Dominggo Sa Adlaw Sa Pentekostes

a. UNANG BASAHON

Buhat 2:1-11

Ang pagbasa gikuha gikan sa basahon sa Buhat sa mga Apostoles.

Sa pag-abot na sa adlaw sa Pentekostes, ang tanang magtotoo nagtigom sa usa ka dapit. Ug sa kalit may dahunog gikan sa langit, sama sa kusog nga huros sa hangin, ug milukop kini sa tibuok balay nga ilang gitigoman. Unya nakakita sila'g daw mga dila nga kalayo nga nanugdon diha sa matag usa kanila. Silang tanan napuno sa Espiritu Santo ug misulti sa nagkalainlaing pinulungan sumala sa gipasulti kanila sa Espiritu.

Sa Jerusalem may mga Judeo nga relihiyoso kaayo nga gikan sa nagkalainlaing nasud sa kalibutan. Sa pagkadungog sa mga tawo sa kabanha, nanugok sila ug hilabihan nilang katingala kay ang tagsatagsa ka magtotoo nagsulti man sa tagsatagsa ka pinulungan sa mga namati. Busa sa dakung katingala miingon sila, "Dili ba taga Galilea man kining mga tawhana? Nganong nakasulti man sila sa atong tagsatagsa ka pinulungan? Dinhi kanato may taga-Partia, Media, Elam, Mesopotamia, Judea, Capadocia, Ponto, Asia, Frigia, Panfilia, Ehipto, ug sa mga dapit sa Libya duol sa Cirene; ang uban kanato taga-Roma nga mga Judeo ug dili Judeo nga nakabig sa tinuohan sa mga Judeo; ug may pipila pa kanato nga taga-Creta ug Arabia -apan bisan pa niini, kitang tanan nakadungog kanila nga nagsulti sa atong tagsatagsa ka pinulungan mahitungod sa katingalahang butang nga gibuhat sa Dios."

Mga igsoon, ang Pulong sa Ginoo.

b. SALMO RESPONSORYO

Salmo 104:1,24,29-30,31,34

Tubag (R)-Ginoo, ipadala ang imong Espiritu, ug bag-oha ang nawong sa yuta.

Dayga ang Ginoo, kalag ko! O Ginoo, akong Dios, daku gayud ikaw! Gisul-oban ikaw sa kahalangdon ug himaya, gibistihan diha sa kahayag ingon og usa ka kapa. (R)

Pagkadaghan sa imong mga buhat, O Ginoo! Diha sa kaalam gibuhat mo silang tanan, puno ang yuta sa imong

mga binuhat; Dayga ang Ginoo, O kalag ko! (R)

Ang tanang mga binuhat nagapaabot kanimo nga imo silang hatagan og pagkaon sa igong panahon. Sa imong paghatag kanila niini, nagatigom sila; sa imong pagbukhad sa imong kamot, nabuhong sila sa mga maayong butang. (R)

Kun imong kuhaon ang ilang gininhawa, mangamatay sila ug mobalik ngadto sa abog. Sa imong pagpadala sa imong Espiritu, magama sila, ug mabag-o nimo ang nawong sa yuta. (R)

c. IKADUHANG BASAHON

1 Corinto 12:3-7,12-13

Ang pagbasa gikuha gikan sa unang sulat ni San Pablo ngadto sa mga taga-Corinto.

Walay makasulti nga si Jesus mao ang Ginoo, gawas kun mandoan siya sa Espiritu Santo.

May mga nagkalainlaing hiyas nga espirituhanon, apan mao rang espirituha ang naghatag niini. May nagkalainlaing paagi sa pag-alagad, apan mao rang Ginooha ang gialagaran. May nagkalainlaing katakus sa pag-alagad, apan usa ra ka Dios ang naghatag og katakus sa tagsatagsa alang sa tanang pag-alagad. Ang matag usa gihatagan og pipila ka ilhanan sa presensiya sa Espiritu alang sa kaayohan sa tanan.

Kay si Kristo sama sa usa ka lawas nga may daghang bahin apan usa ra ka lawas bisan kun nagkalainlain ang mga bahin niini. Sa samang pagkaagi, kitang tanan, mga Judeo ug dili mga Judeo, mga ulipon ug dili ulipon, gibunyagan diha sa usa ra ka lawas, pinaagi sa mao gihapong Espiritu, ug gipainom kitang tanan sa usa ka Espiritu.

Mga igsoon, ang Pulong sa Ginoo.

d. SEKWENSIYA

Umari ka, O Espiritu Santo, ug ibanwag ang langitnong silaw sa imong kahayag. Amahan sa mga kabus, tighatag sa mga gasa, sa mga kasingkasing masiga nga kahayag. Ikaw mao ang maglilipay nga labing hingpit, sa kalag kalan-ong tam-is. Binating dinapit pahuluyanan ka dinhi sa tanang kahago. Sa kainit tigbugnaw, sa kagul-anan tiglipay.

