulod sa maong balay kon dili una mailhan.

Nganong naghisgot man kita niini? Tungod kay ang atong Ebanghelyo karon naghisgot sa pagkamabinantayon. Ang pagkamabinantayon gikinahanglan gayud tungod kay ang bugtong nga gipadayag sa Dios Amahan ngadto sa Anak gililong kini sa tanang mga tawo nga wala nagtuo kaniya. Mao kini ang paagi nga magtudlo kanato sa pagbantay kanunay ilabina sa pag-abot ug pagbalik ni Kristo. Dili lang kini ordinaryo nga pagbantay kon dili maigmat nga pagbantay. Kini usa ka pasidaan sa atong Ginoong Jesukristo tungod kay wala gayo'y bisan usa nga nasayud sa iyang pag-abot. Ang iya lamang panghinaut nga kitang tanan nagtukaw ug nangandam alang sa iyang pag-abot.

Ang kinaiya sa pagkamabinantayon dunay mga pamaagi. Una, gikinahanglan ang pag-antus. Bisan unsa may mahitabo, maayo o nagdaut man ang tempo, ma adlaw man o gabii, gikinahanglan gayud ang pag-antus niini kay basin unya og moabot ang Dios sa atong kaugalingon nga wala nato damha. Ang ikaduha mao ang mga timailhan. Ang pagbantay sa mga timailhan "common” kini bisan pa sa unang mga tawo nga nagdepende gayud niini. Kining paglantaw sa mga timailhan, nagpadayag kini nga ang tawo nga mabinantayon, makanunayon usab diha sa iyang pagbantay. Diha sa iyang pagkamakanunayon, nagpadayag kini nga matinud-anon siya sa iyang tahas. Ang ikatulo mao ang pagpaminaw. Ang pagkamagbalantay dili lang diay kutob sa pagbantay kon dili kahibalo pud maminaw. Diha sa Basahon sa 1 Corinto 16:22 nagkanayon "Maranatha" sa ato pa "The Lord is coming!" Ang Ginoo haduol na! Paminawa ang mga singgit sa kalipay, pagmaya, kadasig sa mga tawo nga modawat kang Kristo. Ang atong kaluwasan haduol na. Ang kaluwasan ihatag niadtong modawat kang Kristo. Atong biyaan ang atong pagkaulipon sa kangitngit kay si Kristo ang magdala kanato nianang dakong kahayag sa kaluwasan. Ang ikaupat mao ang pagtubag sa atong tawag isip mabinantayon. Sayud gayud ang Ginoo sa tanan natong mga gipangayo sa kinabuhi, apan usahay pud kita nagdumili sa pagtahan sa atong kaugalingon alang kaniya. Lisud ug dili sayon ang pagpuyo sa pagkamabinantayon, apan si Kristo mismo ang nagtawag kanato niining maong kinaiya. Usahay pud, malipayon kita nga mitubag sa tawag ni Kristo, apan nalimtan pud nato ang mga panginahanglan sa uban. Kadtong masakiton, mga biniyaan, walay gikaon ug walay mga puloy-anan.

Nalimot kita nga bisan gani kining mga tawhana maoy presensya ni Kristo diha sa iyang pag-abot mao nga wala kita nakabantay.

Angay nato nga batonan nga si Kristo moabot sa atong kinabuhi sa nagkalainlaing paagi nga wala nato damha. Ang daku nga panginahanglan niini sa atong kaugalingon mao ang maayong pagkamabinantayon ug maigmat kanunay diha sa atong pagbantay. Ang atong simbahan nagkinahanglan og mga matinud-anon nga mga magbalantay. Ato untang makabig ang atong kaugalingon niini dili lang sama sa naandan nga buhat sa "security guard" ug sa "door bell" nga mopahibalo kinsay moabot, kon dili ang pagkamabinantayon nga molantaw sa kinatibuk-an gayud. Kitang tanan gitawag ug gihagit niini. Ug atong pangayoon kanunay sa Ginoo ang iyang makanunayong giya kanato alang sa atong paglahutay ug pagkamatinud-anon sa atong pagkamagbalantay.

