Ikanapulog Siyam

IKA-NAPULO'G SIYAM NGA DOMINGGO

a. UNANG BASAHON

Kinaadman 18:6-9

Ang pagbasa gikuha gikan sa basahon sa Kinaadman.

Ang among mga katigulangan gipahibalo nang daan unsa ang mahitabo niadtong gabhiona, aron malipay sila ug madasig sa pagsalig diha sa imong mga saad kanila. Ang imong katawhan nahibalo nga Imong luwason ang matarong nga nasud ug nga imong laglagon ang ilang mga kaaway.

Sa maong buhat gisilotan mo ang among mga kaaway ug gibuhatan mo kami sa mahimayaong dungog sa pagtawag kanamo nganha kanimo. Sulod niining tanang panahon ang mainitong mga tawo gikan niining matarong nga nasud sa tago naghalad ug nagsakripisyo, nagsinaaray sa usag-usa nga ilang ampingan ang balaod sa Dios ug mag-inambitay sila sa mga panalangin ug mga peligro. Nag-awit na sila niadtong karaan nga mga awit sa pagdayeg.

Mga igsoon, ang Pulong sa Ginoo.

b. SALMO RESPONSORYO

Salmo 33:1,12,18-19,20-22

Tubag (R)-Bulahan ang lungsod nga gipili sa Ginoo alang sa iyang kaugalingon.

Pagsadya, kamong mga matarong, diha sa Ginoo; angay sa matarong ang pagdayeg kaniya. Bulahan ang nasud kansang Dios mao ang Ginoo, ang lungsod nga iyang gipili alang sa iyang kaugalingong kabilin. (R)

Tan-awa ang mga mata sa Ginoo anaa kanila nga mahadlokon kaniya, kanila nga nagalaum sa iyang kaayo, aron pagluwas kanila gikan sa kamatayon ug pag-amping kanila sa panahon sa gutom. (R)

Ang among kalag nagapaabot sa Ginoo, nga mao ang among hinabang ug among panalipod. Maania unta kanamo, O Ginoo, ang imong kalooy kami nga nagalaum kanimo. (R)

c. IKADUHANG BASAHON 

Hebreo 11:1-2,8-19 o 11:1-2,8-12

Ang pagbasa gikuha gikan sa sulat ngadto sa mga Hebreo.

Ang kahulugan sa pagtoo mao nga may pagsalig kita sa mga butang nga atong gialoman ug dili nato makita. Pinaagi sa pagtoo, ang mga tawo sa karaang panahon gikahimut-an sa Dios.

Tungod sa pagtoo misugot si Abraham sa dihang gipaadto siya sa Dios sa usa ka nasud nga gisaad sa Dios nga ihatag kaniya. Gibiyaan niya ang iyang kaugalingong nasud bisan wala siya masayud asa siya paingon. Pinaagi sa pagtoo mipuyo siya sa nasud nga gisaad sa Dios kaniya sama ra nga siya usa ka langyaw. Nagpuyo siya sa mga tolda ingon ni Isaac ug ni Jacob nga nakadawat sa samang saad gikan sa Dios. Kay nagpaabot si Abraham sa siyudad nga ang Dios mismo maoy naglaraw ug nagtukod, ang siyudad kansang mga sukaranan dili gayud mapukan.

Tungod sa pagtoo nahimo si Abraham nga usa ka amahan bisan tuod tigulang na siya kaayo ug si Sara dili na makapanamkon. Misalig siya nga tumanon sa Dios ang iyang gisaad. Bisan siya daw patay na gayud, mitungha gikan niining tawhana ang mga kaliwat nga sama sa kadaghan sa mga bituon sa kalangitan, ingon kadaghan sa dili maisip nga mga balas sa kabaybayonan.

Nangamatay silang tanan diha sa pagtoo. Wala sila makadawat sa mga butang nga gisaad sa Dios, apan bisan layo pa kaayo nakita na nila kini ug gikahinangop nila ug miila sa dayag nga sila mga langyaw ug mga dumuduong dinhi sa kalibutan.