O bulahang kahayag, pun-a ang kasingkasing sa imong katawhan nga nagatoo kanimo. Kun ang tawo wala sa imong grasya, kawad-an siya'g kaputli, mawala siyay bili. Hugasi ang mahugaw, ug ang mamala bisbisi, ug unya ang tanang nasamdan tambali. Ang nahisalaag tultoli, ang gahi humoka, ug ang nagmabugnawon nga kalag inita.

Ihatag sa nagatoo kanimo ang pito ka gasa nga sagrado. Gantihi sila tungod sa mga buhat nga maayo. Hatagi sila sa kamatayon aron masiguro ang ilang kaluwasan. Igasa kanila ang langitnong kabulahanan nga nagalungtad hangtud gayud sa kahangturan. Amen. Alleluya.

e. EBANGHELYO

Juan 20:19-23

Ang pagsangyaw sa Maayong Balita sumala ni San Juan.

Sa pagkagabii na niadtong Dominggoha, nagtigom ang mga tinun-an didto sa lawak ug gitrangkahan nila ang pultahan kay nahadlok man sila sa mga kadagkoan sa mga Judeo. Unya mitungha si Jesus sa ilang taliwala ug miingon, "Mainyo unta ang kalinaw." Human siya makasulti niini, gipakita niya kanila ang iyang mga kamot ug ang iyang kilid. Nalipay pag-ayo ang mga tinun-an sa ilang pagkakita kang Jesus. Unya si Jesus miingon kanila pag-usab. "Mainyo unta ang kalinaw. Ingon nga ako gipadala sa Amahan, ako usab magpadala kaninyo." Gisulti niya kini kanila ug unya gihuypan niya sila ug giingnan, "Dawata ninyo ang Espiritu Santo. Kun pasayloon ninyo ang mga sala sa mga tawo, gipasaylo kini; kun ang ilang mga sala dili ninyo pasayloon, dili usab kini pasayloon."

Mga igsoon, ang Maayong Balita sa atong Ginoo.

KOMENTARYO

Tema: Ang Espiritu Santo Maghahatag sa Gasa sa Kahiusahan ug Kalinaw.

Ang Unang Pagbasa gikan sa Mga Buhat sa mga Apostoles 2: 1-11, naghulagway sa adlaw sa Pentekostes; "ang tanang magtutuo nagkatigum sa usa ka dapit. Ug sa kalit may dahunog gikan sa langit, sama sa kusog nga huros sa hangin ug milukop kini sa tibuok balay nga ilang gitiguman" (Buhat 2: 1-2). Natuman na gayud ang saad ni Jesus human Siya gibayaw ngadto sa langit; Matud pa sa usa ka komentaryo, pinaagi sa pagbalik ni Jesus ngadto sa Iyang Amahan, Siya makadawat sa Espiritu nga maoy Iyang ihatag sa mga apostoles aron sila makadawat og gahom ug mamahimong mga saksi Niya ngadto sa tibuok kalibutan. Mao kini ang higayon diin mikunsad ang Espiritu Santo ngadto sa mga apostoles: "Unya nakakita sila og daw mga dila nga kalayo nga nanugdon diha sa matag usa kanila" (Buhat 2:3). Busa ang mga apostoles napuno sa kaisog ug dihadiha misulti sa "nagkalainlaing pinulongan sumala sa gipasulti kanila sa Espiritu" (Buhat 2:4).

Ang ikaduhang pagbasa gikan sa 1 Corinto 12: 3-7, 12-13, kini naghisgot mahitungod sa mga hiyas o gasa gikan sa Espiritu Santo nga gitagana ngadto sa mga sumusunod ni Kristo. Kining maong Espiritu Santo makasulti nga si Jesus mao ang Ginoo. Ang Espiritu Santo usab ang naghatag sa kahiusahan. Ang mga hiyas o gasa alang kini sa pag-alagad. Ang tanan gitugyanan og pipila ka gasa alang sa kaayohan sa tanan.

Sa Ebanghelyo, gisaysay ni San Juan ang pagpakita ni Jesus ngadto sa Iyang mga apostoles. Gabii sa Dominggo kini ug napulo sa napulog duha ang nagkapundok "Pagkagabii nianang adlawa, ang unang adlaw sa semana, samtang gitrangkahan ang mga pultahan diin nahimutang ang mga tinun-an tungod sa kahadlok sa mga Hudeyo, miabot si Jesus ug mibarog sa taliwala ug miingon kanila, 'Ang kalinaw maanaa kaninyo' (Juan 20:19). Pagsulti Niya og "kalinaw" isip pagpangumusta ni Jesus ngadto sa Iyang mga tinun-an, Iyang gipakita ang Iyang mga samad sa kamot ug kilid. Tungod niini nagmaya ang Iyang mga apostoles. Human si Jesus misulti sa Iyang ikaduhang pagpangumusta, Iyang gihuypan ang lyang mga apostoles ug Siya miingon, "Dawata ninyo ang Espiritu Santo. Kang bisan kinsang mga sala nga inyong pasayloon, kini gipasaylo; kang bisan kinsang mga sala nga dili ninyo pasayloon, kini dili pasayloon" (Juan 20: 22-23). Mao kini Pentekostes sumala ni San Juan. Gibaliklantaw niini ang paghuyop sa Ginoo sa gihulma nga lapok nga mao ang unang tawo diha sa pagmugna niini (Gen 2:7; Ezeq. 37). Kini ang bag-ong pagmugna pinaagi sa paghuyop sa Espiritu sa nabanhaw nga Kristo.

