Domingo sa Maayong Magbalantay

Ikaupat nga Domingo sa Pagkabanhaw

PASIUNA

Abril 30, 2023

Maayong buntag/hapon mga igsuon ko diha ni Cristo.

Ania na kita sa Ika-upat nga Domingo sa Pagkabanhaw sa atong Ginoo, ang ginatawag nga Dominggo sa Maayong Magbalantay o Good Shepherd Sunday. Karong Dominggoha usab atong gisaulog ang Adlaw sa Pag-ampo alang sa mga Bokasyon kon World Day of Prayer for Vocations.

Ang Unang Pagbasa gikuha gikan sa Buhat sa mga Apostoles. Atong madungog si San Pedro nga nagproklamar nga si Jesus mao ang Ginoo ug Mesiyas ug ang bugtong paagi aron matagamtaman ang kaluwasan nga iyang gidala mao ang paagi sa pagba-o ug pagbabunyag.

Ang Ikaduhang Pagbasa gikuha gikan sa Unang Sulat ni San Pedro. Gilarawan ni San Pedro ang kinaiya ni Jesus isip Maayong Magbalantay nga mihalad sa iyang kaugalingon alang sa kaluwasan ug kalinaw sa iyang panon.

Ang Ebanghelyo gikuha gikan sa Santos nga Ebanghelyo sumala ni San Juan. Atong madungog si Jesus nga miingon, "Amen, amen, sa pagkatinuod sultihan ko kamo nga ako ang pultahan sa mga karnero..."

Palihug manindong alang sa pagsugod sa Santos nga Eukaristiya.

BASAHON I

Acts 2:14, 36-41

KINUTLO GIKAN SA MGA BUHAT SA MGA APOSTOLES

Unya mitindog si Pedro uban sa napulog-usa ka apostoles ug sa makusog nga tingog miingon kanila, "Mga igsuon kong Judio, ug kamong tanan nga nagpuyo sa Jerusalem, pamati-a ninyo ang akong isulti karon."

"Busa ang tanang mga tawo sa Israel kinahanglan masayod nga kining maong Jesus nga inyong gilansang sa krus gihimo sa Dios nga Ginoo ug Mesiyas!"

Sa pagkadungog niini sa mga tawo, natandog sila pag-ayo ug giingnan nila si Pedro ug ang ubang mga apostoles.

"Mga igsuon, unsa may among buhaton?"

Unya miingon si Pedro kanila, "Ang tagsatagsa kaninyo kinahanglan mag- hinulsol, ug magpabunyag sa ngalan ni Jesucristo aron pasayloon ang inyong mga sala, ug madawat ninyo ang gasa sa Dios nga mao ang Espiritu Santo. Kay ang saad sa Dios alang man kaninyo ug sa inyong mga anak, ug sa tanan nga atua sa layo- tanan nga pagatawgon sa atong Ginoong Dios."

Nangaliyupo si Pedro kanila ug miagda nga nag-ingon, "Luwasa ninyo ang inyong kaugalingon sa silot nga ipahamtang niining dautang katawhan!" Daghan kanila mituo sa iyang mensahe ug nagpabunyag. Mga tulo ka libo ka tawo ang nahidugang sa pundok sa mga magtutuo niadtong adlawa.

ANG PULONG SA GINOO.

SALMO RESPONSORYO

Ps. 23:1-3, 3-4, 5,6

R. Magbalantay kanako ang Ginoo, wala nay magmakulang pa kanako. 

Magbalantay kanako ang Ginoo,

wala nay magmakulang pa kanako. Sa lunhaw nga sibsibanan iya ako nga gipapahulay; Sa daplin sa malinawon nga tubig iya akong gidala; iyang gihupay ang akong kalag.

R. Magbalantay kanako ang Ginoo, wala nay magmakulang pa kanako.

Iya ako nga gitultolan sa matarong

nga mga agianan tungod sa iya nga ngalan.

Bisan kon maglakaw ako sa walog nga mangitngit wala akoy kahadlokan nga dautan; kay anaa ka man sa akong kiliran.

Sa imong igbubugaw ug sungkod gihatagan mo ako og kaisog.

R. Magbalantay kanako ang Ginoo, wala nay magmakulang pa kanako. 

Gihikyaran mo ako og lamesa sa akong atubangan samtang nagtan-aw ang akong mga kaaway;

Gidihogan mo ang akong ulo og lana;

nagaawas gayod ang akong imnanan.

R. Magbalantay kanako ang Ginoo, wala nay magmakulang pa kanako. 

Ang kaayo lamang ug kaluoy maoy nagasunod kanako, sa tanang mga adlaw sa akong kinabuhi;

Ug magpuyo ako sa balay sa Ginoo sa mga katuigan nga umaabot.

