IKA-SIYAM ADLAW SA MISA DE GALLO

IKA-SIYAM ADLAW SA MISA DE GALLO

Disyembre 24, 2024

PASIUNA

December 24, 2024

Maayong buntag mga igsoon ko diha ni Cristo!

Karon Martes sa ika-upat nga semana sa Adbiyento ug ania na kita sa ika-siyam ug katapusang adlaw sa Misa de Gallo sa atong malaumon ug malipayong pagtukaw alang sa Pasko sa Pagkatawo sa atong Manunubos.

Ang unang pagbasa gikuha gikan sa Ikaduhang Basahon ni Samuel. Dinhi atong madungog ang mensahe ni Propeta Natan kang David.

Ang ebanghelyo gikuha gikan sa Ebanghelyo sumala ni San Lucas. Dinhi atong madungog ang awit sa pagdayeg ni Zacarias ngadto sa Dios.

Puno sa kalipay, manindog kita alang sa pagsugod sa Santos nga Eyukaristiya.

Salmo Responsoryo:

Awitan ko kanunay ang kaayo sa Ginoo.

Katilingbanong Pag-ampo:

Ginoo nga Labing Halangdon, dungga kami.

BASAHON I

2 Sm. 7:1-5, 8b-12, 14a, 16

KINUTLO GIKAN SA IKADUHANG BASAHON NI SAMUEL

Unya sa diha nga nakasukad na si David sa iyang pagkahari ug wala na siya ipasamok sa GINOO sa iyang mga kaaway nga naglibot kaniya, giingnan niya si Natan, ang propeta, "Nakita mo karon nga nagpuyo ako sa palasyo nga sidro, apan anaa ta ibutang ang Sudlanan sa Kasabutan sa Dios sa usa ka tolda!"

Ug miingon si Natan kang David, "Lakaw, buhata ang imong gitinguha, kay mag-uban kanimo ang GINOO." Apan niadtong gabhiona gisultihan si Natan sa GINOO, "Ingna ang akong alagad nga si David, Kini ang gisulti sa GINOO: Buhatan ba ako nimog balay nga akong kapuy-an?"

"Busa karon sultihi ang akong sulu-goon nga si David, 'Kini ang giingon sa GINOO nga Labing Gamhanan: Gikuha ko ikaw sa pasibsibanan, gikan sa imong pagkamagbalantay sa karnero, aron paghimo kanimong hari sa akong katawhan, ang mga Israelita. Nag-uban ako kanimo sa tanang dapit nga imong giadtoan, ug gibuntog ko ang tanan mong kaaway; ug himoon kong bantogan ang imong ngalan, ingon sa mga ngalan sa mga bantogang tawo sa kalibutan. Hatagan kog luna ang akong katawhan, ang mga Israelita, ug papuy-on ko sila didto aron makabaton silag ilang kau- galingong yuta. Dili na sila samokon sa mga tawong mapintas ingon kaniadto, sukad sa panahon nga nagtudlo akog mga maghuhukom alang sa akong katawhan, ug dili ko na ikaw ipasamok sa tanan mong mga kaaway. Dugang pa niana, ako nag-ingon nga hatagan ko ikawg mga kaliwat. Ug inigkamatay mo, ilubong ka tupad sa imong mga katigulangan ug himoon kong hari ang usa sa imong mga anak ug lig-onon ko ang iyang ging- harian. Ako maiyang amahan, ug siya maakong anak. Kon makasala siya, kastigohon ko siya ingon sa buhaton sa usa ka amahan ngadto sa iyang anak. Ug palungtaron ko ang imong banay ug gingharian hangtod sa hangtod."

ANG PULONG SA GINOO.

SALMO RESPONSORYO

Ps. 89:2-3, 4-5, 27, 29

R. Awiton ko kanunay ang kaayo sa Ginoo.

Ang mga kaayohan sa Ginoo akong awitan sa gihapon; latas sa tanang kaliwatan magsangyaw ang akong baba sa imong kamakanunayon.

Kay nag-ingon ka, "Ang akong kaluoy nagabarog sa kahangturan"; sa langit imong gilig-on ang imong kamatinud-anon.

R. Awiton ko kanunay ang kaayo sa Ginoo.

"Naghimo akog kasabutan uban sa akong pinili, nanumpa ako kang David akong sulugoon;

Hangtod sa kahangturan lig-onon ko ang imong kaliwat, ug pabarugon ko ang imong trono sa tanang kaliwatan."

