IKANAPULO'G DUHA NGA DOMINGGO

IKANAPULO'G DUHA NGA DOMINGGO

a. BASAHON I

Jer. 20: 10-13

Kinutlo gikan sa basahon ni Propeta Jeremias.

Nabati ko ang hagawhaw sa katawhan. Gianggaan ako nilag, "Ang Gikalisangan sa Tanang Dapit!" Miingon sila, "Ato siyang pakaulawan!" Bisan ang suod kong mga higala nagtinguha nga mapukan ako matud nila. "Basin pag malingla ta siya aron ato siyang madakop ug makapanimalos kita kaniya." Apan Ikaw Ginoo, dapig kanako ug gamhanan kaayo; mangapukan ug mangapakyas gayud sila nga naglutos kanako ug dili gayud modaug. Maulawan sila pag-ayo kay dili man molampos. Ug ang ilang kaulawan walay katapusan ug dili gayud hikalimtan. Apan Ikaw, Labing Gamhanang Ginoo, matarung ang pagsulay mo sa mga tawo; kay nasayud ka man sa ilang kasingkasing ug hunahuna. Busa pakit- a ako sa Imong pagpanimalos sa akong mga kaaway, kay gitugyan ko ang akong kawsa sa Imong mga kamot. Pag-awit ug dayga ang Ginoo! Giluwas Niya ang mga dinaugdaug gikan sa mga tawong dautan.

Ang Pulong sa Ginoo.

b. SALMO RESPONSORYO

Salmo 69:8-10,14,17,33-35

Tubag (R) Ginoo, sa Imong dakung gugma, tubaga ako.

Tungod Kanimo giantus ko ang insulto, ug nalumos ang akong nawong sa kaulaw. Nahimo akong sinalikway sa akong mga igsoon, usa ka langyaw alang sa mga anak sa akong inahan. Kay ang gugma ko sa Imong templo nagadilaab daw kalayo. Ug ang mga insulto kanila nga nangulipas Kanimo natingub diri kanako. (R)

Nangamuyo ako Kanimo, O Ginoo, nga Imo ako nga kaloy-an, O Sa Imong dakung gugma tubaga ako uban sa Imong makanunayong panabang. Tubaga ako, O Ginoo, kay daku man ang Imong kaayo; diha sa Imong dakung kalooy lingia ako. (R)

Tan-awa, kamong mga mapaubsanon, ug pagsadya; kamo nga nangita sa Ginoo malipay unta ang inyong mga kasingkasing. Kay ang Ginoo magpatalinghog sa mga kabus ug ang mga Iyaha nga gibilanggo dili Niya tamayon. Magdayeg unta Kaniya ang mga langit ug ang yuta, ang kadagatan ug ang nagalihok diha kanila. (R)

c. BASAHON II

Roma 5: 12-15

Kinutlo gikan sa sulat ni San Pablo ngadto sa taga Roma.

Nakasulod sa kalibutan ang sala pinaagi sa usa ka tawo, ug ang sala nagdalag kamatayon. Busa mikaylap ang kamatayon ngadto sa tanang katawhan kay nakasala man ang tanang tawo. Dinhi na sa kalibutan ang sala sa wala pa gani ihatag ang Balaod; apan sanglit wala may balaod, wala isipa ang mga sala. Apan sukad sa panahon ni Adan hangtud sa panahon ni Moises ang tanang tawo gigamhan sa kamatayon, lakip kadtong wala makasala sama sa pagpakasala ni Adan sa iyang paglapas sa sugo sa Dios.

Naghulagway si Adan sa usa ka tawong umaabot. Apan dili managsama silang duha; kay dili sama sa sala ni Adan ang gasa sa Dios. Kay kon daghan ang nangamatay tungod sa pagpakasala sa usa ka tawo, labi pang daku ang grasya ug ang gasa sa Dios nga mabatonan sa daghang tawo pinaagi sa usa ka tawo nga mao si Jesukristo.

Ang Pulong sa Ginoo.

d. EBANGHELYO

Mt. 10: 26-33

Ang Santos nga Ebanghelyo sumala ni San Mateo.