Sa atong panahon karon adunay daghang kagubot, panagbingkil, ug walay kahiusahan. Kasagaran ang tanan nakatutok lamang sa kaugalingon nga kaayohan ug wala nay pagtagad sa uban. Luyo niining mga kagubot, panagbingkil ug walay kahiusahan, aduna pa bay paglaum nga masinati nato ang kalinaw? Kini ang usa ka dakung hagit kanatong tanan!

Sa ginagmay nga pamaagi aduna kitay mahimo aron nga ang kalinaw ug kahiusahan nga atong gimithi ato kining matagamtaman dinhi sa atong inadlaw-adlaw nga kinabuhi. Diha sa paggahin sa atong kaugalingon ngadto sa uban mamahimo kita nga instrumento sa paglambo sa uban. Kay diha sa paglambo sa uban, kalinaw ug kahiusahan atong masinati. Sa yano nga pamaagi aduna kitay mahimo; sama na lamang sa pagpaambit sa mga gasa o hiyas nga anaa sa matag usa kanato ngadto sa uban. Dili unta kini mamahimong pagpasigarbo sa uban ang mga gasa nga anaa kanato apan mamahimo kining instrumento aron madasig ang uban sa pagkinabuhing Kristohanon. Ang mga hiyas o gasa sa Espiritu dili unta mamahimong babag sa uban diha sa pagtubo sa Kristohanong pagtoo. Diha sa pagpaambit sa atong mga gasa, kita makahatag ug serbisyo inubanan sa gugma sa atong isigkatawo. Kining mga gasa usab, labaw sa tanan, makahatag og dugang dungog ug himaya sa atong Ginoo.

Giya alang sa Pamalandong:

1. Diha sa akong pagkinabuhi isip usa ka Kristiyano, sa unsang paagiha ako mamahimong instrumento alang sa kalamboan sa uban?

2. Nahimo ba nako ang tanan aron sa pagkab-ot sa kahiusahan ug kalinaw alang sa tanan?

PANGALIYA

Tema:

"Ang Espiritu Santo Maghahatag sa Gasa sa Kahiusahan ug Kalinaw."

Pangulo:

Mag-ampo kita sa Dios Amahan nga nagpadala sa Balaang Espiritu sa tibuok kalibutan nga maoy magdan-ag sa tanang katawhan. Busa sa dakung pagsalig ug kahinangop atong ihalad karon ang atong mga panginahanglan. Sa matag pag-ampo motubag kita: GINOO SA GUGMA DUNGGA KAMI.

1. Alang sa tanang nagdumala sa Simbahan nga magmakugihon silang mopalambo sa gasa sa kaalam ug katakus sa pagdumala sa katawhan nga gisalig kanila sa Amahan. Mag-ampo kita.

2. Alang sa tanang nagdumala sa atong nasud nga malamdagan sila sa Balaang Espiritu nga hatagan nila og dakung gimbug-aton ang panginahanglan sa bagang hut-ong sa katawhan. Mag-ampo kita.

3. Alang sa tanang masakiton ug mga nag antus sa mga nagkalainlaing suliran sa kinabuhi nga magmalaumon sila sa grasya ug panabang sa Dios kinsa maoy tinubdan sa kahupayan. Mag-ampo kita.

4. Alang sa atong Kristohanong katilingban nga lamdagan kita sa Balaang Espiritu aron maghari ang kahiusahan ug pagtinabangay alang sa kalamboan ug katukuran sa Iyang gingharian. Mag-ampo kita.

5. Alang sa mga kabatan-onan nga mabag-o nila ang dagway sa kalibutan pinaagi sa atong matinud-anon nga pagsunod sa kabubut-on sa Dios ug diha sa pagpaambit sa mga gasa nga gipadayag kanila. Mag ampo kita.

6. Alang sa atong kaugalingong katuyuan ato kining i-ampo sa hilum.

Pangulo: 

Amahan nasayod kami nga kon wala Ikaw wala kami mahimo. Lamdagi kami sa Imong Balaang Espiritu Santo aron sa kanunay mahingpit ang among pagtoo ug pagsalig Kanimo kinsa maoy tinubdan sa tanang grasya. Kini among gipangayo pinaagi ni Kristo among Ginoo hangtud sa kahangturan. Amen.