MGA PAGBASA

IKA-KAWHAAN NGA DOMINGGO

a. UNANG BASAHON

Jeremias 38:4-6,8-10

Ang pagbasa gikuha gikan sa basahon ni Propeta Jeremias.

Unya ang mga opisyal miingon sa hari, "Angay patyon kining tawhana. Ang iyang gisulti makapatalaw sa atong mga sundalo, ug mao usab kini ang lyang gibuhat ngadto sa tanang mga tawo sa siyudad. Makadaot sa katawhan nga nahibilin sa siyudad kining tawhana; nagtinguha lamang siya sa pagpasakit kanila."

Busa miingon si Hari Sedekias, "Kun mao kana, kamoy bahala kaniya." Busa gikuha nila ako ug gidala ug gitunton didto sa atabay ni Prinsipe Malkias nga didto usab mahimutang sa lagwerta sa palasyo. Gimalhan na sa tubig ang maong atabay ug lapok na lamang ang didto sa sulod niini, ug busa nalubong ako sa lapok.

Ug migawas si Ebedmelec sa palasyo ug giingnan niya ang hari, "Kamahalan, ang gibuhat niining mga tawhana dili maayo. Ilang gihulog si Jeremias sa atabay, ug mamatay gayud siya sa gutom. Wala nay pagkaon sa siyudad." Busa gimandoan sa hari si Ebedmelec sa pagdala'g tulo ka tawo aron kuhaon ako ug dili mamatay.

Mga igsoon, ang Pulong sa Ginoo.

b. SALMO RESPONSORYO

Salmo 40:2,3,4

Tubag (R)-Ginoo dali ug tabangi ako.

Nagapaabut ako, nagapaabut sa Ginoo, ug miduko siya aron pagtan-aw kanako. (R)

Ang Ginoo nakabati sa akong singgit. Iya akong gikuha gikan sa kahiladman sa kalaglagan, gikan sa lapok sa kaluwasan; lyang gipahimutang ang akong mga tiil ibabaw sa bato; gilig-on niya ang akong mga lakang. (R)

Gibutangan niya og bag-ong awit ang akong baba, usa ka imno ngadto sa atong Dios. Daghan ang motan-aw diha sa kataha ug mosalig sa Ginoo. (R)

Bisan gisakit ug kabus ako, apan ang Ginoo nagahunahuna kanako. Ikaw ang akong hinabang ug akong manluluwas; O Dios ko, ayaw pagpanagana. (R)

c. IKADUHANG BASAHON

Hebreo 12:1-4

Ang pagbasa gikuha gikan sa sulat ngadto sa mga Hebreo.

Sanglit gilibutan man kita niining dakong pundok sa mga saksi, isalikway ta ang tanan nga nakababag kanato ug ang sala nga naghari kanato pag-ayo, ug daganon ta nga matinud-anon ang lumba nga atong gisalmotan. Itutok ta ang atong mga mata kang Jesus nga maoy gisandigan sa atong pagtoo ug maghingpit niini. Wala siya molunga bisan pa sa iyang pag-antus sa krus, ug wala niya igsapayan ang kaulaw sa pagpakamatay didto sa krus tungod sa kalipay nga madawat niya, ug naglingkod siya karon sa tuo sa trono sa Dios.

Palandonga kun unsa ang iyang giantus - kun unsa ang iyang pagpailob taliwala sa hilabihang pagsupil sa mga makasasala. Busa ayaw kamo kaluya ug paglunga.

Kay sa inyong pagpakigbisog batok sa sala wala pa gayud kamo makig-away hangtud sa kamatayon.

Mga igsoon, ang Pulong sa Ginoo.

d. EBANGHELYO

Lukas 12:49-53

Ang pagsangyaw sa Maayong Balita sumala ni San Lukas.

