21st Sunday

Ikakawhaag-usa nga Domingo

Sulod sa Tuig C

BASAHON I

Is. 66:18-21

KINUTLO GIKAN SA BASAHON NI PROPETA ISAIAS

"Nasayod ako sa ilang binuhatan ug hunahuna, ug moabot ako aron pagtigom sa tanang kanasuran ug katawhan; manganhi unya sila ug makakita sila sa akong gahom, ug magbutang akog ilhanan diha kanila."

"Ipadala ko ngadto sa ubang ka nasuran ang pipila sa nahisalin kanila: ngadto sa España, sa Libya, sa Lydia, ug ngadto sa Tubal ug sa Grecia ug sa mga pulo nga atua sa layo nga wala maka dungog sa akong ngalan ug makakita sa akong gahom; imantala nila ang akong gahom ngadto sa kanasuran. Ug dad-on nila gikan sa tanang kanasuran ang tanan ninyong kaigsuonan aron ihalad ngadto sa GINOO; magsakay sila ug mga kabayo, mga karwahe, mga karomata, mga asno ug mga kamelyo ug mangadto sila sa balaan kong bukid, ang Jerusalem nag-ingon ang GINOO. Ihalad kamo nila ngari kanako ingon nga maghalad ang mga Israelita didto sa Templo sa GINOO sa ilang halad nga pagkaon sinulod sa limpiyong sudlanan. Himoon kong mga pari ug mga Levita ang uban kanila.

ANG PULONG SA GINOO.

SALMO RESPONSORYO

Ps. 117: 1, 2

R. Panglakaw kamo sa tibuok kalibutan ug isangyaw ang Maayong Balita.

Dayga ang Ginoo, kamong tanang mga nasod; himayaa siya, kamong tanang katawhan.

R. Panglakaw kamo sa tibuok kalibutan ug isangyaw ang Maayong Balita.

Kay makanunayon ang iyang kaluoy alang kanato, ug ang kamatinud-anon sa Ginoonagalungtad hangtod sa kahangturan.

R. Panglakaw kamo sa tibuok kalibutan ug isangyaw ang Maayong Balita.

BASAHON II

Heb. 12:5-7, 11-13

KINUTLO GIKAN SA SULAT NI SAN PABLO NGADTO SA MGA HEBREO

Nalimot ba kamo sa makapadasig nga mga pulong nga gisulti sa Dios kaninyo ingon nga iyang mga anak?

"Anak, ayaw isipa nga diyotay rag bili ang pagkastigo sa Ginoo kanimo, Ug ayaw kaluya kon badlongon ka niya.

Kay kastigohon sa Dios ang tanan nga iyang gihigugma, Ug latoson ang tanan nga iyang gisagop ingon nga anak."

Antusa ang pagkastigo kaninyo ingon nga kini gikan sa inyong amahan, kay nagpaila kini nga giisip kamo sa Dios nga iyang mga anak. May anak ba god nga dili kastigohon sa iyang amahan? Kon kastigohon kita, makasubo kini kanato inay makalipay. Apan sa kaulahian kadtong nakadawat sa maong pagpanton makaani sa kinabuhing matarong ug ganting malinawon.

Busa ituboy ang nahuyhoy ninyong mga kamut ug lig-ona ang naluya ninyong mga tuhod. Subaya ninyo ang tul-id nga mga dalan aron dili mainutil ang piang ninyong tiil kondili mamaayo hinoon. 

ANG PULONG SA GINOO. 

EBANGHELYO

Lk 13:22-30

Kinutlo gikan sa Ebanghelyo sumala ni Lucas

Ug miagi siya latas sa kalongsoran ug kabalangayan, samtang nagatudlo siya ug nagapanaw padulong ngadto sa Jerusalem. Ug dihay miingon kaniya, "Ginoo, diyotay ra ba ang maluwas?"

Ug miingon siya ngadto kanila, "Padayon kamo pagpanlimbasog nga makasulod agi sa masigpit nga ganghaan kay, nagaingon ako kaninyo, daghan ang mosulay pagsulòd ug dili sila makahimo.

