IKAUPAT NGA DOMINGGO SA PAGKABANHAW

IKAUPAT NGA DOMINGGO SA PAGKABANHAW

a. BASAHON I

Buhat 2:14,36-41

Kinutlo gikan sa basahon sa Buhat sa mga Apostoles.

Unya si Pedro mitindog uban sa napulog usa ka apostoles ug sa makusog nga tingog miingon kanila: "Mga igsoon kong Judio, ug kamong tanan nga nagpuyo sa Jerusalem, pamatia ninyo ang akong isulti karon.

"Ang tanang mga tawo sa Israel kinahanglan masayud nga kining maong Jesus nga inyong gilansang sa krus gihimo sa Dios nga Ginoo ug Mesiyas!"

Sa pagkadungog niini sa mga tawo, natandog sila pag-ayo ug giingnan nila ni Pedro ug ang ubang mga apostoles. "Mga igsoon, unsa may among buhaton?" Unya si Pedro miingon kanila: "Ang tagsa tagsa kaninyo kinahanglan maghinulsol, ug magpabunyag sa ngalan ni Jesukristo aron ang inyong mga sala pasayloon, ug madawat ninyo ang gasa sa Dios nga mao ang Espiritu Santo. Kay ang saad sa Dios alang man kaninyo ug sa inyong mga anak, ug sa tanan nga atua sa layo tanan nga pagatawgon sa atong Ginoong Dios."

Si Pedro nangaliyupo kanila ug miagda nga nag-ingon: "Luwasa ninyo ang inyong kaugalingon sa silot nga ipahamtang niining dautang katawhan!" Daghan kanila mituo sa iyang mensahe ug nagpabunyag. Mga tulo ka libo ka tawo nahidugang sa pundok sa mga magtotoo niadtong adlawa.

Ang Pulong sa Dios.

b. SALMO RESPONSORYO

Salmo 23:1-3,3-4,5,6

Tubag (R) - Magbalantay kanako ang Ginoo, wala nay magmakulang pa kanako.

Magbalantay kanako ang Ginoo: wala nay magmakulang pa kanako. Sa lunhaw nga sibsibanan Iya ako nga gipapahulay: Sa daplin sa malinawon nga tubig Iya akong gidala; Iyang gihupay ang akong kalag.(R)

Iya ako nga gitultolan sa matarung nga agianan tungod sa Iyang ngalan. Bisan kon maglakaw ako sa walog sa kangitngitan wala akoy kahadlokan nga dautan; kay anaa Ka man sa akong kiliran. Sa Imong igbubugaw og sungkod gihatagan Mo ako og kaisog. (R)

Gihikyaran Mo ako og lamesa sa akong atubangan samtang nagtan-aw ang akong mga kaaway; Gidihogan Mo ang akong ulo og lana; nagaawas gayud ang akong imnanan. (R)

Ang kaayo lamang ug kalooy maoy nagasunod kanako sa tanang mga adlaw sa akong kinabuhi; Magpuyo ako sa balay sa Ginoo sa mga katuigan nga umaabot. (R)

c. BASAHON II

1 Pedro 2: 20-25

Kinutlo gikan sa unang sulat ni San Pedro.

Dalaygon ba kon kamo mag-antus sa kastigo nga angay kaninyo tungod kay nakabuhat kamog dautan? Dili gayud! Apan kon giantus ninyo ang mga pagdaugdaug bisan pa sa Iyang pagbuhat sa maayo, manalangin ang Dios kaninyo tungod niini. Gitawag kamo sa Dios aron mag-antus, kay si Kristo nag-antus man tungod kaninyo ug naghatag kaninyog panig-ingnan aron inyong sundon. Wala siya makasala ni mamakak. Sa dihang gipanghimaraot Siya wala mobalus sa pagpanghimaraot; sa dihang gisakit Siya, wala Siya manghulga; hinonoa Iyang gisalig ang tanan sa Dios, ang matarung nga Maghuhukom. Gidala ni Kristo mismo diha sa Iyang lawas ang tanan tang mga sala didto sa krus aron dili na kita magpakasala kondili magkinabuhi nga matarung. Pinaagi sa Iyang mga samad nangaayo kamo. Kamo kaniadto sama sa mga karnero nga nanghisalaag; apan karon gidala kamo pagbalik aron pagsunod sa Magbalantay ug tigpanalipod sa inyong mga kalag.