Si Jesus miingon sa iyang mga tinun-an, "Mianhi ako aron sa pagpadilaab sa kalibutan, ug pagkaayo unta kun kini misilaob na! Dunay bunyag nga ako pang dawaton, ug dili ako mahimutang hangtud matuman kini. Naghunahuna ba kamo nga mianhi ako aron pagdala'g pakigdait nganhi sa kalibutan?

Tug-anan ko kamo, dili pakigdait ang akong gidala kondili pagbahinbahin! Sukad karon ang usa ka panimalay nga may lima ka sakop mabahin, tulo batok duha, ug duha batok tulo. Ang amahan makigbatok sa iyang mga anak nga lalaki, ug ang mga anak lalaki makigbatok sa ilang amahan; ang inahan makigbatok sa iyang mga anak nga babaye, ug ang mga anak nga babaye makigbatok sa ilang inahan; ang ugangang babaye makigbatok sa iyang mga binalaye, ug ang mga binalaye makigbatok sa ilang ugangang babaye."

Mga igsoon, ang Maayong Balita sa atong Ginoo.

e. KOMENTARYO

Tema: "Adunay Kalipay Luyo sa Kasakit"

Sa atong kinabuhi nga pagkakristiyano gitawag kita sa pagsunod kang Kristo. Ilabina diha sa pagdawat nato sa Sakramento sa Bunyag. Kita, mga binunyagan gihatagan og tahas nga mahimong pari, propeta, ug hari. Sa atong mga pagbasa karon naghisgot kini sa pagkapropeta. Kabalo kita nga ang propeta mao ang magsasangyaw sa Ginoo. Gisangyaw nila ang maayong mensahe sa Ginoo ngadto sa Iyang katawhan. Ug tuod man, ang gisangyaw sa mga propeta mao ang kamatuoran kay tungod kini gikan gayud sa Ginoo. Apan dili gayud malikayan nga adunay ubang mga tawo nga dili dapig sa kamatuoran, mao nga pagmakadungog nila sa mga propeta nga mosangyaw mahitungod sa gisulti sa Ginoo, sila gayud ang una nga dili motuo ug masuko dayon.

Mao kini ang kasinatian ni Jeremias sa atong unang pagbasa. Ang mga opisyales nasuko kaniya kay tungod wala sila nakauyon sa iyang gisulti ngadto sa mga katawhan. Apan wala sila masayod nga ang gisulti ni Jeremias sa mga katawhan gikan man kadto sa Ginoo. Apan kay tungod dili man motuo ang mga opisyales sa iyaha, ilang gisultihan ang ilang hari nga maayong patyon si Jeremias kay tungod wala siya naghatag og paglaum sa katawhan. Tungod niini si Haring Zedekiah gihatag si Jeremias, ug ilang gibutang hinayhinay si Jeremias didto sa balon pinaagi sa pisi. Apan ang balon wala nay tubig atong taknaa ug nahibilin nalang mao ang lapok, mao nga nalubong sa lapok si Jeremias. Apan bisan pa man niini naluwas gihapon si Jeremias pinaagi kang Ebedmelech. Si Ebedmelech mao ang nagsulti sa hari mahitungod sa dili maayong pagtratar sa mga opisyales kang Jeremias ug tungod niini iyang gisugo si Ebedmelech sa pagluwas kang propeta Jeremias.

