IKA-NAPULO'G-WALO NGA DOMINGGO

 IKA-NAPULO'G-WALO NGA DOMINGGO

A. Unang Basahon

Exodo 16:2-4,12-15

Ang pagbasa gikuha gikan sa basahon sa Exodo.

Didto sa kamingawan nagbagulbol ang tanang mga Israelitas kang Moises ug kang Aaron. Miingon sila, "Maayo pa hinoon kon gipatay kami sa Ginoo didto sa Ehipto, kay didto makapahimulos kami sa mga karne ug

makakon og pan kutob sa among gusto. Apan gidala ninyo kami nganhi sa kamingawan aron patyon sa gutom."

Ug ang Dios miingon kang Moises, "Nabati ko ang mga mulo sa mga Israelita. Ingna sila nga inigkasawomsom na, makabaton sila'g karne, ug sa pagkabuntag madawat nila ang tanang pan nga ilang gikinahanglan. Unya masayran nila nga ako, ang Ginoo, mao ang ilang Dios."

Nianang pagkagabii mitungha ang mga langgam nga buntog nga milukop sa tibuok kampo, ug sa pagkabuntag dihay bagang yamog sa kampo. Sa pagkauga sa yamog, nakakita sila og mga butang nga nipis ug puti, ingon ka nipis sa yamog diha sa yuta, Wala sila masayod kun unsa kadto ug nagpangutan-anay sila, "Unsa man kini?"

Miingon kanila si Moises, "Mao kini ang pagkaon nga gihatag sa Ginoo kaninyo aron inyong kan-on.

Mga igsoon, ang Pulong sa Ginoo.

B. Salmo Responsoryo

Salmo 78:3-4,23-24,25-54*

Tubag (R) - Gihatagan sila sa Ginoo og pan gikan sa langit.

Ang tanan nga among hidunggan ug hibaloan, ug ang gisugilon kanamo sa among mga katigulangan, among isangyaw ngadto sa kaliwat nga umaabot. Kini ang mahimayaong mga buhat sa Ginoo. Ug ang iyang gahum ug ang mga katingalahan nga iyang gibuhat. (R)

Gisugo niya ang kalangitan sa taas ug ang mga pultahan sa langit iyang giablihan; gipaulanan sila niya og manna aron ilang kan-on ug gihatagan sila sa langitnong kalan-on. (R)

Ang pan sa gamhanan gikaon sa mga tawo; gipadad-an sila niya og kabuhong sa mga kalan-on. Gidala sila niya ngadto sa iyang balaan nga yuta, ngadto sa kabukiran nga nadaog sa iyang tuong kamut. (R)

C. Ikaduhang Basahon

Efeso 4:17,20-24

Ang pagbasa gikuha gikan sa unang sulat ni San Pablo ngadto sa taga-Efeso.

Busa, sa ngalan sa Ginoo, awhagon ko kamo sa dili pagkinabuhi sama sa mga pagano kansang mga hunahuna walay hinungdan, ug kansang kaisipan anaa sa kangitngit. Dili sila makaambit sa kinabuhi nga gihatag sa Dios, kay mga ignorante man sila ug mga gahi'g-ulo. Nawad-an na sila sa kaulaw; nagpatuyang sila sa bisyo, ug nagbuhat sa tanang kalaw-ayan sa walay pugong-pugong.

Apan dili kini mao ang inyong nakat-onan bahin ni Kristo! Sa walay duhaduha nakadungog kamo mahitungod kaniya, ug sa inyong pagkasumusunod niya gitudloan kamo sa kamatuoran nga anaa ni Jesus. Busa hukasa ninyo ang daang tawo nga maoy hinungdan sa inyong daotang kinabuhi kaniadto nga gilaglag sa malimbongong mga kailibgon niini. Kinahanglan nga bag-ohon gayud ninyo ang inyong mga kasingkasing ug mga hunahuna. Isul-ob ninyo ang bag-ong tawo nga gibuhat sa Dios sama sa iyang dagway, nga makita diha sa matuod nga kinabuhing matarong ug balaan.

Mga igsoon, ang Pulong sa Ginoo.

D. Ebanghelyo

Juan 6:24-35

Ang pagsangyaw sa Maayong Balita sumala ni San Juan.

