Kasaulogan sa pulong

IKA-KAWHAA'G DUHA NGA DOMINGGO

a. UNANG BASAHON

Sirac 3:17-18,20,28-29

Ang pagbasa gikuha gikan sa basahon ni Sirac.

Anak, pagpaubos diha sa tanan mong buhaton, ug ang mga tawo malipay niini labaw pa kay sa mga gasa. Sa magkadako ikaw'ng tawo, kinahanglan nga labi kang magpaubos; unya ang Ginoo mahimuot kanimo.

Ang gahum sa Ginoo dako, ug mapasidunggan siya kanila nga mga mapaubsanon. Walay sulbad alang sa mga problema nga ilaha sa mga tawo nga mapahitas-on; mang kadautan migamot na diha kanila. Ang makinaadmanon nga mga tawo makakat-on gikan sa mga sanglitanan ug mga pasumbingay. Mamati sila pag-ayo kay buot man sila makakat-on.

Mga igsoon, ang Pulong sa Ginoo.

b. SALMO RESPONSORYO

Salmo 68:4-5,6-7,10-11

Tubag (R)-O Dios, sa imong kaayo imong gibuhata'g puloy-anan ang kabus.

Ang matarong nagasadya ug nagalukso sa kallpay atubangan sa Dios; nalipay sila ug nagasadya. Awiti ang Dios, awiti'g pagdayeg ang iyang ngalan; ang lyang ngalan mao ang Ginoo. (R)

Ang amahan sa mga ilo ug tigpanalipod sa mga balo mao ang Dios diha sa iyang balaang puloy-anan. Ang Dios nagahatag og puloy-anan sa mga biniyaan; gipagula niya ang mga binilanggo ngadto sa kagawasan. (R)

O Dios Imong gihataga'g daghang ulan ang Imong kabllin; Imong giuli ang yuta sa diha nga kini nahimong arol; ang Imong mga panon sa kahayopan nagapuyo niini; sa imong kaayo, O Dios, gitagana mo kini alang sa mga kabus. (R)

c. IKADUHANG BASAHON

Hebreo 12:18-19,22-24

Ang pagbasa gikuha gikan sa sulat ngadto sa mga Hebreo.

Kay wala kamo moduol sa usa ka butang nga mahikap ninyo sa nagdilaab nga kalayo didto sa Bukid sa Sinai, sa kangitngit, sa kangiob ug sa bagyo, sa lanog sa trumpeta ug sa usa ka tingog - sama sa gibuhat sa mga Israelita. Sa pagkadungog sa mga Israelita sa maong tingog, nangaliyupo sila sa Dios nga mohunong na unta ang maong tingog."

Hinonoa, ang giduol ninyo mao ang Bukid sa Sion ug ang siyudad sa buhing Dios, ang langitnong Jerusalem, uban sa linibo ka mga anghel niini. Miduol kamo sa malipayong panagtigom sa mga kamagulangang anak kansang mga ngalan nahisulat didto sa langit. Miduol kamo sa Dios, ang Maghukom sa tanang mga tawo, ug sa mga espiritu sa mga matarong nga nahingpit na. Miduol kamo kang Jesus nga maoy tigpataliwala sa bag-ong kasabutan, ug ngadto sa gisablig nga dugo nga nagpaila sa maayong mga butang kay sa dugo ni Abel.

Mga igsoon, ang Pulong sa Ginoo.

d. EBANGHELYO

Lucas 14:1,7-14

Ang pagsangyaw sa Maayong Balita sumala ni San Lucas.

Usa niana ka Adlaw'ng Igpapahulay miadto si Jesus sa balay sa usa sa mga inilang Pariseo aron mokaon, ug ang mga tawo naniid pag-ayo kaniya. Namatikdan ni Jesus nga dihay pipila sa mga bisita nga nagpili sa labing pinasidunggang dapit sa kan-anan, busa iyang gisulti kining sambingaya ngadto kanilang tanan: "Kun dapiton gani kamo pagtambong sa usa ka kombira sa kasal, ayaw kamo paglingkod sa labing pinasidunggang dapit sa kan anan kay tingali unya'g may laing dinapit nga labi pang Importante kay kanimo, ug ang nagdapit kaninyong duha moduol ug moingon kanimo, Siyay palingkora diha.' Unya maulawan ka ug mapugos paglingkod sa labing ubos nga dapit. Hinonoa, kun dapiton ka, adto lingkod sa labing ubos nga dapit, aron ang nagdapit kanimo moduol ug moingon: Higala, balhin ngari sa pinasidunggan dapit.' Sa ingon niini, kapasidunggan ka atubangan sa tanang dinapit. Kay kadtong magpataas ipaubos, ug ang magpaubos ipataas."

Unya miingon si Jesus sa nagdapit kaniya, "Kun ikaw magkombira, ayaw dapita ang imong mga higala, o ang imong mga igsoon, o ang imong mga paryenti, o ang mga dato mong mga silingan, kay sila mobalos pagdapit kanimo ug sa ingon niini ikaw hibaslan sa imong gibuhat.

Kun magkombira ka, maoy dapita ang mga kabus, ang mga bakol, ang mga piang, ug ang mga buta, ug mabulahan ka kay dili man sila makabalos kanimo. Baslan ka ra sa Dios inigkabanhaw sa mga matarong."

