IKA-KAWHAAN NGA DOMINGGO

 IKA-KAWHAAN NGA DOMINGGO

A. Unang Basahon

Panultihon 9:1-6

Ang pagbasa gikuha gikan sa basahon sa Panultihon.

Ang kaalam nagbuhat og balay alang sa iyang kaugalingon, ug kini gibutangan niya'g pito ka haligi. Nagpa-ihaw siya'g mananap aron kombirahan. Gibutangan niya'g pahumot ang bino, ug giandam na ang kan- anan. Gisugo niya ang iyang mga sulugoong babaye sa pagdapit sa mga kadagkoan sa lungsod, ug sila nag-ingon, "Tambong kamo sa kombira, mga tawong walay alamag!" Ug sa mga buangbuang, nag-ingon siya, "Dali kamo, kaon kamo sa giandam kong kalan-on ug i nom kamo sa bino nga akong giandam kaninyo. Biya-i ang mga walay alamag ug dili kamo mamatay. Sunda ninyo ang dalan sa kahibalo."

Mga igsoon, ang Pulong sa Ginoo.

B. Salmo Responsoryo

Salmo 34:2-3,10-11,12-13,14-15

Tubag (R) - Tagamtama ug sinati-a ang kaayo sa Ginoo.

Dayegon ko ang Ginoo sa tanang panahon ang iyang pagdayeg maania kanunay sa akong baba. Pahimaya-a ang akong kalag diha sa Ginoo; ang mapaubsanon makadungog kanako ug malipay. (R)

Kahadloki ang Ginoo, kamong iyang mga balaan kay walay makulang kanila nga mahadlokon kaniya. Ang mga dagko nahimong kabus ug gutom; apan sila nga nangita sa Ginoo wala magmakulang sa bisan unsang butang nga maayo. (R)

Umari kamo, mga kabataan, pamati-a ako; tudloan ko kamo sa kahadlok sa Ginoo. Kinsa kaninyo ang nagatinguha sa kinabuhi, ug malipay sa mga adlaw sa kahumugaway? (R)

Ilikay ang inyong dila sa mangil-ad ug ang inyong mga ngabil sa pagsulti og maut. Likayi ang dautan, ug pagbuhat sa maayo pangita-a ang kalinaw, ug sunda kini. (R)

C. Ikaduhang Basahon

Efeso 5:15-20

Ang pagbasa gikuha gikan sa sulat ni San Pablo ngadto sa taga-Efeso.

Busa pagmatngon kamo pag-ayo sa inyong pagkinabuhi. Ayaw kamo pagkinabuhi sama sa mga ignorante kondili sama sa mga maalam. Ayoha paggamit ang inyong panahon kay daotan kining mga adlawa. Busa ayaw kamo pagpakabuang, kondili paningkamoti nga masayran ninyo ang kabubut-on sa Ginoo alang kaninyo.

Ayaw kamo paghuboghubog kay makadaot kini kaninyo, hinonoa, tinguha-a ninyo nga mapuno kamo sa Espiritu. Sa inyong pagsultisulti gamita ninyo ang mga salmo, mga imno ug mga balaang awit; awiti ninyo ug dayga sa kinasingkasing ang Ginoo. Sa ngalan sa atong Ginoong Jesukristo pagpasalamat kamo kanunay sa Dios Amahan tungod sa tanang butang.

Mga igsoon, ang Pulong sa Ginoo.

D. Ebanghelyo

Juan 6:51-58

Ang pagsangyaw sa Maayong Balita sumala ni San Juan.

Si Jesus miingon sa katawhan, "Ako ang pan nga gikan sa langit nga naghatag sa kinabuhi. Ang mokaon niining pan dili gayud mamatay. Ug ang pan nga akong gihatag mao ang akong unod aron mabuhi ang kalibutan."

Nakahaling kini og mainit nga paglalisay sa mga Judio. "Unsaon man niining tawhana paghatag kanato sa iyang lawas aron kan-on?" nangutana sila.

Si Jesus miingon kanila, "Sultihan ko kamo: kon dili kamo mokaon sa unod sa Anak sa Tawo ug dili moinom sa iyang dugo, dili kamo makabaton sa kinabuhi. Ang mokaon sa akong unod ug moinom sa akong dugo may kinabuhing walay katapusan ug banhawon ko siya sa katapusang adlaw.

