Ikanapulog-usa nga Domingo

Ikanapulog-usa nga Domingo Sulod sa Tuig

PASIUNA

June 16, 2024

Maayong buntag/hapon mga igsuon diha ni Cristo.

Karong Domingoha mao ang Ikanapulo'g-usa nga Domingo sa Ordinaryong Panahon. Karon usab atong gisaulog ang Father's Day. Atong iapil sa atong pag-ampo ang tanang mga amahan.

Ang unang pagbasa gikuha gikan sa Basahon ni Propeta Ezequiel. Dinhi atong madungog ang Ginoo nga nag-ingon, "Akoy mopalaya sa lunhaw'ng kahoy uy mopalambo sa laya nga kahoy. Ako ang Ginoo, nagsulti ug tumanon ko gayod kini."

Ang ikaduhang pagbasa gikuha gikan sa Ikaduhang Sulat ni San Pablo nagdto sa taga-Corinto. Siya mipahinumdom kanila diha sa pag-ingon, "Apan labaw sa tanan, buot kitang magpahimuot Kaniya bisan dinhi sa atong puloy-anan o didto."

Ang Ebanghelyo gikuha gikan sa Santos nga Ebanghelyo sumala ni San Marcos. Dinhi atong madungog si Jesus nga naghisgot sa Gingharian sa Dios pinaagi sa Sambingay sa liso sa mustasa.

Palihug manindog alang sa pagsugod sa Santos nga Eyukaristiya.

Salmo Responsoryo:

Ginoo, mayo gayod ang pagpasalamat Kanimo.

Katilingbanong Pag-ampo:

Amahan nga Langitnon, dungga kami.

BASAHON I

Ez. 17:22-24

KINUTLO GIKAN SA BASAHON NI PROPETA EZEQUIEL

Nag-ingon ang GINOONG DIOS,

"Ako mismo magkuhag salingsing sa kinatumyang bahin sa sidro, ug itanom ko kini sa kinahabogan bukid sa Israel; mananga kini ug mamunga ug mahimo kining matahom nga sidro. Magpuyo sa ilalom niini ang tanang matang sa mananap; ug sa landong sa mga sanga niini magsalag ang mga langgam. Ang tanang kakahoyan sa kaumahan masayod unya nga ako, ang GINOO, maoy moputol sa habog nga kahoy, ug mopataas sa mubo nga kahoy. Akoy mopalaya sa lunhawng kahoy ug mopalambo sa laya nga kahoy. Ako, ang GINOO, nagsulti niini ug tumanon ko gayod kini." ANG PULONG SA GINOO.

SALMO RESPONSORYO

Ps. 92:2-3, 13-14, 15-16

R. Ginoo, maayo gayod ang pagpasalamat kanimo.

Maayo ang pagpasalamat sa Ginoo, ang pag-awit og pasalamat sa imong ngalan, O Labing Halangdon. Pagsangyaw sa imong kaluoy sa kaadlawon ug sa imong kamatinud-anon sa tibuok nga gabii.

R. Ginoo, maayo gayod ang pagpasalamat kanimo.

Ang matarong nga tawo molambo ingog palmira, ingog sidro sa Libano motubo siya. Sila nga gitanom diha sa balay sa Ginoo molambo diha sa kahawanan sa atong Dios.

R. Ginoo, maayo gayod ang pagpasalamat kanimo.

Mamunga sila bisan diha sa katigulangon; Makusganon ug malig-on sila, Nagapadayag unsa katarong ang Ginoo, ang akong Bato, diha kaniya walay kasaypanan.

R. Ginoo, maayo gayod ang pagpasalamat kanimo.

BASAHON II

2 Cor. 5:6-10

KINUTLO GIKAN SA IKADUHANG SULAT NI SAN PABLO NGADTO SA TAGA-CORINTO

Busa kanunay kitang masaligon kaayo. Nasayod kita nga samtang ania kita niining lawasa, layo kita sa puloy- anan sa Ginoo. Kay nagkinabuhi man kita pinaagi sa pagtuo ug dili pinaagi sa atong makita. Masaligon kita kaayo ug palabihon nato nga mamiya kita sa atong puloy-anan niining lawasa ug mamuyo uban sa Ginoo. Apan labaw sa tanan, buot kitang magpahimuot kaniya bisan dinhi sa atong puloy-anan o didto. Kay kinahanglan moatubang kitang tanan kang Cristo aron iyang hukman, aron ang tagsatagsa makadawat sa angay kaniya sumala sa iyang nabuhat, maayo o dautan, dinhi sa kalibutan.

ANG PULONG SA GINOO.

EBANGHELYO

Mk. 4: 26-34

Kinutlo gikan sa Balaan nga Ebanghelyo sumala ni Marcos

Ug miingon si Jesus sa panon sa katawhan, "Ang gingharian sa Dios sama sa usa ka tawo nga nagsabod og binhi ngadto sa yuta. Ug natulog ug nagtukaw gabii ug adlaw, ug ang binhi miturok ug mitubo sa paagi nga wala niya mahibaloi. Sa iyang kaugalingon ang yuta mipagula, una sa dahon, dayon sa uhay, dayon sa tibuok lugas diha sa uhay. Ug sa pagkahinog sa bunga, dihadiha dayon iyang dad-on ang galab, tungod kay ting-ani na."

