KASAULOGAN SA PULONG

IKAUNOM NGA DOMINGGO

a. BASAHON I

Sirach 15: 15-20

Kinutlo gikan sa basahon ni Sirach.

Kon buot ikaw, makaamping ka sa mga sugo; maunongon ang pagtuman sa iyang kabubut-on. Gibutang atubangan kanimo ang kalayo ug tubig: bisan unsay imong pilion, hupti sa imong kamut. Atubangan sa tawo anaa ang kinabuhi ug ang kamatayon, bisan unsay iyang pilion ihatag kaniya. Dako ang kinaadman sa Dios, kusganon Siya sa gahum ug nagatan-aw sa tanan. Ang mga mata sa Dios nagatan-aw sa tanan nga Iyang gibuhat; nakasabot Siya sa tanang mga buhat sa tawo. Walay tawo nga Iyang gisugo sa pagpakasala walay gitagaan Niyag gahum sa pagpamakak.

Ang Pulong sa Ginoo.

b. SALMO RESPONSORYO

Ps. 119:1-2.4-5.17-18.33-34

Tubag (R) - Bulahan sila nga nagatuman sa balaod sa Ginoo.

Bulahan sila kansang paagi walay ikagsaway, nga nagalakat diha sa balaod sa Ginoo. Bulahan sila nga nagatuman sa Iyang mga kasuguan, nga nangita Niya sa tibuok nilang kasingkasing. (R)

Nagsugo Ka nga tumanon pag-ayo ang Imong mga sugo. Hinaut unta nga maglig-on ako diha sa mga dalan, sa pag-amping sa Imong mga kasugoan. (R)

Kaloy-i ang Imong sulogoon, aron mabuhi ako ug mag-amping sa Imong mga pulong. Ablihi ang akong mga mata aron magpalandong ako sa mga katingalahan sa Imong balaod. (R)

Tudloi ako, O Ginoo, sa paagi sa Imong mga kasugoan aron ayohon ko sila pagtuman. Tagai akog kinaadman aron akong tumanon ang Imong mga sugo, ug ampingan ko sa tibuok kong kasingkasing. (R)

c. BASAHON II

1 Corinto 2: 6-10

Kinutlo gikan sa unang sulat ni San Pablo ngadto sa taga Corinto.

Niadtong mga hamtong na hinoon sa ilang kinabuhing espirituhanon, gigamit ko ang makinaadmanong mga pulong. Apan dili kinaadman nga iya niining kalibutana, ni sa mga nagmando sa kalibutan, kansang gahom nagkahanaw na. Ang kinaadman nga akong gitudlo mao ang tinagong kinaadman sa Dios nga iyang gililong sa tawo, apan gipili niya alang sa atong himaya, bisan sa wala pa himoa ang kalibutan. Ug walay pangulo niining kalibutana nga nasayod sa maong kinaadman, kay kon nasayran pa nila kini, dili unta nila ilansang sa krus ang Ginoo sa himaya. Hinuon, sumala sa giingon sa Kasulatan. "Ang wala makita ug madungog sa tawo, ang wala gayod palandonga sa tawo nga mahitabo, mao ang giandam sa Dios niadtong nahigugma Kaniya." Apan gipadayag kanato sa Dios ang Iyang tinago, pinaagi sa Iyang Espiritu. Ang Espiritu nagsusi sa tanang mga butang, bisan pa niadtong labing natago nga mga katuyoan sa Dios.

Ang Pulong sa Ginoo.

d. EBANGHELYO

Mt. 5:17-37

Ang Santos nga Ebanghelyo sumala ni San Mateo.