Giya alang sa Pamalandong:

1. Sa imong kinabuhi nakasinati ka ba sa presensya ni Kristo?

2. Andam ba kita kanunay sa paghiabot ni Kristo diha sa atong tagsa tagsa ka kinabuhi?

(Pagkahuman, maggahin og hamubong kahilom alang sa pagpamalandong sa mensahe nga gipadayag. Human sa hamubong kahilom, mopadayon ang PSL sa pag-ingon:)

Pangulo: Palihug tindog.

3. Pangaliya

Pangulo: Si Kristo mianhi aron sa pagluwas kanato ug misaad nga Siya mobalik. Mag-ampo kita nga sa kanunay mahinangpon kita nga moabiabi kaniya. Sa matag pag-ampo, moingon kita:

GINOO, DUNGGA ANG AMONG PAG- AMPO.

a. Nga ang pagsaulog nato sa Adbiyento moabli sa atong mga kasingkasing ngadto sa gugma sa Ginoo. Mag-ampo kita sa Ginoo.

b. Nga ang kahayag ni Kristo modan-ag sa kangitngit sa sala. Mag-ampo kita sa Ginoo.

c. Nga kining "Advent Wreath" magpahinumdum kanato sa sa kanunay sa pagpangandam sa pagbalik ni Jesukristo. Mag-ampo kita sa Ginoo.

d. Nga sulod niining panahon sa Pasko, mapuno unta kita sa kalinaw ug kalipay diha sa atong pagpaningkamut sa pagsunod sa pagtulun-an ni Kristo. Mag-ampo kita sa Ginoo,

III. RITO SA PAGPANALANGIN

1. Pag-ampo sa Pagpanalangin

Pangulo: Ginoong Dios, ang Imong Simbahan malipayon nga naghulat sa pag-abut sa Manunubos nga midan-ag sa among mga kasingkasing ug miwagtang sa kangitngitan sa kasal-anan.

Ibubo kanamo ang imong mga panalangin samtang kami mosindi sa mga kandila niining "wreath". Hinaut nga ang ilang mga siga mopadayag sa kahayag ni Kristo ang Ginoo hangtud sa kahangturan.

Tanan : Amen.

(Ipahigayon ang pagpangsindi sa mga kandila ngadto sa advent wreath. Mouna ang pangulo sa pagsindi dayon mosunod ang katilingban.)

IV. PAGTIGOM SA GASA ALANG SA PAGHIGUGMA

1. Pagtigom sa mga Gasa

Pangulo: Manglingkod ang tanan.

Niining higayona human nato mapadayag ang atong pagtoo sa Ginoo, ato na usab ipadayag ang atong buhat sa gugma alang sa Simbahan ug panginahanglan sa atong katilingban pinaagi sa atong kinasingkasing nga paghalad sa mga gasa.

(Ipahigayon dinhi ang awit sa pagtigom sa mga gasa ug dawaton kini sa PSL.)

2. Amahan Namo

Pangulo: Isip mga anak sa Dios, mangahas kita karon sa Amahan sa mga pulong nga gitudlo kanato ni Kristo.

Tanan: Amahan namo (awiton)

V. RITO SA PAGTAPOS

1. Panalangin ug Panamilit

Pangulo: Hinaut nga ang kahayag ni Kristo mogiya kanato ngadto sa mga kalipay sa iyang gingharian, karon ug sa kahangturan. Sa ngalan sa Amahan, sa Anak ug sa Espiritu Santo.

Tanan : Amen.

2. Pahibalo

(Basahon sa Pangulo ang mga pahibalo nga inandam na daan.)

Pangulo: Manglingkod kita alang sa mga pahibalo.

3. Katapusang Awit

Pangulo: Manindog ang tanan alang sa katapusang awit.