Ikalima nga Domingo sa Pagkabanhaw

IKALIMANG DOMINGGO SA PAGKABANHAW

a. BASAHON I

Buhat 6:1-7

Kinutlo gikan sa basahon sa Mga Buhat sa mga Apostoles.

Wala madugay, samtang nag-anam og kadaghan ang mga tinun- an, nagkabingkil ang mga lumad nga Judio ug ang mga Judio nga Griego og pinulongan. Ang mga Judio nga Griego og pinulongan miingon nga ang ilang mga biyuda wala kahatagi sa ilang bahin sa matag adlaw nga pag-apod-apod sa salapi. Busa gitigom sa nagpulog-duha ka apostoles ang tanang mga tinun-an ug giingnan: "Dili matarung nga palabihon namo ang pag-atiman sa mga butang nga may labot sa salapi kay sa pagwali sa Pulong sa Dios. Busa, mga igsoon, pagpili kamog pito ka tawo diha kaninyo nga puno sa Espiritu Santo ug sa kaalam, ug amo silang tugyanan niining buluhatona. Niining paagiha kami makagamit sa tibuok namong panahon sa pag-ampo ug sa pagwali." Ang tibuok pundok nahimuot sa sugyot sa mga apostoles; busa gipili nila si Esteban, nga puno sa pagtoo ug sa Espiritu Santo, ug si Felipe, si Procoro, si Nicanor, si Timon, si Parmenas, ug si Nicolas, taga Antioquia nga usa ka Hentil nga nakabig ngadto sa tinuohan sa mga Judio. Ang pundok midala kanila ngadto sa mga apostoles ug ang mga apostoles nag- ampo ug nagpandong kanila sa ilang mga kamot.

Ug busa mipadayon pagkaylap ang Pulong sa Dios. Ang mga tinun-an didto sa Jerusalem nag-anam og kadaghan ug daghan kaayong mga pari nanuo.

Ang Pulong sa Ginoo.

b. SALMO RESPONSORYO

Salmo 33:1-2,4-5,18-19

Tubag (R) Ginoo, ang Imong kalooy maania unta kanamo, sa among pagbutang sa among pagsalig diha Kanimo.

Panglukso kamo sa kalipay, kamong mga matarung, diha sa Ginoo; ang pagdayeg angay sa mga buotan. Pasalamati ang Ginoo diha sa alpa; sa lira nga may napulo ka koldas awita ang Iyang kadayeganan. (R)

Matarung ang pulong sa Ginoo, ug ang tanan Niyang mga buhat kasaligan. Mahigugmaon Siya sa kaangayan ug katarung; puno ang yuta sa kalooy sa Ginoo. (R)

Tan-awa nga ang mga mata sa Ginoo anaa kanila nga mahadlokon Kaniya, kanila nga nagalaum sa Iyang kalooy; Aron pagluwas kanila sa kamatayon ug pag-amping kanila bisan sa panahon sa tinggutom. (R)

c. BASAHON II

1 Pedro 2:4-9

Kinutlo gikan sa unang sulat ni San Pedro.

Panuol kamo sa Ginoo, ang buhing bato nga gisalikway sa mga tawo, apan gipili sa Dios ug Iyang giisip nga bililhon. Panuol kamo ingon nga mga batong buhi ug ipagamit ang inyong kaugalingon aron pagtukod sa espirituhanong templo diin mag-alagad kamo ingon nga balaang mga pari nga maghalad sa espirituhanon ug makapahimuot nga mga halad ngadto sa Dios pinaagi kang Jesukristo. Kay ang Kasulatan nag-ingon: "Akong gipili ang bililhong bato nga karon Akong gibutang nga sukaranan sa Zion; ug ang mosalig Kaniya dili gayud mapakyas."

Kining batoha mahal kaayo alang kaninyo nga nagatoo. Apan alang niadtong wala motuo, ang Kasulatan nag-ingon: "Ang bato nga gisalikway sa mga panday kay kuno walay pulos, namatud-an nga mao diay ang labing importanteng bato."

Laing bahin sa Kasulatan nag-ingon: "Kini mao ang bato nga makapahidagma sa mga tawo, ang dakung bato nga makapapukan kanila."

Nahidagma sila kay wala sila motuo sa pulong sa Dios. Ug mao kini ang gitagana sa Dios kanila.