Bisan gani ang atong Ebanghelyo karon nagsaysay mahitungod sa mensahe sa Ginoo, nga tungod niining Iyang mensahe ang Iyang katawhan makasinati gayud og panagbulag. Tungod kay adunay pipila nga dili motuo sa pulong sa Ginoo ug adunay pipila nga mituo. Mao kini ang kamatuoran nga dili tanan andam modawat sa maayong mensahe sa Ginoo. Nga bisan pa man sa kamaayo sa Ginoo naa pa gihapon nga mga tawo nga dili buot modawat sa Iyang mga pulong. Mao nga tungod niini adunay panagaway bisan diha sa pamilya, ang anak dili uyon sa iyang amahan ug ang amahan dili uyon sa iyang anak. Apan bisan pa man niini ang Ginoo wala nagkulang sa pagpahinumdom sa Iyang katawhan sa pagsunod Kaniya. Bisan pa man daghan ang dili mouyon sa imoha tungod sa pulong sa Ginoo, apan hinumduman nato nga dili kita ang una nga nakasinati niini, kun dili mao si Kristo ang tinubdan sa atong pagtuo. Kay kun dili sa Iyang pagpasakit diha sa krus kawang lamang ang atong kasakit nga nasinati tungod sa Iyang mga pulong.

Tataw ug dayag gayud nga ang atong Ebanghelyo nagpunting dili lang sa kapanahonan ni Jesus apan bisan sa atong katilingban nahitabo gihapon kini. Mamatikdan nato na diha sa atong katilingban anaa gihapon ang walay pagsinabtanay kay tungod ang uban dili motuo sa pulong sa Ginoo. Apan sama sa atong ikaduhang pagbasa sa Hebreo, gihagit kita sa pagpabilin gihapon diha sa Ginoo bisan pa man daghan ang masuko sa atua.

Sa katapusan nanghinaut ang Ginoo sa atua sa dili paghunong sa pagsunod ug pagbuhat sa Iyang mga pulong diha sa atong kinabuhi. Bisan pa man luyo niining kasakit nga atong madawat. Apan ang Ginoo naghatag sa atua ug kasigurohan nga sa atong kasakit, luyo niini mao ang kalipay nga sa katapusan mag-uban kita Kaniya ngadto sa Iyang gingharian sa langit.

Giya alang sa Pamalandong:

1. Sa atong pagsunod kang Kristo milambo ba ang atong pagtuo bisan sa mga daghang kasakitan sa kinabuhi?

2. Nagmadasigon ba kita sa paghatag og panahon sa pagtabang sa atong mga kaigsoonan luyo sa mga pagbiaybiay sa uban?

f.PANGALIYA

Pangulo: Ato karong ihalad sa atong Amahan makagagahum nga ang atong mga pag-ampo ug mga panginahanglan. Sa matag pangamuyo kita motubag: GINOO, DUNGGA ANG AMONG PAG-AMPO.

1. O Dios, himoa nga ang mga pangulo sa Simbahan makabaton og lig-ong pagtoo ug pagsalig aron magmakanunayon ug magmatinud-anon sila sa ilang pagsangyaw sa Maayong Balita sa buhing Dios sa tanang katawhan. Mag-ampo kita.

2. O Dios, himoa nga ang tanang lideres sa kanasuran makabaton og kadasig sa pagpangita sa kaangayan, hustisya ug kalinaw sa ilang pag-alagad sa tanang katawhan. Mag-ampo kita.

3. O Dios, himoa nga ang mga nag-antus tungod sa kawad-on makasinati sa Imong presensya diha sa mga instrumento nga Imong gipadala aron matubag ang ilang panginahanglan. Mag-ampo kita.

4. O Dios, inita ang among tagsatagsa ka kasingkasing sa Imong walay puas nga gugma aron kami magpadayon sa pag alagad Kanimo pinaagi sa tanan namong mga kaigsoonan ilabina diha sa among matag pamilya. Mag-ampo kita.

5. O Dios, among ihalad diha Kanimo ang tanang namong mga kaigsoonan nga nag una na kanamo dinhi niining kalibutana, madawat na unta nila ang kapahulayang dayon. Mag-ampo kita.

6. O Dios, ihalad namo Kanimo ang tanan namong personal nga katuyuan diha sa kahilum.

Pangulo: Mahigugmaon nga Amahan, amo nang gikahalad Kanimo ang among mga panginahanglan. Itugot nga amo na kining madawat pinaagi ni Kristo among Ginoo ug Manluluwas. Amen.