R. Awiton ko kanunay ang kaayo sa Ginoo.

Miingon siya kanako, "Ikaw ang akong Amahan, akong Dios, akong bato, akong Manluluwas."

Hangtod sa kahangturan patunayon ko ang akong kaluoy alang kanimo, ug ang akong kasabutan uban kanimo nagabarog nga malig-on.

R. Awiton ko kanunay ang kaayo sa Ginoo.

EBANGHELYO 

Lk. 1:67-79

Kinutlo gikan sa Ebanghelyo sumala ni Lucas

Ug si Zacarias, ang iyang amahan, napuno sa Espiritu Santo ug nanagna nga nag-ingon: "Daygon ang Ginoo, ang Dios sa Israel, kay giduaw ug gitubos niya ang iyang katawhan.

"Gibayaw niya alang kanato ang usà ka makagagahom nga manluluwas diha sa balay ni David nga iyang sulugoon, sama sa iyang gipamulong pinaagi sa iyang mga balaang propeta gikan pa sa karaang panahon:

"Kaluwasan gikan sa atong mga kaaway, ug gikan sa mga kamot sa tanan nga nasilag kanato, aron pagpakitâ og kaluoy alang sa atong katigulangan ug paghinumdom sa iyang balaan nga kasabótan,

"Ang panumpa nga iyang gipasalig ngadto kang Abraham nga atong amahan, aron tugotan kità, nga naluwas na gikan sa kamot sa mga kaaway, nga makaalagad kaniya sa walay kahadlok, diha sa pagkabalaan ug pagkamatarong atubangan kaniya sa tanan nato nga mga adlaw.

"Ug ikaw, anak, pagatawgon nga propeta sa Labing Halangdon tungòd kay mag-una ka atubangan sa Ginoo aron pag-andam sa iyang mga dalan, aron pagpahibalo sa iyang katawhan sa kaluwasan pinaagi sa kapasayloan sa ilang mga salâ, pinaagi sa malumo nga kaluoy sa atong Dios, moduaw kanato ang banagbanag nga mosubang gikan sa Kahitas-an,

"Aron pagdan-ag kanila nga naglingkod sa kangitngit ug sa landong sa kamatayon, aron pagtultol sa atong mga tiil diha sa dalan sa kadait."

Ang Ebanghelyo sa Ginoo.

KATILINGBANONG PAG-AMPO

December 24, 2024

Pari: Si Zacarias nagpasalamat sa Dios tungod sa pagkamatinud-anon sa Dios, ato karong ihalad Kaniya ang atong mga panginahanglan. Busa sa matag pangamuyo, moingon kita:

DIOS NGA LABING HALANGDON, DUNGGA KAMI.

1. Alang sa nagdumala sa Simbahan ilabina si Santo Papa Francisco, kaobispohan ug kaparian, mamahimo unta silang maayong sumbanan sa pagpadayag sa kapasayloan sa Dios ngadto sa katawhan. Mag-ampo kita sa Ginoo.

2. Alang sa atong panggamhanan, nasyonal ug lokal, nga sila makabaton og maalagarong kasingkasing ug motahan sa ilang kaugalingon alang sa kaayohan sa tanang katawhan. Mag-ampo kita sa Ginoo.

3. Alang sa tanang mga anak, panalanginan unta sila sa Dios og kasingkasing nga mapasalamaton ngadto sa ilang mga ginikanan. Mag-ampo kita sa Ginoo.

4. Alang sa mga tigulang, nagmasakiton ug himalatyon, hupayon unta sa Dios ang ilang mga balatian ug hatagan unta sila sa Dios og paglaum. Mag-ampo kita sa Ginoo,

5. Alang sa mga nagadayeg ug nagapasalamat sa Dios, ilabina nila ______, makabaton unta sila og katagbawan sa grasya nga gibubo kanila sa Dios. Mag-ampo kita sa Ginoo.

6. Alang sa atong mga kaigsuonan nga nahiuna na kanato ilabina sila ______, nga unta sila makaambit na sa kinabuhing tunhay kauban ang atong Ginoo didto sa gingharian sa langit. Mag-ampo kita sa Ginoo.

Pari: Maluluy-on ug mahigugmaong Ginoo, tabangi kami nga malig-on ug makasantos sa mga kalisod. Dili unta kami mawad-an sa paglaum sa imong saad. Itugot kini pinaagi ni Cristo among Ginoo. Amen.