Apan kamo mao ang pinili nga katawhan, ang mga harianong pari, ug ang balaan nga nasud. Gipili kamo sa Dios aron maiya ug aron magmantala sa mga kahibulongang buhat sa Dios, ang nagtawag kaninyo gikan sa kangitngit ngadto sa Iyang katingalahang kahayag.

Ang Pulong sa Ginoo.

d. EBANGHELYO

Jn. 14:1-12

Ang Santos nga Ebanghelyo sumala ni San Juan.

Si Jesus miingon sa mga tinun-an, "Ayaw kamog kaguol. Salig kamo sa Dios ug salig usab kamo Kanako. Sa balay sa Akong Amahan dunay daghang mga lawak, ug Ako moadto aron pag- andam og dapit alang kaninyo. Kon dili pa kini tinuod, dili Ko unta kamo sultihan niini. Ug kon atua na Ako didto ug makaandam nag dapit alang kaninyo, mobalik Ako ug kuhaon Ko kamo aron bisan asa Ako, atua usab kamo. Nahibalo kamo unsaon pag-adto sa dapit nga Akong adtoan." Si Tomas miingon Kaniya, "Ginoo, wala kami mahibalo kon asa Ikaw paingon, busa unsaon namo pagkatultol sa dalan paingon didto?" Si Jesus mitubag, "Ako mao ang dalan, ug ang kamatuoran, ug ang kinabuhi; walay makaadto sa Amahan kondili moagi Kanako. Karon nga nakaila na kamo Kanako, makaila usab kamo sa Akong Amahan; ug sukad karon nakaila na kamo Kaniya ug nakakita Kaniya."

Si Felipe miingon Kaniya, "Ginoo, ipakita kanamo ang Amahan, ug igo na kana kanamo." Si Jesus mitubag: "Dugay na Akong nakig-uban kaninyong tanan, ug wala ba gihapon Ikaw makaila Kanako, Felipe? Ang nakakita Kanako nakakita usab sa Amahan. Busa nganong nag-ingon ka man, 'Ipakita kanamo ang Amahan?' Wala ba ikaw motuo, Felipe, nga Ako anaa sa Amahan ug ang Amahan ania Kanako? Ang mga pulong nga Akong gisulti kaninyo wala magagikan Kanako. Ang Amahan nga ania Kanako nagabuhat sa Iyang kaugalingong buluhaton. Tuhoi ninyo nga Ako anaa sa Amahan ug nga ang Amahan ania Kanako, kondili, panuo kamo tungod niining mga buhat. Sultihan Ko kamo sa matuod: ang magatoo Kanako magabuhat sa Akong gibuhat ug magabuhat siyag labaw pa niini, kay Ako moadto sa Amahan.

Ang Ebanghelyo sa Ginoo.

e. KOMENTARYO

Tema: Ang Tawag sa Pag-alagad.

Niining Ikalimang Dominggo sa

Pagkabanhaw, kita gipahinumduman sa atong tagsa tagsa ka tawag, ang tawag sa pag-alagad.

Ang atong mga pagbasa karon nagsaysay nga ang Ginoo nagpili ug nagtawag sa iyang mga tinugyanan diha sa pagpadayag sa Pulong sa Dios ngadto sa tanang katawhan sa tibuok kalibutan.

Ang unang pagbasa nagsaysay mahitungod sa pagpili sa pito ka mga lalaki nga mamahimong alagad sa nga apostoles. Kini tungod kay niadtong panahona nagkadaghan naman ang mga sumusunod ni Kristo. Ang mga apostoles nagpili og pito ka mga lalaki nga puno sa kaalam sa Espirtu Santo ug usa na kanila si Esteban, nga puno kaayo sa pagtoo ug sa Balaang Espiritu Santo aron sa pagtahan sa iyang kaugalingon diha sa pag-alagad, pag-ampo, ug pagbalaan sa Pulong sa Dios. Kini nagpunting sa usa ka tawag, ang tawag sa pag-alagad sa Ginoo.