Ug miingon siya, "Sa unsa man nato ikatandi ang gingharian sa Dios o unsa mang sambingaya atong magamit alang niini? Sama kini sa liso sa mustasa nga sa dihang gipugas kini sa yuta, mao ang kinagamyan nga liso sa tanang binhi sa yuta. Apan sa pagpugas niini, motubo ug mahimong labing dako sa tanang mga tanom ug mananga kinig dagko, mao nga ang kalanggaman sa langit makahimo pagsalag ubos sa iyang landong."

Ug sa susama niining daghang sambingay misulti siya kanila sa pulong sumala sa ilang katakos pagpaminaw. Ug gawas sa sambingay wala siya mamulong kanila; apan kon sila ra sa iyang mga tinun-an iyang gipasabot ang tanan.

Ang Ebanghelyo sa Ginoo.

KATILINGBANONG PAG-AMPO

June 16, 2024

Pari: Mga igsuon, ang atong Ginoo nagpahinumdom kanato nga Siya mao ang motuman sa tanan ug mopalambo niini. Atong ipadangat karon ngadto sa Dios ang atong panginahanglan diha sa pag- ingon:

AMAHAN NGA LANGITNON, DUNGGA KAMI.

1. Amahan nga Langitnon, himoa nga mamahimong buhi ang imong gugma ug mamahimong dayag ngadto sa mga nag-alagad sa Simbahan ilabina kang Santo Papa Francisco, Arsobispo Romulo, Kaparian, mga Relihiyoso ug mga Diyakono. Mag-ampo kita.

2. Amahan nga Langitnon, dasiga ug hatagi sa kabuhong sa imong grasya ang mga namunuan sa panggamhanan ug lig-ona sila aron mamahimo silang mga instrumento sa kalinaw ug kaangayan. Mag- ampo kita.

3. Amahan nga Langitnon, ibubo ang imong grasya ug gugma sa mga magtutuo nga nakasinati og mga sakit sa lawas, mga anaa sa kalisod ug kapit-os, ug mga biktima sa inhustisya. Mag-ampo kita.

4. Amahan nga Langitnon, hatagi og kusog ug kalig-on, kalipay ug kalinaw ang tanang mga amahan nga among gipasidunggan karong adlawa ug pinaagi sa pangama ni San Jose Esposo ni Maria, mapaambit nila kini ngadto sa ilang tagsa-tagsa ka pamilya. Mag- ampo kita.

5. Amahan nga Langitnon, pun-a sa Espiritu sa kaayo, ug gugma ang among mga igsuon nga mihalad sa ilang pasalamat ug pagdayeg nganha Kanimo ilabina nila _____ Mag-ampo kita.

6. Amahan nga Langitnon, dawata diha sa imong gingharian ang mga magtutuong nangamatay ilabina sila _______ Mag-ampo kita.

Pari: Ginoong Dios, sa imong mga kamot among itugyan ang among mga pag-ampo ug panginahanglan uban sa among dakong pagsalig ug pagtuo nga pinaagi Kanimo molambo kami ug motubo diha sa imong ugma. Kini among gipangayo pinaagi ni Cristo nga among Ginoo. Amen.

PAHIBALO:

June 16, 2024

1. Si Reberendo RANIE BOY LABADAN PAMPLONA, ordinahan pagka Pari karong umaabot nga Junyo 20, 2024 sa alas 9:30 sa buntag didto sa St. Joseph the Worker Parish, Sasa, Davao City. Ug sila Reberendo diakono SOREN HELBERO ABELLANOSA sa St. Francis of Assisi Parish-Maa, AMIEL ESPIÑA ARADO sa San Antonio de Padua Parish-Agdao, JUNEL ETULLE BUSTAMANTE sa San Roque Parish-Malabog, CIECILIO LOPE CANICO sa Holy Family Parish-Baliok, RITZCHILD JOHN SABERON CARIAGA sa San Pablo Parish-Juna Subd., Matina, ANGELO CELIS ESPINAS sa St. Mary of the Perpetual Rosary Parish-Buhangin, JULIUS ESPONGA LUGAY sa St. Jude Shrine Parish-Malvar St., ALCRIS GUTIERREZ PANGANIBAN sa St. Francis of Assisi Parish-Maa, Pagaordinahan pagkapari karong Hunyo 29, sabado sa alas 9:00 sa buntag didto sa San Pedro Cathedral.

Giawhag kadtong mga adunay mga pagbabag nga may kalabutan sa maong ordinasyon sa pagpaabot niini ngadto sa Arsobispo sa Dabaw pinaagi sa pagsulat sa tinuod nga mga basihanan sa mga reklamo, uban sa pangalan ug contact details sa nagpadala. Giawhag usab ang tanan sap ag-ampo alang sa atong mga diakono. Daghang salamat.