Inig bangon na gani sa tag-iya sa balay ug trangkahan na niya ang ganghaan, ug magsugod kamo og barog sa gawas ug manuktok sa ganghaan diha sa pag-ingon, 'Ginoo, ablihi kami.

Sa pagtubag moingon siya kaninyo, 'Wala akò mahibalo kon taga diin kamo. Unya magsugod kamo pag-ingon, 'Nangaon ug nanginom kami sa imong atubangan, ug nagtudlo ka diha sa among kadalanan?

Ug moingon siya kaninyo, 'Wala ako mahibalo kon taga diin kamo; pahilayo gikan kanako, kamong mga magbubuhat og daotan!' Didto aduna unyay dangoyngoy ug pagkagot sa mga ngipon inigkakita ninyo kang Abraham, Isaac, Jacob, ug sa tanang mga propeta sulòd sa gingharian sa Dios, ug kamo ibalibag sa gawas.

Ug moabot sila gikan sa sidlakan ug sa kasadpan, ug gikan sa amihanan ug sa habagatan, ug palingkoron sila didto sa gingharian sa Dios. Ug tan-awa, ang mga naulahi mag-una ug ang mga nag-una maulahi.”

Ang Ebanghelyo sa Ginoo.

PASIUNA 

AUGUST 21, 2022

Maayong buntag / hapon mga igsoon diha ni Kristo.

Ania na kita sa ikakawhaan ug usa nga domingo sa ordinaryong panahon.

Ang unang pagbasa gikan sa Basahon ni Propeta Isaias. Kini nagkanayon: "Nasayod ako sa ilang binuhatan ug hunahuna ug moabot ako aron pagtigom sa tanang kanasuran ug katawhan."

Ang ikaduhang pagbasa gikan sa sulat ngadto sa mga Hebreo. Kini nagkanayon: "Kay kastigohon sa Dios ang tanan nga iyang gihigugma ug lotoson ang tanan nga iyang gisakop ingon nga anak."

Ug ang Ebanghelyo gikan sa ebanghelyo sumala ni San Lucas. Kini nagsaysay mahitungod sa pagsulod sa gingharian sa langit.

Palihug manindog alang sa pagsugod sa Santos na Eyukaristiya.

PANGALIYA 

AUGUST 21, 2022

PARI: Mag ampo kita sa atong mahigugmaong Amahan alang sa atong mga panginahanglan. .Sa matag pangamuyo kita motubag: DUNGGA ANG IMONG KATAWHAN, O DIOS.

1. Bendisyonan unta kanunaysa Dios ang Santo Papa, mga Obispo,mga kaparian, aron makanunayon silang magsangyaw sa Maayong Balita,pinaagi sa ilang mga maayong buhat. Mag-ampo kita.

2. Panalanginan unta kanunay sa Dios ang mga nangulo sa atong nasud, aron malipayon silang magtuman sa ilang mga katungdanan nga mao ang paghatag ug kaayohan sa katawhan...Mag-ampo kita.

3. Dasigon unta sa Ginoo ang tanang Kristohanong magtotoo, aron makab-ot ang kahiusahan ug kalinaw.Mag-ampo kita.

4. Hatagan unta sa Dios ug kaayohan ug kahupayan ang tanang masakiton, mga tigulang ug ang tanang mga nag-antus aron makabaton silag kadasig ug paglaum. Mag-ampo kita.

5. Panalanginan unta sa Ginoo, sila nga nagdayeg ug nagpasalamat kaniya hilabina nila ___________ Mag-ampo kita.

6. Hatagan unta sa Dios ug kinabuhing dayon ang tanang nangamatay, hilabia nila _____________ Mag-ampo kita.

PARI: Ginoong Dios,himoa nga makasinati kami kanunay sa imong mga panalangin, Kaloy-I kami sa kanunay, kini among gipangayo pinaagi ni Kristo,among Ginoo, Amen.