Mga igsoon, ang Maayong Balita sa atong Ginoo.

e. KOMENTARYO

Tema: Ang Pagpaubos Mao ang Kinaiya sa Tinuod nga Sumusunod ni Kristo

Adunay usa ka negosyante nga nanag-iya og dako kaayo nga humayan. Usa ka adlaw niana misubay siya sa iyang humayan kauban ang iyang suloguon. Matud pa niya "Kining tanan nga imong makita nga humayan akoa kining tanan. Ako ang nanag-iya niini ug akoa kining gipasigarbo sa tanan kong mga kaila". Mitubag ang sulugoon, "Sir, nakita ba nimo kanang tipasi sa humay? Ang adunay sulod nga bugas nakaduko sa yuta apan ang walay sulod nagapunting sa langit".

Mga igsoon, gipahinumduman kita sa atong Ginoong Jesus karong adlawa diha sa Ebanghelyo nga atong nadungog nga pulong pagpaubos. Si Kristo nagpaubos ug kita nga mga sumusunod Niya gitawag usab sa buhat sa pagpaubos. Matud pa ni Santo Tomas Aquino ang pagpaubos mao ang Korona sa tanang Birtudes o "Crown of all virtues". Mga igsoon ang pagpaubos mao ang pagdawat sa kamatuoran nga ang tanan Grasya sa Ginoo. Ang pagpaubos wala nagpasabot nga atong gitamakan ang atong kaugalingon apan kini maoy pagdawat nga ang tanan Iya sa Ginoo ug Grasya sa Ginoo. Adunay tulo ka punto ang buot ipadayag karong adlawa sa temang pagpaubos. Una, nga ang pagpaubos mao ang paggawas sa kaugalingon. Kon atong gihunahuna sa kaugalingon nga kita importante o kaha gikumpara ang atong kaugalingon wala nato nabuhat ang tinuod nga pagsunod kang Jesus. Diha sa pagpaubos makita usab nato unsa kita ka gamay sa mata sa Ginoo. Ikaduha, ang pagpaubos mao ang pagpuyo sa kamatuoran. Sa pagpaubos makita nato nga kitang tanan adunay mga tagsatagsa ka mga gasa. Kon aduna kay gasa sa pagkanta nan apil sa "Choir" sa simbahan. Kon aduna kay gasa sa pagsayaw nan palamboa kini og ihalad kini sa simbahan. Gihagit kitang tanan sa pagpuyo sa kamatuoran. Ikatulo, ang pagpaubos kanunay naggiya kanato sa pagpasalamat. Ang tawong mapaubsanon siya usab mapasalamaton. Mapasalamaton sa tanang grasya sa kinabuhi mao kana ang tinuod nga timaan sa usa ka kristiyano nga mapaubsanon.

Mga igsoon walay mapahitas-on sa langit ug kadtong gusto malangit gidapit sa pagpuyo nga mapaubsanon dinhi sa kalibutan.

Giya alang sa Pamalandong:

1. Nagmapaubsanon ba ako sa akong pagpangalagad diha sa akong pamilya ug katilingban?

2. Mapasalamaton ba ako sa Ginoo sa mga talento nga Iyang gipiyal kanako ug madasigon nga mipaambit niini ngadto sa uban?

f. PANGALIYA

Pangulo: Puno sa dakung pagtoo, ato karong ihalad sa Langitnong Amahan ang atong mga pag-ampo ug mga panginahanglan. Sa matag pangamuyo kita motubag: O DIOS, DUNGGA KAMI.

1. Ginoo, hatagi og kalig-on ang Imong Simbahan aron magmakanunayon nga mosaksi sa pagpakaylap sa Maayong Balita sa kaluwasan sa tibuok kalibutan. Kami nagaampo...

2. Ginoo, hikapa ang mga kasingkasing sa mga nagdumala sa mga kanasuran aron matinud-anon silang moalagad sa mga katawhan padulong sa hingpit nga kalamboan ug kaangayan. Kami nagaampo.

3. Ginoo, himoa nga ang mga lideres sa matag Kristohanong katilingban magpakabana sa espirituhanong panginahanglan sa katawhan ilabina sa mga kabatan-onan. Kami nagaampo.

4. Ginoo, dugangi ang paglaum ug hatagi og kalig-on ang among mga igsoon nga nag antus sa kawad-on sa kinabuhi ug mga nagmasakiton nga Imo silang hupayon pinaagi sa mga tawo nga migahin sa ilang panahon sa pag-atiman kanila ug pagpaambit sa ilang bahandi aron matubag ang ilang panginahanglan.Kami nagaampo...

5. Ginoo, kami nga nagkatigom karon niining Imong bangkite sa gugma ug kinabuhi, makabaton og igong kalig on sa pagsagubang sa mga pagsulay ug mga babag sa among pagpanaw sa dalan padulong sa Imong Gingharian. Kami nagaampo..

6. Ginoo, among ihalad Kanimo ang among personal nga katuyuan diha sa kahilum.

Pangulo: Mahigugmaon nga Dios, Imo nang nadungog ang mga pag-ampo sa Imong katawhan. Itugot nga among matagamtaman ang grasya nga Imong gitagana alang kanamo pinaagi ni Kristo among Ginoo ug Manunubos. Amen.