IKAWALO NGA NOVENA

Ikalimang Domingo sa Kwaresma

Ikawalo ka adlaw sa Novena

PASIUNA

Marso 17, 2023

Maayong buntag mga igsuon diha ni Cristo.

Karon mao ang Ikalima nga Domingo sa Kwaresma ug Ikawalo nga adlaw sa Novena alang sa atong mahal nga Patron Sr. San Jose esposo ni Maria.

Diha sa unang pagbasa nga gikuha gikan sa Basahon ni Propeta Jeremias atong madungog nga ang Ginoo maghimo og bag-ong kasabutan ug ibutang kini Niya sa ilang kaisipan ug isulat sa ilang kasingkasing.

Ang ikaduhang pagbasa gikan sa Sulat ngadto sa mga Hebreo, nagkanayon, “Sanglit nahingpit man siya, nahimo siyang tinubdan sa dayon nga kaluwasan alang sa tanan nga masinugtanon kaniya.”

Ug diha sa Santos nga Ebanghelyo sumala ni San Juan, atong madungog nga si Jesus miingon, “Ug kon ako ibayaw na gikan sa yuta, kabigon ko ang tanan nganhi Kanako.”

Palihug manindog alang sa pagsugod sa Santos nga Eyukaristiya.

Salmo Responsoryo:

        Linisi ang akong kasingkasing, O Dios.

Katilingbanong Pag-ampo:

     Amahan, dungga ang among pag-ampo.

BASAHON I

Jer. 31:31-34

KINUTLO GIKAN SA BASAHON NI PROPETA JEREMIAS

Nag-ingon ang GINOO, "Taliabot ang panahon nga maghimo akog bag-ong kasabutan uban sa katawhan sa Israel ug sa Juda. Dili kini sama sa kasabutan nga gihimo ko uban sa katigulangan nila sa dihang dala ko sila gikan sa Ehipto. Wala nila tumana ang maong kasabutan bisan ug ako ang ilang GINOO. Ako, ang GINOO, ang nagsulti niini. Inig-abot niadtong panahona, mao kini ang kasabutan nga himoon ko uban sa katawhan sa Israel: ibutang ko ang akong sugo sa ilang kaisipan ug isulat ko sa ilang kasingkasing. Ug mahimo ako nga ilang Dios ug sila akong katawhan. Ako, ang GINOO, ang nagsulti niini."

"Dili na kinahanglan nga tudloan ang usa ka tawo sa iyang katagilungsod bahin sa pag-ila sa GINOO. Kay silang tanan makaila na man kanako, gikan sa labing timawa ngadto sa labing inila. Pasayloon ko ang ilang mga sala, ug dili ko na hinumdoman ang ilang mga kasaypanan. Ako, ang GINOO, maoy nagsulti niini."

ANG PULONG SA GINΟΟ.

SALMO RESPONSORYO

Ps. 51:3-4, 12-13, 14-15

R. Linisi ang akong kasingkasing, O Dios. 

Kaloy-i ako, O Dios, diha sa imong kaayo; sa kadako sa imong kaluoy papasa ang akong kalapasan.

Hugasi akog maayo sa akong kasaypanan ug linisi ako sa akong kasal-anan.

R. Linisi ang akong kasingkasing, O Dios.

Usa ka malinis nga kasingkasing gamaa dinhi kanako, O Dios, ug usa ka makanunayong espiritu bag-oha sulod kanako.

Ayaw ako isalikway sa imong atubangan, ayaw kuhaa kanako ang imong balaang espiritu.

R. Linisi ang akong kasingkasing, O Dios.

Ibalik kanako ang kasadya sa imong kaluwasan, ug padayona dinhi kanako ang maayong espiritu.

Tudloan ko ang malapason sa imong mga dalan, ug ang mga makasasala mamalik kanimo.

R. Linisi ang akong kasingkasing, O Dios.

BASAHON II

Heb. 5:7-9

KINUTLO GIKAN SA SULAT NI SAN PABLO NGADTO SA MGA HEBREO

Sa dinhi pa siya sa kalibutan, nag- ampo ug nangaliyupo si Jesus uban sa makusog nga pagtuwaw ug mga luha ngadto sa Dios nga may gahom sa pagluwas kaniya sa kamatayon. Tungod kay mapaubsanon ug buotan man siya, gidungog siya sa Dios. Apan bisan siya mao ang Anak sa Dios nakakat-on siya sa pagkamasinugtanon pinaagi sa iyang mga pag-antos. Sanglit nahingpit man siya, nahimo siyang tinubdan sa dayon nga kaluwasan alang sa tanan nga masinugtanon kaniya.

ANG PULONG SA GINOO.