R. Magbalantay kanako ang Ginoo, wala nay magmakulang pa kanako.

BASAHON II

1 Pt. 2:20-25

KINUTLO GIKAN SA UNANG SULAT NI SAN PEDRO

Kay dalaygon ba kon mag-antos kamo sa kastigo nga angay kaninyo tungod kay nakabuhat kamog dautan? Dili gayod! Apan kon giantos ninyo ang mga pag- daug-daog bisan pa sa inyong pagbuhat sa maayo, manalangin ang Dios kaninyo tungod niini. Gitawag kamo sa Dios aron mag-antos, kay si Cristo nag-antus man tungod kaninyo ug naghatag kaninyog panig-ingnan aron inyong sundon. Wala siya makasala ni mamakak. Sa dihang gibugalbugalan siya, wala siya mobalos sa pagbugalbugal; sa dihang gisakit siya, wala siya manghulga; hinonoa iyang gisalig ang tanan sa Dios, ang matarong nga Maghuhukom. Didto sa krus gidala ni Cristo diha sa iyang lawas ang tanan tang mga sala aron dili na kita mag- pakasala kondili magkinabuhi nga matarong. Pinaagi sa iyang mga samad nangaayo kamo. Kamo kaniadto sama sa mga karnero nga nahisalaag; apan karon gidala kamo pagbalik aron mag-sunod sa Magbalantay ug Tigpanalipod sa inyong mga kalag.

ANG PULONG SA GINOO.

ANG EBANGHELYO

Jn. 10:1-10

Kinutlo gikan sa Balaan nga Ebanghelyo sumala ni Juan

Miingon si Jesus:

Amen, sa pagkatinuod sultihan ko kamo, ang dili mosulod pinaagi sa pultahan ngadto sa hawan sa mga karnero apan mosaka sa laing agianan, siya usa ka kawatan ug tulisan. Apan ang mosulod pinaagi sa pultahan mao ang magbalantay sa mga karnero. Ang magbalantay sa ganghaan mag-abli sa pultahan ug ang mga karnero maminaw sa iyang tingog, ug ang iyang mga kaugalingong karnero gitawag niya sumala sa ilang ngalan ug siya magpagawas kanila. Kon pagawason niya ang tanan niyang karnero, mag-una siya kanila ug ang mga karnero mosunòd kaniya tungod kay nakaila man sila sa iyang tingog. apan walâ sila nakasabot sa iyang gisulti kanila.

Apan dili sila mosunod sa langyaw; mokagiw sila kaniya kay walâ man sila makaila sa tingog sa langyaw." Kining pasumbingay gisulti ni Jesus kanila,

Busa miingon na usab si Jesus,

"Amen, sa pagkatinuod sultihan ko kamo nga akò ang pultahan sa mga karnero.

Ang tanan nga mianhi [nga nag-una kanako] mga kawatan ug tulisan, apan ang mga karnero walâ maminaw kanila. Akò ang pultahan.

Ang mosulod pinaagi kanako maluwas; mosulod ug mogawas siya ug makakaplag siya og sibsibanan. Ang kawatan mianhi aron lamang mangawat ug magpatay ug magpukan.

Akò mianhi aron makabaton sila og kinabuhi ug makaangkon niini sa kabuhong." 

Ang Ebanghelyo sa Ginoo.

Katilingbanong Pag-ampo:

Abril 30, 2023

Pari: Ang Dios Amahan mipadala sa iyang mahigugmaong Anak isip ang Maayong Magbalantay kanatong tanan. Uban sa masaligon nga kasingkasing, atong ipadangat ang atong pag-ampo ug panginahanglan diha sa pag-ingon:

JESUS, MAAYONG MAGBALANTAY, DUNGGA KAMI.

1. Nga ang Maayong Magbalantay magbubo sa iyang grasya ug panalangin ngadto sa atong mga lideres sa Simbahan ilabina ang atong Santo Papa Francisco, Arsobispo, Kaparian ug mga Relihiyoso, diha sa ilang pagdala sa katawhan ngadto Dios. Mag-ampo kita.

2. Nga ang Maayong Magbalantay magtandog sa mga kasingkasing sa mga pangulo sa atong nasud ug pun-on sila sa kabuhong sa iyang grasya sa kahibalo, paghiguma, pagtoo ug paglaum. Mag-ampo kita.

3. Nga ang Maayong Magbalantay maghatag og proteksyon ug panalangin ngadto sa mga kabatan-onan kinsa mitubag sa tawag sa pag-alagad ug mobadilaab sa gasa sa ilang pagtoo ngadto Kaniya ug magbantay ug motawag ngadto sa mga kabataan nga wala makaila Kaniya. Mag-ampo kita.

4. Nga ang Maayong Magbalantay maghatag og dugang kusog, kasisog ug kahibalo ngadto sa atong mga "vocation promoters" diha sa ilang pagdala sa mga kabataan ngadto sa Ginoo. Mag-ampo kita.

5. Nga ang Maayong Magbalantay maghupay sa mga nag-antos sa sakit ug kawad-on sa kinabuhi pinaagi sa mga tawo nga nag-amoma kanila. Mag- ampo kita.

6. Nga ang Maayong Magbalantay moamoma ug manalangin kanila nga

mihalad sa ilang pasalamat ug pagdayeg ngadto sa Dios ilabina nila.________

Mag-ampo kita.

7. Nga ang Maayong Magbalantay modawat ug mohatag og kinabuhing walay katapusan kanila nga mipanaw na niining kalibutana ilabina sila_________ Mag-ampo kita

Pari: Dios nga labing gamhanan, imong nadungog ang among mga panginahanglan. Malaumon nga imo kining hatagan og katumanan pinaagi ni Cristo nga among Ginoo ug Maayong Magbalantay. Amen.