IKAKAWHAA'G SIYAM NGA DOMINGGO

IKAKAWHAA'G SIYAM NGA DOMINGGO

a. BASAHON I

Is. 45:1, 4-6

Kinutlo gikan sa basahon ni Propeta Isaias.

Mao kini ang giingon sa Ginoo ngadto sa Iyang dinihogan nga si Ciro, kansang tuong kamot Akong gikuptan aron pagmando sa kanasuran nga anaa sa iyang atubangan ug pagbuntog sa gahum sa mga hari, pag-abli sa mga pultahan nga anaa sa iyang atubangan ug dili na kini sirhan: Tungod sa Akong alagad nga si Jacob, ug kang Israel nga Akong pinili, gitawag ko ikaw sa imong ngalan, ug gihatagan ko ikawg bansagon, bisan pag wala ka makaila Kanako. Ako mao ang Ginoo, wala nay lain, walay Dios gawas Kanako; aron ang katawhan, sukad sa sidlakan hangtud sa kasadpan, masayud nga walay lain gawas Kanako; Ako mao ang Ginoo, ug wala nay lain.

Ang Pulong sa Ginoo.

b. SALMO RESPONSORYO 

Salmo 96:1,3,4-5,7-8,9-10

Tubag (R) Tagaig himaya ug dungog ang Ginoo.

Awiti ang Ginoo og usa ka bag-ong awit, awiti ang Ginoo, kamong tanang kayutaan. Isangyaw ang Iyang himaya diha sa kanasuran; diha sa tanang katawhan, ang Iyang katingalahang mga buhat. (R)

Kay daku ang Ginoo ug angay gayud nga dayegon; makataha Siya, labaw sa tanang mga dios. Kay ang tanang mga dios sa kanasuran kawang apan ang Ginoo nagbuhat sa kalangitan. (R)

anak Hatagi ang Ginoo, kamong mga banay sa kanasuran, hatagi ang Ginoo sa himaya ug pagdayeg; hatagi ang Ginoo og himaya angay sa Iyang ngalan. Pagdalag mga gasa, ug sulod sa Iyang kahawanan. (R)

Simbaha ang Ginoo diha sa balaan nga saput; pangurog kamo sa Iyang atubangan, kamong tanang kayutaan; Ingnan diha sa kanasuran; Ang Ginoo Hari, nagamando Siya nga matarung sa katawhan. (R)

c. BASAHON II 

1 Tes.1: 1-5

Kinutlo gikan sa unang sulat ni San Pablo ngadto sa taga Tesalonica.

Gikan ni Pablo, ni Silas ug ni Timoteo, alang sa iglesia sa Tesalonica nga Iya sa Dios nga Amahan ug sa Ginoong Jesukristo: Mabatonan unta ninyo ang grasya ug ang kalinaw.

Sa kanunay nag-ampo kami alang kaninyo ug nagpasalamat sa Dios tungod kaninyong tanan. Sa among pag-ampo sa atong Dios ug Amahan wala namo hikalimti paghisgot ang inyong pagtoo nga gipakita ninyo, ug ang inyong kakugi nga dinasig sa gugma, ingon man ang inyong malig-ong paglaum sa atong Ginoong Jesukristo. Mga igsoon, nasayud kami nga ang Dios nahigugma kaninyo ug gipili kamo Niya aron maiya. Kay nagwali kami sa Maayong Balita dili sa pulong lamang kondili sa gahum sa Espiritu Santo. Hugot ang among pagtoo nga kini matuod gayud. Nasayud kamo giunsa namo pagkinabuhi samtang kami uban pa kaninyo tungod lamang sa inyong kaayohan. ang

Ang Pulong sa Ginoo.

d. EBANGHELYO

Mt. 22:15-21

Ang Santos nga Ebanghelyo sumala ni San Mateo.

Ang mga Pariseo nanlakaw ug naglaraw sa pagbitik kang Jesus pinaagig mga pangutana. Unya gipadala nila ngadto kang Jesus ang pipila sa ilang mga tinun-an ug pipila ka mga sakop sa pundok ni Herodes. "Magtutudlo," miingon sila, "Nasayud kami nga dili Ka mamakak; nagtudlo Ka sa matuod bahin sa pagbuot sa Dios alang sa tawo, sa walay pagpanumbaling sa gihunahuna sa mga tawo, kay wala Ka man magtagad sa ilang panagway. Busa sultihi kami kon unsa ang Imong hunahuna; supak ba sa atong Balaod ang pagbayad og buhis ngadto sa Emperador sa Roma, o dili ba?" Apan nasayud si Jesus sa ilang dautang laraw, busa miingon Siya: "Mga tigpakaaron ingnon! Nganong inyo man gayud Akong bitkon? Pakit-a Ako ninyo sa kuwarta nga ibayad sa buhis?" Ug gipakita nila ang kuwarta, ug nangutana Siya kanila, "Kinsa mang nawong ug ngalan kining nakulit dinhi?" "Sa Emperador," mitubag sila. Busa si Jesus miingon kanila, "Kon mao kana, ibayad ngadto sa Emperador ang iya sa Emperador, ug ngadto sa Dios ang iya sa Dios."

