IKALIMA NGA NOVENA

HUWEBES

SA IKAUPAT NGA SEMANA SA KWARESMA

PASIUNA

Marso 14, 2024

Mga igsoon ko diha ni Cristo maayong gabii kaninyong tanan.

Karon Huwebes sa Ikaupat nga Semana sa Kwaresma ug ika-lima nga adlaw sa Novena alang sa atong mahal nga Patron Sr. San Jose esposo ni Maria.

Palihug manindog alang sa pagsugod sa Santos nga Eukaristiya..

Salmo Responsoryo:

"O Ginoo, hinomdomi kami, tungod sa gugma nimo sa imong lungsod."

Pangaliya sa Katawhan:

AMAHAN, TABANGI KAMI SA KAKULANG SA AMONG PAGTUO.

BASAHON I

Ex. 32.7-14

Kinutlo gikan sa basahon sa Exodus.

Miingon ang Ginoo kang Moises, "Hala, pagdalig lugsong, kay ang imong katawhan nga gipagawas mo sa Ehipto nagpakaulaw sa ilang kaugalingon. Dali ra silang mitipas sa dalan nga palaktan ko unta kanila. Naghimo sila alang sa ilang kaugalingon ug usa ka nating baka sa tinunaw nga bulawan ug nagsimba niini, ug naghalad silag mga sakripisyo alang niini. Miingon sila, Israel, mao kini ang imong Dios nga nagpagawas kaninyo sa Ehipto." Ang Ginoo miingon kang Moises, "Na- sayod ako nga tig-ag kasingkasing kining maong katawhan. Karon, pasagdi ako nga laglagon ko sila sa nagdilaab kong kasuko. Unya himoon ko ikaw ug ang imong kaliwatan nga usa ka dakong nasod."

Apan si Moises nangaliyupo sa Ginoo nga iyang Dios, ug miingon, "Ginoo nganong pasilaobon mo man ang imong kasuko batok sa imong katawhan nga giluwas mo gikan sa Ehipto pinaagi sa dako mong gahom? Makaingon unya ang mga Ehiptohanon, nga gipagawas mo diay sa Ehipto kay buot mo silang patyon didto sa kabukiran ug aron mapuo sila. Ayaw na intawon ipadayon ang imong kasuko; ug ayaw intawon pahamtangi sa katalagman ang imong katawhan. Hinumdomi ang imong alagad nga si Abraham, si Isaac, ug si Israel, ug ang gisaad mo kanila, ug gipanumpaan mo sa imong ngalan. Miingon ka kanila, "Pasanayon ko pag-ayo ang imong mga kaliwat sama ka daghan sa mga bituon sa kalangitan. Ihatag ko sa imong mga kaliwat kining tanang yuta nga akong gisaad ug mapanag-iya nila kini hangtod sa kahangtoran." Busa wala ipadayon sa Ginoo ang nahunahunaan nga buhaton ug wala niya pahamtangi ang iyang katawhan sa katalagman nga iyang gisaad.

Ang Pulong sa Ginoo.

SALMO RESPONSORYO

Salmo 106.19-20.21-22.23

R. (4) O Ginoo, hinomdomi kami, tungod sa gugma nimo sa imong lungsod.

Ang atong mga katigulangan naghimog baka didto sa Horeb ug nagsimba sa usa ka larawan nga tinunaw; ilang gibaylo ang ilang himaya sa larawan sa usa ka toro nga mokaog balili.

R. O Ginoo, hinomdomi kami, Tungod sa gugma nimo sa imong lungsod.

Unya naghisgot siya sa pagpuo kanila, apan si Moises, ang iyang pinili mibarog aron pagpangamuyo alang kanila aron pagpuypoy sa iyang makalaglag nga kapungot.

R. O Ginoo, hinomdomi kami, Tungod sa gugma nimo sa imong lungsod.

EBANGHELYO

Jn. 5. 31-47

+Ang Santos nga Ebanghelyo sumala ni San Juan.

