Ikapito nga adlaw sa Misa de Gallo

Ikaupat Nga Domingo Sa Adbiyento

Disyembre 22

PASIUNA

December 22, 2024

Maayong buntag mga igsoon ko diha ni Cristo!

Ania na kita sa Ika-upat nga Domingo sa Adbiyento ug sa Ika-pito nga adlaw sa Misa de Gallo.

Ang unang pagbasa gikuha gikan sa Basahon ni Propeta Miqueas. Dinhi iyang gisaysay nga miingon ang Ginoo, "Apan, ikaw, O Bethlehem Efrata, anha maggikan kanimo ang usa ka hari sa Israel."

Ang ikaduhang pagbasa gikuha gikan sa Sulat ngadto sa mga Hebreo. Dinhi atong madungog si Cristo nga miingon, "Ania ako, O Dios, aron pagtuman sa buot mong ipabuhat kanako."

Ang ebanghelyo gikuha gikan sa Ebanghelyo sumala ni San Lucas. Kini nagsaysay sa pagbisita ni Birhen Maria sa iyang paryente nga si Santa Isabel.

Uban sa malipayong kasingkasing, manindog kita alang sa pagsugod sa Santos nga Eyukaristiya.

Salmo Responsoryo:

Ginoo, pabalika kami kanimo, pakitaa kami sa imong nawong ug maluwas kami.

Katilingbanong Pag-ampo:

Amahan, patalinghugi kami. 

BASAHON I

Mi. 5:1-4

KINUTLO GIKAN SA BASAHON NI PROPETA MIQUEAS

Katawhan sa Jerusalem, panagan kamo kay misulong na ang mga kaaway.

Giataki na nila ang mga pangulo sa Israel. Miingon ang GINOO, "Apan ikaw, O Betlehem-Efrata, bisag ikaw ang labing gamay nga lungsod sa Juda, anha maggikan kanimo ang usa ka hari sa Israel kansang kagikan sukad pa gayod sa kakaraanan."

Busa itugyan sa GINOO ang iyang katawhan sa ilang mga kaaway hangtod nga manganak na ang babayeng nagbati; unya ang tanan niyang kadugo nga gipamihag mamauli na sa ilang nasod.

Inig-abot niya, harian niya ang iyang katawhan sa gahom nga gikan sa GINΟΟ ug sa kahalangdon nga gikan gayod sa GINOONG DIOS.

Magpuyo nga layo sa kadaot ang iyang katawhan, kay ang katawhan sa tibuok kalibutan moila man sa iyang pagkagamhanan, ug magdala siyag kalinaw.

ANG PULONG SA GINOO.

SALMO RESPONSORYO

Ps. 80:2-3, 15-16, 18-19

R. Ginoo, pabalika kami kanimo, pakitaa kami sa imong nawong ug maluwas kami.

O magbalantay sa Israel, pamati, gikan sa imong trono diha sa kerubin, padan-ag.

Dasiga ang imong gahom, ug umari ka aron pagluwas kanamo.

R. Ginoo, pabalika kami kanin., pakitaa kami sa imong nawong ug maluwas kami.

O Ginoo sa kagahuman, dung-awa kami pag-usab gikan sa langit, ug tan-awa kami;

Atimana pag-ayo kining parasan, ug bantayi ang gitanom sa imong kamut nga tuo (Ang anak sa tawo nga imong gihimong makusganon).

R. Ginoo, pabalika kami kanimo, pakitaa kami sa imong nawong ug maluwas kami.

Matabangan unta nimo ang tawo sa imong tuong kamut, pinaagi sa anak sa tawo nga imong gihimong makusganon.

Unya dili na kami mopahilayo kanimo; tagai kamig bag-ong kinabuhi ug sangpiton namo ang imong ngalan.

R. Ginoo, pabalika kami kanimo, pakitaa kami sa imong nawong ug maluwas kami.

BASAHON II

Heb. 10:5-10

KINUTLO GIKAN SA SULAT NGADTO SA MGA HEBREO

Tungod niini, sa dayon nang anhi ni Cristo sa kalibutan, miingon siya sa Dios, "Dili ka buot sa sakripisyo ug mga halad nga mananap, Apan giandam mo ako ug usa ka lawas.

Wala ka mahimuot sa halad nga mga mananap nga gisunog didto sa halaran,

O sa mga sakripisyo sa pagwagtang sa mga sala.

Unya miingon ako, 'Ania ako, O Dios,

Aron pagtuman sa buot mong ipabuhat kanako- Sumala sa nahisulat bahin kanako diha sa libro sa Balaod."

