Ikaupat nga Domingo sa Pagkabanhaw

Ikaupat nga Domingo sa Pagkabanhaw

PASIUNA

April 21, 2024

Maayong buntag/hapon mga igsuon ko diha ni Cristo.

Ania na kita sa Ikaupat nga Domingo sa Pagkabanhaw sa atong Ginoo. Karong Domingoha usab mao ang Good Shepherd Sunday ug World Day of Prayer for Vocation.

Ang unang pagbasa gikuha gikan sa Buhat sa mga Apostoles. Dinhi gisaysay ni San Lucas nga si Pedro miingon sa mga kadagkoan sa Templo nga, "Si Jesus mao 'Ang bato nga gisalikway ninyong mga magtutukod og balay nga nahimo hinuon nga labing importanteng bato."

Ang ikaduhang pagbasa gikuha gikan sa Unang Sulat ni San Juan. Siya mipahinumdom ngadto kanila mahitungod sa dakong gugma sa Amahan.

Ang ebanghelyo gikuha gikan sa Balaan nga Ebanghelyo sumala ni San Juan. Kini nagsaysay mahitungod sa pagpadayag ni Jesus isip "Maayong Magbalantay"

Palihug manindog alang sa pagsugod sa Santos nga Eyukaristiya.

Salmo Responsoryo:

Ang bato nga gisalikway sa mga magtutukod nahimong bato kanato.

Katilingbanong Pag-ampo:

Jesus, Maayong Magbalantay, dungga kami.

BASAHON I

Acts 4:8-12

KINUTLO GIKAN SA MGA BUHAT SA MGA APOSTOLES

Si Pedro nga napuno sa Espiritu Santo mitubag kanila, "Mga pangulo sa ka- tawhan ug mga kadagkoan sa Templo: kon kami gisukit-sukit karon mahitungod sa maayong buhat nga nahimo alang sa bakol, ug sa unsang paagiha siya naayo, nan angay masayod kamong tanan ug ang tanang katawhan sa Israel, nga kining tawhana nga nagtindog dinhi sa inyong atubangan naayo sa hingpit pinaagi sa gahom sa ngalan ni Jesucristo nga Nazaretnon-kadtong inyong gilansang sa krus ug unya gibanhaw sa Dios. Si Jesus mao ang gihisgotan sa Kasulatan nga nag- ingon, 'Ang bato nga gisalikway ninyong mga magtutukod og balay Nahimo hinoon nga labing importanting bato.'

Ang kaluwasan makaplagan lamang diha kaniya, kay wala nay laing ngalan sa tibuok kalibutan nga gihatag sa Dios ngadto sa katawhan nga makaluwas kanato."

ANG PULONG SA GINOO.

SALMO RESPONSORYO

Ps. 118:1, 8-9, 21-23, 26, 21, 29

R. Ang bato nga gisalikway sa mga magtutukod nahimong bato sa kanto.

Pasalamati ninyo ang Ginoo, kay siya maayo, kay ang iyang kaluoy nagalungtad hangtod sa kahangturan. Labing maayo ang pagdangop sa Ginoo kay sa pagsalig sa tawo. Labing maayo ang pagdangop sa Ginoo kay sa pagsalig sa mga prinsipe.

R. Ang bato nga gisalikway sa mga magtutukod nahimong bato sa kanto. 

Pasalamatan ko ikaw, kay gipatalinghugan mo ako ug nahimo kang akong manluluwas.

Ang bato nga gisalikway sa mga magtutukod nahimong bato sa kanto.

Sa Ginoo nahimo kini; kahibulongan kini atubangan sa atong mga mata.

R. Ang bato nga gisalikway sa mga magtutukod nahimong bato sa kanto. 

Daygon siya nga nagaanhi sa ngalan sa

Ginoo; daygon ikaw namo gikan sa balay sa Ginoo.

Pasalamatan ko ikaw, kay gipatalinghugan mo ako ug nahimo kang akong manluluwas, Pasalamati ninyo ang Ginoo, kay siya maayo; kay ang iyang kaluoy nagalungtad hangtod sa kahangturan.

