IKA-NAPULO'G-UNOM NGA DOMINGGO

 IKA-NAPULO'G-UNOM NGA DOMINGGO

A. Unang Basahon

Jeremias 23:1-6

Ang pagbasa gikuha gikan sa basahon ni Propeta Jeremias.

Pagkamakalilisang sa silot sa Ginoo niadtong mga pangulo nga nagpasagad lang nga pamatyon ug patibulaagon ang iyang katawhan! Mao kini ang giingon sa Ginoo, ang Dios sa Israel, sa mga pangulo nga angay untang mag-atiman sa iyang katawhan; "Gipatibulaag ug giabog ninyo ang akong katawhan inay inyo untang atimanon. Karon, silotan ko kamo tungod sa daotan ninyong mga buhat. Ako, ang Ginoo, maoy nagsulti niini. Tigomon ko ang nahibilin sa akong katawhan gikan sa kanasuran diin ko sila palaaga, ug dad-on ko sila balik sa ilang nasud. Unya mosanay sila pag-ayo.

Hatagan ko sila'g mga pangulo nga mag-atiman kanila. Dili na sila mahadlok o malisang, ug dili ko na sila silotan pag-usab. Ako, ang Ginoo, maoy nag- ingon niini."

Nag-ingon ang Ginoo, "Taliabot ang panahon nga magpili ako'g matuod nga kaliwat ni David aron mahimong hari. Ang maong hari magmando sa tumang kamaalamon, ug ipatunhay niya ang hustisya ug katarong sa tibuok nasud. Kon maghari na siya, mahilikay na sa kadaot ang katawhan sa Juda, ug magpuyo na nga malinawon ang katawhan sa Israel. Paganganlan siya'g, 'Ang Ginoo Atong Kaluwasan."

Mga igsoon, ang Pulong sa Ginoo.

B. Salmo Responsoryo

Salmo 23:1-3,3-4,5,6

Tubag (R)- Magbalantay kanako ang Ginoo, wala nay magmakulang pa kanako.

Magbalantay kanako ang Ginoo, wala nay magmakulang pa kanako. Sa lunhaw nga sibsibanan iya akong gipahulay; sa daplin sa malinaw nga tubig iya akong gidala; iyang gihupay ang akong kalag. (R)

lya akong gitultolan sa matarong nga mga agianan tungod sa iyang ngalan. Bisan kon maglakaw ako sa walog nga mangitngit, wala akoy kahadlokan nga dautan; kay anaa ka man sa akong kiliran sa imong igbubugaw og sungkod gihatagan mo ako og kaisog. (R)

Gihikyaran mo ako'g lamisa sa akong atubangan samtang nagatan-aw ang akong mga kaaway; gidihogan mo ang akong ulo og lana; naga-awas gayud ang akong kopa. (R)

Ang kaayo lamang ug kalooy maoy nagasunod kanako, sa tanang mga adlaw sa akong kinabuhi; ug magpuyo ako sa balay sa Ginoo sa mga katuigan sa katuigan. (R)

C. Ikaduhang Basahon

Efeso 2:13-18

Ang pagbasa gikuha gikan sa sulat ni San Pablo ngadto sa taga-Efeso.

Apan sa inyong pagkahiusa kang Kristo Jesus, kamo nga kaniadto layo sa Dios, karon nahiduol na pinaagi sa kamatayon ni Kristo. Kay si Kristo mismo mao ang atong kalinaw pinaagi sa paghimo sa mga Judio ug sa mga dili Judio nga usa lamang ka katawhan. Pinaagi sa iyang lawas giguba niya ang paril nga nag-ali ug naghimo kanilang mga kaaway. Giwagtang niya ang Balaod sa mga Judio, lakip ang mga kasugoan ug mga kalagdaan niini, aron gikan sa duha ka kaliwatan, mahimo diha kaniya ang usa ka katawhan, ug sa ingon makab-ot ang kalinaw. Pinaagi sa iyang kamatayon sa krus gihiusa kita niya ug gipasig-uli ngadto sa Dios, ug sa ingon niana giwagtang niya ang pagdinumtanay. Busa mianhi si Kristo ug gisangyaw niya ang Maayong Balita sa kalinaw alang sa tanan-kaninyong mga dili Judio nga duol kaniya. Pinaagi kang Kristo kitang tanan, Judio ug dili Judio, makaduol sa Amahan diha sa usa ka Espiritu.