Kadtong nagsulti sa Ingon nagpahayag sa matin-aw nga nangita sila og usa ka nasud nga ilang kaugalingon. Wala na sila maghunahuna sa nasud nga ilang gibiyaan; kun naghunahuna pa sila niini, makapauli unta sila. Hinonoa, gipangandoy nila ang labi pang maayong nasud, ang langitnong nasud. Busa wala ikaulaw sa Dios nga sila moila kaniya nga ilang Dios, kay nag-andam man siya'g usa ka siyudad alang kanila.

Tungod sa pagtoo nakahimo si Abraham paghalad sa iyang anak nga si Isaac sa dihang gisulayan siya sa Dios. Si Abraham mao ang gisaaran sa Dios, apan andam siya paghalad sa iyang bugtong anak ingon nga halad-sinunog. Giingnan siya sa Dios, "Pinaagi kang Isaac makabaton ka'g mga kaliwat." Nagtoo si Abraham nga makahimo ang Dios pagbanhaw kang Isaac, busa maingon ta nga gidawat ni Abraham si Isaac gikan sa kamatayon.

Mga igsoon, ang Pulong sa Ginoo.

d. EBANGHELYO

Lucas 12:32-48 o 12:35-40

Ang pagsangyaw sa Maayong Balita sumala ni San Lucas.

Si Jesus miingon sa iyang mga tinun-an, "Ayaw kahadlok, gamayng panon! Kay ang inyong Amahan nahimuot sa paghatag kaninyo sa Gingharian. Ibaligya ang tanan ninyong katigayonan ug ihatag ang halin ngadto sa mga kabus. Pagsangkap kamo'g mga puntil nga dili madunot, ug tigoma ang inyong mga bahandi didto sa langit, diin dili gayud sila mokunhod, kay walay kawatan nga makahilabot niini, ni may anay nga makakutkot. Kay hain gani ang inyong bahandi, atua usab didto ang inyong kasingkasing." Pag-andan kamo sa bisan unsay modangat. Baksi'g hugot ang inyong mga bisti diha sa hawak ug dagkoti ang inyong mga suga, sama'g mga sulugoon nga naghulat sa pagbalik sa ilang agalon gikan sa kombira sa kasal. Inig-abot niya ug Inigtuktok ablihan dayon nila ang pultahan. Bulahan kadtong mga sulugoon nga makaplagan sa ilang agalon nga nagtukaw ug nag-andam!

Sultihan ko kamo nga magbakos siya, palingkoron sila sa kan-anan ug silbihan niya. Ug bulahan sila kun hikaplagan niya nga andam, bisan kun moabot siya sa tungang gabil, o kaadlawon na! Ug timan-l kini: `kun nahibalo pa ang tagbalay kanus-a moabot ang kawatan, dili gayud siya motugot nga lungkabon sa kawatan ang iyang balay.' Busa kamo usab kinahanglan mangandam, kay ang Anak sa Tawo moabot sa oras nga wala ninyo siya paabota."

Unya miingon si Pedro, "Ginoo, nagsugilon ka ba niining sambingaya alang kanamo lamang, o gitumong mo ba kini alang sa tanan?" Ang Ginoo mitubag, "Kinsa ba diay ang buotan ug maalamon nga sulugoon? Siya ang tugyanan sa iyang agalon pagdumala sa panimalay ug paghatag sa ubang mga sulugoon sa ilang pahat sa kalan-on sa husto nga panahon.

Bulahan kadtong sulugoon nga makaplagan sa iyang agalon nga nagtuman niini sa paghiuli niya. Sultihan ko kamo: ang agalon maghimo niadtong maong sulugoon nga tinugyanan sa tanan niyang katigayonan. Apan kun kadtong maong sulugoon moingon sa iyang kaugalingon, Dugay pa moabot ang akong agalon,' ug unya mosugod siya sa pagpamunal sa kauban niyang mga sulugoon nga lalaki ug babaye, ug magpalabi'g kaon ug inom ug maghuboghubog, ug unya mahibalik ang agalon usa niana ka adlaw nga ang sulugoon wala makahibalo, tagodtagoron siya sa iyang agalon ug pahiagomon sa gidangatan sa ubang ligoy nga sulugoon.""