Si Jesus miingon sa Iyang mga tinun-an; "Ayaw ninyo hunahunaa nga mianhi ako aron pagsalikway sa Balaod ni Moises ug sa mga pagtulun-an sa mga propeta. Wala ako moanhi aron pagsalikway kanila, kondili aron paghatag kanila og husto nga kahulogan. Timan-i kini! Samtang may langit pa ug yuta, bisan ang labing diyotay nga kudlit o ang labing gamay nga bahin sa Balaod, dili gayod pagasayloan hangtod matuman ang tanan. Busa ang dili magatuman bisan sa labing gamay sa kasugoan, ug magatudlo sa uban sa pagbuhat sa ingon, pagailhon nga labing ubos sa Gingharian sa langit. Apan ang magatuman sa Balaod ug magatudlo sa uban "Nakadungog usab kamo nga giingnan ang mga tawo kaniadto, "Ayaw pakyasa ang imong panaad, kondili tumana ang imong gipanumpaan atubangan sa Ginoo nga imong buhaton." Apan karon sultihan ko kamo; Ayaw panumpa kon ikaw manaad; ayaw panumpa sa langit, kay ang langit mao ang trono sa Dios. Ingna lamang "Oo kun Dili", kay kon may mokapin pa niini, kana gikan na sa Yawa."

Ang Ebanghelyo sa Ginoo.

e. KOMENTARYO

Tema: Pagpuyo sa Balaod pinaagi sa Gugma.

Kasagaran kanato ganahan nga magsuroy- suroy sa mga "Malls" ilabina panahon sa ting- init kay aron lamang magpabugnaw. Ug diha sa atong pagsulod sa mga "Malls" o uban pang mga kompanya, aduna gayod mga balaod nga atong gisunod. Sama pananglit sa "ENTRANCE" ug "EXIT". Dili gayod kita makabuot kon asa ta gusto moagi. Kinahanglan kon mosulod kita adto gayod kita moagi sa naay marka nga "Entrance" ug kon mogawas kita adto gayod kita moagi sa adunay marka nga "Exit" aron sa ingon niining paagiha mahimong hapsay ang dagan.

Karon mao ang ikaunom nga Dominggo sa Ordinaryong Panahon, kita gipahinumduman sa pagpuyo sa balaod pinaagi sa gugma. Ang atong Ebanghelyo nagpunting sa usa ka punto nga mao ang pagsunod sa balaod. Si Kristo nagpasabot sa mga balaod nga gihatag ni Moises sa mga Israelita. Kining maong mga balaod dugay na nga gipuy- an ug gisunod sa mga Israelita. Apan sa atong Ebanghelyo karon atong nadungog si Kristo nga naghisgot pag-usab niining mga balaod.

Ang pangutana, nganong gibuhat kini ni Jesus? Nagpasabot ba kini nga mianhi siya aron pag-usab sa mga balaod o nagpasabot kini nga dili husto ang mga balaod nga gisunod sa mga Israelita? Si Jesus mianhi sa kalibutan dili aron pag-usab sa mga balaod kon dili aron tumanon kini. Si Jesus mao ang katumanan sa balaod. Ang balaod nga gisunod sa mga Israelita husto. Apan ang problema anaa sa ilang pamaagi sa pagsunod. Ang ilang pagsunod sa balaod mao ang gitawag nato sa atong pinulongan nga "taphaw." Nagsunod lamang sila sa unsay nahisulat ug dili sa tinuod nga kahulugan niini diha sa ilang tagsa-tagsa ka kinabuhi. Busa, si Jesus nagpasabot pag-usab niining mga balaod aron ilang mapuy-an sa tinuoray ug mahimong makahuluganon ang ilang pagsunod niini.

Apan unsaon man diay pagsunod sa balaod? Gipamulong ni Jesus nga ang tinuod nga pagsunod sa balaod mao ang pagsunod niini pinaagi sa gugma. Ang pagsunod sa balaod dili lang kay sunod-sunod lang apan kinahanglan nato tugkaron kung unsa ang buot ipasabot sa balaod nga atong gisunod aron mapuy-an nato kini pinaagi sa gugma. Ang mga pagtulun-an ni Kristo mahitungod sa balaod sa pagpanapaw, panagbulag ug kasuko nagpunting sa tinuod nga balaod sa gugma. Kay wala man pasagdi ni Kristo nga magkatibulaag ang iyang katawhan diha sa paghupot og mga pagbati nga nahisupak sa kabubut-on sa Amahan. Kay ang Ginoo maoy unang nahigugma kanato, busa wala kitay katarungan nga dili mahigugma ug magmatinud- anon sa atong isigkatawo. Busa kon moingon kita nga nahigugma kita Dios, nan atong kaakuhan nga atong higugmaon ang atong isigkaigon. Nga kon tinuod kita nga nahigugma, dili ug dili gayud nato supakon ang balaod sa Dios. Ang balaod sa Dios nga mao hingpit nga gugma.