Mga igsoon, ang Pulong sa Ginoo.

D. Ebanghelyo

Marcos 6:30-34

Ang pagsangyaw sa Maayong Balita sumala ni San Marcos.

Namalik ang mga apostoles ug nakigkita sila kang Jesus, ug ilang gisugilon kaniya ang tanan nilang nahimo ug natudlo. Daghan kaayo ang mga tawo nga nagpuli-puli sa pagpangabot ug pagpanglakaw; tungod niini si Jesus miingon sa iyang mga tinun-an, "Mangadto kita sa dapit nga awaaw aron makapahulay kamo'g diyotay." Busa nanakay sila sa usa ka sakayan ug nangadto sa usa ka dapit nga awaaw.

Apan daghan tawo ang nakakita sa ilang pagbiya ug nailhan sila dayon;

busa ang mga tawo sa tanang lungsod miadto nga nagdagan ug nahiluna pa gani pag-abot sa dapit nga giadtoan ni Jesus ug sa iyang mga tinun-an. Sa pagkawas ni Jesus sa sakayan, nakita niya kining dakong panon sa katawhan ug nalooy siya pag-ayo kanila, kay sama man sila sa mga karnero nga walay magbalantay. Ug gitudloan niya sila og daghang mga butang.

Mga igsoon, ang Maayong Balita sa atong Ginoo.

E. Komentaryo 

Tema: Pahulay Kamo...

Sa kinabuhi sa tawo, ang pagpaningkamot nahimo nang kabahin sa atong inadlaw-adlaw nga kasinatian. Maningkamot kita sa pagtrabaho aron makakwarta aron aduna kitay magamit alang sa atong inadlaw-adlaw nga panginahanglan. Maningkamot kita aron kita magmalampuson. Usahay makaingon kita nga kulang ang atong adlaw kung aduna kitay mga buluhaton nga dili nato matapos, o kung makita nato nga wala kita nagmabungahon ang atong mga paningkamot.

Isip mga sumusunod ni Jesukristo, pinaagi sa atong bunyag, kita gitahasan sa pagpaambit ngadto sa uban ang Ginoo nga atong gituohan. Kini nga pagpaambit makita diha sa atong mga buhat ug pulong. Si Jesus kahibalo nang daan nga sa atong pagpaningkamot sa pagpaambit sa Maayong Balita, sama sa gibuhat sa iyang mga tinun-an, masinati usab nato ang kakapoy. Mao nga sa atong Ebanghelyo karon, giingnan ni Jesus ang iyang mga tinun-an: "Lakaw kamo sa lugar nga awaaw, ug pahulay kamo." Kini nga mga pulong ni Jesus naghatag kanato og duha ka punto nga angay natong pamalandungan. Una, ang lugar nga awaaw. Unsa may buot ipasabot niini? Apan dinhi sa konteksto sa atong Ebanghelyo, gihatagan og igong gimbug-aton dili ang lugar, kun dili ang kahimtang o ang palibot nga adunay kahilom, adunay kalinaw, "Awaaw". Tungod kay diha sa kasinatian sa kahilom, sa mainampuong paagi, diha sa atong mga kasingkasing makita nato ang presensya sa Ginoo. Diha sa kahilom atong madungog ug atong mabati ang pagkamahigugmaon sa atong Ginoo. Ug kini nga kasinatian magdala kanato sa ikaduhang punto sa atong pagpamalandong, "pahulay kamo."

