26th Sunday

Ikakawhaag-unom nga Domingo Sulod sa Tuig

BASAHON I

Am. 6:1, 4-7

KINUTLO GIKAN SA BASAHON NI PROPETA AMOS

Alaot gayod kamo nga nagpuyo nga haruhay diha sa Sion, ug kamo nga nagtuo nga halayo kamo sa kakuyaw diha sa bukid sa Samaria-kamong mga dagkong tawo sa nasod sa Israel, nga maoy dangpanan sa mga tawo.

Alaot gayod kamo nga naghigda sa mga mahalon nga mga katre, ug naghay adhay-ad sa inyong mga kama, ug nagkaon sa karne sa mga nating baka ug nating karnero. Gusto kamong magtagik ug mga awit, sama sa gihimo ni David, ug magtugtog sa mga alpa. Nagpatuyang kamog inom ug bino, ug gidihog ninyo ang inyong kaugalingon sa labing maayo nga lana, apan wala kamo magbangotan sa pagkalaglag sa Israel. Busa kamo maoy unang mabihag, ug ang inyong mga pista ug mga kombira matapos.

ANG PULONG SA GINOO.

SALMO RESPONSORYO

Ps. 146:7, 8-9, 10

R. Dayga ang Ginoo, kalag ko. 

Bulahan siya nga matinumanon hangtod sa kahangturan nga nagapadangat sa katarong alang sa gidaugdaog, nagahatag og pagkaon sa gutom. Ang Ginoo nagahatag ug kagawasan sa mga bihag.

R. Dayga ang Ginoo, kalag ko. 

Ang Ginoo nagahatag ug pagtan-aw sa buta, Ang Ginoo nagabangon kanila nga nalukapa; Ang Ginoo nahigugma sa matarong, Ang Ginoo nanalipod sa mga langyaw. 

R. Dayga ang Ginoo, kalag ko.

Gibuhi sa Ginoo ang mga ilo ug mga balo, apan iyang gibawo ang paagi sa dautan.

Ang Ginoo maghari hangtod sa kahangturan; ang imong Dios, O Sion, latas sa tanang kaliwatan. Aleluya.

R. Dayga ang Ginoo, kalag ko.

BASAHON II

1 Tm. 6:11-16

KINUTLO GIKAN SA UNANG SULAT NI SAN PABLO NGADTO KANG TIMOTEO

Apan kay ikaw iya man sa Dios, likayi kining tanan. Paningkamuti nga mahimo kang matarong, diosnon, may pagtuo, may paghigugma, mainantuson ug maaghop. Paningkamuti kutob sa imong mahimo nga makadaog ka sa bugno sa pagtuo ug makadawat sa ganti nga mao ang kinabuhing walay katapusan; kay gitawag ka man sa Dios alang sa maong kinabuhi sa pagsugid mo sa imong pagtuo atubangan sa daghang mga saksi. Atubangan sa Dios nga maoy naghatag ug kinabuhi sa tanan, ug atubangan ni Cristo Jesus nga misaksi sa kamatuoran atubangan ni Poncio Pilato, gisugo ko ikaw pagtuman sa tanan nga gipabuhat kanimo. Ug matngoni nga dili kini kabulingan ug dili masaway hangtod sa pagbalik sa atong Ginoong Jesucristo. Ang iyang pagpadayag himoon sa Dios sa hustong panahon, ang Dios nga dalaygon ug bugtong Magbubuhat, ang Hari sa mga hari ug ang Ginoo sa mga ginoo. Siya lamang ang walay kamatayon ug nagpuyo sa kahayag nga dili maduol. Wala pa gayoy nakakita kaniya ug wala gayoy makakita kaniya. Ipahinungod kaniya ang dungog ug walay katapusang gahom! Amen.

ANG PULONG SA GINOO.

EBANGHELYO

Lk 16:19-31

Kinutlo gikan sa Ebanghelyo sumala ni Lucas

Si Jesus miingon ngadto sa mga Pariseo, May usa ka tawo nga adunahan ug nagbisti siya og labing mahal nga sapòt ug naglipaylipay sa kabuhong matag adlaw. Ug adunay kabos nga ginganlag Lázaro nga naglubog didto sa iyang ganghaan, ug kini siya naputos sa nuka. Ug nangandoy siya pagtagbaw sa iyang kagutom gikan sa mga mumho nga matagak gikan sa talad sa adunahan; apan ang mga iro na hinoon ang modúol pagtilap sa iyang mga nuka. Nahitabo nga namatay ang kabos ug gidala siya sa mga anghel ngadto sa dughan ni Abraham; ug namatay usab ang adunahan ug gilubong siya.