Ang Ebanghelyo sa Ginoo.

e. KOMENTARYO

Tema: Ang Pagkamatinud-anon.

Niadtong panahona ang nasod sa mga Hudeyo naa uban sa gahum sa mga taga Roma nga gipangunahan sa Emperador nga si Haring Cesar. Ang mga Hudeyo ug Pariseo mobayad gayud og buhis ngadto sa Emperador nga maoy naghatag og kasuko kanila. Mao nga diha sa ilang pagpakighinabi sa mga Pariseo uban ni Jesus, ang mga Pariseo naglaraw sa pagbitik kang Jesus pinaagi'g pangutana, "Magtutudlo, sultihi kami kon unsa ang Imong hunahuna: supak ba sa atong balaod ang pagbayad sa buhis ngadto sa Emperador sa Roma, o dili ba?" Nasayud si Jesus sa ilang dautang laraw apan wala siya mabitik sa ilang laang. Diha sa salaping dinaryo nahipatik ang nawong ni Cesar mao nga si Jesus mitubag, "Ihatag kang Cesar ang kang Cesar sa Dios ang sa Dios.

Ang atong Ebanghelyo karon

nagpahinumdum kanato nga kita kabahin sa Gingharian sa Dios ug kabahin usab sa katilingban nga atong gipuy-an. Kini nagpasabot nga aduna kitay obligasyon niining duha.

Isip mga kristiyanos, dili lang kita miyembro sa Simbahan apan usab miyembro kita sa usa ka katilingban. Mao nga usahay adunay panagbangi tali sa atong obligasyon sa atong nasud o katilingban ilabi na kung maghisgot diha nga may kalambigitan sa pagtoo ug ang moralidad sa tawo. Niining maong panghitabo o sitwasyon ato kanunay ibutang ang Ginoo ug unahon nato ang iyang mga balaod bisan kini sukwahi sa balaod sa atong nasud.

Kitang mga kristiyanos gisangonan sa pagmantala sa Ebanghelyo sa atong Ginoo. Gitawag kita sa pagmantala sa Maayong Balita ngadto sa nagkalainlaing paagi sa atong kinabuhi.

Ang pinakaimportante nga tumong alang kanatong tanan, mao ang pagbuhat og maayo alang sa atong kaluwasan.

Giya alang sa pamalandong:

1. Unsay buot ipasabot ni Jesus sa pag-ingon nga angay atong "ihatag kang Cesar ang kang Cesar, ug sa Dios ang sa Dios."?

2. Katungdanan ba sa kristiyanos ang pagtuman sa matarong nga mga balaod sa kagamhanan ilabi na ang pagbayad sa buhis?

f. PANGALIYA

Pangulo: Ang atong Ginoo nagpadayag sa Iyang pagkamatinud-anon ngadto sa Iyang katawhan. Busa moduol kita Kaniya karon ug atong ihalad ang atong mga panginahanglan. Sa matag pag- ampo kita motubag: AMAHAN NGA MALOLOY-ON DUNGGA KAMI.

1. Alang sa tibuok Simbahan, ilabi na ang nagdumala niini ang Santo Papa, mga Obispo ug kaparian, andam unta kining motahan sa ilang kaugalingon ug kanunay nga mohatag og higayon alang sa mga tawo nga nanginahanglan sa espirituhanong giya sa ilang kinabuhi. Mag-ampo kita.

2. Alang sa tanang nagdumala sa mga nasud, unta magmatinud-anon sila sa pagpangalagad aron makab-ot ang kauswagan ug kaangayan nga maoy mithi ug damgo sa tanang katawhan. Mag-ampo kita.

3. Alang sa atong tagsa tagsa ka katilingban nga ang hiyas sa pagkamatinud-anon ug pagkamahigugmaon ikapakaylap sa atong mga kaigsoonan pinaagi sa atong pagsaksi nga inubanan sa atong mga maayong binuhatan. Mag-ampo kita.

4. Alang sa matag pamilya nga unta si Kristo ang mahimong sentro sa ilang pagpuyo aron anaa ang pagsinabtanay ug maghari ang gugma sa tagsa tagsa alang sa katunhayan ug malinawong pagpuyo sa tanan. Mag-ampo kita.

5. Alang sa atong mga igsoon o paryente nga nangamatay na nga dawaton na unta sila sa gingharian nga gitagana alang kanila. Mag-ampo kita.

6. Alang sa atong personal nga katuyuan ato kining i-ampo diha sa kahilum.

Pangulo: Amahan, sayud kami sa Imong walay sukod nga gugma kanamo. Busa masaligon kaming mipadangat sa among mga pangamuyo nganha Kanimo, sa ngalan ni Kristo among Ginoo. Amen.