Ikakawhaag-siyam nga Domingo Sulod sa Tuig

 Ikakawhaag-siyam nga Domingo Sulod sa Tuig

PASIUNA

OKTURE 20, 2024

Maayong buntag/hapon mga igsuon diha ni Cristo.

Ania na kita sa Ikakawhaan ug Siyam nga Domingo sa Ordinaryong Panahon. 

Karon usab mao ang Ikakawhaan ug unom ka adlaw sa panaw duaw o Pilgrimage sa atong mahal nga inahan ang Imaculada Conception.

Karon usab mao ang World Mission Sunday ug Sunday For Cultures.

Ang unang pagbasa gikuha gikan sa Basahon ni Propeta Isaias. Kini nagsaysay nga Kabubuton sa Ginoo nga ang Iyang Alagad mag-antos ug magsakit.

Ang ikaduhang pagbasa gikuha gikan sa Sulat ngadto sa mga Hebreo. Dinhi gisaysay nga "magmasaligon kita ug modulo sa trono sa Dios diin atua ang grasya aron madawat nato ang kaluoy ug ang grasya nga atong gikinahanglan."

Ang ebanghelyo gikuha gikan sa Balaan nga Ebanghelyo sumala ni San Marcos. Dinhi atong madungog nga si Santiago ug Juan buot molingkod sa tuo ug wala ni Jesus sa Iyang Himaya.

Palihug manindog alang sa pagsugod sa Santos nga Eyukaristiya.

Salmo Responsoryo:

Ginoo, kaloy-i kami, sanglit nagasalig kami kanimo.

Katilingbanong Pag-ampo:

Amahan, panalangini kami.

BASAHON I

Is. 53:10-11

KINUTLO GIKAN SA BASAHON NI PROPETA ISAIAS

Ang GINOO nag-ingon, "Maoy akong kabubut-on ang pagpaantos ug pagsakit kaniya; sa dihang gihimo niya ang iyang kaugalingon ingon nga halad alang sa sala,

makita niya ang iyang mga kaliwat ug makabaton siyag taas nga kinabuhi; 1u1űug pinaagi kaniya matuman ang laraw sa GINOO.

Inigkatapus sa iyang mga pag-antos, malipay na usab siya ug masayod siya nga wala makawang ang iyang mga pag-antos.

Siya ang matarong kong alagad ug siya maoy mopas-an sa silot sa katawhan aron mahimo silang matarong.

ANG PULONG SA GINOO.

SALMO RESPONSORYO

Ps. 33:4-5, 18-19, 20, 22

R. Ginoo, kaloy-i kami, sanglit nagasalig kami kanimo.

Matarong ang pulong sa Ginoo, ug ang tanan niyang mga buhat kasaligan.

Nahigugma siya sa husto ug matarong; puno ang yuta sa kaluoy sa Ginoo.

R. Ginoo, kaloy-i kami, sanglit nagasalig kami kanimo.

Tan-awa, ang mga mata sa Ginoo anaa kanila nga mahadlokon kaniya, kanila nga nagalaum sa iyang kaayo, Aron pagluwas kanila gikan sa kamatayon ug pag-amping kanila sa panahon sa gutom.

R. Ginoo, kaloy-i kami, sanglit nagasalig kami kanimo.

Ang among kalag nagapaabot sa Ginoo nga mao ang among hinabang ug among panalipod.

Maania unta kanamo, O Ginoo, ang imong kaluoy, kami nga nagalaum kanimo.

R. Ginoo, kaloy-i kami, sanglit nagasalig kami kanimo.

BASAHON II

Heb. 4:14-16

KINUTLO GIKAN SA SULAT NI SAN PABLO NGADTO SA MGA HEBREO

Lig-onon ta ang atong pagtuo kay duna kitay Pangulong Pari nga halangdon nga atua na sa presensiya sa Dios si Jesus, ang Anak sa Dios. Ang atong Pangulong Pari dili sama sa ubang pari nga dili mobatig kaluoy sa atong mga kahuyang. Hinonoa, usa siya ka Pangulong Pari nga gitintal sa tanang paagi sama kanato, apan wala gayod makasala. Busa magma- saligon kita ug moduol sa trono sa Dios diin atua ang grasya aron madawat nato ang kaluoy ug ang grasya nga atong gikinahanglan.

ANG PULONG SA GINOO.

EBANGHELYO

Mk. 10:35-45

TINAAS

Kinutlo gikan sa Balaan nga Ebanghelyo sumala ni Marcos

Ug midúol kang Jesus si Santiago ug si Juan,  ang mga anak ni Zebedeo nga nag-ingon kaniya, "Magtutudlo, buot namo nga ang bisan unsa nga among pangayoon, imong buhaton alang kanamo."

Apan miingon siya kanila, "Unsa man ang buot ninyong akong buhaton alang kaninyo?"

Ug miingon sila kaniya, "Itugot kanamo nga sa imong himaya molingkod kami usà sa imong tuò ug usà sa imong walà."

Apan miingon si Jesus kanila, "Walâ kamo mahibalo unsa ang inyong gipangayo. Makahimo ba kamo pag-inom sa kupa nga akong imnon, o pagpabunyag sa bunyag nga akò bunyagan?"

Ug miingon sila kaniya, "Makahimo kami."

Apan miingon si Jesus kanila, "Moinom kamo sa kupa nga akong imnon, ug mabunyagan kamo sa bunyag nga akò bunyagan; apan ang paglingkod sa akong tuò o sa akong walà dili ako ang paghatag apan alang lamang niadtong gitagan-an niini."