Ug didto sa Hades, giyahat niya ang iyang mga mata ug sa tumang pag-antos nakita niya si Abraham gikan sa halayo ug si Lázaro didto sa iyang dughan. Ug siya misinggit nga nag-ingon, 'Amahan kong Abraham, kaloy-i intawon akò ug ipadala si Lázaro aron pagtuslob sa tumoy sa iyang tudlo sa tubig ug mabugnawan ang akong dila, kay hilabihan ang akong pag-antos niining nagdilaab nga kalayo. Apan miingon si Abraham, 'Anak, hinumdomi nga nakadawat ka sa tanang mga maayong butang sa imong kinabuhi ug, sa ingon, si Lázaro sa mga mangil-ad nga butang; apan karon dinhi gihupay siya, samtang ikaw nag-antos sa hilabihan. Ug gawas pa niining tanan, taliwala kanamo ug kaninyo, adunay dakong bung-aw, aron nga sila nga buòt motabok gikan dinhi nganha kaninyo dili makahimo, ni makatabok gikan diha nganhi kanamo.

Apan miingon siya, 'Busa nagahangyo ako kanimo, Amahan, nga ipadala siya ngadto sa balay sa akong amahan, tungod kay aduna akoy lima ka igsoong lalaki, aron pagpasidaan kanila, aron dili usab sila moabòt niining dapit sa pag-antos.

Apan miingon si Abraham, 'Anaa kanila si Moises ug mga propeta; papaminawa sila kanila.

Apan mitubag siya, 'Dili, Tatay Abraham! Apan kon adunay gikan sa mga minatay nga moadto kanila, maghinulsol sila.

Apan miingon siya kaniya, 'Kon dili sila mamati kang Moises ug sa mga propeta, bisan pag adunay mabanhaw gikan sa mga minatay, dili gayod sila makabig."

Ang Ebanghelyo sa Ginoo.

PASIUNA

SEPTEMBER 25, 2022

Maayong buntag /hapon mga igsoon diha ni Kristo.

Ania na kita sa ikakawhaan ug unom nga domingo sa ordinaryong panahon.

Gisaulog nato karong dominggoha ang Seafarer's Day ug Migrants Sunday.

Ang unang pagbasa gikan sa Basahon ni Propeta Amos. Kini nagpasidaan sa dili pagpatuyang sa kinabuhi.

Ang ikaduhang pagbasa gikan sa unang sulat ni San Pablo ngadto kang Timoteo. Paningkamuti nga mahimo kang matarong, diosnon, may pagtuo, may paghigugma, mainantuson ug maaghop."

Ug ang Ebanghelyo gikan sa ebanghelyo sumala ni San Lucas. Kini mahitungod sa estorya sa usa ka datu ug kang Lazaro..

Palihug manindog ang tanan alang sa pagsugod sa Santos na Eyukaristiya.

PANGALIYA 

SEPTEMBER 25, 2022

PARI: Mga igsoon, mag-ampo kita sa Dios atong Amahan, nga maambitan unta nato ang iyang gugma .Sa matag pangamuyo moingon kita.

GINOO, DUNGGA KAMING IMONG MGA ANAK.

1. Alang sa Simbahan, nga pinaagi sa pagdasig sa Espiritu Santo, magsangyaw kanunay sa pulong sa Dios, ngadto sa tanang dapit ug tanang panahon. Mag-ampo kita.

2. Alang sa mga namunoan sa atong nasud, nga pinaagi sa lamdag sa Espiritu ni Kristo, madasigon silang mag-alagad sa katawhan alang sa kaayohan sa kadaghanan. Mag-ampo kita.

3. Alang sa mga Seafarers ug mga Migrante, pinaagi sa gahum sa Dios, mapanalipdan sila ug ang ilang pamilya sa katalagman ug panalanginan sila sa kanunay. Mag-ampo kita.

4. Alang kanila nga mipadangat sa ilang mga pasalamat ngadto sa Dios, ilabina nila makabaton unta ug kalig-on sa pagtoo ug pagsalig sa Ginoo. Mag-ampo kita.

5. Alang sa mga kalag sa tanang nangamatay, hilabina sila makadawat na unta sa kinabuhing tunhay. Mag-ampo kita.

PARI: Ginoong Dios,dawata ang mga pag-ampo sa imong katawhan, kay kini among gipangayo pinaagi ni Kristo, among Ginoo, Amen.