Diha sa kalinaw sa atong kasingkasing diin atong nasinati ang atong Ginoo, diha usab nato masinati ang matuod nga pagpahulay. Kay kinsa man usab ang makapahulay kung saba kaayo ang palibot? Sa giingon ria ni San Agustin kaniadto, "My heart is restless until it rest in you." Kon hubaron nato kini sa atong pinulongan kini nagkanayon: "Dili makapahulay ang akong kasingkasing hangtod nga kini mopahulay diha kanimo. Kini nagpasabot sa tinuod nga kahulogan sa pagpahulay. Pahulay kun asa kita makakaplag og igong kusog ug kadasig aron sa pagpadayon sa atong mga tahas nga gisangon kanato sa Dios. Kay anaa lamang kang Jesus ang matuod nga kalinaw (Ef. 2:14), diha gayod sa lyang presensya nato masinati ang tinuod nga pagpahulay. Apan angay usab nato hinumduman nga giingnan kita nga dili sa tinagsa nga paagi apan isip usa ka katilingban. "Pahulay Kamo". Kini nagpasabot sa kamatuoran nga kita usa ka pamilya, aduna kitay tulubagon sa usag-usa. Ug tungod niini gitawag kita nga magkahiusa diha sa pagsinati sa iyang presensya.

Sa katapusan anaa ang panghinaut nga sama sa gibuhat ni Jesukristo ngadto sa lyang mga tinun- an, ato untang mapuy-an ang usa ka pamilya nga Kristohanon nga mag-alagaray ug mag-inampuay sa matag usa. Hinaut pa unta.

Giya alang sa Pamalandong:

1. Mihatag ba kita og higayon nga makapahulay diha sa presensya sa Ginoo?

2. Aduna bay panahon sa atong kinabuhi nga kita gikapoyan?

Sa unsang paagiha kita nakapahulay?

F. Katilingbanong Pag-ampo

Pangulo: Mag-ampo kita sa atong Maloloy-on nga Amahan nga madawat nato ang grasya niining paghalad nato karon sa atong mga pag-ampo. Sa matag pangamuyo kita motubag:

GINOO, DUNGGA ANG AMONG PAG-AMPO. 

1. Mag-ampo kita alang sa mga nagdumala sa atong Simbahan nga ila untang hupngon ang tanang katawhan sa Espirituhanon panginahanglan sa ilang kinabuhi. Mag-ampo kita.

2. Mag-ampo kita alang sa mga pangulo sa atong nasud nga mahatagan unta nila og igong pagtagad ang mga panginahanglan sa katawhan ilabina niadtong nag- antus sa kawad-on ug nahiagum sa mga katalagman. Mag-ampo kita.

3. Mag-ampo kita alang sa atong mga kaigsoonan nga nag-atus sa nagkalainlaing balatian sa lawas, masinati unta nila ang grasya ug panalangin sa Dios aron ilang matagamtaman ang hinanaling kahupayan. Mag-ampo kita.

4. Mag-ampo kita alang sa mga ginikanan nga mahiusa unta sila kanunay sa gugma ug panalangin sa Dios aron maanaa kanila ang kalinaw ug paghinigugmaay sa usag usa. Mag-ampo kita.

5. Mag-ampo kita sa atong mga mahal sa kinabuhi nga nag-una na kanato ngadto sa laing kalibutan nga madawat na unta nila ang ganti nga gitagana sa Dios kanila ug ila nang matagamtaman ang kinabuhing walay katapusan. Mag-ampo kita.

6. Mag-ampo kita sa atong personal nga katuyuan diha sa kahilum.

Pangulo: Makagagahum nga Dios, sayud Ka sa among mga panginahanglan ilabina niining among gihalad karon. Malaumon kami nga dili Nimo ihikaw kanamo ang mga grasya nga angayan namong pagadawaton pinaagi ni Kristo among Ginoo ug Manunubos. Amen