EBANGHELYO

Jn. 12:20-33

Kinutlo gikan sa Balaan nga Ebanghelyo sumala ni Juan

Dunay pipila ka mga Griyego nga ming-ubàn sa mga mingtungas D aron pagsimba sa pangilin. Mingdúol sila kang Felipe nga taga-Betsaida sa Galilea ug gihangyo nila siya sa pag-ingon, "Ginoo, buot namong makítâ si Jesus."

Milakaw si Felipe ug nakigsulti kang Andres.

Milakaw si Andres ug si Felipe ug nakigsulti sila kang Jesus.

Si Jesus mitubag kanila sa pag-ingon, "Miabòt na ang takna aron ang Anak sa Tawo himayaon. Amen, sa pagkatinuod sultihan ko kamo, gawas kon ang lugas sa trigo mahulog sa yuta ug mamatay, magpabilin kini nga usà ra. Apan kon mamatay kini, mamunga kini og daghan. Ang mahigugma sa iyang kinabuhi, mawad-an niini; apan ang magdumot sa iyang kinabuhi dinhi sa kalibotan, magpatunhay niini hangtod sa kinabuhing dayon. Ang buot mag-alagad kanako mosunòd kanako ug hain akò, didto usab ang akong sulugoon. Ang Amahan magpasidungog kaniya nga mag-alagad kanako.

"Karon ang akong kalag nabalaka, ug unsay akong isulti, 'Amahan luwasa akò niining taknaa?' Apan tungòd niini miabòt akò niining taknaa. Amahan, himayaa ang imong ngalan."

Ug adunay tingog gikan sa langit,

"Ákô nang gihimaya ug himayaon ko pag-usab." Ang katawhan nga nagbarog ug nakadungog miingon, "Nagdalugdog."

Apan ang ubàn miingon, "Usa ka anghel nakigsulti kaniya."

Mitubag si Jesus ug miingon,

"Kining tingog nadungog dili alang kanako, apan alang kaninyo.

Karon na ang paghukom niining kalibotan, karon ang magmamando niining kalibotan ilábay sa gawas.

Ug kon akò ibayaw na gikan sa yuta, kabigon ko ang tanan nganhi kanako."

(Giingon niya kini aron pagpasabòt unsang matang sa kamatayon ang iyang pagkamatay.)

Ang Ebanghelyo sa Ginoo.

KATILINGBANONG PAG-AMPO

Marso 17, 2024

Pari: Mga igsuon, uban sa mapaubsanong kasingkasing ug hunahuna, ipadangat nato karon ngadto sa atong Langitnong Amahan, ang tuburan sa pasaylo ug gugma, ang atong mga panginahanglan diha sa pag-ingon: AMAHAN, DUNGGA ANG AMONG PAG-AMPO.

1. Alang kang Papa Francisco, mga obispo, kaparian ug ang tanang gikonsagrahan sa Simbahan, pinaagi sa lamdag sa Espiritu Santo makabig ngadto kang Cristo ug mamahimong maayong sumbanan sa tanang katawhan sa pagsunod Kaniya sa tanang panahon. Mag-ampo kita sa Ginoo.

2. Alang sa mga opisyales sa gobiyerno ug ang ilang mga kaubanan, makadawat unta og limpyo ug lig-on nga kasingkasing aron andam nga modawat ni Cristo sa matag higayon nga pagserbisyo sa katawhan nga ilang gialagaran. Mag-ampo kita sa Ginoo.

3. Alang sa mga wala miila sa Ginoo ug wala mituman sa lyang kasabutan, mapasaylo sa ilang mga sala. Mag-ampo kita sa Ginoo.

4. Alang sa matag pamilya ilabina ang mga nagkagubot, niining panahon sa Kwaresma, makasinati unta sa grasya sa pagpinasayloay ug paghinigugmaay sa matag usa. Mag-ampo kita sa Ginoo.

5. Alang sa mga tigulang, masakiton, kawad-on sa kinabuhi, ug biktima sa nagkalain-laing inhustisya, hupayon sa Dios sa ilang kagul-anan ug lig- onon sa kanunay. Mag-ampo kita sa Ginoo.

6. Alang sa mga nagadayeg ug nagapasalamat sa Ginoo ilabina nila ______ makaangkon og malipayong kasingkasing ug mopaambit niini sa mga nanginahanglan. Mag-ampo kita sa Ginoo.

7. Alang sa mga minahal sa kinabuhi nga nangamatay ilabina sila _______ dawaton na sila sa Paraiso nga gitagana kanila sa Dios Amahan. Mag- ampo kita sa Ginoo.

Pari: Amahan nga maluluy-on, nahalad na namo ang among mga pangaliyupo ug malaumon kami nga Imo kining dunggon pinaagi ni Cristo among Ginoo. Amen.