"Ang sulugoon nga nasayod unsa ang buot ipabuhat kaniya sa iyang agalon, apan dili mag-andam ug dili magtuman sa ipabuhat, silotan sa daghang latos; apan ang sulugoon nga wala masayod unsa ang gusto sa iyang agalon, ug makabuhat ug butang nga tungod niini angay siyang latoson, silotan sa diriyot nga latos. Ang tawo nga gihataga'g daghan, paningla'g daghan; apan ang gihataga'g daghan pa gayud, paninglan usab ug mas daghan pa.

Mga Igsoon, ang Maayong Balita sa atong Ginoo.

e. KOMENTARYO

Tema: Matuohon ug Matinud-anon nga Alagad, Kanunay Andam

Ang kalendaryo sa atong simbahang Katoliko karong Dominggoha anaa na sa ikanapulo'g siyam nga Dominggo sa Ordinaryong Panahon. Isip mga sumusunod ni Kristo kita makapangutana: Unsay angayan anaa sa usa ka sumusunod sulod niining panahona? Unsa ang angayan nga buhaton sa usa ka sumusunod ni Jesus sulod niining tuiga? Ang mga pagbasa karong Dominggoha naghulagway kanato og hagit sa pagtubag sa tawag sa Ginoo sa pagkamatinud-anon, matuohon ug kanunay andam.

Diha sa atong Ebanghelyo gihatagan og igong pagtagad ni San Lukas alang sa iyang magbabasa ang kamahinungdanon sa pagkamatuohon sa mga sugo ni Jesus diha sa panahon, usa ang ikaduhang pag-anhi Niya kun Parosiya. Nagkahulugan kini nga kinahanglan andam ang mga sumusunod ni Jesus sa Iyang pagbalik. Sa atong unang pagbasa gikan sa basahon sa Kinaadman ang kasinatian sa mga Ehiptohanong bata nahisgutan. Ang Israel nga kanunay gipanalanginan sa Dios isip Iyang piniling nasud nakasinati og kaluwasan diha sa kamatayon nga nahiaguman sa mga batang Ehiptohanon. Ang ikaduhang pagbasa gikan sa sulat ngadto sa mga Hebreo nagsaysay mahitungod sa pagtuo ni Abraham. Tungod sa iyang pagtuo ngadto sa Ginoo siya kanunay nagmatinumanon. Ang bunga niini mao ang katumanan sa gisaad sa Ginoo nga yuta ug kaliwatan diha kaniya.

Atong sutaon ang tagsatagsa nato nga kaugalingon. Kumusta man ang atong pagka alagad sa Ginoo? Anaa pa ba kanato ang pagtuo? Anaa pa ba kanato ang pagkamatuohon sa mga pulong sa Dios nga kanunay natong mabatian sa mga Ebanghelyo ug mga pagbasa? Anaa na ba kanato ang pagka-andam kanunay sa pag-abot ni Jesus?

Kita kanunay gipahimangnoan sa Ginoo sa pagkamakanunayon sa pagtuo. Angayan nga kanunay hingpit kini nganha Kaniya, ug Kaniya lamang isip atong Dios. Tinuod dili sayon ang atong pagpangalagad, dili sayon ang pagpaabot. Apan kita dili dapat magpabilin nga walay pagsalig sa gahum sa Dios nga kanunay nagalihok sa atong kinabuhi. Mahisama unta kita kang Abraham nga kanunay nagatuo ug nagatuman sa kabubut-on sa Ginoo taliwala sa kalisod ug pagsulay. Pinaagi sa atong pagtuo ang atong mga pangandoy matuman, kay ang atong Dios, Dios man nga tuburan sa tanan nga atong makita ug dili makita sulod niining atong kalibutan.

Si San Lukas nagdapit kanato sa kamahinungdanon sa pagkamatuohon sa mga sugo ni Jesus, usa ang ikaduhang pag-anhi Niya. Magmatinud-anon unta kita sa atong mga buhat ingon nga si Jesus kanunay nagmatinud-anon kanato, diha sa Iyang pagluwas kanato pinaagi sa Krus. Kita Iyang gipakitaan og mga buhat nga angayan gayud natong sundon isip Kristohanon. Ang pangutana andam ba kita karon sa pagbuhat niini samtang atong gipaabot ang Iyang ikaduhang pagbalik? Anaa na ba kanato ang tinuod nga pagtuo kang Jesus isip atong Dios ug Manluluwas?