Sa pagkakita sa mga tawo nga si Jesus wala na didto ni ang iyang mga tinun-an, nanakay sila sa mga sakayan ug nangadto sa Capernaum aron pagpangita kaniya.

Samtang nakaplagan na nila si Jesus didto sa tabok sa lanaw, miingon sila kaniya, "Magtutudlo, kanus-a ka pa mahiabot dinhi?"

Si Jesus mitubag, "Sultihan ko kamo: nangita kamo kanako kay nakakaon man kamo sa pan ug nangabusog ug dili tungod kay nakasabot kamo sa mga milagro nga akong nahimo. Ayaw kamo paghago alang sa kalan-on nga madunot, kon dili sa kalan-on nga molungtad ngadto sa kinabuhing walay katapusan. Kining kalan-ona ihatag kaninyo sa Anak sa Tawo, kay gipatikan man siya sa Dios nga Amahan sa timaan sa iy g pag-uyon."

Busa gipangutana nila siya, "Unsa may among buhaton aron pagtuman sa gisugo sa Dios?"

Si Jesus mitubag, "Kini ang buluhaton nga ipabuhat sa Dios kaninyo, nga motuo kamo sa iyang gipadala."

Sila mitubag, "Unsa mang milagroha ang imong ipakita kanamo aron manuo kami kanimo? Unsa may imong himoon? Ang among mga katigulangan nangaon og mana didto sa kamingawan, sumala gayud sa giingon sa Kasulatan: Gihatagan niya sila'g pan gikan sa langit."

Si Jesus miingon, "Sultihan ko kamo: ang gihatag ni Moises kaninyo dili mao ang pan gikan sa langit; ang akong Amahan mao ang maghatag kaninyo sa matood nga kalan-on gikan sa langit. Kay ang pan nga gihatag sa Dios mao siya nga nanaog gikan sa langit ug naghatag og kinabuhi sa kalibutan."

"Sir," sila miingon kaniya, "hatagi kami kanunay niining maong pan."

Si Jesus miingon kanila, "Ako mao ang pan nga naghatag sa kinabuhi. Ang moari kanako dili na gayud gutumon; ang motuo kanako dili na gayud uhawon."

Mga igsoon, ang Maayong Balita sa atong Ginoo.

E. Komentaryo 

Tema: Si Kristo: Kalan-on ug naghatag og Bag- ong Kinabuhi

Adunay duha ka managhigala nga nag- estoryahay kabahin sa ilang tagsa-tagsa ka kasinatian sa kinabuhi. Ang usa miingon kanila nga dunay duha ka butang nga lisod bag-ohon sumala sa ilang kasinatian: una, mao ang pagbag-o sa batasan nga naandan ug ikaduha mao ang pagbiya sa mga bisyo. Usahay sa atong kinabuhi lisod gayod ang pagbag-o. Kontento na kita kung unsay anaa kanato ug dili na kita maningkamot aron sa pagkab-ot sa kinabuhing tunhay kung sa espirituhanong bahin sa atong kinabuhi ang hisgutan. Apan kon kalibutanong butang ang atong hisgutan dili gayod kita makontento niini kay gusto gayod kita makaangkon kon unsay atong gipangandoy. Apan ang mahinungdanon sa tanan nga unta kita mangandoy sa mga butang nga maoy makahatag kanato og usa ka kalipay nga dili kahulipan sa materyal nga butang ug mao kini ang gingharian sa Dios o kinabuhing tunhay. Usahay sa atong kasinatian kanunay nato basulon ang uban sa tanan natong mga kapakyasan sa kinabuhi lakip na ang Dios. Nagpasabot kini nga kulang kaayo ang atong pagsalig sa Dios ug sa pagdawat sa kamatuoran nga ang Dios mao gayod ang tinubdan sa tanan.

Sa basahon sa Exodus, gipadayag ang hulagway sa katawhan sa Israel. Diha sa ilang kasinatain sa kamingawan, ang katawhan sa Israel nagbagulbol batok kang Moises ug Aaron. Usa kini sa kasagaran nga bation sa mga tawo nga dili makadawat sa mga pagsulay sa kinabuhi. Wala nila hatagi og dakung bili ang panabang sa Dios nga maoy naghatag kanila sa ilang panginahanglan. Ang panahon sa mga langgam nga gikapoy gikan sa taas nga paglupad, nanugpa sa kilid sa ilang gikampohan. Apan ang laing pagkaon nga manna nga wala nila paabota, nangahulog gikan sa langit aron sila makakaon. Sa panahon sa grabe nga kawad-on, ang Ginoo maoy naghatag kanila sa ilang gikinahanglan. Ang Ginoo maoy ilang kalig-on. Wala sila pasagdi sa Ginoo sa ilang mga kalisdanan.