Ang Pulong sa Ginoo.

d. EBANGHELYO

Jn. 10: 1-10

Ang Santos nga Ebanghelyo sumala ni San Juan.

Si Jesus miingon: "Sultihan Ko kamo sa matuod: ang tawo nga mosulod sa toril dili agi sa pultahan ug mokatkat hinoon sa laing bahin niini, kawatan ug tulisan. Apan ang magbalantay sa mga karnero mosulod agi sa pultahan. Ang pultahan ablihan sa portero aron siya makasulod. Ang mga karnero mamati sa iyang tingog inigtawag niya sa ilang tagsa tagsa ka ngalan, ug siya magauna kanila sa ilang paggula. Kon atua na sila sa gawas, magauna siya kanila ug ang mga karnero magasunod kaniya, kay sila nakaila man sa iyang tingog. Apan sila dili mosunod sa laing magbalantay: managan hinoon sila palayo kaniya, kay wala man sila makaila sa iyang tingog."

Gisaysay ni Jesus kanila kining sambingaya, apan wala sila makasabot sa Iyang gisugilon kanila.

Busa si Jesus miingon pag-usab: "Sultihan ko kamo sa matuod: Ako mao ang pultahan sa mga karnero. Ang tanan nga mianhi una Kanako mga kawatan ug mga tulisan, ug busa ang mga karnero wala mamati kanila. Ako mao ang pultahan; ang mosulod agi Kanako maluwas; siya mosulod ug mogula ug makakaplag siyag masibsib. Apan ang kawatan moanhi aron lamang pagpangawat ug pagpatay ug paglaglag. Ako mianhi aron sila makabaton og kinabuhi, kinabuhi nga puno gayud.

Ang Ebanghelyo sa Ginoo.

e. KOMENTARYO

Abril 30, 2023

Tema: Jesus ang Atong Magbalantay ug Ganghaan sa Kaluwasan.

Seguro, dili gayod nato malimtan ang mga panghitabo nga atong nasinati ilabina sa kalamidad nga midangat sa atong kinabuhi nga wala nato damha. Sama pananglit sa bagyo, baha, linog ug uban pang mga katalagman. Nagdala kini og kadaut sa atong kinabuhi, mga kabtangan ug labaw pa gayod niini aduna pa gayod mga kinabuhi nga nakalas tungod niini. Apan luyo niining tanan atong makita ug mabati ang hingpit nga pagtinabangay sa matag usa. Atong makita nga nagkahiusa ang tanan wala magsapayan unsa ang kahimtang sa kinabuhi. Usa sa dili nato malimtan ang nahitabo didto sa kaulohan partikularmente sa probinsya sa Quezon nga diin ang ilang Kura Paroko nga si Padre Colendres mibuhis sa iyang kinabuhi aron lang ang iyang parokyano maluwas. Wala siya magmakuli pagtabang sa iyang mga parokyano pagpalabang sa makusog nga baha nga nahimong hinungdan sa iyang kamatayon.

