IKA-KAWHAA'G-DUHA NGA DOMINGGO

 IKA-KAWHAA'G-DUHA NGA DOMINGGO

A. Unang Basahon

Deuteronomio 4:1-2,6-8

Ang pagbasa gikuha gikan sa basahon sa Deuteronomio.

Unya miingon si Moises sa katawhan, "Pagmatngon kamo sa tanang sugo nga gitudlo ko kaninyo, ug tumana kini aron kamo magpabiling buhi ug makasulod ug makapanag-iya sa yuta nga gihatag kaninyo sa Ginoo, ang Dios sa inyong katigulangan. Ayaw dugangi ni kuha-i ang gisugo ko kaninyo; tumana gayud ninyo ang gisugo sa Ginoo nga inyong Dios. Tumana ninyo kini, kay mao kini ilhanan nga kamo maalamon atubangan sa katawhan. Inigkadungog nila niining tanang mga balaod, moingon sila, "Sa walay duhaduha ang katawhan niining dakung nasud maalamon ug masinabuton.'

Kay unsa mang nasura nga gamhanan kansang dios duol kaayo niini, ingon ka duol sa Ginoo nga atong Dios nganhi kanato, sa dihang mosangpit kita kaniya? Ug unsa mang nasura nga gamhanan nga may mga balaod ug mga tulumanon nga matarong ingon niining tanang balaod nga gihatag ko kaninyo niining adlawa?

Mga igsoon, ang Pulong sa Ginoo.

B. Salmo Responsoryo

Salmo 15:2-3,3-4,4-5

Tubag (R) - Siya nga nagahimo sa katarung, magpuyo diha sa atubangan sa Ginoo.

Siya nga nagalakaw nga walay sala ug nagabuhat sa matarong; nga nagahunahuna sa kamatuoran diha sa iyang kasingkasing ug wala magasulti og dautan sa iyang dila. (R)

Siya nga wala magdagmal sa iyang isigkatawo, ni nagpasangil batok sa iyang silingan; pinaagi kaniya ang sad-ang itamay, samtang nagapasidungog siya kanila nga mahadlokon sa Ginoo. (R)

Siya nga wala magpatanto nga hilabihan sa iyang kwarta ug wala modawat og suborno batok sa walay sala. Siya nga nagabuhat niining mga butanga dili gayud masamok. (R)

C. Ikaduhang Basahon

Santiago 1:17-18,21-22,27

Ang pagbasa gikuha gikan sa sulat ni Santiago.

Ang tanang maayo ug hingpit nga gasa naggikan sa langit; gikan kini sa Dios nga maoy nagbuhat sa mga kahayag diha sa langit. Dili gayud siya mausab ni magpakita'g landong sa pagkausab. Sa iyang pagbuot iya kitang gihimong mga anak pinaagi sa pulong sa kamatuoran aron sa tanan niyang binuhat mahisama kita sa unang mga bunga.

Busa isalikway ninyo ang tanang ngil-ad nga batasan ug daotang mga buhat, ug dawata nga mapaubsanon ang pulong nga iyang gitisok diha sa inyong kasingkasing kay kini makaluwas kaninyo.

Ayaw limbongi ang inyong kaugalingon pinaagi sa pagpamati lamang sa pulong sa Dios; hinonoa, tumana kini.

Alang sa Dios nga Amahan, ang putli ug matuod nga tinuohan mao ang pag-atiman sa mga ilo ug mga biyuda sa ilang kalisod, ug ang pagmatngon nga dili kabulingan ang iyang kaugalingon sa kangil-ad sa kalibutan.

Mga igsoon, ang Pulong sa Ginoo.

D. Ebanghelyo

Marcos 7:1-8,14-15,21-23

Ang pagsangyaw sa Maayong Balita sumala ni San Marcos.

Ang mga Pariseo ug pipila sa mga magtutudlo sa Balaod nga gikan sa Jerusalem mialirong kang Jesus. Ug namatikdan nila nga may mga tinun-an ni Jesus nga nangaon nga "hugaw" og kamot. Sa ato pa, wala sila makapanghunaw sumala sa paagi nga gitudlo sa mga Pariseo nga buhaton sa mga tawo.