Hinaut ang atong mga pagbasa karong Dominggoha maghatag kanato og lamdag, kusog ug kaisog nga moatubang sa hagit sa pagkamatuohon sa mga sugo ni Jesus. Hinaut nga kita magpadayon sa pagkamatinud-anon luyo sa atong kahuyang. Ang Ginoo nag-ingon: "Ako kanunay maga-uban kaninyo hangtud sa kahangturan". Busa mosalig kita Kaniya. Puy-an ta ang Iyang gitudlo kanato. Dili lamang sa pulong, kondili usab sa buhat. Ang pagtuo nato kanunay nga magpabiling buhi kon kini adunay buhat, buhat sa gugma ug pagkamasaligon kanunay sa grasya sa Ginoo. Isip alagad atong sugdan karon taknaa, pinaagi sa pagpuyo ug pagbuhat og maayo matag adlaw. Pinaagi sa atong pagtuo kang Jesus ang atong Manluluwas, nga kanunay andam maghatag sa Iyang kaugalingon kanatong tanan. Sa susamang paagiha kita usab unta andam nga mohatag sa atong kaugalingon ngadto sa uban. Isip panapos, ato kanunay nga batonan nga ang pinakamaayo nga pagpangandam sa pag-abot sa atong Ginoo dili mao ang pagpabiling huyang, apan mao ang pagkamatinud-anon diha sa pagtuman sa atong kristohanong mga tahas sa kinabuhi uban ni Kristo. Amen.

Giya alang sa Pamalandong:

1. Nagmadasigon ba kita sa pagbuhat sa kabubut-on sa Amahan sa matag takna sa atong panaw sa kinabuhi?

2. Andam ba kita sa kanunay sa paghimamat apat sa atong Ginoo sa tanang takna sa Iyang Booy pagbalik?

f. PANGALIYA

Pangulo: Puno sa pagsalig mag-ampo kita sa atong maloloy-on ug makagagahum nga Dios sa atong mga panginahanglan. Sa matag pangamuyo kita motubag: GINOO, DUNGGA ANG AMONG PAG AMPO.

1. Nga ang tibuok Simbahan magdala og kahayag sa atong mga kaigsoonan nga anaa sa kangitngit ug pagkabahinbahin, paglaum sa mga anaa sa kalisod ug kawad on ug gugma sa mga naghupot og kasilag sa ilang kasingkasing. Mag-ampo kita.

2. Nga ang mga lideres sa atong nasud giyahan sa kanunay sa Balaang Espiritu Santo aron matinud-anon nilang alagaran ang tanang katawhan ilabina ang mga nanginahanglan. Mag-ampo kita.

3. Nga ang mga pangulo sa atong Kristohanong katilingban, makabaton sa kinasingkasing nga pagtoo ug pagsalig sa Dios kinsa maoy tinubdan sa kalig-on ug gugma. Mag-ampo kita.

4. Nga ang matag sakop sa pamilya makat on sa pagpaambit sa kaligdong sa ilang pagtoo ug pagsaksi sa buhing paglaum diha sa katilingban. Mag-ampo kita.

5. Nga ang matag usa kanato motubo diha sa gugma ug pagkamabination nga maoy kongkretong paagi sa pagpuyo sa ehemplo nga gipakita ni Kristo. Mag-ampo kita.

6. Nga ang atong personal nga katuyuan, atong kining ihalad sa Dios diha sa kahilum.

Pangulo: Langitnong Amahan, nasayud kami nga Imo kaming giatiman kanunay tungod sa Imong dakung gugma kanamo. Masaligon kami nga among madawat ang grasya nga Imong gitagana kanamo pinaagi ni Kristo Imong Bugtong Anak, uban sa Espiritu Santo Dios nga usa hangtud sa kahangturan. Amen.