Kining gasa sa pagkaon nga nadawat gikan sa langit nga nasinati sa katawhan sa Israel, mao usab ang gihatagan og dakung punting diha sa Ebanghelyo ni San Juan karon. Si Jesus mao ang buhing pan nga maoy maghatag kanato og katagbawan. Kon mokaon kita og ordinaryo dali kining mahilis ordinaryo nga pan ug mawala. Apan kon mokaon kita sa buhing pan nga mao ang lawas ni Kristo, mosulod siya kanato aron kita mabag-o ug mahiusa diha kaniya. Siya mao ang pan sa kinabuhi diha sa Santos nga Yukaristiya nga atong madawat panahon sa Kasaulogan sa Santos nga Misa. Kini maoy makapahingkod sa atong pagtoo diha sa pagkinabuhi subay sa kabubut-on sa Dios.

Apan ang pangutana karon, unsaon man nato pagdawat ni Kristo diha sa atong kinabuhi? Ang pagdawat ni Kristo maoy usa ka dakung hagit alang kanatong tanan. Mao kini ang mensahe alang kanato karong adlawa nga kitang tanan giawhag sa pagbag-o sa daang natong pagkatawo aron mamahimo kitang angayan sa pagdawat kanunay ni Kristo. Ang bag-ong tawo mahisama sa hulagway ni Kristo nga mahigugmaon, mapailubon ug mainantuson. Unta nga kining mensahe nga atong nadungog karon uban sa giya sa Espiritu Santo, ato kining mapuy-an sa atong tagsa-tagsa ka kinabuhi. Hinaut pa unta.

Giya alang sa Pamalandong:

1. Kanus-a pa man kita magbag-o sa atong kinabuhi?

2. Gihatagan ba nato og dakung bili ang Santos nga Yukaristiya nga maoy tinubdan sa Espirituhanon natong kinabuhi?

F. Katilingbanong Pag-ampo

 

Pangulo: Ihalad nato karon sa atong Makagagahum nga Dios ang atong mga pag-ampo ug panginahanglan uban sa tumang pagsalig nga Iyang tubagon kini ug hatagan og katumanan. Sa matag pag-ampo kita motubag: 

GINOO SA GUGMA, DUNGGA ANG AMONG PAG-AMPO.

1. Alang sa kinatibuk-ang Simbahan ilabina sa Santo Papa, mga Obispo ug kaparian, ila untang palamboon ang Espirituhanong kinabuhi sa mga tawo pinasubay sa diwa sa Ebanghelyo. Mag-ampo kita.

2. Alang sa mga lideres sa atong nasud nga ang ilang makiangayon nga pagdumala ug pag-alagad sa katawhan maghatag unta kini og kalambuan alang sa tanang katawhan. Mag-ampo kita.

3. Alang sa matag Kristohanong pamilya nga maningkamot unta sila sa pagpuyo diin si Kristo maoy sentro sa ilang kinabuhi. Mag-ampo kita.

4. Alang sa matag katilingban nga unta hatagan og dakung bili ang Kasaulogan sa Yukaristiya nga maoy naghatag og kalig-on sa usa ka katawhan nga nagkahiusa. Mag-ampo kita.

5. Alang kanatong tanan nga ang Yukaristiya mao ang matuod nga pagpakighimamat sa buhi nga Kristo nga maoy makatagbaw sa atong Espirituhanon nga kagutom. Mag- ampo kita.

6. Alang sa atong kaugalingon nga katuyuan, ato kining ihalad diha sa kahilum.

Pangulo: Mahigugmaong Amahan, dungga ang among mga pag-ampo ug tabangi kami kami kanunay nga mahiduol Kanimo, Ikaw nga naghatag og katagbawan sa among mga panginahanglan. Kini among gipangayo pinaagi ni Jesukristo among Ginoo ug Manluluwas. Amen.