17th Sunday

Ikanapulog-pito nga Domingo Sulod sa Tuig

BASAHON I

cycle C

Gn. 18:20-32

KINUTLO GIKAN SA BASAHON SA GENESIS

Miingon kang Abraham ang GINOO, "Hilabihan na ang mga mulo batok sa Sodoma ug sa Gomora, ug ang ilang sala dako kaayo. Busa molugsong ako aron susihon kon tinuod ba ang mga mulo nga akong nadungog."

Unya mibiya ang duha ka tawo ug mipadayon paingon sa Sodoma, apan nagpabilin ang GINOO uban kang Abraham. Giduol ni Abraham ang GINOO ug gipangutana, "Laglagon mo ba gayod ang mga walay sala uban sa mga makasasala? Pananglit adunay kalim-an ka tawo nga walay sala didto, laglagon mo ba ang tibuok siyudad? Dili mo ba kini pasayluon aron lamang pagluwas sa kalim-an ka tawo? Sa walay duhaduha dili mo gayod patyon ang mga walay sala uban sa mga makasasala. Dili mo kana mabuhat! Kay kon buhaton mo kini, ang mga walay sala mahiagom sa silot uban sa mga makasasala. Dili kana mahitabo! Ang Maghuhukom sa tibuok kalibutan kinahanglang magbuhat sa angay gayod."

Ang GINOO miingon, "Kon maka kaplag akog kalim-an ka tawo nga walay sala didto sa Sodoma, dili ko silotan ang tibuok siyudad tungod lamang kanila."

Unya miingon na usab si Abraham, "GINOO, pasayloa nga mangahas ako pagpadayon sa pagpakigsulti kanimo. Tawo lamang ako ug walay katungod pagsulti bisan unsa. Apan tingalig aduna lamay kap-atan ug lima ka tawo nga walay sala didto inay kalim-an. Laglagon mo ba ang tibuok siyudad tungod lang kay kulang og lima?"

Ang GINOO mitubag, "Dili ko

laglagon ang siyudad kon makakaplag akog kap-atan ka tawo nga walay sala." Unya miingon na usab si Abraham, "Tingalig kap-atan ra ka tawo ang walay sala."

Ang GINOO mitubag, "Dili ko laglagon kini kon adunay kap-atan ka tawo nga walay sala."

Si Abraham miingon, "Ayaw intawon kasuko, GINOO, nga mopadayon ako sa pagsulti. Pananglit katloan lamang ka tawo sila?"

Ang GINOO mitubag, "Dili ko laglagon kini kon makakaplag akog katloan ka tawo."

Miingon si Abraham, "Pasayloa intawon ako, GINOO, nga mangahas ako pagpadayon sa pagpakigsulti kanimo. Pananglit makakaplag ka lamag kawhaan ka tawo?"

Ang GINOO mitubag, "Dili ko laglagon ang siyudad kon makakaplag akog kawhaan ka tawo."

Si Abraham miingon, "Ayaw intawon kasuko, GINOO, niining katapusan kong pagsulti. Pananglit aduna lamay napulo nga imong makaplagan, unsa may mahitabo?"

Ang GINOO mitubag, "Dili ko kini laglagon kon adunay napulo."

ANG PULONG SA GINOO.

SALMO RESPONSORYO 

Ps. 138/1-2, 2-3, 6-7, 7-8

R. Ginoo, sa adlaw nga nangayo akog hinabang, imo ako nga gitubag.

Pasalamatan ko ikaw, O Ginoo, sa tibuok kong kasingkasing.

(kay imong gidungog ang mga pulong sa akong ba-ba); sa atubangan sa mga anghel awiton

ko ang imong pagdayeg; Magasimba ako sa imong balaan nga templo, ug pasalamatan ko ang imong ngalan.

R. Ginoo, sa adlaw nga nangayo akog hinabang, imo ako nga gitubag.

Tungod sa imong kaluoy ug imong kamatuoran; kay imong gipadala labaw sa tanang butang ang imong ngalan ug ang imong saad. Sa akong pagsangpit gipatalinghugan mo ako; imo akong gilig-on sulod sa akong kaugalingon.

R. Ginoo, sa adlaw nga nangayo akog hinabang, imo ako nga gitubag.

Ang Ginoo hataas, apan bisan pa niana nagatan-aw siya sa mapaubsanon, ug ang mapahitas-on iyang hiilhan gikan sa layo.

Bisan magalakaw ako taliwala sa kagul anan, imo ako nga bantayan; batok sa kapungot sa akong mga kaaway imong gibakyaw ang imong kamut.

R. Ginoo, sa adlaw nga nangayo akog hinabang, imo ako nga gitubag.

Ang imong tuong kamut nagaluwas kanako. Ang Ginoo maghingpit sa iyang gihimo kanako; Ang imong kaluoy, O Ginoo, nagalungtad sa kahangturan; ayaw pagbiyai ang buhat sa imong mga kamut. 

R. Ginoo, sa adlaw nga nangayo akog hinabang, imo ako nga gitubag.

BASAHON II

Col. 2:12-14

KINUTLO GIKAN SA SULAT NI SAN PABLO NGADTO SA TAGA-COLOSAS

Mga igsuon: Sa pagbunyag kaninyo gilubong kamo uban ni Cristo, ug sa pagbunyag usab kaninyo gibanhaw kamo uban ni Cristo pinaagi sa inyong pagtuo sa gahom sa Dios nga nagbanhaw kaniya. Kaniadto patay kamo sa espiritu tungod sa inyong mga sala ug tungod kay dili man kamo mga Judio ug busa wala mahisakop sa Balaod. Apan karon gibanhaw na kamo sa Dios uban ni Cristo! Gipasaylo na kita sa Dios sa tanan tang mga sala. Gipapas niya ang tanan tang mga utang lakip ang mga kasabutan bahin niini ug giwagtang niya ang tanan pinaagi sa paglansang niini didto sa krus.

