KASAULOGAN SA PAGKALAWAT SA MGA MASAKITON (Cebuano)

KASAULOGAN SA PAGKALAWAT SA MGA MASAKITON

(Cebuano)

1. RITO SA PAGSUGOD

I. Pag-abi-abi

Ang PSL o Extraordinary Ministers of Holy Communion moabi-abi ngadto sa masakiton, mangayo siyag katahuran pinaagi niining 'mosunod nga mga pulong:

PSL / EMHC: MAAYONG ____________ KANINYONG TANAN.

AGIG PAGHINUMDUM KANATO ISIP MGA KATOLIKONG KRISTIYANOS, ANIA KITA KARON ALANG SA PAGSAULOG NIINING PANAHON SA ______________  (ibungat sa PSL /

EMHC ang liturhiyanhong panahon nga gisaulog sa Simbahan aron usab masayod ang masakiton ug mga kaubanan niini) DIIN ATONG GIGAHIN KINING MAONG ADLAW NGADTO SA GINOO.

NIINING ATONG PANAGTIGOM KARON, ATONG PAGASAULOGON ANG RITO SA PAGKALAWAT SA MASAKITON ILABINA SA ATONG IGSOON NGA SI N. ______________. 

ATONG SUGDAN KINI DIHA SA PAG-INGON:

PSL / EMHC: SA NGALAN SA AMAHAN, UG SA ANAK, UG SA ESPIRITU SANTO.

Tanan: Amen.

PSL / EMHC: ANG KALINAW SA GINOO MAANIA NIINING BALAYA UG SA TANAN NGA NAGPUYO DINHI.

Tanan: Maanaa usab kanimo.

Ipahimutang sa ministro diha sa lamesa nga giandam sa tagbalay ang dala niyang Ostiya o Balaang Sakramento ug magsimba silang tanan.

2. Pasiunang Awit

Mamahimong mag-awit nga haum sa panahon o dili na.

3. Pagbisibis sa Tubig nga Balaan

Sumala sa kahimtang, ang PSL /EMHC mamahimong mobisibis sa balaang tubig ngadto sa masakiton ug sa palibot sa lawak subay niining mosunod nga mga pulong. Ibungat usa niya kini una niya bisbisan.

PSL/ EMHC:

[KINING TUBIG MAGPAHINUMDUM UNTA SA BUNYAG NGA IMONG NADAWAT DIHA KANG KRISTO, KANSANG MAKALUWASNONG PAGPASAKIT UG PAGKABANHAW NAGLUWAS KANATO.]

4. Rito sa Paghinulsol

PSL/EMHC: MGA KAIGSOONAN, MAGHINULSOL KITA SA ATONG MGA SALA ARON MAANDAM KITA SA ATONG PAGSAULOG NIINING MAONG KASAULOGAN.

Tanan: Nagakompisal ako sa Dios nga makagagahum sa tanan, ug kaninyo mga igsoon, kay nakalapas ako ug daku uyamot, sa hunahuna, sa pulong, sa buhat ug sa wala pagbuhat sa angay'ng buhaton, kay akong sala, akong sala, akong dakung sala. Busa nangamuyo ako kang Santa Maria kanunay'ng Ulay, sa tanang mga anghel ug mga Santos ug kaninyo mga igsoon, aron inyo akong iampo sa Ginoo nga atong Dios.

PSL/EMHC: KALOY-AN UNTA KITA SA DIOS NGA MAKAGAGAHUM SA TANAN, UG PASAYLOON SA ATONG MGA SALA, DAD- ON UNTA KITA NIYA NGADTO SA KINABUHING DAYON.

Tanan: Amen.

II. KASAULOGAN SA PULONG SA DIOS

1 Corinto 11:26

1. Pagbasa

Kinutlo gikan sa unang sulat ni San Pablo ngadto sa taga Corinto.

Kay sa matag kaon ninyo niining pan ug sa matag inom ninyo niining kopa, gisangyaw ninyo ang iyang kamatayon hangtud sa pagbalik niya.

Ang Pulong sa Ginoo.

III. RITO SA PAGKALAWAT

1. Amahan Namo

PSL / EMHC: KARON MAGHIUSA KITA SA PAG-AMPO SA DIOS SUMALA SA GITUDLO KANATO SA ATONG GINOONG JESUKRISTO.

Tanan: Amahan namo...

ibungat o awiton

Pagkahuman sa awit o bungat sa Amahan Namo, andamon sa PSL/ EMHC ang hostiya nga anaa sa gamay'ng sudlanan o pyx ug iya kining kuhaon ug ipakita ngadto sa masakiton uban sa pag-ingon:

2. Pagkalawat

PSL / EMHC: KINI MAO ANG KORDERO SA DIOS NGA NAGAWAGTANG SA MGA SALA SA KALIBUTAN. BULAHAN ANG GIDAPIT ALANG SA BANGKITE SA GINOO.

Masakiton (o Tanan):

Ginoo, dili ako angay nga mokalawat kanimo apan ipamulong mo lamang ug mamaaayo ako.

PSL / EMHC: LAWAS NI KRISTO.

Tanan: Amen.

Human sa pagkalawat, hiposon sa PSL/EMHC ang tanan niyang mga gamit ug taposon ang kasaulogan diha sa rito sa pagtapos.

IV. RITO SA PAGTAPOS

1. Pag-ampo

PSL / EMHC: GINOO, SANTOS NGA AMAHAN, DIOS NGA MAKAGAGAHUM SA TANAN, MASALIGON KAMI NGA NANGAMUYO KANIMO.

HIMOA NGA ANG LAWAS SA IMONG ANAK NGA SI JESUKRISTO NGA NADAWAT SA AMONG IGSOON MAGDALA KANIYA NGADTO SA WALAY KINUTUBANG PAGKAAYO SA HUNAHUNA UG SA LAWAS.

KINI AMONG GIPANGAYO PINAAGI NI KRISTO AMONG GINOO.

Tanan: Amen.

2. Panalangin

Pangayoon karon sa PSL o EMHC ang panalangin sa Dios ug mohimo sa timaan sa krus sa iyang kaugalingon samtang moingon niining mosunod:

PSL / EMHC: PANALANGINAN KA UNTA SA DIOS NGA AMAHAN, AYOHON KA UNTA SA DIOS NGA ANAK UG HAYAGAN KA UNTA SA ESPIRITU SANTO.

Tanan: Amen.

3. Katapusang Awit.  (kon duna)