ΙΚΑ-ΚΑTLOA'G-DUHA NGA DOMINGGO

 ΙΚΑ-ΚΑTLOA'G-DUHA NGA DOMINGGO

A. Unang Basahon

1 Hari 17:10-16

Ang pagbasa gikuha gikan sa unang basahon sa Mga Hari.

Si Elias nga Propeta sa Sarefta, ug sa pag-abot niya sa ganghaan sa siyudad, may usa ka biyuda nga nangahoy; ug gitawag niya ang biyuda ug giingnan, "Palihog dad-i ako'g gamay'ng tubig aron makainom ako." Samtang nagkuha siya sa tubig gitawag na usab niya ang babaye ug giingnan, "Hatagi usab ako'g gamay'ng pan."

Ug miingon ang biyuda, "Saksi ang Ginoo nga imong Dios nga wala ako makaluto og pan. Aduna lamang akoy usa ka kumkom nga harina ug diyotay nga lana sa olibo. Nangahoy ako aron lutoon ko kini alang kanako ug sa akong anak aron makakaon kami sa dili pa kami mamatay."

Ug miingon kaniya si Elias, "Ayaw kabalaka; buhata ang giingon mo, apan himo-i una ako'g gamay nga torta ug dad-a nganhi kanako, ug pagkahuman paghimo usab alang kanimo ug sa imong anak. Kay nag-ingon ang Ginoo, ang Dios sa Israel, 'Dili mahurot ang imong harina ingon man ang imong lana hangtud nga magpadala'g ulan ang Ginoo dinhi sa yuta."

Milakaw ang biyuda ug gihimo niya ang giingon ni Elias, ug wala siya kahutdi og kalan-on sulod sa daghang mga adlaw. Wala mahurot ang iyang harina ug ang lana, sumala sa gisulti sa Ginoo pinaagi kang Elias.

Mga igsoon, ang Pulong sa Ginoo.

B. Salmo Responsoryo

Salmo 146:7,8-8,9-10

Tubag (R) Dayega ang Ginoo, kalag ko.

Ang Ginoo matinud-anon hangtud sa kahangturan, nagapadangat sa katarong alang sa gidaugdaug, nagahatag og pagkaon sa gigutom. Ang Ginoo nagaluwas sa mga bihag. (R)

Ang Ginoo nagahatag og pagtan-aw sa buta, ang Ginoo nagabangon kanila nga alukapa; Ang Ginoo nahigugma sa matarong. Ang Ginoo nanalipod sa mga langyaw. (R)

C. Ikaduhang Basahon

Hebreo 9:24-28

Ang pagbasa gikuha gikan sa sulat ngadto sa mga Hebreo.

Wala mosulod si Kristo sa balaang dapit nga hinimo sa mga tawo nga gisundog lamang sa matuod nga balaang dapit. Misulod siya sa langit, diin nangatubang siya karon sa Dios alang ug tungod kanato. Ang Pangulong Pari sa mga Judio mosulod ngadto sa Balaang Dapit matag tuig dala ang dugo sa usa ka mananap. Apan wala mosulod si Kristo aron paghalad sa iyang kaugalingon sa makadaghan; kay mag-antos unta siya sa makadaghan sukad pa sa pagbuhat sa kalibutan. Hinonoa, nagpakita siya karon sa makausa ug alang sa tanan sa naghinapos na ang tanang panahon, aron pagwagtang sa sala pinaagi sa paghalad sa iyang kaugalingon. Kinahanglan mamatay ang tagsatagsa sa makausa, ug tapos niana hukman siya sa Dios. Gihalad usab si Kristo sa makausa aron pagwagtang sa mga sala sa daghang mga tawo. Mopakita siya sa ikaduhang higayon dili tungod sa sala, kondili sa pagluwas kanila nga nagahulat kaniya.

Mga igsoon, ang Pulong sa Ginoo.

D. Ebanghelyo

Marcos 12:38-44 or 12:41-44

Ang pagsangyaw sa Maayong Balita sumala ni San Marcos.

Sa iyang pagtudlo kanila si Jesus miingon, "Pagbantay kamo sa mga magtutudlo sa Balaod nga gustong magsuroysuroy nga magsul-ob og mga bisting tag-as ug buot nga yukboan sulod sa mga merkado, nga nagpili sa mga lingkoranan nga linain sulod sa mga sinagoga, ug sa mga dapit nga labing maayo sa mga kombira. Nanglupig sila sa mga biyuda ug nangilog sa ilang mga katigayonan, ug unya nagpasundayag og tag-as nga mga pag- ampo atubangan sa mga tawo. Labi pang makalilisang ang ilang silot!"

Samtang naglingkod si Jesus duol sa panudlanan sa Templo, naniid siya sa mga tawo nga nanghulog didto sa ilang mga halad. Daghang mga dato ang nanghulog og daghang kuwarta. Unya miduol sa hulganan sa halad ang usa ka biyudang kabos ug mihulog og duha ka dako. Gitawag ni Jesus ang iyang mga tinun-an ug giingnan, "labaw pa sa gipanghulog sa uban ang gihulog niining kabus nga biyuda. Kay ang uban mihulog sa sobra sa ilang bahandi; apan siya, bisan sa iyang kakabus, mihatag sa tanan nga anaa kaniya-gihatag niya ang tanan nga iyang gisaligan aron mabuhi."

Mga igsoon, ang Maayong Balita sa atong Ginoo.

E. Komentaryo

Tema: Pagkamanggihatagon.

