IKA-NAPULO'G-USA NGA DOMINGGO

 IKA-NAPULO'G-USA NGA DOMINGGO

A. Unang Basahon

Ezequiel 17:22-24

Ang pagbasa gikuha gikan sa basahon ni Propeta Ezequiel.

Nag-ingon ang Ginoong Dios, "Ako mismo magkuha'g salingsing sa kinatumyang bahin sa sidro, ug itanom ko kini sa kinahabogang bukid sa Israel; mananga kini ug mamunga ug mahimo kining matahom nga sidro. Magpuyo sa ilalom niini ang tanang matang sa mananap; ug sa landong sa mga sanga niini magsalag ang mga langgam. Ang tanang kakahoyan sa kaumahan masayud unya nga ako, ang Ginoo, maoy moputol sa habog nga kahoy, ug mopataas sa mubo nga kahoy. Akoy mopalaya sa lunhawng kahoy ug mopalambo sa laya nga kahoy. Ako, ang Ginoo, nagsulti niini ug tumanon ko gayud kini."'

Mga igsoon, ang Pulong sa Ginoo.

B. Salmo Responsoryo

Salmo 92:2-3,13-14,15-16

Tubag (R) Ginoo, maayo gayod ang pagpasalamat kanimo.

Maayo ang pagpasalamat sa Ginoo, ang pag-awit og pagdayeg sa imong ngalan, O Labing Halangdon. Ang pagsangyaw sa imong kalooy sa kaadlawon ug sa imong kamatinumanon sa tibook gabii. (R)

Ang matarong molambo ingo'g palmera, ingo'g sidro sa Libano motubo siya. Sila nga gitanum diha sa balay sa Ginoo molambo diha sa kahawanan sa atong Dios. (R)

Mamunga sila bisan diha sa katigulangon; makusganon ug malig-on sila. Magpadayag sila unsa katarong ang Ginoo, ang akong Bato, diha kaniya walay kasaypanan. (R)

C. Ikaduhang Basahon

2 Corinto 5:6-10

Ang pagbasa gikuha gikan sa ikaduhang sulat ni San Pablo ngadto sa taga- Corinto.

Busa kanunay kitang masaligon kaayo. Nasayud kita nga samtang ania pa kita niining lawasa, layo kita sa puloy-anan sa Ginoo. Kay nagkinabuhi man kita pinaagi sa pagtoo, dili sa atong makita. Masaligon kita kaayo ug palabihon nato nga mamiya kita sa atong puloy-anan niining lawasa ug mamuyo uban sa Ginoo. Apan labaw sa tanan, buot kitang magpahimuot kaniya bisan dinhi sa atong puloy-anan o didto. Kay kinahanglan maotubang kitang tanan kang Kristo aron iyang hukman, aron ang tagsatagsa makadawat sa angay kaniya sumala sa iyang nabuhat dinhi sa kalibutan, maayo o daotan.

Mga igsoon, ang Pulong sa Ginoo.

D. Ebanghelyo

Marcos 4:26-34

Ang pagsangyaw sa Maayong Balita sumala ni San Marcos.

Unya mipadayon si Jesus pagsulti, "Ang Gingharian sa Dios sama sa tawo nga nagpugas og binhi sa iyang uma. Ug samtang nagpadayon siya sa iyang buluhaton adlaw-adlaw, miturok ug mitubo ang mga binhi sa paagi nga wala niya masabti. Ang yuta maoy nagpatubo ug nagpabunga sa mga tanom: maoy mouna ang linghod nga punoan, unya mosunod ang iyang uhay, ug unya ang bus-ok nga mga lugas. Ug inigkahinog na, galabon kini kay ting-ani na man.

"Sa unsa mang buta nga ikatandi nato ang Gingharian sa Dios?" nangutana si Jesus. "Unsa mang sambingaya ang gamiton nato sa pagsaysay niini? Sama kini sa liso sa mustasa nga maoy labing gamay nga liso dinhi sa kalibutan. Kon itanom kini ug makatubo na, mahimo kining labing dako ug ang mga langgam manugdon ug magsalag sa landong niini."

Nagwali si Jesus ngadto sa mga tawo ginamit ang ubang sambingay nga sama niini, apan gisulti lamang niya ang masabot nila. Wala siyay gisulti kanila nga wala ipaagi sa mga sambingay. Apan kon ang iyang mga tinun-an lamang ang kauban niya, iyang isaysay kanila ang tanan.

Mga igsoon, ang Maayong Balita sa atong Ginoo.

E. Komentaryo

Tema: Ang pamaagi sa Ginoo, pinakanindot nga pamaagi sa tanang pamaagi.

Adunay usa ka sugilanon mahitungod sa usa ka tawo nga nangayo og duha ka butang sa iyang agalon. Una nangayo siya og usa ka bangan nga bulak apan gihatagan hinoon siya og cactus nga daghan kaayo og tunok. Ikaduha mihangyo siya nga hatagan siya og alibangbang, apan gihatagan hinoon siya og ulod. Nahiubos ang tawo sa iyang agalon tungod kay dili man mao ang gihatag kaniya kay sa iyang gipangayo. Apan nilabay ang mga adlaw iyang namatikdan nga ang daghan kaayo'g tunok nga Cactus nilabong ug namulak og nindot kaayo. Ang ulod nahimong alibangbang nga maanyag kaayong sud-ungon sa mga mata. Gusto lang diay tudloan sa iyang agalon ang tawo kung unsaon nga mamahimong pasensyoso, mosalig ug motuo sa iyahang pamaagi tungod kay nakahibalo siya kung unsay makaayo alang kaniya.

