Ikakawhaan nga Domingo sa Ordinaryong Panahon

IKAKAWHAAN NGA DOMINGGO

a. BASAHON I

Is. 56: 1, 6-7

Kinutlo gikan sa basahon ni Propeta Isaias.

Nag-ingon ang Ginoo: "Subaya ang hustisya ug buhata ang matarung, kay sa dili madugay moabot na ang akong kaluwasan, ug ipadayag na ang akong pagtubos."

"Ang mga langyaw nga miduol sa Ginoo aron mag-alagad Kaniya ug paghigugma sa Iyang ngalan, sila nga nagtuman sa Adlaw Igpapahulay ug wala magpasipala niini panad-on ko sa balaan kong bukid, ug lipayon ko sila didto sa akong balay - alampoanan. Ang ilang mga halad sinunog ug mga halad inihaw dawaton didto sa akong halaran; kay ang akong balay nganlan balay alampoanan sa tanang katawhan.

Ang Pulong sa Ginoo.

b. SALMO RESPONSORYO

Salmo 67: 2-3,5,6,8

Tubag (R) - O Dios, magadayeg unta Kanimo ang tanang mga nasud.

Kaloy-an unta kita sa Dios ug bendisyonan Niya; ipadan-ag unta kanato ang Iyang nawong. Mahibaw-an unta ang Imong dalan dinhi sa yuta; diha sa tanang mga nasud ang Imong kaluwasan. (R)

Maglipay unta ang mga nasud ug magsadya tungod kay nagamando Ka sa kanasuran diha sa katarung; ang mga nasud dinhi sa yuta Imong agakon. (R)

Dayegon unta Ikaw sa katawhan, O Dios; ang tanang kalungsuran magdayeg unta Kanimo. Panalanginan unta kita sa Dios, ug ang tanang kautlanan sa yuta mahadlok unta Kaniya. (R)

c. BASAHON II

Roma 11: 13-15,29-32

Kinutlo gikan sa sulat ni San Pablo ngadto sa taga Roma.

Karon, bahin kaninyong mga dili Judio: ipasigarbo ko ang akong buluhaton ingon nga apostol ako sa mga dili Judio, aron masina ang akong isigka Judio ug maluwas ko ang pipila kanila. Kon sa dihang gisalikway sila, ang kalibutan nagpasig-uli ngadto sa Dios, unsa pa kaha kon dawaton sila? Kinabuhi alang sa mga patay! Kay dili gayud mag-usab-usab ang Dios sa Iyang hunahuna labot sa Iyang pilion ug panalanginan. Kamong mga dili Judio misupil sa Dios kaniadto, apan karon gikaluy-an kamo sa Dios tungod kay misupil man ang mga Judio. Sa maong pagkaagi, tungod sa kalooy nga nadawat ninyo, ang mga Judio misupil sa Dios aron sila usab makadawat sa kalooy sa Dios. Kay gihimo sa Dios ang tanang mga tawo nga masupilon aron ikapakita Niya ang Iyang kalooy kanilang tanan.

Ang Pulong sa Ginoo.

d. EBANGHELYO

Mt. 15: 21-28

Ang Santos nga Ebanghelyo sumala ni San Mateo.

Unya mibiya si Jesus niadtong dapita ug miadto sa kayutaan duol sa mga siyudad sa Tiro ug Sidon. Usa ka babaye nga taga Canaan, nga nagpuyo niadtong dapita, miduol Kaniya ug mituwaw, "Sir, Anak ni David, kaloy-i intawon ako! Ang anak kong babaye giyawaan ug nag-antus pag-ayo." Apan wala motubag si Jesus. Miduol ang Iyang mga tinun-an Kaniya ug miingon, "Papahawaa siya kay nagsunodsunod siya kanato ug saba kaayo!" Unya mitubag si Jesus, "Gipadala Ako ngadto lamang sa nawalang mga karnero sa nasud sa Israel." Apan miduol ang babaye ug miluhod sa atubangan ni Jesus. "Sir, tabangi intawon ako!" miingon siya. Si Jesus mitubag, "Dili husto nga kuhaon ang kalan-on sa mga anak ug ipakaon sa mga iro." Ang babaye mitubag, "Tinuod kana, Sir, apan bisan gani ang mga iro makakaon man sa mga mumho nga mahulog gikan sa lamesa sa agalon." Ug si Jesus mitubag kaniya: "Inday, pagkadaku sa imong pagsalig! Matuman ang imong gihangyo." Ug niadto dayong gutloa naayo ang iyang anak.

Ang Ebanghelyo sa Ginoo. 

e. KOMENTARYO

Tema: Ang Pagsalig maoy Sukdanan sa Dios sa atong Kaluwasan.

Sa atong kinabuhi dili nato malikayan nga kita mosalig sa uban ilabina kung nakahatag kini kanato og inspirasyon, pagbag-o ug uban pang mga butang nga nakatabang sa atong kaugalingon. Dili nato kini ikalimod tungod kay usa kini ka gasa nga gipaambit sa Dios kanato.

Sa atong mga pagbasa karon ilabina sa Ebanghelyo ni San Mateo, nga naghisgut mahitungod sa "Pagtuo o Pagsalig" sa usa ka babaye ngadto kang Kristo. Diha usab sa ikaduhang pagbasa gikan sa sulat ni San Pablo ngadto sa mga taga Roma, nagpadayag bahin sa kaluwasan alang sa mga dili Hudio. Atong mabati sa kadako sa pagsalig ni San Pablo sa Ginoo ug sa iyang kaugalingon nga maluwas ang mga dili Hudio. Kon atong hatagan og gimbug- aton ang Ebanghelyo nagpadayag kini kon unsa ka hugot ang pagsalig sa usa ka babaye nga Taga-Canaan nga mamaayo ang iyang anak nga babaye nga giyawaan ug nag-antos pinaagi sa iyang pagtuo ngadto kang Kristo Jesus. Diha sa dalan nahimamat ni Jesus ang usa ka babaye nga adunay dako nga pagtuo kaniya. Sa una nilang panag-estoryahay gisulayan ni Jesus kung unsa kadako ang iyang pagtuo, hangtud wala madugay gihatag kaniya ang iyang gipangayo.