Ang hagit nato karon mao ang pag-usab sa atong panlantaw sa balaod. Klaro na kanato ang balaod sa gugma. Busa dili nato kini lantawon nga usa ka butang nga maka-daut sa atong pagkatawo. Hinonoa, ato kining tan-awon nga usa ka pamaagi aron kita molambo sa atong pagkatawo. Busa mga kaigsoonan atong puy-an ang balaod pinaagi sa gugma. Sa atong ikaduha nga pagbasa klaro kaayo nga ang Ginoo naay giandam sa tawo nga nagpuyo sa balaod diha sa gugma. Nahisulat, "ang wala makakita ug madungog sa tawo, ang wala gayod palandonga sa tawo nga mahitabo, mao ang giandam sa Dios niadtong NAHIGUGMA kaniya." Mao nga puy- an ta ang balaod pinaagi sa gugma.

Giya alang sa pamalandong:

1. Giunsa man nako pagpuyo ang balaod sa Dios? Pinaagi ba sa gugma?

2. Kon ang akong pagpuyo sa balaod sa Dios dili pinaagi sa gugma, andam ba ako pag- usab sa akong kaugalingon aron mapuy-an nako kini pinaagi sa gugma? Kanus-a pa? Pwede ba nga karon na?

f. PANGALIYA

Pangulo: Ginoong Dios, tungod sa pakig-uban sa Imong Anak dinhi kanamo, nahimo kining dakong sukaranan aron kami sa kanunay mangan- doy sa pagpuyo nga matarong subay sa Imong balaod nga Imong gipadayag dinhi kanamo. Busa mangamuyo kami diha Kanimo sa pag-ingon: GINOO, LAMDAGI KAMI SA IMONG PULONG.

1. Alang sa atong Santo Papa, Juan Pablo II, nga unta siya hatagan og dugang kabaskog ug kadasig sa pag- dumala sa tibouk Simbahan pinasubay sa bag-ong kasabutan, si Jesukristo ang buhing katumanan sa tanan. Mag-ampo kita.

2. Alang sa atong mga kaparian, kamadrihan ug sa tanang mga relihiyoso nga diha sa pagtuman sa ilang tagsatagsa ka programa o ministriya sa simbahan maila unta nila si Kristo isip sentro ug sumbanan sa tanan nilang bulahaton. Mag-ampo kita.

3. Alang sa mga lideres sa atong panggamhanan nasyo- nal o lokal man nga ila untang ipatigbabaw ang tinuod nga hustisya ug kaangayan sa tanang katawhan aron kita sa kanunay maka-angkon sa kinabuhi nga puno sa kalinaw ug paghigugma. Mag-ampo kita.

4. Alang sa mga abogado mga gitahasan sa husgado ug kadtong mga magbabalaod nga unta sa kanunay ilang ipatigbabaw ang kaayo, kaangayan ug kalamboan sa tanan. Mag-ampo kita.

5. Alang sa atong mga igsoon nga nahimong biktima diha sa sayop nga pag-implementar sa balaod ug gipahamtangan sa maong silot nga unta dili sila mawad-an sa pagsalig sa Dios sama ra nga nakighiusa sila sa mga kasakitan sa atong Ginoo. Mag-ampo kita.

6. Alang kanatong tanan nga ania dinhi karon ato untang maila ang tinuod nga balaod, ang gipadayag ni Jesus nga siya ang matuod nga gugma ug kalooy. Mag-ampo kita.

7. Alang sa... (idugang ang panginahanglan sa katilingban). Mag-ampo kita.

8. Alang sa atong mga katuyoan atong i-ampo sa hilom.

Pangulo: Makagagahum nga Dios, ang Imong kinabuhi maoy nagtudlo kanamo sa pag-alagad ngadto sa uban. Magsunod unta kami kanunay sa Imong dalan ug mga balaod aron kami makala- hutay diha sa among paghatag sa kauga- lingon alang sa Imong kahimayaan. Kini among giampo pinaagi ni Kristo among Ginoo. Amen.