Ang tawag sa pag-alagad dili lamang buluhaton ug misyon sa mga pari ug mga relihiyoso kon dili alang kanatong tanang mga binunyagan sa ngalan ni Jesukristo. Si Jesukristo unta ang atong sumbanan diha sa atong pag-alagad matag adlaw diha mismo sa atong pamilya, katilingban, ug sa tibuok nga katawhan labi na gayod sa mga kaigsoonan nato nga nagkinahanglan sa atong mga tabang. Ang matag buluhaton nato mamahimo lamang kini nga sayon ug magmalambuon kon ang atong Ginoong Jesukristo maoy atong ibutang sa atong taliwala ug tumong diha sa atong pagkinabuhi matag adlaw. Siya mao ang dalan, ang kamatuoran ug ang kinabuhi. Walay makaadto sa Amahan kon dili pinaagi kaniya. Si Kristo isip maoy labaw'ng pari dayag lamang nga ato siyang sundon ug puy-an ang Iyang mga hiyas aron kita makabaton og kinabuhing tunhay didto sa langit nga Iyang gisaad kanato sa dinhi pa Siya sa kalibutan. Ato untang hinumduman nga si Kristo nag-andam kanato og daghang mga lawak didto sa langit aron pag-abot na sa hustong panahon siya mosugat sa matag usa kanato sa tumang kahinangop. Mao nga atong paningkamutan sa pagpuyo nga subay sa iyang kabubut-on. Ug nga ato Siyang papuy-on sa atong tagsa tagsa ka mga kasingkasing kay diha kaniya anaa ang matuod nga kinabuhi, gugma, kalinaw ug labaw sa tanan ang atong kaluwasan.

Mga igsoon ko diha kang Kristo, kitang tanan gitawag sa pag-alagad, kini mao ang pag- alagad sa Dios ug sa iyang katawhan.

Giya alang sa pamalandong:

1. Nabati ba nako ang tawag sa pag-alagad? Unsa man ang akong gibuhat?

2. Gibuhat ba nako ang pag-alagad sa Ginoo pinaagi sa pagserbisyo sa uban, pagsimba ug pag-ampo?

3. Giunsa man nako pagpakita sa akong pag- alagad sa uban?

f. PANGALIYA

Pangulo : Ang Dios naghatag kanato og kasiguroan nga dili kita angayan maguol kay nag-andam siya kanato og dapit nga diin kita mahiusa Kaniya. Sa masaligong kasingkasing, atong ipadangat Kaniya ang atong mga pangamuyo diha sa pag-ingon: GINOO, PATALINGHUGI ANG AMONG PAG-AMPO.

1. Mag-ampo kita sa tanang pangulo sa Simbahan nga sa kanunay ubanan sila sa Dios diha sa ilang matinud- anong pagpaningkamot nga masabwag ang kamatuoran nga si Kristo mao ang dalan, kamatuoran ug kinabuhi. Moingon kita.

2. Mag-ampo kita sa pangulo sa atong nasod ug sa iyang gingsakupan nga uban sa maampoong pamaagi maha- tagan nila og prayoridad ang mulo sa katawhan ilabi na gayud ang mga isyo sa kalisod ug kawad-on. Moingon kita.

3. Mag-ampo kita sa atong mga igsoon nga nag-antus sa kapit-os sa kinabuhi, walay gikaon, gisalikway sa pa- milya ug katilingban, mga kabos ug masakiton ug sa tanang giisip nga wala nay luna sa sosyodad, magma- laumon unta sila sa Diosnong panabang ug kaaghop ug masinati nila ang Espirituhanong katagbawan. Moingon kita.

4. Mag-ampo kita sa nagdumala sa atong lokal nga pang- gamhanan nga magmatinud-anon unta silang moalagad sa ilang katawhan dili sa kaugalingon interes kon dili sa kaayohan sa atong katilingban. Moingon kita.

5. Mag-ampo kita nga sa kanunay, hatagan kita sa grasya sa pagkamatuohon nga si Kristo ang atong dalangpanan sa atong kinabuhi ilabi na diha sa pag-alagad sa uban. Moingon kita.

6. Mag-ampo kita (idugang ang panginahanglan sa katilingban). Moingon kita.

7. Mag-ampo kita alang sa atong kaugalingong katuyuan sa hilom.

Pangulo: Dios nga mahigugmaon, sayod kami nga kanunay Ka naga-uban kanamo. Bisan pa sa among mga kakulangan malaumon kami nga Imong hatagan og katumanan ang among mga pangamuyo pinaagi sa Imong Anak among Ginoo. Amen.