Sa atong moderno nga panahon karon, usahay nagkapuliki na kita sa pagpangita og kauswagan sa atong kinabuhi ug kusog kaayo ang kompetensya sa mga modernong kagamitan o sa mga teknolohiya. Makapadayag pa ba kita sa atong pagtuo sa Dios pinaagi sa paghatag og dakong panahon sa pag- ampo ug pagpamalandong? Kasagaran mosangpit ug moduol lang kita sa Ginoo kung kita anaa sa kalisod sa atong kahimtang ug naghinubra na ang atong pagsalig sa atong kaugalingon ug gihatagan na nato og dakung gimbug-aton ang atong mga kabtangan o mga bahandi niining kalibutana. Nasayod kita nga lumalabay ra kining tanan ug dili kini mao ang garantiya nga mahiusa kita sa Ginoo.

Ang dakung pangutana, nabuhat ba nato ang atong responsibilidad agi og balus sa kaayo sa Dios sa matag usa kanato? Misunod ba kita sa iyang kabubut-on ug pamaagi diha sa pagbuhat sa maayo diha sa atong isigkatawo? Isip mga binunyagan aduna kitay kaakuhan nga motubag sa pagkamahigugmaon sa Dios, pinaagi sa atong dakong pagsalig nga maoy sukaranan ug sukdanan sa atong pagka- kristiyano ug pagkamatuohon kang Kristo Jesus. Oo, kinahanglan gayud nga kita mosalig sa Dios kay mao kini ang makaluwas sa atong kalag padulong sa gingharian sa langit nga gipasalig sa atong Langitnong Amahan. Matud pa sa Balaang Kasulatan nga kon kita adunay pagtuo sama ka dako sa liso sa mustasa, makahimo kita og butang nga imposible nga mahitabo apan sa Dios walay imposible. Kon aduna kitay pagtuo nga kining butanga makaluwas kanato, ato gayod nga paningkamutan sa pagbuhat niini kay nasayod man kita nga kini maghatag kanato og kaayohan. Sa pagbuhat nato niini kita nagpamatuod nga kita nakadawat sa kaayo sa Dios. Unsaon man nato pagpakita sa atong pagsalig diha sa atong kaugalingon ug sa uban kon kita mismo wala mituo sa grasya sa Dios. Sama ra usab kon unsaon man nato pagpaambit sa gugma sa Dios ngadto sa uban nga dili nato makita kon kita mismo wala mahigugma sa atong kaugalingon ug sa atong isigkatawo nga kanunay natong mahimamat. Ato unang hingpiton ang atong pagtuo ug pagsalig sa Ginoo aron mahingpit usab ang atong pagpadayag sa atong pagtuo ug pagsalig sa atong kaugalingon ug sa uban. Kay walay bili ang atong pagsalig ug pagtuo kon kini wala mapadayag sa buhat. Amen.

Giya alang sa pamalandong:

1. Kumusta na man ang akong pagtuo ug pagsalig sa Ginoo? 

2. Nagpabilin bang hugot o huyang ang akong pagtuo sa Dios? Ngano man?

f. PANGALIYA

Pangulo: Ang atong Langitnong Amahan nagdasig kanunay kanato sa pag-ila ug pagsinati sa Iyang presensya diha sa atong mga buluhaton ilabi na diha sa atong mga panginahanglan. Busa ihalad nato Kaniya ang atong mga pag-ampo ug sa matag pangamuyo kita motubag: 

GINOO, PATALINGHUGI KAMI.

1. Nga ang atong Santo Papa, mga Obispo, kaparian ug mga relihiyoso, magmakanunayon sila sa ilang pag-alagad sa Simbahan ang katawhan sa Dios. Mag- ampo kita.

2. Nga ang mga pangulo sa atong panggamhanan dinasig sa lamdag sa Espiritu Santo, maglantaw sa kaayohan sa tanang katawhan ilabi na gayod niadtong nanginahanglan sa hinanaling pagtagad ug pag-atiman. Mag-ampo kita.

3. Nga ang mga lideres sa atong matag katilingban makabaton sa kalig-on sa pagtoo ug hingpit nga pagsalig sa gahum sa Dios nga maoy ilang gabayan sa ilang matinud-anon nga pagpangalagad. Mag- ampo kita.

4. Nga kitang tanan nga nagkatigum karon unta mahiusa kita sa Ginoo pinaagi sa atong pagpadayag sa atong pagtoo diha sa pulong ug buhat nga mahimong sumbanan sa atong mga kaigsoonan. Mag-mapo kita.

5. Nga ang atong mga minahal sa kinabuhi nga mipanaw na makabaton na unta sila sa kinabuhing dayon nga gisaad sa Dios nga ganti alang kanila nga nagpuyo sa katarung sa buhi pa sila. Mag-ampo kita.

6. Nga ang atong personal nga katuyuan, atong i-ampo diha sa kahilum.

Pangulo: Langitnon nga Amahan, nasayud Ka sa tanan namong mga panginahanglan bisan pa og dili namo ibungat Kanimo. Sa tumang pagsalig naglaum kami nga amo kining mahuptan subay sa Imong kabubut-on ug paagi. Kining tanan among gipangayo pinaagi ni Kristo among Ginoo. Amen.