Kay ang mga Judio god, labi na ang mga Pariseo, nagtuman man sa mga gitudlo sa ilang mga katigulangan. Dili mokaon ang mga Pariseo kondili una sila makapanghunaw sa hustong paagi, ni mokaon sila og bisan unsa nga gikan sa palingki kon dili pa nila kini kahugasan. May daghan pang mga sugo nga ilang nadawat ug gituman, ingon pananglit sa hustong paagi sa paghugas sa mga tasa, mga kulon, mga panaksan nga tumbaga, ug mga higdaanan.

Busa nangutana kang Jesus ang mga Pariseo ug ang mga magtutudlo sa Balaod, "Ngano ba nga ang imong mga tinun-an wala man magtuman sa mga sugo nga gibilin sa atong mga katigulangan, kon dili nangaon hinoon nga hugaw ug kamot?"

Si Jesus mitubag kanila, "Wala gayod masayop si Isaias sa iyang gipanagna mahitungod kaninyo. Mga tigpakaaron-ingnon kamo, sumala sa giingon sa Dios nga gisulat ni Isaias: "Kining mga tawhana nagpasidungog kanako sa pulong lamang, apan ang ilang kasingkasing halayo kanako. Kawang lamang ang ilang pagsimba kanako, kay ilang gitudlo nga balaod sa Dios ang mga sugo nga hinimo lamang sa tawo!"

Ug midugang si Jesus sa pag-ingon, "Gipasagdan ninyo ang mga sugo sa Dios ug mao hinoon ang inyong gituman ang mga pagtulon-an nga iya sa tawo."

Unya gipaduol pag-usab ni Jesus kaniya ang panon sa katawhan, ug miingon siya kanila, "Pamati kamong tanan ug sabta ninyo kini: bisan unsa nga mosulod sa baba sa tawo dili makahugaw kaniya. Ang makahugaw sa tawo mao kadtong mogula gikan kaniya. Kay gikan sa sulod, gikan sa kasingkasing sa tawo, manggula ang mga dautang hunahuna, pagpanapaw, pagkaibog, pagpanlimbong, kalaw-ay, kasina, pagbutangbutang, pagpagarbo, ug pagbinuang - kining tanan naggikan sa sulod sa tawo ug maoy makahugaw kaniya."

Mga igsoon, ang Maayong Balita sa atong Ginoo.

E. Komentaryo

Tema: Ang Pagsunod sa Kabubut-on sa Ginoo.

Mga kaigsoonan, ania na kita sa Ikakawhaa'g Duha nga Dominggo sa Ordninaryong Panahon. Ang atong mga pagbasa naghisgot nga si Moises nagmando sa mga tawo nga kinahanglan nila tumanon ang mga kasugoan sa Ginoo. Nagpakita kini nga ang Israel pinili nga nasud sa Ginoo. Ang pagsunod sa mga balaod ni Moises nagpasabot nga kinahanglan padayonon kini kay mao kini ang timailhan nga ang mga tawo pinili sa Ginoo. Sa laing bahin si Santiago nag-ingon nga pagkahuman sa pagpamati sa pulong sa Dios, kinahanglan nato kining tumanon. Diha sa usab sa Ebanghelyo naghisgot sa wala paghugas sa mga kamot ang mga tinun-an ni Jesus sa dili pa mokaon. Ato usab nga makita nga si Jesus nag-ingon sa mga tawo nga ang mogula sa tawo ang makahugaw ug dili ang mosulod sa tawo. Kini nagpadayag nga dili bahin sa kahinlo sa kamot una mokaon ang gihatagan og dakung bili kay kon atong tan-awon pag-ayo, ang mga katawhan ni San Markos dili mga Judeyo kon dili mga Hentil. Ang paghinlo sa kamot usa sa mga balaod sa mga Judeyo nga angay nilang tumanon. Mao nga atong masabtan nga ang mga tinun-an wala maghugas sa ilang kamot kay wala man makahibalo ang mga katawhan bahin sa balaod sa mga Judeyo. Kini nagpasabot nga ang kaluwasan makab-ot pinaagi sa pagsunod kang Kristo Jesus ug dili pinaagi sa pagsunod sa balaod sa tawo.