Kay ang akong unod mao ang matuod nga kalan-on, ug ang akong dugo mao ang matuod nga ilimnon. Ang mokaon sa akong unod ug moinom sa akong dugo magpuyo dinhi kanako ug ako diha kaniya. Ang buhing Amahan maoy nagdala kanako ug tungod kaniya nabuhi usab ako. Sa samang pagkaagi; ang mokaon kanako mabuhi tungod kanako. Busa kini mao ang pan nga gikan sa langit; dili kini sama sa pan nga gikaon sa inyong mga katigulangan ug unya nangamatay gihapon sila. Ang mokaon niining maong pan mabuhi sa dayon."

Mga igsoon, ang Maayong Balita sa atong Ginoo.

E. Komentaryo 

Tema: Ang Pagkaon nga nagahatag og Kinabuhi.

Usa sa mga kinaiya nga ganahan kaayo kitang mga Filipino mao ang pagkaon. Nga kung atong lantawon ang palibot karong panahona, nagkadaiya ang nagtinda og pagkaon, mga restaurant, panaderia, ug mga "minute burger". Dugang pa niini, sa panahon nga dunay pista, bisan nagkalisud maningkamot gayod kita nga mangandam ug maghikay aron makapakaon sa mga bisita nga atong gidapit. Bisan dyutay ang giandam nga pagkaon, kusog gihapon kaayo manawag, "Dali mo diri kay naa pay gamay nabilin". Kay lagi dili kita buot nga mapasmo ang atong bisita ug mga higala. Ug dili usab kita mobalibad kay bisan og human na kita og kaon sa ubang balay, mokaon lang gihapon kita. Kataw-anan, pero naghulagway kini kung unsa nato ka paborito ang pagkaon.

Sa unang pagbasa, naghulagway usab og usa ka kombira. Bisan pa tuod nga mga walay alamag ug mga buang-buang ang gipang-imbita, apan ang preparasyon sa kombira maanindot gihapon. Nagpaihaw siya og mananap ug gipalamian niya ang bino. Bisan ang mga bisita ug wala mahisakop sa hataas nga hut-ong sa katilingban apan dili gihapon matukib ang kamaayo nga iyang gipakita kanila sa pag-andam sa kombira.

Ang atong Ebanghelyo naghisgot usab og pagkaon. Apan kini nga pagkaon, pan nga gikan sa langit nga nagahatag sa kinabuhi. Dugang pa gayod niini, ang mokaon niining pan dili gayod mamatay. Sama sa mga tawo sa panahon ni Jesus. Kung atong hinuktukan makapangutana kita, unsa man kining nga klase sa pan? Gamhanan ba kini kay makahatag man og kinabuhi? Apan si Jesus nagpadayag: "Ako mao ang pan nga gikan sa langit nga naghatag sa kinabuhi. Ang mokaon niining pan dili gayod mamatay. Ug ang pan nga akong ihatag mao ang akong unod aron mabuhi ang kalibutan".

Tataw kaayo mga igsoon nga sa kanunay gipahinumduman kita nga si Jesus nagahatag kanato kanunay sa iyang kaugalingon alang sa kaluwasan sa tanan. Luyo sa atong mga kakulangan ug kapakyasan sa pagsunod sa iyang mga balaod siya nagpadayon sa paghatag sa iyang kaugalingon kanato.

Kon atong pamalandungan pag-ayo ato kining ikatandi kon unsa ka nindot ang kombira sa kinabuhi. Giandaman kita sa tanan, gikan sa tiyan sa atong inahan nasinati nato ang kahayahay sa kinabuhi, siyam ka bulan nga nindot kaayo nga pagpuyo, walay kasakitan ug mga kagul-anan. Nasinati nato, nga kita luwas ug anaa ang matuod nga paghigugma ug pag-amoma. Sa laing bahin, kung mahuman na ang atong kinabuhi niining kalibutana kita mopanaw niining kalibutan nga atong gipuy-an kay giandaman usab pud og maayong luna diin lunlon kalipay ug panaghiusa maoy maghari, kung diin ang walay puas nga kombira gipahigayon. Apan ang kamatuoran sa kinabuhi nagapunting usab dili lunlon kalipay ang atong matagamtam niining kinabuhia kon dili aduna gayod mga kasakitan. Anaa kanunay ang mga pagsulay. Makasinati kita og kapait ug kalisud nga usahay maoy magtukmod kanato aron kita mabugnaw sa atong pagtoo, pagsalig ug paglaum sa umaabot nga gingharian.