Ang atong Ebanghelyo karon naghulagway kang Jesus isip usa ka maayong magbalantay ug agianan sa mga karnero. Matud pa sa usa ka Biblical Commentary, ang mga niaging mga bersikulo nagpadayag sa kalainan ni Jesus ug sa mga binayran nga mga magbalantay karnero. Gipadayag ni Jesus nga siya mao ang matuod nga magbalantay. Siya mao ang matuod nga tag-iya sa mga karnero ug nakaila sa panon ug ang iyang panon nakaila sa iyang tingog. Si Jesus mao ang Maayong Magbalantay. Gihigugma kita niya nga iyang panon bisan pa man sa atong pagkamasinupakon kaniya. Siya namatay diha sa krus aron kita iyang maluwas gikan sa sala. Kini mao ang labing dako nga pagpadayag sa iyang gugma. Siya mao ang ganghaan si kinsa naghatag ug kasegurohan nga ang tanan nga moagi kaniya makabaton sa kaluwasan nga dayon. Siya mao ang pultahan. Pinaagi kaniya ug pinaagi lamang kaniya, kita makaadto sa Amahan (Eph. 2:18). iyang sa mga

Ang gibuhat ni Fr. Colendres niadtong panahon sa bagyong Frank usa ka buhat sa gugma, buhat sa usa ka maayong magbalantay sa iyang mga parokyano. Iyang gisunod ang mga lakang ni Jesus, ang Maayong Magbalantay. Iyang gipuy-an ang sugo ni Jesus: ang paghigugmaay sa matag usa. Pagkadako sa gugma nga iyang gipakita! Isip mga magtutuo, kita usab gitawag sa pagsunod sa mga lakang ni Kristo, ang atong matuod nga magbalantay. Ang atong ikaduhang pagbasa nagpahinumdom kanato nga si Kristo nag-antos alang kanato, naghatag og pananglitan aron atong sundon ang matinud-anong paghigugma sa uban. Kining maong buhat magdala kanato padulong sa kahiusahan sa Dios.

Giya alang sa pamalandong:

1. Sa unsang paagi nahimo akong maayong magbalantay sa uban?

2. Nahimo ba akong instrumento alang sa kabag-ohan sa uban?

f. PANGALIYA

Abril 30, 2023

Pangulo: Ang Dios Amahan mipadala sa Iyang mahigug- maong Anak, ang maayong magbalantay. Uban sa masaligon tang kasingkasing atong ipa- dangat ang atong panginahanglan diha sa pag-ingon: GINOO, BANTAYI KAMING IMONG KATAWHAN.

1. Nga ang Sto. Papa, obispo, kaparian, magmakugihong mopalambo sa mithing Kristohanon ngadto sa tanan isip sila ang gisangunan sa pagbantay sa tibuok panon ang Simbahan. Mag-ampo kita.

2. Nga ang nagdumala sa atong nasod ilabi na sa mga magbabalaod nga ila untang hikaplagan ang mga kahi- wian nga mga sistema sa panggamhanan. Mag-ampo kita.

3. Nga ang tanang mga nag-antus sa pagpanlupig, pagpang-limbong ug mga giyatakan sa katungod makabaton unta ug igong kusog sa pagdangop kang Jesus, ang Maayong Magbalantay nga maoy mohupay ug maghatag og kasul- baran sa ilang mga panginahanglan. Mag-ampo kita.

4. Nga ang nangulo sa atong lokal nga panggamhanan, magmabinantayon unta sa haylo sa salapi nga maoy makadaot sa ilang dignidad ug sa ilang kalag, moda- ngop unta sila sa Dios, ang matuod nga tuburan sa pagpangalagad. Mag-ampo kita.

5. Nga kitang tanan nga nagkatigom karon dinhi, ato untang mahuptan ang hiyas sa pagkamaayong mag- balantay ngadto sa matag banay ug katilingban sama nga si Jesus nag-alagad ug nagabantay kanato sa tanang panahon. Mag-ampo kita.

Pangulo: Dios nga labing gamhanan, Imong nadungog ang among mga panginahanglan. Malaumon kami nga Imo kining hatagan og katumanan pinaagi sa Imong Anak, ang Maayong Mag-balantay uban sa Espiritu Santo, usa ka Dios hangtud sa kahangturan. Amen.