Ikanapulog Tulo nga Domingo sa Ordinaryong Panahon

IKA-NAPULO'G TULO NGA DOMINGGO

a. UNANG BASAHON

1 Hari 19:16,19-21

Ang pagbasa gikuha gikan sa unang basahon sa Mga Hari.

Ang Ginoo miingon kang Elias, "Dihugi usab si Jehu, ang anak ni Namsi, aron mahimong hari sa Israel, ug dihugi si Eliseo, anak ni Safat, nga taga-Abelmiula aron mahimong propeta ilis kanimo."

Busa mibiya si Elias gikan didto, ug nakaplagan niya si Eliseo, ang anak ni Safat, nga nagdaro ginamit ang napulo'g duha ka baka, ug diha siya sa ika-napulo'g-duha. Miagi si Elias kaniya ug gisul-ob ni Elias ngadto kang Eliseo ang iyang kupo. Gibiyaan niya ang mga baka, ug migukod siya kang Elias ug miingon, "Pahaloka una ako sa akong amahan ug sa akong inahan, ug unya mosunod ako kanimo."

Ug si Elias miingon kang Eliseo, "Lakaw kay wala ko ikaw did-i." Ug mibalik siya ug gikuha niya ang mga baka ug giihaw ug giluto niya kini ug maoy iya kining gipakaon sa katawhan. Unya misunod siya kang Elias, ingon nga iyang katabang.

Mga igsoon, ang Pulong sa Ginoo.

b. SALMO RESPONSORYO

Salmo 16:1-2,7-8,9-10,11

Tubag (R)-Ikaw ang akong kabllin, O Ginoo. 

Bantayi ako, O Dios kay nagadangop ako kanimo; naga Ingon ako sa Ginoo, "Ikaw ang akong Ginoo. O Ginoo, ikaw ang akong bahin ug ang akong kopa, ikaw mao ang akong

suwerte. (R)

Dayegon ko ang Ginoo nga nagatambag kanako; bisan sa kagabhion nagpahimangno kanako ang akong kasingkasing. Gibutang ko ang Ginoo kanunay sa akong

atubangan; kun anaa siya sa akong tuo wala akoy kahadlokan. (R)

Busa ang akong kasingkasing nalipay ug ang akong kalag nagsadya, ang ako usab nga lawas nagapabilin diha sa pagsalig. Kay dili nimo biyaan ang akong kalag didto sa kahiladman, ni itugot mo nga ang imong buotang alagad madunot. (R)

Tudloan mo ako sa dalan ngadto sa kinabuhi, sa kapuno sa mga kasadya diha sa imong atubangan, ang mga kalipay diha sa imong tuong kamot hangtud sa kahangturan. (R)

IKADUHANG BASAHON

Galacia 5:1,13-18

Ang pagbasa gikuha gikan sa sulat ni San Pablo ngadto sa taga-Galacia

May kagawasan kita tungod kay gihatagan man kita'g kagawasan ni Kristo. Busa pabilin kamo nga dili ulipon ug ayaw kamo paulipon pag-usab.

Apan kamo, mga igsoon, gitawag aron makabaton og kagawasan. Apan ayaw himoa ang inyong kagawasan nga pasangil aron maghari kaninyo ang lawasnong pangandoy. Hinonoa, pag-alagaray kamo uban ang gugma. Kay ang tibook Balaod natingob sa usa lamang ka sugo: "Higugmaa ang imong isigkatawo sama sa imong kaugalingon." 

Apan kun kamo magpanahitay ug magtinukbanay sama sa mga mananap, pagbantay nga dili kamo mahurot pagkalaglag!

Kini ang akong isulti kaninyo: "paharia ang Espiritu sa inyong kinabuhi, ug ayaw patumani ang mga pangandoy sa tawhanong kinaiya. Kay ang mga tinguha sa tawhanong kinaiya supak sa mga tinguha sa Espiritu, ug ang mga tinguha sa Espiritu supak sa tawhanong kinaiya. Nagkasumpaki kining duha busa dili kamo makabuhat sa buot unta ninyong buhaton. Kun ang Espiritu maoy magmando kaninyo, dili na kamo ilalom sa Balaod.

Mga igsoon, ang Pulong sa Ginoo.

d. EBANGHELYO 

Lucas 9:51-62 

Ang pagsangyaw sa Maayong Balita sumala ni San Lucas.