Mao nga ang hagit kanato karon: una, kinahanglan nga kita andam kanunay nga modawat kang Kristo sa matag-adlaw sa atong kinabuhi. Kini masinati nato diha sa makanunayon natong pag- apil sa Santos nga Misa, diin si Kristo sa kanunay naghatag sa iyang kaugalingon nganhi kanato. Usa kini ka pahinumdum kanato kung unsa ang nahitabo didto sa krus, diin si Kristo andam nga mihalad sa iyang kaugalingon alang sa kapasayloan sa atong mga sala. Siya ang pan nga gikan sa langit nga naghatag og kinabuhing walay katapusan. Ikaduha, sama sa hagit sa unang pagbasa nga unta dili kita magpabiling buta sa kamatuoran, ug unta andam kita makigbisog niini, kay kini mao man ang magdala kanato haduol sa Ginoo. Ikatulo, maningkamot kita nga mapuno unta kita sa Espiritu Santo aron sa kanunay magsubay kita sa maayong dalan sa kinabuhi ug nga mapuno ang atong kasingkasing sa pagdayeg ug pagpasalamat sa Ginoo aron sa paghatag og kahimayaan sa lyang ngalan. Ikaupat, dili unta kita makalimot sa pagpasalamat sa Ginoo sa Iyang makanunayong pag- amoma ug paghigugma kanato nga walay kinutuban. Sa makanunayon Niyang pag-andam kanato og maanindot nga luna ug kombira sa pag-abot na sa panahon. Ang pagpasalamat usa ka paghatag og bili sa iyang kaayo kanato nga walay utlanan.

Sa katapusan, dili lang kita mangandoy sa kombira nga maghatag og kabusog sa atong lawas kon dili ato untang pangandoyon ang kombira nga kanunay gitagana sa Dios kanato aron diha sa makanunayon natong pag-apil sa Santos nga Misa diin gihatag ni Jesus ang Iyang kauglingong Lawas ug Dugo aron kita kanunay nga mahiusa kaniya sa iyang walay kinutubang gugma ug pag-amoma. Kini ang matuod kombira nga magtagbaw sa gigutom natong mga kalag nga walay laing makahatag og katagbawan niini kun dili ang Lawas ug Dugo ni Kristo nga giandam diha sa altar.

Giya alang sa Pamalandong:

1. Kanunay ba natong gihatagan og bili ang kombira nga gitagana kanato sa Dios?

2. Wala ba kita magdumili sa pagtambong sa pagdapit sa Ginoo kanato sa iyang makaluwas nga kombira?

F. Katilingbanong Pag-ampo

Pangulo: Sa hiniusang tingog ato karong ipadangat sa Makagagahum nga Amahan ang atong mga pag-ampo ug pangaliyupo uban sa atong dakung pagsalig. Sa matag pag-ampo kita motubag:

GINOO DUNGGA KAMI.

1. Nga ang Ginoo magauban kanunay sa Iyang Simbahan ilabina sa Santo Papa, mga Obispo ug kaparian ug mag-agak kanila ngadto sa Iyang Gingharián. Mag- ampo kita.

2. Nga ang Ginoo manalangin unta kanunay sa atong nasud ilabina sa nagdumala niini aron ang kalinaw, gugma ug kahiusahan maoy maangkon sa tanan. Mag-ampo kita.

3. Nga ang presensya sa Ginoo mohupay unta sa tanan natong mga kaigsoonan nga nag-antus sa ilang balatian aron ilang mabatunan ang kahupayan. Mag-ampo kita.

4. Nga ang Ginoo magauban unta kanunay sa matag katilingban aron ilang mabatunan ang kalambuan subay sa Kristohanong panig-ingnan. Mag-ampo kita.

5. Nga ang Ginoo maggiya unta sa matag usa kanato kinsa naningkamot nga mahiusa kanunay Kaniya diha sa atong pagpanaw paingon sa Iyang Gingharian diin ang kalipay nga walay pagkatapos maoy atong matagamtaman. Mag-ampo kita.

6. Nga ang atong personal nga katuyuan ato kining ihalad sa Ginoo diha sa kahilum.

Pangulo: Mahigugmaon namong Amahan, diha sa Imong kalooy amo nang nahalad ang among mga panginahanglan. Malaumon kami nga Imong dunggon ang among gipangayo Kanimo pinaagi sa Imong Bugtong Anak si Jesukristo among Ginoo ug Manunubos. Amen.