Si Jesus miingon sa Iyang mga Apostoles: "Ayaw kamo kahadlok sa mga tawo. Walay tinagoan nga dili mahibaw-an ug walay sekreto nga dili mabutyag. Ang gisulti Ko diha sa ngitngit kinahanglan isulti ninyo diha sa hayag, ug kadtong kamo ray nakabati kinahanglan isinggit ninyo didto sa mga atop. Ayaw kamo kahadlok niadtong mopatay sa lawas apan dili makapatay sa kalag; hinonoa, kahadloki ninyo ang Dios nga makalaglag sa lawas ug sa kalag didto sa impiyerno. Sa usa ka daku, makapalit kamog duha ka langgam nga sayaw, apan bisan pa niana walay usa kanila nga mahulog sa yuta kon walay pagtugot sa inyong Amahan. Ug bahin kaninyo, bisan gani ang tanang buhok sa inyong ulo giihap. Busa ayaw kamo kahadlok kay mas bililhon pa kamo kaayo kaysa mga sayaw!"

"Ang moangkon atubangan sa mga tawo nga siya Akoa, angkonon Ko usab atubangan sa Akong Amahan didto sa langit. Apan ang dili moangkon nga Siya Akoa, dili Ko usab angkonon atubangan sa Akong Amahan didto sa langit."

Ang Ebanghelyo sa Ginoo.

e. KOMENTARYO

Tema: Pagkamahadlokon ngadto sa Dios.

Sa miaging Dominggo atong gikanta ang awit nga Gugma ang Dios. Karon ato na usab kantahon kining awit nga nag-ulohan og "Ayaw Kahadlok".

Kitang tanan magdungan sa pagkanta: ayaw kahadlok sa imong pagpanaw sa kalaworan. Ang Ginoo anaa kanunay sa imong kiliran. Ayaw kahadlok nga moabot ang mga katalagman, kamo panalipdan sa gugma sa atong Amahan." Niining ikanapulo og duha nga Dominggo sa Ordinaryong Panahon, kita gitawag sa pagkamahadlokon ngadto sa Dios.

Ang atong Ebanghelyo naghisgot kong kinsay angayan natong kahadlokan. Angay ba kitang mahadlok sa mga tawong nagbiay-biay o nagyubit kanato tungod sa pagsangyaw sa Maayong Balita ug kaluwasan? Kinsa man ang angayan natong kahadlokan? Ang atong isigkaingon ba o ang katalagman ba o kamatayon? gutom ba o pagpanglutos? "Ayaw kamo kahadlok niadtong mopatay sa kalag; hinonoa, kahadloki ninyo ang Dios nga makalaglag sa lawas ug sa kalag didto sa impiyerno. Sa laktod nga pagkasulti, ang Dios lamang ang angayan natong kahadlokan.

Dili nato ikalimod nga sa atong kinabuhi niining kalibutana mobati gayod kita og kahadlok ilabi na gayod panahon sa sa kalisdanan, sa mga kalamidad, bagyo ug linog, kawad-on sa kinabuhi ug bisan pa man gani ang kamatayon. Aduna usab kitay kahadlok sa mga tawong adunay hataas nga katungdanan sa katilingban o mga adunahan. Apan kining tanan kalibutanon lamang, kasagaran mobati kita og kahadlok tungod kay kulang ang atong pagsalig ngadto sa labaw'ng Makagagahum. Lig-onon nato ang atong pagtuo ngadto Kaniya. Siya ang atong sukaranan, kalig-on ug paglaum sa kinabuhi. Mao kini ang gisaysay sa atong unang pagbasa. Dili kita angay mahadlok sa bisan unsang katalagman, hinonoa bisan ang mga langgam Iya man gani kining giatiman ug gihatagan og bili, unsa pa kaha kitang Iyang mga katawhan? Busa atong hinumduman kanunay Siya andam mosabot ug modawat kanato bisan kinsa o unsa kita diha sa katilingban. Wala Siyay gipili o pinalabi, kabus man o adunahan, o bisan unsa ang estado sa kinabuhi. Angayan natong pamalandungan nga ang gugma sa Dios walay kinutuban. Siya lamang ang bugtong natong kahadlokan. Busa sa kanunay mangandam kita sa atong kaugalingon. Ato kanunay'ng hinumduman nga ang paglikay sa paghimo ug dautan o pagpakasala ug pagkinabuhi sumala sa Iyang mga sugo, magdala kanato sa atong kaluwasan ug kalingkawasan.