Una sa tanan miingon siya, "Dili ka buot ni mahimuot sa mga sakripisyo ug mga halad nga mananap, o sa mga halad nga mananap nga sunugon didto sa halaran ug sa mga sakripisyo sa pag-wagtang sa mga sala." Gisulti kini niya bisan kon kining tanang mga sakripisyo gihalad subay sa Balaod. Unya miingon siya, "Ania ako, O Dios, aron pagtuman sa buot mong ipabuhat kanako". Busa gisalikway sa Dios ang tanang karaang mga sakripisyo ug giilisan kini sa sakripisyo ni Cristo. Tungod kay gituman ni Jesucristo ang buot ipabuhat sa Dios kaniya, nahinloan kitang tanan sa sala pinaagi sa paghalad sa iyang kaugalingong lawas, sa makausa lamang ug alang sa tanan.

ANG PULONG SA GINOO.

EBANGHELYO

Lk. 1:39-45

Kinutlo gikan sa Ebanghelyo sumala ni Lucas

Ugmitindog si Maria, ug miadto nga nagdalidali niadtong mga adlawa, ngadto sa kabungtoran, didto sa usa ka lungsod sa Judea. Ug misulod siya sa balay ni Zacarias ug nangumusta kang Isabel.

Ug sa pagkadungog ni Isabel sa pangumusta ni Maria, miulpot ang bata sulòd sa iyang sabakan, ug napuno sa Espiritu Santo si Isabel. Ug misinggit siya sa makusog nga siyagit,

"Labing bulahan ka sa mga kababayenhan ug bulahan ang bunga sa imong sabakan. Ug ngano nga nahitabo man kini kanako nga ang inahan sa akong Ginoo miari kanako? Tan-awa, tungòd kay sa diha nga miabòt ang tingog sa imong pangumusta ngari sa akong mga dalunggan, miulpot sa kasadya ang bata nga ania sa akong sabakan. Bulahan, O ikaw nga mitúo nga adunay katumanan ang mga gipamulong nganha kanimo gikan sa Ginoo."

Ang Ebanghelyo sa Ginoo.

KATILINGBANONG PAG-AMPO

December 22, 2024

Pari: Nagasunod sa panag-ingnan ni Maria, atong daygon ug pasalamatan ang Dios Amahan nga sa kabuhong sa iyang pagkamanggihatagon mihatag kanato sa iyang Bugtong Anak, atong Manluluwas ug Manunubos. Sa matag pangamuyo, kita moingon:

AMAHAN, PATALINGHUGI KAMI.

1. Nga ang Santo Papa, kaobispohan, kaparian ug ang tanang lumilihok sa Simbahan, mabulahan diha sa ilang pagtuo, paglaum ug pagsalig sa grasya sa Dios. Mag-ampo kita sa Ginoo.

2. Nga ang tanang lideres sa atong nasud, makabaton unta sila og kasingkasing nga maalamon alang sa kaayohan ug pagpalambo sa katilingban. Mag-ampo kita sa Ginoo.

3. Nga pinaagi sa pangama ni Maria, ang mga kabus ug dinaugdaug, mga tigulang, ug himalatyon, mamahimong gawasnon gikan sa ilang kahimtang. Mag-ampo kita sa Ginoo.

4. Nga ang mabdos nga mga inahan, pinaagi sa pangaliya sa Mahal nato nga inahan, Birhen Maria ug sa iyang paryinte nga si Santa Isabel, makasinati og kalipay, gugma, ug kusog samtang nangandam sila sa pag-abot sa bag-ong kinabuhi. Mag-ampo kita sa Ginoo. 

5. Nga ang mga nagadayeg ug nagapasalamat sa Dios, ilabina nila_______ makabaton og malipayong kasingkasing diha sa ilang pagpaambit sa grasya nga nadawat ngadto sa uban. Mag-ampo kita sa Ginoo.

6. Nga ang atong mga minahal sa kinabuhi nga nahikatulog na sa dayon ilabina sila ______, makadawat na sa kalipayng tunhay didto sa langit. Mag-ampo kita sa Ginoo.

Pari: Langitnong Amahan, sa pagduyog sa awit ni Maria, hatagi kamig igong grasya nga mahuptan namo ang iyang mga hiyas. Ibubo kanamo ang grasya aron kami sa kanunay makabaton sa kasingkasing nga puno sa pagdayeg ug pagpasalamat sa tanang butang nga Imong gigasa kanamo. Kini among gipangayo pinaagi ni Cristo among Ginoo. Amen.