Ug sa pagkadungog niini sa napulo, misugod sila sa pagkasuko kang Santiago ug Juan.

Ug pagtawag ni Jesus kanila miingon siya kanila, "Nasayod kamo nga ang mga giila nga mamuno sa mga Hentil nagharihari kanila, ug ang ilang kadagkoan nagmando kanila.

Apan kaninyo, dili sama niini.

Hinunoa, si kinsa nga buot mahimong dako diha kaninyo, magpakahimong inyong alagad; ug si kinsa nga buot mahiuna diha kaninyo magpakahimong sulugoon sa tanan.

Kay ang Anak sa Tawo walâ mianhi aron alagaran apan aron pag-alagad ug pagtugyan sa iyang kinabuhi isip tubos alang sa kadaghanan."

Ang Ebanghelyo sa Ginoo.

KATILINGBANONG PAG-AMPO

OKTUBRE 20, 2024

Pari: Ang atong Ginoo nagpadayag sa iyang pagkamatinud-anon ngadto sa iyang katawhan. Busa moduol kita kaniya karon ug atong ihalad ang atong panginahanglan diha sa pag-ingon:

AMAHAN, PANALANGINI KAMI.

1. Alang sa atong Santo Papa Francisco, mga obispo, kaparian, mga diyakono ug mga relihiyoso, mamahimo unta silang matuod nga instrumento sa pagpalawom sa pagtuo sa tanang binunyagan. Mag-ampo kita sa Ginoo.

2. Alang sa mga lideres sa atong nasud, makabaton unta og kasingkasing nga mohatag og tinuoray nga pagserbisyo aron makab-ot ang kauswagan ug kaangayan nga maoy mithi ug damgo sa katawhan. Mag-ampo kita sa Ginoo.

3. Alang sa tanang misyonero, makadawat unta sila og dugang grasya sa kaalam, ug hugot nga pagtuo sa Ginoo aron mapadayunon nilang ipaambit ang Maayong Balita ngadto sa katawhan. Mag-ampo kita sa Ginoo.

4. Alang sa mga masakiton, tigulang, himalatyon ug biktima sa giyera, makaangkon unta sila sa kaayohan nga ilang gihandum, ug mamahimong masaligon sa grasya sa Dios alang kanila. Mag ampo kita sa Ginoo.

5. Alang sa mga mihalad sa ilang pagdayeg ug pasalamat sa Dios ilabina nila _______ malig-on sa paglaum sa saad sa Dios alang kanila. Mag-ampo kita sa Ginoo.

6. Alang sa atong mga kaigsuonan nga nangamatay ilabina sila _______ dawaton unta sila sa gingharian nga gitagana alang kanila. Mag-ampo kita sa Ginoo.

Pari: Amahan, sayod kami sa imong walay sukod nga gugma kanamo. Busa masaligon kami sa Imong kabubut-on alang kanamo nga mihalad sa among pangamuyo nganha kanimo, pinaagi ni Cristo among Ginoo. Amen.

PAHIBALO

Octobre 20, 2024

1. Adunay pagahimoon nga "CONFIRMATION" karong umaabot nga Nobyembre 2024. Giawhag ang tanan nga nag-edad ug 12 anyos pataas ug wala pa nakadawat sa Sacramento sa Komperma, sa pagparehistro ngadto sa inyong tagsatagsa ka mga Gkk ug magpasa ug photocopy sa Baptismal Certificate. Ang petsa sa pre-confirmation seminar ug mga dugang detalye mahitungod sa Kompirma, ipahibalo ra sa sunod nga mga adlaw. Daghang salamat.

2. Si Seminarista FRANCIS ALIMEOS FLORES sa Holy Family Parish sa Baliok pagaordinahan sa pagka-diyakono karong Nobyembre 12, Martes, niining tuiga, sa alas 9:00 sa buntag diha sa Chapel sa St. Francis Xavier Regional Major Seminary of Mindanao (ReMaSe). Giawhag kadtong adunay mga pagbabag sa maong ordinasyon sa pagpaabot niini ngadto sa Arsobispo sa Davao pinaagi sa pagsulat sa tinuod nga mga basihanan sa mga reklamo, uban sa pangalan ug contact details sa nagpadala. Giawhag usab ang tanan sapag-ampo alang kang Seminarista Francis.

3. Gidapit ang tanan sa pagsalmot sa GALLERY OF SAINT YEAR 5, karong Nobyembre 10-17, 2024, sa alas 9:00 sa buntag hangtod sa alas 9:00 sa gabii didto sa NCCC Mall, Victoria Plaza, JP Laurel Avenue, Davao City nga adunay temang, "Praying Together with the Saints" organized by the Archdiocesan Commission on Social Communications Davao. Maghalad kita'g mga pag-ampo, maminaw sa mga makadasig nga pakigpulong ug mo- apil sa Santos nga Misa matag adlaw. Alang sa program schedule ug ubang detalye, paminaw lang sa DXGN 89.9 Spirit FM o bisita sa ilang Facebook pages; DXGN 89.9 Spirit FM-Davao o Davao Catholic Herald Official.

4. Ang mga sobre alang sa pamisa sa mga kalag karong umaabot nga Nobyembre 2024 mamahimo nang makuha didto sa inyong mga tagsatagsa ka mga Gkk o diha sa opisina sa atong parokya. Kining mga sobre mamahimo ibalik dinhi sa simbahan sa dili pa moabot ang Nobyembre 1, 2024. Daghang Salamat.