Ang unang pagbasa naghisgot sa otoridad sa Ginoo. Kini nagpasabot nga Siya dunay dakong gahom ug kalambigitan sa tanang matang sa kinabuhi sa tawo dinhi sa kalibutan. Nagpahinumdom usab kini nga Siya mao gayud ang Dios nga gamhanan, kinsa adunay dakong katungod sa mga panghitabo sa atong kinabuhi sumala sa Iyang kabubut-on. Ang ikaduhang pagbasa, nagpadayag nga kinahanglan kanunay kitang magmasaligon Kaniya ug motuo nga walay pagduhaduha makita ug dili makita.

Ang atong Ebanghelyo karon, naghisgot sa duha ka sambingay mahitungod sa Gingharian sa Dios. Una, sama kini sa usa ka tawo nga nagsabod og binhi sa iyang uma; ug ikaduha, sama kini sa liso sa mustasa nga maoy labing gamay nga liso sa kalibutan. Tataw kaayo nga naghulagway kini sa usa ka misteryoso nga pagtubo. Diha sa pagtubo atong masinati ang paglihok sa mga kamot sa Ginoo. Nagpadayag kini sa makanunayong presensya sa Ginoo diha sa atong kinabuhi. Nagpasabot kini nga Siya nagauban gayod kanato hangtud sa hangtud. Ang Ginoo gayud maoy hinungdan niini, tinuod walay gitawag og "magic" sa kinabuhi. Moagi gayod kitang tanan sa husto nga proseso. Ang mensahe niini, mao nga ang tanang dagkong butang nga nahitabo sa atong kinabuhi nagsugod gayod sa gagmay'ng butang. Usahay, atong gihatagan og dakong pagtagad ang mga dagkong butang sa atong kinabuhi kung asa kongkreto natong masinati ang pagkamanggihatagon sa Ginoo ug atong gibaliwala ang paghatag og gimbug-aton sa gagmay'ng butang nga nahitabo. Wala kita masayod nga kini diay nga mga gagmay'ng butang maoy modala kanato ngadto sa pinakadagko ug bililhong gasa sa Ginoo.

Ang binhi ug liso sa mustasa nga gigamit sa sambingay simbolo sa mga pulong sa Ginoo nga dunay dakong gahom sa pagdala kanato sa kinabuhing dayon. Kini modulot gayud sa kasingkasing sa tawo ug motubo ug maoy mahimong tinubdan sa atong kusog ug kalipay. Kung sumadahon nato ang estorya, ang Ginoo buot gayud motudlo ug mopadayag kanato kung unsa ang tinuoray nga paghulat ug pagsalig sa Iyang kabubut-on ug pagkamanggihatagon. Kini tungod kay ang iyang pamaagi maoy pinakaanindot sa tanang pamaagi. Siya nakahibalo kung kanus-a ang husto nga panahon alang kanato. Busa kita mosalig ug molaum diha sa Ginoo kay Siya kanunay nga anaa kanato.

Sa katapusan, gihagit kita nga magmakanunayon sa atong pagtoo ug pagsalig sa iyang grasya. Kinahanglan nato tun-an ang tinuoray nga paghulat aron motubo kita ug magmabungahon subay sa kabubut-on sa Dios nga Amahan. Ug isip usa ka binunyagan nga nakadawat sa pulong sa Ginoo, magmadasigon usab unta kita sa pagdapit sa uban aron sa ingon sila makakaplag ug motubo usab sa pulong sa Dios nga maoy tuburan sa kinabuhi.

Giya alang sa pamalandong:

1. Isip mga binunyagan gibuhat ba nato ang angay alang sa kahimayaan sa Dios?

2. Nagsunod ba kita kanunay sa pamaagi ug kabubut-on sa Dios?

F. Katilingbanong Pag-ampo

Pangulo: Sa kinasingkasing nga pagtoo, ato karong ihalad sa Makagagahum nga Dios ang atong mga pag-ampo ug panginahanglan. Sa matag pag-ampo kita motubag: 

GINOO, DUNGGA ANG IMONG KATAWHAN.

1. Nga ang tibuok Simbahan ilabina sa nangulo niini, ang Santo Papa, mga Obispo ug kaparian unta ang pagtoo nga gitisok molambo ug maghari sa matag usa aron masinati ang gugma ug panagdait sa tanan. Mag-ampo kita.

2. Nga ang gugma ug kaangayan maoy maghari sa matag galamhan sa mga lideres sa atong panggamhanan aron ang pagsinabtanay ug kahiusahan maoy magpatigbabaw sa atong tagsa tagsa ka katilingban. Mag-ampo kita.

3. Nga ang diwa sa pagkamanggihatagon ug kamaalagaron maoy maghari sa kasingkasing sa atong mga batan-on aron motahan sila sa ilang kaugalingon sa bokasyon sa pagkapari ug pagkarelihiyoso, Mag-ampo kita.

4. Nga ang mga misyonero madasig sa ilang gimbuhaton sa pagpakaylap sa Maayong Balita sa atong Ginoo ngadto sa tanang katawhan ilabina sa atong mga kaigsoonan nga wala pa makaila kang Kristo. Mag- ampo kita.

5. Nga ang matag usa kanato makabaton sa lig-on nga pagtoo aron magkahiusa kitang moalagad sa atong mga kaigsoonan diha sa atong tagsa tagsa ka katilingban. Mag- ampo kita.

6. Nga ang atong personal nga katuyuan, ato kining ihalad diha sa kahilum.

Pangulo: Amahan nga mahigugmaon, Imong nadungog ang among mga pag-ampo ug panginahanglan. Malaumon kami nga amo nang madawat ang grasya nga Imong gitagana kanamo pinaagi ni Kristo Imong Bugtong Anak ug among Ginoo hangtud sa kahangturan. Amen.