Mao usab kini ang gisaysay sa ikaduhang pagbasa nga naghisgot mahitungod sa atong salang panulundon nga nahimo sa atong mga katigulangan tungod sa ilang pagkamasinupakon sa Dios. Apan pinaagi sa grasya ug gugma sa Dios, Iyang gipadala ang Iyang bugtong Anak aron sa pagluwas sa iyang katawhan. Busa tungod sa pagpakasala sa usa ka tawo naghari ang kamatayon, apan ang matarong nga buhat ug hingpit nga pagtuo ug pagsunod sa iyang kabubut-on mao ang atong hinagiban aron kita maluwas ug makabaton sa kinabuhing dayon.

Busa tungod niini puy-an nato ang atong kinabuhi subay sa mga gitudlo kanato sa atong manunubos nga mao ang Ginoong Jesukristo. Sa kanunay magkinabuhi kita sumala sa Iyang kabubut-on ug makighiusa kita Kaniya pinaagi sa pagpasaylo sa mga tawong nakasala kanato. Ug sa kanunay magpabilin kitang magmalig-on sa atong pagtuo pinaagi sa pagtuman sa Iyang gitudlo kanato sa hunahuna, pulong ug buhat. Kinahanglan nato nga magmahadlokon sa Ginoo.

Giya alang sa pamalandong:

1. Nagmahadlokon ba ako sa Ginoo?

2. Unsa man ang akong gibuhat aron sa pagpadayag sa akong pagkamahadlokon sa Ginoo?

f. PANGALIYA

Pangulo: Mga igsoon, mag-ampo kita sa atong Langitnong Amahan nga Iyang dunggon ang atong mga pag-ampo ug mga panginahanglan uban sa dakung pagsalig ug gugma. Sa matag pag-ampo kita moingon: DUNGGA KAMI GINOO.

1. Nga ang mga pangulo sa Simbahan, Santo Papa, mga Obispo ug mga kaparian, magmakugihon ug makanunayon untang mosangyaw sa Maayong Balita sa kaluwasan. Mag-ampo kita.

2. Nga ang mga lideres sa tanang kanasuran, magmadasigon unta sa ilang pagserbisyo ug pagpangalagad sa tanang katawhan nga walay gipihig. Mag-ampo kita.

3. Nga ang tanang pangulo sa Gagmay'ng Kristohanong Katilingban sa kanunay magmatinud-anon unta silang moalagad sa ilang katawhan nga gipiyal kanila sa ilang katilingban. Mag-ampo kita.

4. Nga ang mga nag-antus tungod nagkalainlaing balatian sa lawas, nag- antus sa sa kawad-on ug kagutom nga pinaagi sa panabang sa Espiritu Santo aduna untay mga tawo nga gihimong instrumento sa Dios sa pagtubag sa ilang gikinahanglan. Mag-ampo kita.

5. Nga kitang tanan nga nagkatigom karon magmainiton unta sa pagsangyaw sa Pulong sa Dios ngadto sa tanang katawhan ilabina diha sa atong tagsatagsa ka pamilya ug katilingban. Mag-ampo kita.

6. Nga ang atong kaugalingon nga katuyuan, atong ihalad diha sa kahilum.

Pangulo: Among Dios nga Amahan, tuburan sa kalooy ug gugma. Imong nadungog ang among mga pag- ampo. Tabangi kami nga makabaton kanunay sa masaligon, matoohon ug mahigugmaon nga kasingkasing  sama Kanimo. Kini among gipangayo ug gilauman nga madawat pinaagi ni Kristo among Ginoo. Amen.