Nakasinati ka ba nga ikaw gihatagan o kaha ikaw ang mihatag? Unsa man ang imong gibati kon ikaw nakadawat ug ikaw mihatag? Siguro malipay gayod kita kay makaingon man kita nga grasya na kini.

Adunay usa ka tawo nga nagpuyo sa usa ka kombento. Matag alas dose ang takna sa kaudtohon dunay usa ka lalaki nga magsige og pangayo og pagkaon alang sa iyang paniudto ug kanunay kini niyang gihatagan. Usa ka udto niana, nakita siya sa kusinera ug gibadlong siya ug gikasab-an. Apan bisan pa sa mga kasaba nga iyang nadawat gibalewala niya kining tanan kay matud pa niya makahimo man gani kuno kita og pagpakaon sa hayop, sa tawo pa kaha nga binuhat sa Dios?

Sa unang pagbasa nagsaysay sa pagkamanggihatagon sa usa ka balo nga taga Sarepat. Wala siya magdumili sa paghatag kang Elias bisan pa man nga ang pagkaon nga iyang giandam alang gayud nilang duha sa iyang anak sa dili pa sila mamatay.

Sa laing bahin sa ikaduhang pagbasa, naghisgot usab kini nga si Kristo Jesus mao ang labaw nga manggihatagon tungod kay wala siya magdumili sa paghalad sa iyang tibuok nga kaugalingon pinaagi sa pagkamatay sa krus aron kita maluwas.

Sa atong Ebanghelyo karon nagpadayag usab og kamanggihatagon. Ang pagkamanggihatagon sa usa ka biyuda. Si Kristo mismo wala magsaway kon dako o diyutay nga kantidad ang atong ikahalad ngadto sa Ginoo. Ang importante nga makahibalo kita nga mohatag o mogahin og gamay balik sa Dios sa mga grasyanga atong nadawat gikan Kaniya. Gihatagan niya og dakung gimbug-aton ang pagkamanggihatagon nga gikan gayud sa kinahiladman sa atong kasingkasing. Ang pagkamanggihatagon wala magadepende sa salapi kon dili ang matuod nga tumong sa maong paghatag. Ang gikahimut-an ni Jesus sa maong biyuda kay mapaubsanon siyang mihatag sumala sa iyang kasingkasing nga kon atong tan-awon pag-ayo kulang pa gani kini alang sa iyang kaugalingon.

Mga igsoon, kita gihagit usab sa pagkamanggihatagon sama sa biyuda pinaagi sa paggahin sa atong mga naangkon nga grasya ngadto sa mga nanginahanglan. Kanang mihatag kita nga walay kapin kabubut-on o wala nahisupak sa atong galamhan. Usab, ang atong paghatag sa atong kaugalingon o pagtahan sa tibuok natong kaugalingon ngadto sa Dios sa walay pagduhaduha. Paghalad nga walay nagpaluyo nga pagpakaaron-ingnon. Kini ang matuod nga pagkamanggihatagon ngadto sa Dios nga maoy tinubdan sa tanan natong nahuptan. Atong pangayoon ang pangama sa mga Santos nga maoy modelo sa ilang pagkamanggihatagon bisan pa man nga nagkahulogan kini sa ilang kinabuhi.

Giya alang sa Pamalandong:

1. Nakahimo ba kita pagpaambit sa atong bahandi nga atong nahuptan gikan sa Dios?

2. Mihatag ba kita kay kini sobra na sa atong panginahanglan? O mihatag ba kita kay kinahanglan gayud natong mohatag bisan pa man og kulang pa kini sa atong panginahanglan?

F. Katilingbanong Pag-ampo 

Pangulo: Mag-ampo kita sa atong manggihahatagon nga Dios kinsa nahigugma pag-ayo kanato ug dili gayud Niya ihikaw kanato ang atong mga panginahanglan. Sa matag pangamuyo kita motubag: GINOO, DUNGGA ΚΑΜΙ.

1. Ginoo, nag-ampo kami sa nga nagdumala sa Simbahan, ang Santo Papa, mga Obispo ug kaparian nga sa kanunay panalipdi sila sa mga tentasyon ug mga pagsulay diha sa ilang pagpangalagad. Mag-ampo kita.

2. Ginoo, nag-ampo kami sa mga opisyales sa tanang nasud nga magmatinud-anon sila sa ilang pagdumala sa bagang panon sa katawhan kinsa nangandoy kanunay nga mahaw-as sa ilang mga kalisdanan. Mag-ampo kita.

3. Ginoo, nag-ampo kami sa among mga kaigsoonan nga nag-antus sa nagkalainlaing balatian sa lawas, himoang lig-on ang ilang pagtoo ug pagsalig diha Kanimo kay Ikaw ra man ang bugtong makahatag og kahupayan sa ilang giantus nga mga kasakitan. Mag-ampo kita.

4. Ginoo, nag-ampo kami sa mga kabus namong kaigsoonan nga unta ang mga adunahan makapaambit sila sa ilang bahandi aron makatagamtam og kahupayan ang ilang mga kalisdanan. Mag-ampo kita.

5. Ginoo, nag-ampo kami sa matag pamilya, himoa silang manggihatagon sa ilang gugma ug panahon ngadto sa ilang mga anak. Mag-ampo kita.

6. Ginoo, ihalad namo Kanimo ang among kaugalingon nga katuyuan diha kahilum. sa

Pangulo: Amahan, nasayod kami sa Imong paghigugma ug pag-amuma kanamong Imong mga anak. Among isalig ang tanan nganha Kanimo kay nasayud kami nga dili Nimo pakyason ang among mga tinguha ug panginahanglan. Kini among gipangayo pinaagi ni Kristo among Ginoo. Amen.