Sa laing bahin, maayo usab nga atong tan- awon kung unsa ang rason nganong adunay balaod aron masabtan nato nganong nabalaka kaayo ang mga Judeyo sa pagtuman sa balaod sa ilang mga katigulangan. Ang balaod sa konteksto sa mga Judeyo, gihimo aron mapasayon ang pagsunod sa kabubut-on sa Dios. Sa atong konteksto, ang balaod gihimo aron mahapsay ang dagan sa mga panghitabo. Pananglitan, ang "traffic rules" o mga balaod sa atong trapiko, gibuhat aron mahimong hapsay ang dagan sa trapiko. Dili lang kana, ang balaod usab gimugna aron mapahimatngonan ang matag usa sa atong tulumanon isip sakop sa atong katilingban. Apan sa atong panahon karon, daghang mga balaod nga wala makatabang sa mga tawo aron kita mahiduol sa Dios ug makamatngon sa Iyang presensya. Usa sa mga balaod nga makatabang kanato sa atong pagpakighiusa sa Dios mao ang balaod sa pagtamod nato sa napulo ka sugo sa Dios, ang pagkinabuhi sa katarung nga nagsubay kanunay sa Iyang kabubut-on. Mao kini ang hagit sa matag usa kanato karon. Hinaut ngá ato na kining mapuy-an.

Giya alang sa Pamalandong:

1. Isip mga Kristiyano, ato bang nasinati pag-ayo ang napulo ka sugo sa Dios?

2. Ato bang gihatagan og dakung bili ang matag sugo o balaod sa Dios?

F. Katilingbanong Pag-ampo

Pangulo: Mag-ampo kita sa Amahan nga sa atong pagbuhat ug pagpuyo sa Iyang mga sugo kanunay unta kining haum sa Iyang kabubut-on. Busa ato karong pangayoon ang Iyang panabang ug grasya. Sa matag pag-ampo kita motubag:

GINOO, SA IMONG KALOOY DUNGGA KAMI.

1. Alang sa nangulo sa Simbahan, matuman ug mapuy-an unta nila sa tumang kaaghop ang kabubut-on sa Dios kay sa kabubut- on sa tawo. Mag-ampo kita.

2. Alang sa nagdumala sa atong nasud, mahitukma unta ang ilang mga balaod sa kabubut-on sa Dios alang sa kauswagan sa tanang katawhan. Mag-ampo kita.

3. Alang sa mga lideres sa katilingban mahuptan unta nila ang kabililhon sa pagsunod sa balaod sa Dios nga maoy maghatag sa matag usa sa kalig-on ug sa matinud-anon nga pagpangalagad. Mag- ampo kita.

4. Alang sa atong mga kaigsoonan nga nag- antus sa kalisod sa kinabuhi makaplagan unta nila ang matuod nga kasulbaran sa ilang mga suliran pinaagi sa mga instrumento nga gipadala sa Dios kanila. Mag-ampo kita.

5. Alang kanatong tanan, magmasunuron unta kita sa kabubut-on sa Dios nga maoy maggiya kanato sa pagkinabuhi nga gawasnon, malinawon ug labaw sa tanan mahigugmaon sa atong isigkatawo. Mag- ampo kita.

6. Alang sa atong kaugalingon nga katuyuan, ato kining ihalad diha sa kahilum.

Pangulo: Amahan nga maloloy-on Imong nadungog ang mga pangaliyupo sa Imong katawhan. Sayud kami nga kon wala Ikaw wala gayud kami mahimo. Itugot nga amo nang madawat ang grasya nga Imong gitagana kanamo pinaagi sa Imong Bugtong Anak si Jesukristo among Ginoo ug Manunubos. Amen.