R. Ang bato nga gisalikway sa mga magtutukod nahimong bato sa kanto.

BASAHON II

1 Jn. 3:1-2

KINUTLO GIKAN SA UNANG SULAT NI SAN JUAN

Palandonga ninyo unsa kadako ang paghigugma sa Amahan kanato! Gi- higugma kita niya pag-ayo nga tungod niini giisip kitang mga anak sa Dios ug kini matuod gayod. Wala makaila kanato ang kalibutan, kay wala man kini makaila sa Dios. Minahal kong mga igsuon, kita karon mga anak na sa Dios, apan wala pa nato matino kon maunsa gayod kita. Ang nasayran nato mao nga inigpadayag na ni Cristo mahisama kita kaniya, kay makita man nato siya sa iyang pagkamao gayod.

ANG PULONG SA GINOO.

EBANGHELYO

Jn. 10: 11-18

Kinutlo gikan sa Balaan nga Ebanghelyo sumala ni Juan

Jesus Siyang miingon sa mga tinun-an: "Ako ang maayong magbalantay sa karnero. Ang maayong magbalantay sa karnero maghalad sa iyang kinabuhi alang sa iyang mga karnero. Ang sinuholan, nga dili magbalantay ug dili tag-iya sa mga karnero, nakakita sa lobo nga moduol, ug biyaan niya ang mga karnero ug molayas, ug ang lobo magsakmit ug magpatibulaag sa mga karnero. Tungod kay ang sinuholan walay kabalaka sa mga karnero kay dili kini iyaha.

"Ako ang maayong magbalantay sa mga karnero ug nakaila ako sa akong mga karnero, ug ang akong mga karnero nakaila kanako. Sama sa Amahan nga nakaila kanako, ako usab nakaila sa Amahan, ug ang akong kinabuhi akong ihalad alang sa mga karnero. Apan ako adunay ubang mga karnero nga wala dinhi sa hawan; kinahanglan nga dad-on ko sila dinhi ug maminaw sila sa akong tingog, ug mahimo silang usa ka panon, usa ang magbalantay.

"Tungod niini ang Amahan nahigugma kanako, kay ako naghalad sa akong kinabuhi, aron nga madawat ko kini pag-usab. Walay makakuha niini gikan kanako, apan ako naghalad niini sa akong kaugalingon. Aduna akoy gahom sa paghalad niini, ug aduna akoy gahom sa pagdawat niini pag-usab. Mao kini ang sugo nga akong nadawat gikan sa akong Amahan."

Ang Ebanghelyo sa Ginoo.

KATILINGBANONG PAG-AMPO

Abril 21, 2024

Pari: Mag-ampo kita karon ngadto sa Dios, ang misagop kanato pinaagi ni Cristo, ang Maayong Magbalantay. Atong ipadangat Kaniya ang tanan natong panginahanglan. Diha sa mapaubsanong kasingkasing, kita moingon:

JESUS, MAAYONG MAGBALANTAY, DUNGGA KAMI.

1. Nga si Papa Francisco, mga obispo, kaparian, mga diyakono ug mga relihiyoso, mahisama unta kang Cristo, ang Maayong Magbalantay, mamahimong andam mohatag sa kaugalingon diha sa pag-alagad sa iyang panon. Mag-ampo kita sa Ginoo.

2. Nga ang mga lideres sa panggamhanan, makasinati sa mga hiyas ni Cristo isip Maayong Magbalantay aron mapaambit usab nila kini sa ilang mga panon. Mag-ampo kita sa Ginoo.

3. Nga niining World Day of Prayer for Vocations, ang atong mga kabatan-onan makadawat og kasingkasing nga mopatalinghug sa tawag ug mando sa Diyos ngadto kanila. Mag-ampo kita sa Ginoo.

4. Nga ang mga nahisalaag sa ilang kinabuhi, gikapuyan tungod sa kawad-on ug sa sakit, makakaplag sa dalan padulong sa Maayong Magbalantay ug makadawat og kahupayan. Mag-ampo kita sa Ginoo.

5. Nga ang mga mihalad sa ilang pagdayeg ug pasalamat sa Ginoo ilabina nila ___ malig-on diha sa ilang pagsalig ug pagtoo ngadto kaniya. Mag-ampo kita sa Ginoo.

6. Nga ang mga kalag sa atong igsuong nangamatay ilabina sila ___ dawaton na sa Ginoo didto sa iyang Gingharian. Mag-ampo kita sa Ginoo.

Pari: Amahan nga Makagagahum, itugot nga ang tinuoray ug kanunay nga kalipay among masinati pinaagi niining mga misteryo sa Pasko. Hatagi og katumanan ang among mga pag-ampo pinaagi ni Cristo among Ginoo ug Manluluwas. Amen.