ANG PULONG SA GINOO.

EBANGHELYO

Lk 11:1-13

Kinutlo gikan sa Ebanghelyo sumala ni Lucas

Ug nahitabonga nag-ampo siya didto sa usa ka dapit; sa nahuman na misulti ang usà sa iyang mga tinun-an ngadto kaniya, "Ginoo, tudloi kami sa pag-ampo, sama usab nga si Juan mitudlo sa iyang mga tinun-an." Unya miingon siya kanila, "Inig-ampo ninyo, ingna niini: "Amahan, pagabalaanon ang ngalan mo; umabot ang gingharian mo; ang inadlaw namo nga kalan-on ihatag kanamo sa adlaw-adlaw; ug pasayloa kami sa among mga salâ, kay kami usab nagapasaylo sa tanan nga nakautang kanamo.

Ug ayaw kami dad-a ngadto sa pagsulay." Ug miingon siya ngadto kanila, "Pananglit usà kaninyo adunay higala ug moabòt kini sa tungang gabii ug moingon kaniya, 'Bay, pabayloa ra god ko og tulò ka buok pan, tungod kay naabtan kog higala nga gikan sa panaw ug wala akoy ikadalit kaniya. Ug kadtong didto sa sulòd moingon pagtubag,

'Ayaw na akog hasula pa!

Natrangkahan na nako ang pultahan

ug ang akong mga anak ania na sa higdaanan uban kanako. Dili na ako mahimo pang mobangon aron paghatag kanimo!' Sultihan ko kamo, bisan pa og iya kining higala dili siya mobangon unya mohatag kaniya,

apan tungod gayod sa pagkawalay-ulaw niini, mobangon na lang siya ug mohatag kaniya sa bisan unsa nga iyang gikinahanglan.

"Ug akò mismo nagaingon kaninyo, pangayô ug pagahatagan kamo; pangita ug makakaplag kamo, im panuktok ug pagaablihan kini kaninyo. Kay si bisan kinsa nga mangayô makadawat, ug ang mangita makakaplag, ug siya nga manuktok pagaablihan.

"Ug kinsa mang amahana diha kaninyo nga kon pangayoan sa anak og isda, mohatag na hinoon og bitin kaniya, imbis nga isda? O kaha kon pangayôan kini og itlog, mohatag na hinoon kini og tánga? Busa, kon kamo man gani nga mga daotan makamao mohatag og mga maayong gasa sa inyong mga anak, nan labaw pa nga mohatag ang Langitnong Amahan sa Espiritu Santo ngadto kanila nga mangayô kaniya."

Ang Ebanghelyo sa Ginoo.

PASIUNA 

HULYO 24,2022

Maayong buntag /hapon mga igsoon diha ni Kristo.

Ania na kita sa ikanapulo'g pito nga domingo sa Ordinaryong panahon. Niining domingoha usab atong gisaulog ang "Second World lDay of Grandparents and the Elderly. "Busa atong iampo ang mga Apohan ug ang mga katigulangan.

Ang unang pagbasa gikan sa basahon sa Genesis. Kini naglarawan sa panag-estorya ni Abraham ug sa Ginoo.

Ang ikaduhang pagbasa gikan sa sulat ni San Pablo ngadto sa Taga Colosas,siya miingon: "Apan karon gibanhaw na kamo sa Dios uban ni Kristo."Gipasaylo na kita sa Dios sa tanan tang mga sala."

Ug ang ebanghelyo gikan sa ebanghelyo sumala ni San Lucas. Kini nagsaysay sa pagtudlo ni Hesus sa pag-ampo ngadto sa iyang mga tinun-an.

Palihug manindog alang sa pagsugod sa Santos na Eyukaristiya.

PANGALIYA 

HULYO 24,2022

PARI: Uban sa dakong pagsalig, atong ihalad sa Amahan ang atong mga pag-ampo ug panginahanglan.Sa matag pangamuyo moingon kita:

GINOO, DUNGGA ANG AMONG PAG-AMPO.

1. Alang kang Papa Francisco,mga Obispo,mga kaparian ug mga relihiyoso lamdagan unta sila kanunay sa Espiritu Santo diha sa ilang pagsangyaw sa Maayong balita aron magiyahan nila ang katawhan sa pagsubay sa hustong dalan. Mag-ampo kita.

2. Alang sa mga lideres sa atong nasud, giyahan unta sa Espiritu ni Kristo aron diha sa ilang buhat ug pulong magpatunhay ang katarong ug kamatuoran. Mag-ampo kita.

3. Alang sa mga Apohan ug mga katigulangan hilabina kanila nga nagmasakiton ug nagmaluyahon, lig-onon ug hupayon unta sila sa Ginoo. Mag-ampo kita.

4. Alang kanila nga nagadayeg ug mipasalamat sa Ginoo,hilabina nila _________ hatagan unta sila sa Dios og dugang kadasig ug kalig-on sa pagkinabuhi diha sa katarong. Mag-ampo kita.

5. Alang sa mga kalag sa mga nangamatay hilabina sa kalag nila _________ dawaton na unta sa Dios sa iyang gingharian.. Mag-ampo kita.

PARI: Amahang Langitnon, nasayod kami nga ikaw gayod ang tinubdan sa tanang kaayo ug grasya.Nangamuyo kami, imo untang hatagan og katumanan ang among mga pag-ampo. Kini among gipangayo pinaagi ni Kristo among Ginoo, Amen.