Sa nagkaduol na ang mga adlaw nga si Jesus hapit na mokayab sa langit, mihukom siya pag-adto sa Jerusalem. Mipadala siya ug mga sinugo nga nag-una kaniya, ug nangadto sila sa usa ka balangay sa Samaria aron pag andam sa tanan alang kaniya. Apan nagdumili ang mga tawo didto sa pagdawat kaniya, kay dayag man nga nagpadulong siya sa Jerusalem. Sa pagkasayud niini sa mga tinun-an nga si Santiago ug si Juan, miingon sila, "Ginoo, buot ka ba nga mosugo kami nga mag-ulan og kalayo gikan sa langit aron malaglag sila?"

Si Jesus milingi ug gibadlong sila. Ug mipadayon sila paglakaw ngadto sa laing balangay. Samtang naglakaw sila, may usa ka tawo nga miingon kang Jesus, "Mosunod ako bisan asa ka moadto." Si Jesus miingon kaniya, "Ang mga milo may tagoanan, ug ang mga langgam may mga salag, apan walay kahigdaan ug kapahulayan ang Anak sa Tawo." Ug miingon siya sa laing tawo, "Sunod kanako." Apan miingon ang tawo, "Sir, mouli una ako aron paglubong sa akong amahan." Si Jesus mitubag, "Pasagdi ang mga patay nga maglubong sa ilang mga minatay. Apan ikaw, lakaw ug iwali ang Gingharian sa Dios."

May laing tawo usab miingon, "Mosunod ako kanimo, sir, apan tugoti una ako pagpauli aron pagpanamilit sa akong banay." Si Jesus miingon kaniya, "Kinsa gani kadtong mosugod pagdaro ug unya magpunay og lingi dili angay sa Gingharian sa Dios."

Mga igsoon, ang Maayong Balita sa atong Ginoo.

KOMENTARYO

Tema: Paghatag sa Tibuok Kaugalingon Diha sa Dios

Karong adlawa atong nadungog ug nasubay ang maanindot ug importante nga koneksyon sa mga basahon diha sa atong paghatag sa tibuok natong kaugalingon ngadto sa Dios. Ang atong mga pagbasa nagatuyok diha sa kamatuoran nga ang Dios nagtawag kanato aron mamahimo Niyang katabang sa pagmantala sa Maayong Balita. Ug sa atong kabahin kita gihagit sa pagbiya sa mga importanteng butang sa atong pagkinabuhi aron sa pagsunod sa labing halangdong tawag sa Dios.

Ang atong Ebanghelyo nag-abli kanato sa pagpamalandong nga kitang gitawag nakadawat sa dakung pribilihiyo ug gikinahanglan sa paghalad sa tibuok natong kinabuhi. Naay tulo ka tawo sa atong Ebanghelyo ang naghatag og nagkadaiyang tubag sa tawag o pagsunod kang Jesus. Ang una nag-ingon kang Jesus nga andam siya mosunod. Si Jesus sa Iyang kabahin wala naglimod sa pag-ingon sa tinuod nga kahimtang sa pagsunod Kaniya. Kini usab nagpadayag sa dakung sakripisyo nga gikinahanglan tungod kay Siya wala nagpuyo sa kahamugaway nga pagkinabuhi. Ang ikaduha, diha sa pagtawag ni Jesus mitubag nga mouli una siya sa paglubong sa iyang amahan. Kini nga kahimtang gihatagan sa dakung pagtamod diha sa kultura sa mga Hudiyo nga usa ka daku nga kahigayonan ang paglubong sa miyembro sa pamilya. Ang ikatulo, nagpakita og interes sa pagsunod ni Jesus apan naay mga kondisyunes sama nga siya makapanamilit sa iyang banay. Kining sitwasyon susama pud sa nahitabo kay Eliseo diha sa unang pagbasa apan ang kalahian kay siya gitugtan ni Elias sa pagpanguli ug paghatag pagtahud diha sa iyang pamilya. Tungod niining kalahian atong maingon nga gihatagan ni Jesus sa mas dakung bili ang atong pagsunod Kaniya kumpara diha sa atong mga personal ug nagkadaiyang mga buluhaton. Kini wala nagpakita nga walay bili ang pamilya diha ni Jesus apan nagpunting sa kamatuoran sa kadako sa responsibilidad sa misyon nga gikinahanglan sa pagtalikod ug pagbiya sa tanang butang nga makapahimulag o maglangan kanato sa pagsunod sa Dios.