"Kon ako magpamatuod mahitungod sa akong kaugalingon, ang akong isulti dili dawaton nga tinuod. Apan may lain nga nagapamatuod mahitungod kanako, ug ako nasa- yod nga tinuod ang iyang gisulti bahin kanako. Gipadala ninyo ang inyong mga sinugo ngadto kang Juan, ug siya misaksi mahitungod sa ka- matuoran. Hinuon wala ako magkinahanglan sa pagpamatuod sa tawo; gisulti ko lamang kini aron kamo maluwas. Si Juan sama sa suga nga nagasiga ug nagadan-ag ug gikalipay ninyo ang pagpahimulos ug makadiyot sa iyang kahayag. Apan may nagapamatuod mahitu- ngod kanako nga gipadala ako sa Amahan. Ug ang Amahan nga nagpadala kanako nagapa- matuod usab mahitungod kanako. Wala kamo makadungog sa iyang tingog, ug wala ninyo makita ang iyang nawong; busa ang iyang mga pulong wala magpabilin diha kaninyo, kay wala man kamo motuo sa iyang gipadala. Kamo nagatuon sa Kasulatan kay gituohan man ninyo nga diha kanila makakaplag kamo sa kinabuhing dayon. Ug sila mismo nagapamatuod mahitungod kanako. Apan kamo dili buot moari kanako aron unta makabaton ka- mog kinabuhi.

"Wala ako magkinahanglan nga daygon sa mga tawo, Apan ako nasayod kaninyo; nasayod ako nga wala kamo mahigugma sa Dios. Ako mianhi sa ngalan sa akong Amahan, apan ako wala ninyo dawata; kon may moanhi hinuon sa iya lamang kaugalingong ngalan, siya inyong dawaton. Gusto kamo nga daygon sa inyong isigkatawo, apan wala kamo maninguha nga daygon sa bugtong Dios; busa unsaon man ninyo sa pagtuo? Apan ayaw ninyo huna- hunaa nga isumbong ko kamo sa akong Amahan; si Moises nga maoy inyong gilaoman maoy magasumbong kaninyo. Kon kamo mituo pa gayod kang Moises, motuo usab unta kamo kanako, kay siya nagsulat man mahitugod kanako. Apan sanglit wala man kamo motuo sa iyang gisulat, unsaon man ninyo pagtuo sa akong gisulti? "

Ang Ebanghelyo sa Ginoo.

PANGALIYA SA KATILINGBAN

Pari: Sa makadaghan nga higayon wala kita makasubay sa pamaagi sa Ginoo. Mangayo kita kaniya sa kusog nga atong mapuy-an ang kinabuhi sa pagtuo. Masaligon kita sa pag-ingon: AMAHAN, TABANGI KAMI SA KAKULANG SA AMONG PAGTUO.

Nga ang mga nangulo sa simbahan mahimo unta nga hingpit nga mga saksi sa gugma ug kaluoy sa Dios. Mag-ampo kita.

Nga ang mga naghupot og pangatungdanan sa gobiyerno isalikway ang tinguha sa kaugalingon nga kahakog aron mamahimong gawasnon sa pag-alagad sa katawhan. Mag-ampo kita.

Nga ang mga kabus, mga masakiton, ug mga hinikawan sa maayong panglawas mabati ang gugma sa Dios pinaagi sa mga tawo nga nag-atiman kanila. Mag-ampo kita.

Nga kadtong midayeg ug mipasalamat sa manggihatagong Dios, ilabina sila _______ hatagan unta sa mga grasya nga ilang gikinahanglan. Mag-ampo kita.

Nga ang mga nangamatay ilabina nila _____ makaabot sa ilang walay katapusang puloy-anan didto sa langit uban ang atong Langitnong Amahan. Mag-ampo kita.

Pari: Langitnong Amahan, lamdagi kami pinaagi sa Balaang Espiritu aron bukas kami nga makapadayag sa among pagtuo pinaagi ni Cristo among Ginoo. Amen.