Diha usab sa atong pagsunod sa lakang ni Jesus kita makasinati sa mga kasakit, pagtamastamas o dili pagdawat gikan sa mga tawo. Sama sa unang bahin sa Ebanghelyo si Jesus wala gidawat sa usa ka balangay sa Samaria nga maoy niduso kang Santiago ug Juan sa pag-ingon sa pag-ampo nga laglagon ang maong lugar. Apan gibadlong sila ni Jesus sa ilang gihunahuna. Kini nga kinaiya ni Jesus nagdala kanato sa atong ikaduhang pagbasa diha sa Sulat ni San Pablo sa mga taga-Galacia nga nag-ingon nga silang tanan mga igsoon. Mao usab ang pagsusi sa tibuok balaod nga miingon "Higugmaa ang Imong isigkatawo sama sa imong kaugalingon." Maanindot nga sumbanan sa atong pagpakiglambigit sa uban natong kaigsoonan nga bisan pa kita dili nila dawaton kita magpadayon sa paghigugma kanila aron kita magmalig-on diha sa gugma ug pagpasaylo sa atong isigkatawo.

Sa atong pagsagubang ug pagtubag sa hagit sa atong mga basahon karon kita kanunay nga gitawag aron hinumduman ang pinakaimportante nga bahandi niining kalibutan nga mao ang kanunay ug walay puas nga paghigugma o paggiya kanatong tanan sa Espiritu Santo. Kita gitawag dili lamang aron sa pagsunod kang Jesus kun dili aron sa paghalad nato sa atong tibuok nga kaugalingon diha Kaniya. Susama sa tawo nga nagadaro nga wala nagsige og lingi sa iyang gibiyaan aron matarong ang iyahang pagdaro, kita usab gipahinumduman nga sa atong panaw sa pagsunod sa Ginoo kita kinahanglan sa pagsentro sa atong pagkinabuhi ug pagpuyo niining kalibutana diha sa himaya nga pagadad-on ni Jesus kanato.

Giya alang sa Pamalandong:

1. Matinud-anon ba ako sa akong pagkasumusunod ni Kristo, diha sa akong paghigugma sa akong isigkatawo? 

2. Malipayon ba ako sa paghimo sa mga buhat sa kaluoy ngadto sa mga nanginahanglan; mga gigutom, masakiton ug mga biktima sa mga kalamidad?

PANGALIYA

Pangulo: Sa atong pagpaningkamot nga makasunod ni Jesukristo sa dalan sa gugma ug kahiusahan, atong ihalad ug isalig sa atong Makagagahum nga Amahan ang atong mga pag-ampo. Sa matag pangamuyo kita moingon: DIOS NGA MALOLOY-ON, DUNGGA

1. Alang sa kinatibuk-ang Simbahan ilabina sa nagdumala niini ang Santo Papa, mga Obispo ug kaparian nga madasigon sila sa kanunay sa paghatag og dakung bili sa mga butang espirituhanon kay sa mga  butang kalibutanon. Mag-ampo kita.

2. Alang sa mga naghupot og katungdanan sa panggamhanan nga giyahan sila sa Espiritu Santo sa pag-apud-apod sa mga panalangin nga gipiyal sa Dios kanila ngadto sa atong mga kaigsoonan nga labi pang nanginahanglan. Mag-ampo kita.

3. Alang sa matag Kristohanong katilingban, nga pinaagi sa mga mensahe nga nadungog makasinati og kabag-ohan aron makab-ot ang gipangandoy nga kahiusahan. Mag ampo kita.

4. Alang sa mga kabus natong mga igsoon ug mga nagmasakiton nga makabaton sila og kahupayan sa giantus nilang kalisdanan pinaagi sa pagpakabana ug panabang sa uban. Mag-ampo kita.

5. Alang kanatong tanan, nga motuhop sa atong kasingkasing ang mga mensahe nga atong nadungog aron makabaton kita og kabag-ohan sa atong kaugalingon. Mag ampo kita.

6. Alang sa atong kaugalingon nga katuyuan, ato kining ihalad sa Dios diha sa kahilum.

Pangulo: Makagagahum nga Dios, wala malilong Kanimo ang among mga panginahanglan, busa nangahas kami paghalad uban sa dakung pagsalig nga hatagan Nimo og katumanan alang sa among kabulahanan pinaagi ni Kristo among Ginoo hangtud sa kahangturan. Amen.